lundi, octobre 15, 2007

يوم الجلاء من الماء


عدّيت حياتي و انا و الطبعة للعنكوش أنزقزق من قلتة لقلتة انّقز في حفر الزيقوات و أنا تقولش عليا انديانا دجونس في زمانوا و كنت ديما متقبّل هالأمر كيف ما يتقبل أنسان ما قبل التاريخ أن دينصور و الا هايشة تاكلو اخوه و الا مرتو.

و نهار من نهارات لقيت روحي في باريس و المطر عاطية ما عندها نصف ساعة , ساعة , ساعتين و هي تجبد حتى لين وجهي صفار : في بلادي في نصيّف ساعة تاكل بعضها و تولي ما تلقى كيفاش تتعدى. بعد ما وفات المطر قلت خلي نمشي نتفرّج في باريس و هي تشطح في الماء و القلت و الطباعي. خرجت, قطرة ماء في الشارع ما فمّاش !

تعجّبت, و أوّل ما رجعت للبلاد قعدت نسأل في المسئولين و المهندسين في تصريف الماء. الكلهم عملوا تجاهي نفس ردة فعل : خزرولي خزرة تهكّم مفادها "ما أخص عقلك" و جاوبوني ببساطة و تبسيط : " يا ولدي في فرانسا تصب المطر بغزارة في كل الوقت, هذاكا علاش وقت الي الفرنسيس عملوا تخطيط تصريف المياه عملوه تصريف لكميّات ضخمة رغم أنه يتكلفلهم غالي برشة , أمّا في بلادنا , و حسب التحاليل المناخية, المطر شديدة الغزارة ما تصب كان مرة في الفال يعني كل خمس و الا عشر سنوات و لذا وقت الي عملنا تخطيطنا لتصريف المياه تجاهلنا عمدا الكميات الغزيرة التي تعتبر استثنائية و عملنا تجهيز ضريّف و ما يتكلفش برشة تلافيا منا للتبذير".

حكّيت راسي وقتها و جاوبت ببداهة : " ايه و نفرضو أن هالك المطر الي تجي مرّة في الفال جات ! موش تعمل خسائر و تهلك هاك التجهيزات الضريفة ؟"

عاودو خزرولي بتهكم و استخفاف و قالوا : " صحيح تصير خسائر و ضرر مادي, لكن ديما تقعد خسائر هامشية و تتصلح و أقل بكثير من أننا نخسروا في تجهيز البلاد الكل تجهيز ضخم ما يتمشاش مع طقسنا "

برا يا زمان و ايجا يا زمان و تعمل هكة البلاد الكل تفيض, قلت في قلبي "اه هاذي هي المطر الي حكاولي عليها و الي ما تجي كان مرة في العشرة سنين". العام الي بعدو روبلوط عاودت فاضت. قلت : "صدفة". العام الي بعدوا تتعاود الحكاية مرتين وراء بعضهم و عام السنة مازال الشتاء ما دخلش و البلاد غرقت مرتين.

بلادنا, يا جماعة, بدات في التخطيط لتصريف المياه و التصرّف في الأمطار منذ الاستقلال ( خذات المشعل على المستعمر الفرنسي الي اليوم نحتفلوا بذكرى ال44 لرحيلو من ترابنا) يعني منذ أكثر من نصف قرن. و وقتها عملت تخطيط على قد الجهيّد و حسب المعطيات وقتها يعني حسب الظروف المادية للبلاد في هاك الفترة و الدراسات المناخية الي عملوها جدودنا.

الي انّجموا نشيروا اليه لهنا- و الي ما يخفاش عالناس الكل- أنه أولا بلادنا تبارك الله ظروفها المادية تفرهدت بالقدا مقارنتا بحالتنا فجر الأستقلال. و ثانيا أن الظروف المناخية العالمية تبدلت بطريقة كبيرة و بعدت كل البعد عن مناخ بلادنا في وسط القرن الماضي. و السؤال الي يتطرح هو : هل أن سياسة التجهيز و التصرف في الماء تبدلت في بلادنا منذ ذلك الوقت مراعيتا التطورات الجديدة ؟ الجواب هو "لا".

ولاّت يا جماعة هاك المطر الي زعمة "تجي مرة في الفال" تزورنا في السنة مرة على الأقل و تحطم و تكسّر و تهلك و تقتل. فهل أن هذه النوعية من الخسائر يمكن أن تكون "استثنائية" و تعتبر خسائرها أقل من قيمة التجهيز ؟ كم تسوى روح بشرية بالنسبة للمسئولين عن هذه التخاطيط ؟ كان يعتبروا أن "الضغط على المصاريف" في تهيئة البلاد يتكلف خير من تلافيهم مقتل المواطنين الأبرياء ...سامحني فيهم.

مشكلتنا يا جماعة أننا ستانسنا بالنوم العميق و السبات و عدم تحمّل المسئولية : كان ولد صغير فقد لعبته نقولولو "هزتها الهبّة" , كان فريقنا المفضّل خسر راهوا من "العوامل الجوية" و كان البلاد غرقت راهوا من "الكميات الغير منتظرة من الأمطار" !

وقتاش نتعلموا نجابهوا رواحنا و ناخذوا المسئولية باش نتلافاو كوارث كيف هذية ؟ وقتاش انجموا نسمعوا أن مدير ديوان الرصد الجوي اجتمع بالمهندسين في ديوانه للبحث كيفاش يطوروا طرقهم لا للرصد فقط بل لإيصال المعلومة للمواطن و جعله يتخذ الحذر ؟ ما وصلناش الطلب من هؤولاء بالاعتذار الرسمي لتقاعسهم...فقط الدراسة !

وقتاش نسمعوا بتخطيط عمراني واضح لبلادنا تكون فيه نضرة شاملة لبلادنا بعد عشرة سنين وعشرين سنة و خمسين سنة و التطوّر من عشرية لعشرية ؟ وقتاش نتلهاو بتهيئة العمران و نحدوا من البناء العشوائي الغير مدروس و نعملوا حساب مجاري الوديان و التوبوغرافيا و الجغرافيا ؟

وقتاش البلديات تطوّر خدمتها و ما تقتصرش على قباضة تدفع فيها الضرائب البلدية و وقتاش جماعة البلدية يوقفوا توزيع رخص البناء عشوائيا ( بالمعارف) أو دون دراسة ؟ وقتاش تولي تتعامل البلدية مباشرتا مع المواطن اليد في اليد لايجاد حلول فعلية للمشاكل و البعد كل البعد عن اللغة الخشبية ؟

وقتاش ندربوا فرق الأمن متاعنا و الحماية المدنية على حالات طوارء كيف ما هاذي و تكون تدخلاتهم ما تقتصرش نهار الي يفوت فيه الفوت بل قبل ذلك بالنصح و التوجيه السليم الفعّال ؟

وقتاش صحافتنا تنسى المقالات البودورو و تعمل محاسبة عسيرة على كل من يتقاعس على عمله أو على خدمة البلاد ؟

وقتاش وسائل الاعلام تعمل دورها و تنسينا في الحملات التافهة متاع زوز فرنك الي نشوفوها على شاشتنا و قتاش نتعلموا نهوّنوا على كل الحملات التحسيسية و متابعة ردودها على المواطن متابعة علمية و أحصائية ؟

وقتاش يفيق المجتمع المدني و يعمل نشاطات و نوادي و ائتلافات وطنية تعتني بالمواطن المنكوب (بكارثة أو بغير كارثة) و تساهم مساهمة حقيقية و تسعى لتلافي المشاكل لبلادنا بعيدا عن كل الحسابات الشخصية.

وقتاش وزارة التجهيز تفهم أن بلادنا بلاد تسعى للتطوّر و أنه اذا نحبوا المستثمرين يجيو يحركوا العجلة الأقتصادية في البلاد ما يساعدهمش يعيشوا في الزيقوات و في الخرى للعنكوش.

و قتاش يفهموا المسؤولين أنه كل تطور في البنية التحتية يحتّم تطوّر في البنية الفوقية و في قيمة العيش و يحرّك الأقتصاد و يساهم في ثقافة العباد و ينمي الانتليجنسيا و ينقص من مشاكل النقل و التنقل الي هي بيدها تعطي أضعاف هذه التطورات ؟

وقتاش نتحملوا المسئولية يا جماعة و نتعلموا نحاسبو أرواحنا ؟ وقتاش نتبدلوا و نخطو خطوة في درب التطوّر ؟ وقتاش ؟؟؟


22 commentaires:

Sonya a dit…

ابدعت كالعادة ياقوفرنور.... شكرا

explosiv a dit…

"wa9tech...wa9tech...wa9tech...?"
pour moi, avec ce que je vois, c'est "wa9telli yen8a9 el bhim fel b7ar" w chouf w chouf...
allah yer7am8om w barra :'(

ETC...ثم a dit…

يعطيك الصحة ،هكة، قمت بواجبك في ابداء رأيك ، و إلي يظهرلي رأي سديد موش كيما الملف متاع تونس 7 البارح

Anonyme a dit…

Tant que personne n'est blamé surveillé, tant que les plus hautes autorités s'en foutent ... tant qu'il n'y aura pas des décisions efficaces (mouch el foutrage de gueule au journal de 20h) ...

Si ca continue je vais demander le droit d'asile au normaland ... ou normal

L'AsNumberOne a dit…

wa9tech???... N'har le5mis fessif.

Anonyme a dit…

الله غالب خلط امخر سيدي الرئيس
والسوهالات صعاب برشة
اتنجمش تعطينا احتمالات
هههههه

Anonyme a dit…

Et j'ajoute ...
Samedi 13 Octobre (journée noire pour plusieurs foyers): Journée internationale de la prévention des Catastrophes Naturelles !!!
N'est-ce pas ironique?! Non.. pardon... pour chanter à la même mesure, comme on dit, que nos Con-citoyens responsables...je dirai: fatidique!!!

Gouverneur de Normalland a dit…

@ sonya :

شكرا سنية لكلماتك و مجهوداتك الكبيرة في "يوم الجلاؤ من الماء" و ما بعدها

Gouverneur de Normalland a dit…

explosiv :

كان جات الحكاية مرهونة في بهيم نلبسوه مايو و نعوموه ...مش مشكل ...أما الأمور معقدة أكثر من هكة بكثير

:)

Gouverneur de Normalland a dit…

@fouzi :

شفت ماهو هاك المهزلة ؟ يسميوها في تونس "ملف" و هو بلوف...الشي الي يضّك أنو هالنوع من البرامج في الصيغة هذية انقرضت من عام 60 في العالم أجمع...قعدلنا مان أحنا ملفات معبية بالغبرة

Gouverneur de Normalland a dit…

@samitriani :

يا خويا ايجا لنورمالاند ولا يهمّك

ما صاب أخبار ال8 في تونس يعملوهم ال7.30 باش يكونو المذيعين فايقين شوية ...ابارامون يرقدوا بكري و مع الثمنية يبدى يكب فيهم النوم

Gouverneur de Normalland a dit…

@ lasnumberone :

أنا , حسب الانباء الي عندي , مش الخميس في الصيف...يضهرلي في الخريف...نسيت اربعاء و الا خميس أما يصادف نهار 7 في الشهر

;)

Gouverneur de Normalland a dit…

@ arabicca :

عندك احتمالين

1- تستحفض بالصندوق

2- تقبل باش تهرّس سامي الفهري بطريحة

Anonyme a dit…

إنت يا ولد
لازمك تصنع تـــــــــــــــــــــيتانيك كبيرة ! متع ثم ثم
إتكون ديمه حاضرة ....على و عسى ...إتصبش مطرة أخرى ....على الأقل العالم إقول ...الناس ماتت في محاولة إنقـــــــــــــــــاذ ...موش بلعتهم الرّقارات ......و حتى كان تيتانيك دخلت في الأفريكا ...إنقولو ...الشوفير ناقص نضــــــــــر ...حتى الهم عند فيه ما تختار ...حكاية البلدية و الزيقووات...راهي ما هيش باش تصّلح لا السّنه و لا العام الجاي و لا في السنين الجاية ....بوها ..يعرف كان ....بيع لا قعد ...بيع يا ولد ...بيع لا ترحم الكـــــلاب
الي تحكي فيه بــــــــــكلّو معقول في بـــــــــلاد نورمال لـــــــــــند موش في بـــــــــــلاد
قعبج لنـــــــــــــــد
هاكي البــــــــــــــلاد ...لازمها تتعاود من جـــــــــديد ...و كان إلزم ب Mutation

و كان ما نجّمتش روحك ...قولي ..موش مشكل نعطيك قرض باش تنقذ ما يمكن إنقاذه

kacem

Gouverneur de Normalland a dit…

@Yotill :

je ne le savais pas !! malla ironie du sort ! bienvenu dans ton pays virtuel normalland si yotill !

Gouverneur de Normalland a dit…

@Kassem : mar7bé bsi 9assem ! winek ya rajel ?

oui ena je parle de Normalland rahou ? pourquoi ? tu parles d un autre pays enti ? :p

Anonyme a dit…

سيدي الرّئيس ...لاباس ...على الكيف
حابسة و ترمكي
كي تكسي الغــــــــــرام

بلادك نورمالنـــــــــــــــــــد هذيك ...راهي عندها حدود فوقية ! جاية بالعربي فوق بلاد أخرى إسمها : قعبج لند ! و قت الي صبت المطر في بـــــــــلادك ...الماء بأكلو هبط على قعبج لند ! كانكم أنتوما غرقتو مالا أش إتقول علينــــــــــــــــا ...تعمل إمزية ...شوف حل للسطوحات متاعك ! و الزيقوات و الرّقارات ...راهي قعبج لند ! باش تدخل في حالة طـــــــــــــوارء !


kacem

Gouverneur de Normalland a dit…

@Kacem :

يا خويا أحكي مع السنديك أحنا كل شهر نخلصو فيه سي السنديك و هو ماشي يشيّخ في روحو بهاك الفلوس في عوض يصلّح الشقوق و يبدل الميزاب...و كان باش يكمّل هكة الباطيمة الكل باش اتطيح فوق روسكم

Anonyme a dit…

1- أنا بالعربي ...بالسّوري ...بالي إتحب ..راني طابها عليـــــك ! أه ! على شرط واحد إتنحـــــــــي البرتكــــــــــــــان ! شوف كيفاش ! إتنجم إتجيب معاك المدوّنين الكـــــــــــل و خاصة منهم الصّحاح ! في الواقع أنا نقرالهم الكـــــــــــل ، بدون إستثاء ! ....و إظرب سداستك في خمساتك و كل واحد منهم ...يكتب نص واقعي ...على أي موضوع يعجبو ..و بأي لغة ...و نعملو مسابقة ...أحسن نص يطلع على النات ...نعطوه حاجة ...يقد يذكر فيها طول حياتـــــــــو! النصوص الكل تتنشر في نهار واحد و على المدّونات الكل في أن واحد....

2- أنا ما عنديش بلوق ...إكريلي حتى ربع صفحة ...توه إنشوف كيفاش إنخلّصك ...هك إتشوف ..المطر ما خــــــــلاّت شئ ! ربي هز متاعو ...

3- و هذه هدية من عند قاسم ...لمدونتك ...بمناسبة تصليح البنية التحتية الي باش إطيح على راسي !


كان زمــــان

و كانت أيـــــام
كــــــان الحب فيهـــــا ديـــــنا
و كان الكــــلام فيهــــا شعرا
وكــــان الغزل
وكـــــــانت زينب في السابع عشر
***
وكنت صغيرا، كأوراق الشجر
كالحلم، كالربيع،
كنت صلبا
كالنقش على الحجر
***
و حين نزل المطر،
كبرت كالحلم، كالعشب ربيعا
في ديار الغجر.
**
على أرض ليست بــــــــأرضي
يكبر الفكر ...يطول ...يتيّسع
يغوص في أعماق البحار...يجوب الصحاري
يرتوي العقل
ينبت عندهم كـــــــل الأمل
**
و حين نزلت على أرضي
لم أنم و لا نام الألم
عندنا
يكبر الشوك ...يتسّع الشرخ
يضيق العقل
تجرّم الأيـــــــات
فيجهض بين يدينا هذا الوطــــن


kacem

Gouverneur de Normalland a dit…

1- ماناش في مسابقة "بين المدارس" باش نقعدوا نتعاندو اشكون يكتب "أحسن" كل واحد منا عندو أسلوبه و قلمه و مواضيع تخصه

2- مانا تحدّثنا فيه هالموضوع يا قاسم و قلت لك أعمل مدونتك الخاصة علاش تقعد تنشر في مدونات الغير بينما ما أسهلش من خلق مدوّنة ؟ علاش تحمّل الغير اراك و كلامك دون أن تسأل أو تتحرى هل أن صاحب الموقع يتبنى ما قلته أم لا ؟

على كل نشكرك يا قاسم على القصيدة الجميلة و نتمنى نشوفك خلقت مدونة و تكون من أكبر المدونين في هالبر.ه

Anonyme a dit…

1- ماناش في مسابقة "بين المدارس" باش نقعدوا نتعاندو اشكون يكتب "أحسن" كل واحد منا عندو أسلوبه و قلمه و مواضيع تخصه
2- الجواب : صحيح ماناش في مسابقة بين المدارس ! بل لازمها إتكون بين الجامعات ! و الحكاية ما هيش عناد و إشكون يكتب أحسن ! بل يا سيدي الرّئيس العملية تتجاوز المسابقة ...و القصد منها صناعة الفكر الجماعي ...خلق الحدث ...و إستشراق المستقبل!
و رغم الأوريجوناليتي متع كل مدّونة ! و أسلوبها و قلمها ! تبقى شجرة في غـــــــــــابة ...أنا إنشوف الي المحاولات الجماعية إتكون عندها إمتداد أكثر ....و نجاعة و نفاذ أكثر ....ما إتقوليش إنت عامل مدونة علاش ؟

2- مانا تحدّثنا فيه هالموضوع يا قاسم و قلت لك أعمل مدونتك الخاصة علاش تقعد تنشر في مدونات الغير بينما ما أسهلش من خلق مدوّنة ؟
ما عنديش وسعة البال ! و خاصة هاكي الميز أون باج ! و زيد منه و نقص من هوني ...و عاود ! المشكل الي قاسم ما هوش مدّون ! تخلق هكه ما إنجمش إكون مدوّن ...المدّون عندو شخصية متع مدوّن ...أنا ما نعرفش إدون ....نعرف نكتب ..

علاش تحمّل الغير اراك و كلامك دون أن تسأل أو تتحرى هل أن صاحب الموقع يتبنى ما قلته أم لا ؟
المدونة ...فضاء بيبليـــــك ..قهوة بالعربي صغيرة ! وقت الي سيادتك عارض سلعتك على الشارع ...لازمك تتحمل إشكون إقولك هذه إمظرحة و إلا باهية !!!! حكاية المسؤولية هذه أي مدّون لازمو أكون مسؤول موش كان على كتيبتو ...حتى كتيبة الزّوار متاعو ....إشنوه يتبنى و ما يتبناش ؟ إحب إفسّخ ..إفسّخ ! لا أكثر و لا أقــــــــــل ...

على كل نشكرك يا قاسم على القصيدة الجميلة و نتمنى نشوفك خلقت مدونة و تكون من أكبر المدونين في هالبر.ه

توه نكتب في فيلم جديد ...فيه جيش من الرّهبان ...حفاة عرات ...باش نهجم به على نورمـــــــــــالند ...وتي روحك ...بالحرام كان ما نفتحها من أين لا يعلمون .و حتى عبر المدّونات !!!!! وسع البال عندي إتقوا إسباس فيكتوريال .

Unknown a dit…

>>>>وقتاش نتعلموا نجابهوا رواحنا و ناخذوا المسئولية باش نتلافاو كوارث كيف هذية ؟ وقتاش انجموا نسمعوا أن مدير ديوان الرصد الجوي اجتمع بالمهندسين في ديوانه للبحث كيفاش يطوروا طرقهم لا للرصد فقط بل لإيصال المعلومة للمواطن و جعله يتخذ الحذر ؟ ما وصلناش الطلب من هؤولاء بالاعتذار الرسمي لتقاعسهم...فقط الدراسة !

@gouverneur : Ya sidi louken ta3rfou chkoun el président mta3 météo ma t9oul hal klem !
Barra emchilhom we juste as2el 3ala M. Moncef "Kahloucha" taw ye7kyoulek