lundi, mai 17, 2010

يا ترابي

و راس هالشاذلية

وريحة قهوة قوية

و فاشكة زهر نابلية

قلبي ماشي عليك دم

يا ترابي ... يا راس الهم


يا ترابي يا .. داء العيشة

يا حياة الكرمة و العريشة

نساو غلاك ... و عملوك خيشة

وحتى زرعك منهم ما سلم

نهبوه بشجره بحشيشه

ورشموا السرقة على العلم

ترابي صافي .. أما تظلم

.

نحلف بشجر اللوز المنوًر

بالزغاريط و الكعك المحوًر

برشمة شكبة قاعدة تتصًور

بالزردات بالروز المفوًر

ترابي صافي .. أما تظلم


ترابي صافي .. أما ظلموه

لموه قزة ...و بخ تف باعوه

و الي يموتلنا ماعاد ندفنوه

ترابنا تباع و قلبنا تردم

لا جواب و لا خطاب .. نساوه

و لا شكون يدافع ... بقلم

يا ترابي ... مش كنت تشرب دم ؟


نحلف بعبارات الزيت

و كلام قباحة مكتوب عالحيط

و بالرقعة الجلد و كبة الخيط

بكيسان الزرير بخبز القليط

الي ترابي كان يشرب دم


يا ترابي وليت تشرب كوكا ؟

و وليداتك هاربين في فلوكة

و الي قعدوا في حلقك شوكة

و حتى حد منهم ما سلم

عملوا بقانونك شكشوكة

وبحق الناس عملوا معبوكة

و حكموك بعصية و جلم

يا ترابي لو كان تتكلم ...


نحلف بدهنة فيكس و غلفة

و بجماعة الياسمين و الحلفة

وبقرون العلوش و العلفة

بالأفراح و الفلوس المتسلفة

ما تذكروا منك كان الجلم

يا ترابي لو كان تتكلم


يا ترابي لو كان تحكي وتقول

قداش رجالك عاناو الهول

فلاقة اتصول و تجول

و ياما منهم لبسك و تردم

كان يراوك منزوس بالبول

الي عطاك روحه زعمة يندم ؟


نحلف بحس قليان البريك

بهندي الطوابي بصوت الفوشيك

بكحل عاشوراء بالشربة الفريك

بالفزاني بطالب ركيك

ترابي صافي ... أما تظلم


ترابي صافي أما تظلم.

dimanche, mai 09, 2010

هاني ننتحب في دارنا ... مشيتو تتنتحبو على سعدكم ؟


بمناسبة الانتحابات البلدية , قرر سيادته, محافظ نورمالاند, الانتحاب في داره ... جبد المحارم على كل لون يا كريمة يا أحمر يا أخضر يا ذهبي و شد ينتحب ..ينتحب و دموعه شرتله

و أنتوما ؟ أنتحبتوا ؟ مشيتو تتنتحبوا البرة و الا شدكم زنس انتحاب في الدار ؟

هو نورمالون كل مواطن صالح ما ينجم كان ينتحب ... و نزيدكم زيادة ... يقولوا .. والله أعلم ... الي الأنتحاب على وضع البلاد واجب و طني

ايا خلي نمشي ننتحب على سعدي .. أنستوا