lundi, mars 15, 2021

مالك قلبي

كيد العواذل كايدني بس إسمع شوف
دا انت مالكني من قلبي يا سيدي بالمعروف
يا مالك قلبي بالمعروف الحب كواني تعال شوف
حبك كواني تعال شوف
ستر العذول دايما مكشوف
ياما نسمع بكرا وبعده نشوف
وأنا بالصبر أبلغ أملي

يا مالك

 

 

ولدي مالك

 

اليوم عمرك بالضبط عامين ونصف. عندي ستة شهور من الي تحرمت منك وما شفتك في هالوقت الكل كان تلاثة او اربعة ساعات الكل في الكل. انا الي  كنت نتوحشك بين الدقيقة والدقيقة ... بين النفس والنفس. راني نحبك  رد بالك تنسى .. راني نحبك.

 

عامين ونصف التالي, عائشة كرشها على حلقها .. هبطت جبت تاكسي ومشينا نعملوا في تخطيط نشوفوا شنوة احوالك ونطمانوا عليك. كنا قررنا ان بش نسميوك مالك من مدة.  بالتفذليك, وقت الي كنت مازلت فكرة كنا نعيطولك "عبد الستار" .  من بعد , وقت الي الفكرة تجسدت نطفة في كرش امك. نتذكر الي عائشة عملتلي  مفاجاة  : عطاتني جواب حليته لقيت فيه ورقة مكتوب فيها : "عبد الستار غلب" .. كان احساسي وقتها مخلبز .. بين الفرحة والغبطة والفجعة من مسؤولية والنخوة .. أنا بش نولي اب ؟  وبديت تكبر في كرش امك .. وبدات احلامنا تكبر معاك. يوم 15 أكتوبر 2018 دخلت عائشة تعمل في تخطيت روتيني. وانا نستنى فيها اللوطة. قالولي انك دخلتها بعضها في كرش امك ووحلت في الكوابل الداخل ويلزمها تولدك باسرع ما يمكن.  مشيت نجري للدار جبت دبش امك ودخلت قصيت تسكرة طيارة لجدك لمين وجدتك دليلة في اول رحلة من جربة. رجعت نجري وكانت الولادة تمت. عيطتلي الفرملية ولقيتك تتبربص في الكوفوز. قالتلي ولدك في خطر ,, يلزمه اوكسيجان في اسرع ما يمكن .. وقالتلي انه هوما ما عندهمش الماكينة اللازمة لإنقاذك. جبت سيارة اسعاف وركبناك من تالي ومشينا نجريو للمستشفى بيك. وانا خارج من شباك سيارة الاسعاف نبعّد في الكراهب الي في طريقي .. بش نوصلوا وننقذوك. 

كان يومها يوم عيد الجلاء. وكنت مؤمن بيك ومؤمن انك بش تكون انسان صلب وحر وانك بش تقاوم وتخرج منها وما خابش ظني. كنت كل يوم نمشيلك وانت في المستشفى ونحكي معاك ونقلك قداش انا نحبك وقداش امك تحبك. ومن بعد نمشي لامك ونوصللها حبك ليها .. حتى لين تتمكن بش تعاود تشوفك. كانوا اربعة ايام صعاب ياسر. لكن كنت انت اقوى وروحنا مع بعضنا للدار. وتبدلت الحياة بيك. وولى ليها طعم ورونق لا مثيل له.

كنت عرفت امك عامين قبل ما انت تتولد. ما نعرفش كان ربي بش يعطيني الوقت بش نحكيلك حكاية شهرزاد وشهريار من حكايات الف ليلة وليلة .. أما على كل, علاقتي بعائشة تذكرني بالحكاية هذه : كنت تعديت بعلاقات عاطفية صعيبة مع نساء عرفتهم قبل ما نعرف امك ..هذا ما خلاني ناخذ قرار اني نسكر الباب  نهائيا وماعادش ندخل في حتى علاقة عاطفية مع حتى مرى. 

 بعد ما خذيت هذا القرار بيني وبين روحي كنت خرجت مع بنية طلبت مني اني نقوللها "نحبك". ما نجمتش لاني كان نقوللها نحبك ممكن نكون نكذب عليها ... وانا ما نحبش الكذب. المرى هذه سيبت الشر متاعها الكل عليا لاني رفضت اني نقول حاجة ما حسيتش بيها بصدق. برى يا زمان .. ايجا يا زمان تعرفت على عائشة. وكانت هي بيدها كيفي خارجة من علاقات متشعبة وصعيبة. ولّينا صحاب وبعد ولّينا عشّاق. كانت بعد الخدمة تجي بحذايا في استوديو اريانة وين كنت نسكن نضحكوا , نلعبوا , نحكيو ... والمرة هذه صارلي كيف ما صار لشهريار : حصلت. ولى وجودها يسحرني .. ويوم ورى يوم... ما نجمتش ما نقوللهاش اني نحبها. حاولت نشد روحي .. حاولت نقمع روحي. لكن خرجت الكلمة .. كيف شربة ماء باردة في الصيف. نحبك قلتلها . نحبك عاودتلها كل يوم .. كل ساعة .. كانت كلمة اقوى مني .. كيف الشهيقة تخرج .. بطريقة طبيعية  ولا شك فيها .. كيف وجود السماء.  


ياما انت واحشنى وروحى فيك

يا مآنس قلبي لمين اشكيك

أشكيك للي قادر يهديك

ويبلّغ الصابر أمله

أنا حالي ببعدك لم يرضيك

كيد العواذل كايدني بس إسمع شوف

دا انت مالكني من قلبي يا سيدي بالمعروف

 يا مالك قلبي بالمعروف الحب كواني تعال شوف

 

حتى حد ما يعرف علاش جاء في بالي انه نسموك مالك :  من احب الموسيقى ليا هي الادوار والمقامات الحلبية بصوت صباح فخري. نهار الي سمعت الي انت بش تجي... حسيت انك موجود وانك غمرتلي قلبي بالحب وملكته ..  حسيت ان حاجة تبدلت فيا. فتذكرت دور "كيد العواذل"بصوت صباح فخري وقت يغني ويقول "يا مالك قلبي"وكنت انت بالحق ملكت قلبي ..فكان الإسم جلي في مخي. وبما اني ديمقراطي اقترحته على امك وقعدنا مرشحينه كالإختيار الأول ... حتى لين هبطنا لجربة ومشينا نطلوا على خالتك هندة. قلنالها حسب رايك شنوة نسميوه. خزرت هندة لكرش امك وقالت بكل بساطة العالم "هذا مالك" ..فتأكدنا من اسمك


أحسن فترة في حياتي كانت بوجودك. وقت نغنيلك "في الحديقة ارنب" والا نحطلك غناياتك المفضلة ونغنيو معاهم. احسن شعور وقت نحطك في حجري ونعطيك تلون الحيوانات ونحكيلك عليهم وانت في غمري لاسقني وانا لاسقك. حاولوا يبعدوك عليا ..حاولوا يزيفوا معاني الحب ويزايدوا على حبنا لبعضنا. حبي ليك يا مالك قلبي كيف المطر .. تنجم ما تخرجش وقت تصب .. ينجموا يعملولك سحابة بش ما توصلكش. لكن شكون ينجم ينفي وجود المطر؟

 

نحبك مالك. ونحبك تكون متيقن ان وجودك كان عن حب. ان بوك حبك وحب امك .. وان حتى شي وحتى حد ينجم يقلل من حبي ليك وتعلقي بيك. انت احسن حاجة صارتلي في حياتي. ما تنساش. نحبك

 



 

jeudi, octobre 29, 2020

الثنية


لو كان دموعك حنوا عليا 
قبل ما نفوت شطر الثنية 
 ترابك كان مدفون في قلبي 
وقلبي كان بين عينيك .. هدية 
كان حضني ليك .. مطر تبخنس 
شعراتك فوق كتفي .. نوار عشية 
اه لو كان دموعك حنوا عليا

انا كنت الشوق وانت الطلٌة
سِمحة ... بٓهية 
كنت الشجرة وانت الغلة
 ..حلُوٌة مڨدية 
 كنت المسكن  وإنت الفٓلّة 
 نسمة حريٌة 
 غروا بيك والقسم على الله 
 وڨسموا في زوز الرئة 
 اه ..لو كان دموعك حنوا عليا 

كل خطوة نبعد .. ڨلبي يجمد 
نُلْڨف في روحك الي عايشة فيا
عيني تدمع وشاهي نمرد
مش قادر نكٓمٌل على رجليا 
كان جات تحبني علاش تخمم ؟
وعلاش ما نادتشِ عليا 
وتقلي ارجع بصوت مصمم 
انا ليك وانت ليا 
طالوا بيا خطوة وخطوة 
حتى وفات بينا .. الثنية 
 

حتى وفات بينا .. الثنية

vendredi, octobre 25, 2019

حكاية حزينة


حكاية حزينة
كيما عينيك من غير عينيا
كيف وجه  ولدي  
...  يتلفت ما يلقانيش
حكاية حزينة
كيما "ليلتك زينة"
وانا في بيت وانت في بيت
حكاية حزينة
كيف الدنيا بلا بيا
كيف الدنيا بلا بيك
حكاية حزينة
كيف شطحة طانقو غالطة
كيف أول بوسة عشاق
في تركينة ظلمة ..
وين يبولوا السكارى
حكاية حزينة
كيما فيروس ما يشاوركش
كيما مرض يجري في دمك
ويعاشر النفس .. لين يبطى ويخف
حكاية حزينة .. كيما دفينة
حكاية حزينة
كيما السكات ... وقت الي  يلزم الكلام
كيما الكلام .. وقت الي يلزم  السكات
كيما الغصة
كيما الدمعة الي تجمد في العين
حكاية حزينة
كيما أي حكاية اثنين
رجعوا واحد .. و ..واحد   

vendredi, avril 08, 2016

هيا .. عاودوا الحساب




يمضون الليلة في احصاء ذنوب غيرهم 
ولا يرون سوى ذنوب غيرهم
وامضي الليلة في احصاء شامات حبيبتي
ولا ارى سوى شامات حبيبتي

هل اقترفت في منظوركم ذنب؟
حسنا ... عاودوا الحساب.
استرقوا السمع في الابواب
لا تنسوا كدمة الرأس والجلباب
هيا ... عاودوا الحساب
اخرجوا طاولات القمار
هل سأسقط في الصراط
هل أنا مار؟
هيا تكهنوا ...
سينجو اراهن عشرون دينار
اربعون انه يرمى في النار
...
خمسون شامة
واغنية قديمة ... قدم البراءة
وألف ألف قبلة متبادلة
وعبق الحب
وألوان تغدق من القلب
وزخات قرنفل وياسمين
ومطر من الاوركيد
وألف ألف صلاة
للمحب السلام
الوهاب المنان
والصلاة على صاحب النور
مدخل السرور في الصدور
الشفيع يوم النشور
...
هل باطلة هذه الصلاة ؟
من يراهن يا شباب ... ؟؟
هيا ... عاودوا الحساب

vendredi, mars 11, 2016

صب صب يا المطر





صب صب يا المطرْ ... تونس تغسل و تتطهٌر
من وسخهم , من عفنهم, من الي رضع صدر البية
و قعد باير .. شي ما ثمر
... صب صب يا المطرْ



صب صب يا المطرْ ... تونس تغسل و تتطهٌر
برشة غل , ظلام و ذِل , برشة قلوب سوداء كحلْ
خاينين تايهين , متلاعبين بهموم الناس
متاجرين بأمور الدين ...
صب صب يا المطرْ



صب صب يا المطرْ .. تونس تبكي و تتقهرْ
على الي بلع ملح بحرها و على الي شرب ماء المطرْ
و ما قدٌرشي ميٌة و ملحْ .. و باقى يكنبن و يحفٌر
صب صب يا المطر



صب صب يا المطر .. عَلى أرضك كر و فرْ
امحي بيه دم الخاينْ .. ترابك صافي ما يتغرْ
اسقي ارضك دم البارْ ... الي استشهد حامي الديارْ
دمه يطهٌر الأنهارْ .. ينظٌف عرضك ما يتضر
صب صب يا المطرْ
  

samedi, février 20, 2016

أسبوع بعد هروب بن علي

نهار 22 جانفي 2011, بعد فوضى امنية وخوف كبير من عودة النظام القديم, بعد سقوط المزيد من الأبرياء ... بدات الأمور تهدى وتمشي في مسار سلمي.

التونسي ما فرحش بالثورة لأن قعد يده على قلبه ومستحيل يفرح مادام الأرواح تتساقط كيف الذبان.

خممت قلت إذا أحنا نحبوا فعلا نخطوا صفحة جديدة في تاريخنا وتاريخ الإنسانية , يلزم نحترموا قيمة الإنسان وقبل كل شي يلزم الذاكرة الجماعية ماتنساش شكون ضحى من أجل الحرية.

اذا ما نبنيوش المستقبل استنادا على تاريخ يحترم فكرة التضحية وفكرة النضال وفكرة قدسية الحرية ويجل الناس الي ماتت -في اي ضرف من الضروف- قبل و بعد 14 جانفي ما انجموا نعملوا شي.


أيا سيدي اطلقت فكرة تحرك لإحياء ذكرى الشهداء , و نظمت الحكاية وتفاعلوا معايا برشة ناس و توسعت الفكرة من وسط العاصمة الى جل أكبر البلدان في التراب التونسي.

كان يوم سبت نهارتها و التحرك حددته الساعة الرابعة بعد الزوال. وكان خذات الفكرة رواج كبير على الأنترنات. مع التلاثة ونصف نشوف مقابلني جماعة البوكت جاو تلموا قدام المسرح البلدي ويبداو يغنيو في اناشيد على طول صوتهم (و الفكرة متاع التحرك كانت ان الساعة الرابعة يكون فما صمت في وسط العاصمة) . وقعدوا جماعة البوكت يغنيو لساعات و الى حد اليوم ما نعرفش يقينا اذا كان ذلك بش يشوشوا على التحرك و على دقائق الصمت و الا الحكاية تنظمت في اطار جلب الإنتباه ليهم ... التو مش عارف شنوة غايتهم و شنوة طبيعة الأمر الي جاهم.


أيا سيدي جات الساعة الرابعة و تلمينا كعبتين وكعبة من الأول .. مجموعة من الأصدقاء في التدوين لينا بن مهني ووالدها عم الصادق و والدتها و هناء الطرابلسي و فاطمة ارابيكا وتلفزة بالملوان ونادية اكسكيزا وفراس فريرايس وزوجته وفاتن عبد الكافي و ليلى بن دبة و أمال المثلوثي وغيرهم وغيرهم وجلسنا مقابل الانترناسيونال وبدات العباد تتوافد وفيسع تعبات الدنيا بالناس. نتذكر زادة وجود نجيب بالقاضي مقابلني ودرجة التأثر الي في عينيه.
الحاصيلو , التوانسة بكل الوانهم كانوا دايرين مقابلين بعضهم في لحظة تاريخية. لحظة ما تتنساش حسيت بفخر كبير بهذا الشعب ناس من كل بر ومن كل الشرائح الإجتماعية. كانت لحظات خشوع وألم وحزن.


ثم فيسع جاونا جماعة, وبداو يبلبزوا. اش بيكم ؟ قالولنا كيفاش انتوما شادين شموع ؟ مسلمين رانا نحنا . بينما دخلت لينا بن مهني في مشاحنة معاهم قعدت أنا وعمي الصادق بن مهني نتناقشوا معاهم ونهديو فيهم : ياولادي وين شفتوا مس بالدين ؟ هذه عملية رمزية تتعمل في العالم الكل , ياخي كيف يطفى الضو عندكم و تظلام في عينيكم ما تشعلوش شمعة ؟ ...

قعدنا نتناقشوا معاهم وفسرنالهم انهم قاعدين يميٌعوا في القضية والى حكاية الشمع شكلية لا معنى لها وماتستحقش هالهوجة الكل وطلبت منهم تلاوة القرآن وتلاوة الفاتحة وتم وكانو فما عباد تقرى في القرآن وعباد ساكتة و عباد شادة شمعة.


زيد شوية خلطوا زبراطة يوم السبت و جاونا منهم جماعة يتهددوا ويحبوا يضربوا ... قالك شنوة , قالك الشموع حرام وهو السيد شاد روحه بالسيف , سكران ميٌت.

ايه أكهو عاد تم تمييع التحرك وولات المشكلة الاساسية هي : "يجي منه في سبرنا الشمع والا مايجيش" , وبدات الطونسيون تقوى بين العباد و بدات تتخلط فخفت على المشاركين وفضيت الحضبة و مشاو الناس وقعدوا الشموع منصوبين ... وجاو سكارى يوم السبت وشفت مشهد سريالي : جماعة تلم في الشمع بش تعاود تبيعه وجماعة من غادي دارو حول الشمع كيف ماتدور حول كعكة عيد ميلاد وبداو يصيحوا على لحن "سنة حلوة ياجميل" و يغنيو "بسلامة بن علي .."

وخرجت وقتها بزوز ملاحظات الأولى أن التونسي ما يعرفش فكرة "الذكرى" وعايش من غير ذاكرة و الثانية هو أن منه هكة اذا الواحد يحب يعمل تحرك يلزمه يبعد على يوم السبت المقدس , لأن يوم السبت عند التونسي هو يوم البلعة ولاشيء غير البلعة.

dimanche, janvier 24, 2016

و الضحى

"و الضحى و الليل اذا سجى "... نسكت ... خنقتني الغصة و ما نجمتش نكمل الآية. السجادة مفروشة بين السرير و الكوجينة . تي هو شنوة ؟  : ستوديو الكل في الكل  خمسة ميترو على تلاثة ميترو ... واقف قدام السجادة ساقيا يمسوا في الفرش من التالي و راسي يوصل للكوجينة كيف نسجد.

نحمحم ... نستغفر ربي و نعاود : "والضحى و اليل اذا سجى , ما ..." و نعاود نتخنق.  تعبت , ماعادش انجم .. كبرت عليا , جهمت عليا . كل يوم عرك , كلام يجرح , كلام  أمضى من الام , نتجرح , نتبعج , نتذبح , انز ... و نبلع و نغص .. لكن نسكت. ما يلزمش ننهار. أنا  الي إخترت و ما ضربني حد على يدي.   أنا الي شديت الصحيح و عاندت الناس الكل و عرست و أنا مازلت نقرى, كل زادي  بورس متاع طالب و برشة حب و برشة عناد و كسوحية راس. قداش من واحد قالي إحسبها و أخطاك .. و هاك جاتك  فرصة قراية البرة , طير , جنُح , عوم بحرك , جرٌب الدنيا , و العرس مش هارب .. اذا مش هي غيرها .. إحسبها 
و أنا عمري ما حسبتها, عمري لا خممت في روحي وحدي , الدنيا عندي عهود و عقود .. و مبادئ و حدود ... وقبلهم الحب. الحب مبدئي و قناعتي , الحب راهو ديني. نمشي و نخليك ؟ نعيش بلا بيك ؟ كيف مليون حكاية ؟ كيف ألف رواية شفتها على عيني , و باسها اخر مرة و مشى و غاب وراء البحر , وراء السحاب ,  و عاشوا من غير أحباب ...
مش أنا ... أنا هويت و أنتهيت .. و انتصرت للحب و انتصرت بالحب و ربحت برشة حروب ... و عرسنا بش نمشيو ونغيبوا الاثنين في السحاب و نعيشوا وراء البحر أحباب, أصحاب , قراب ,  نستوطن في عينيك و نعيش في جواجيك  ... و مشينا , في الغربة ترمينا ... أنا نشوفك حبيبتي  أما  انت  - يا خسارة - ماعاد تشوف فيا كان زوجك ... على سنة المجتمع ... بع , و المخبل في كبة طلع :   شوف ندادنا و شوف ازواج بلادنا , و شوف نتيجة عنادنا و شوف وشوف و شوف ... قلبي تقطع طروف ... نتوجع و نتجرح , نتذبح , انز ... و نبلع و نغص .. كون قوي : انت الي 
اخترت  و ما ضربك حد على يديك.

" و الضحى و الليل اذا سجى , ما ودٌعك ربك و ما قلى , و لا الآخرة خير لك من الأولى , ولسوف يعطيك ربك فترضى ..." و غلبوني دموعي مع "ألم يجدك يتما فآوى" .... يتيم , في بلاد الغربة , وحدي في الظلمة  , لا أم لا بو ... لا أخت لا خو , لا صاحب لا عدو . أنا و هي ..متناحرين , متعاركين , متحاربين. أنا الي ستنيتك تسندني , في أهلي و ناسي تعوضني , لقيتك كيف الرصاص, في القلب و  في الراس. يتيم أنا , يتيم حب سنين , ضاع في تفاصيل كل يوم , ضاع بين الهموم , ضاع بين شكون ظالم و شكون مظلوم ...

" و الضحى و الليل اذا سجى , ما ودٌعك ربك و ما قلى , و لا الآخرة خير لك من الأولى , ولسوف يعطيك ربك فترضى, ألم يجدك يتما فآوى , ووجدك ضالا فهدى .."
يا ربي يا  كريم , يا ربي يا رحيم , يا سلاك الواحلين  ..  يا رب .. ماضي في حكمك , عدل فيا قضاؤك أشكو إليك ضعف قوتى و قلة حيلتى و هوانى على الناس انت رب المستضعفين و انت ربى الى من تكلنى؟ الى بعيد يتهجمنى ام الى عدو ملكته امرى ؟
يا ربي يا المعبود, شنوة يخلي حبيب يمد يده على حبيب ؟  بعد  الحب و التبويس ,بعد العشق و التدحنيس, بعد الحنان و الشوق , يهز يشرع يده و يعطيك بشلبوق.
يا ربي يا المعبود , ما انجمش , ما انجمش ... ما انجمش .. و الله ما انجمش . انا نرجٌع ؟ مش من تربيتي ...  أنا نسكت ؟ مش من كرامتي ... يا ربي يالمعبود . عاوني يا ربي ... ماعندي غيرك ... عاوني

" و الضحى و الليل اذا سجى , ما ودٌعك ربك و ما قلى , و لا الآخرة خير لك من الأولى , ولسوف يعطيك ربك فترضى, ألم يجدك يتما فآوى , ووجدك ضالا فهدى  , و وجدك عائلا فأغنى .."
 همٌلت قرايتي الي حياتي الكل نحلم بيها , و قعدت  ندور و نلاجي ... يخدمونيش قهواجي ... قرباجي , بانكاجي ... حاجة نعيل بيها روحي و نعيل أميرة جروحي . و خدمني هاك الجاهل في حانوته , أي حتانا تونسي ... تونسي و نفسي عزيزة .. ايه عندي الفيزا ... أما نفسي عزيزة .. علاش يا معلم الذل و السبان ؟ علاش يا العرف طول اللسان ؟ يا سيد راني فنٌان ... ايه فنٌان. شبيك تضحك و علاش السبان ؟ ايه نفسي عزيزة ...  و يلعن بو الخبزة المرمدة .. يلعن بو الي يسبني و يجرحني , يشوشطني يذبحني ,يقشتلني يفضحني  ... جاهل وكان يتلذذ أنه يمزبل راجل قاري .. كانت هذيكا شيخته و بعد ما يغصورني يسألني على ديبلوماتي و يتضيحك و يسألني فاش نفعت  قرايتي ... و لعنت ربايتي .. الي خلاتني ما نبزقش عليه , ما نفشش غيضي فيه .. ما نمدش يدي عليه. تفيه.


 " و الضحى و الليل اذا سجى , ما ودٌعك ربك و ما قلى , و لا الآخرة خير لك من الأولى , ولسوف يعطيك ربك فترضى, ألم يجدك يتما فآوى , ووجدك ضالا فهدى  , و وجدك عائلا فأغنى , فأما اليتيم فلا تقهر , و أما السائل فلا تنهر , و أما بنعمة ربك فحدث"

لا إلاه الا الله . و الله أكبر . و لله الحمد