jeudi, janvier 21, 2010

راجل من رجال تونس.


اصبحنا و اصبح الملك لله. فاق لقى روحوا وحده في الفرش, تململ ... شاف الوقت : السبعة و ربع. أييه .. النهار راح. قام مشى للمقصورة, غسل وجهه , رجع لبس سوريتو, سروال باللية و كدرونو. حط شاشيته فوق راسه و هو خارج يزرب.

منانة في السقيفة بجنبها كانون وسزوة قهوة فوقها فايضة. مقابلها ميدة و سفرة فيها برشة ماعون.

- صباح الخير منانة
- صباح الخير سليم ..

من غير ما تسأله خذات كاس صبت فيه شوية حليب و هزت السزوة متاع القهوة و صبت منها في هاك الكاس. و هو زادة شد بلاصته و قص شوية من الطابونة الي محطوطة عالطاولة و بدى يغمس الخبز في الزيت.

- الجماعة مازالوا عند الحاجة منى ؟
- ايه نعم ..
- ما تقوليليش وينها شاذلية ؟ ياخي جاء عطية هزها غادي ؟
- تي ماهو اليوم قلي ..
- اه ايه قالتلي و الله نسيت

يشرب كاس الحليب فيسع و يخرج من باب السقيفة ... في الجنان يلقى النساء الكل و منهم شاذلية مرته يقلو في الزميطة (البسيسة) : هاي شاذلية مرته يشوف فيها فوق القمح تغييز و فطيمة الشوشانة بجنبها شادتها و مسعودة العربية تلم في القمح في شكارة و معاهم برشة نساء اخرين. بكلهم يغنوا في نغمة صالحي ما يغنوها كان نهارة القليان. ضحك و شاورلهم بيده.. ستلبسوا الكلهم و حشموا و بطلوا الغناء الا شاذلية كملت و هي تشوفلوا و تضحك.

صباح الخير. صباح الخير. صباح الخير. الي يعرضه يعرفه و الا ما يعرقوش يصبح و هو يرجُع من الكرارطي, للي جاي يتسوق. لولاد الحومة. يتعدو جندارمية ... يعبًس .. يقحرولوا و يقحرلهم .. لا يصبح عليهم و لا يصبحوا عليه.

اررر ... اررر ... يدخل عطية للحوش فوق البهيم وهو داخل بعضه ... النساء يفيقوا الي فمة حاجة مش عادية. ينقصوا من الغناء بالوحدة بالوحدة ... اش فمة يا عطية ؟ ما يعبر حد .. يدخل يجري للسقيفة وين قاعدة خالتك منانة اتفطر في الصغار. للاتي .. للاتي ... الحاجة منى .. الدوام لله.

يحل سليم المكتبة و يبدى يستف في الكتب. يدخُل رزم الجرايد الي يلقاهم قدام الحانوت و يستفهم. هو هكة و يشوف في مختار جاي من غادي ... دموعه غالبينه.
تي شبيك يا مختار ؟ مختار من كثرة ما بكاه غالبه ما يقدش حتى يتكلم ... سليم يمد القلة ... اشرب يا مختار ... اشرب و تكلم .. حيرتني .. شكون توفى ؟ شي .. مازال ما نجمش يتكلم ... الحاجة منى ؟ في بالي بيها مريضة على موت ... اخيرا ينطق مختار ... قتلوه ... قتلوه يا سليم ... حشاد ... حشاد مات ...

ينهار سليم على اقرب كرسي شدوا مالطيوح ... حشاد ؟ راهو حشاد ... حشاد العمال ... حشاد الي بش يجيبلنا الاستقلال ... حشوه ؟ قتلوه ؟... كيفاش بش تكون الحركة الوطنية من غير حشاد ؟... جشاد راهو مثُلنا في كل بقعة .. حشاد راهو الناس الكل تحبه ... كيفاش بش يكون النضال و الكفاح العمالي ؟... مشى ؟ مات ؟...قص عليه مختار بين شهقتين و دموعه مازالت تتقاطر ... بالرصااص يا سليم .. اليد الحمراء ...

قام سليم ... خرج خطوة خطوة لقى روحوا قدام حانوته ... تلفت من هنا و من هنا ... السوق يملى و يفرٌغ ... عباد تشري و تبيع .. عباد تعيط بش تبيع منتوجها ... و في نفس الوقت .. حشاد ميت ... هاك العجال يتفارع مع عجلة, الحمال هازز ما هازز فوق ظهره ...القهواجي يدور من طاولة لطاولة ... و حشاد ميت

- مختار ... اخرج

مختار مازال شادد راسه فوق كرسي في المكتبة ...بين دوخة و نويح.

- مختار قتلك اخرج
يمشي سليم يشد مختار من حوايجه و يكركره البرة … يطاوع مختار … كيف الي فاق من الخضة الي خضه بيها سليم ..سليم يهبط ستار الحانوت … يتلفت و يدور في بلاصته و يعيط

- يا ناااااااس ياااااا هووووووو …. مات حشاد …قتلولنا حشااااد

من الي كان الواحد من حس السوق ما يسمعش روحه … حس الذبانة ولى يتسمع.

- حشاد مات … غدروه …بكرطوشة غدروه …

الناس الكل واقفة مصدومة … عمك بوعيش العطار جار سليم يبعُد العباد عالكنتوار .. من غير اي كلمة … يهبط الستار …يتبعه العجال .. و الميكانسيان .. و جماعة المرشى و الخضارة .. و الكواشة .. والشواشين و الصايغية و الصبابطية و من بعد الي يسكروا محلاتهم تخرج الغصة من حلقهم و يبدى الغش يخرج : الي يعيط و الي يضرب على حانوته و الي يسب و الي يكسر حتى لين ياقف راجل بيناتهم ويبدى يغني "اذا الشعب يوما اراد الحياة فلا بد ان يستجيب القدر" الناس الكل تاقف على الي كانت تعمل فيه و يتبعوه بالواحد بالواحد حتى ولى حشد و من ثمة جاو الجندارمية و العصا و الناس تجري و ناس مسلسلة و ناس مكركرة.

- بش يدوروا على الحركة الوطنية واحد واحد
- خلي يدوروا … البلاد هذية تولدلهم مليون حشاد

يتحل باب الشمبري متاع الحبس يتجهروا بالضو. يظهر عسكري

- Mr Selim ?
- Oui . ?
- Suivez nous !
-
ياقف سليم و يشوف لصحابه المسجونين معاه في نظرة تساءل ... يمشي و يتبُع العساكر ... يخرج من الشمبري يتجهر بالضو .. يشوف روحوا في البلار .. وجهه مدمدم بالضرب.

يدخلوه العساكر اللى بيرو الكوميسار. يدخل يلقى مرى مسفسرة قاعدة عالكرسي الي مقابل الكوميسار يعرفها الي هي منانة . الكوميسار يرحب بيه بطريقة ظاهر فيها برشة ترهدين و تنوميس.

- Mr Selim … soyez le bienvenu … vous pouvez vous asseoir si vous voulez … donc, il y a eu un amalgamme … madame mana … comment ca se dit ? bon bref .. cette dame qui est la sœur de votre femme nous a dit que l’autre jour .. quand on vous a capturé, vous aviez une parente qui est decedée … c’est cela ?

- . tout a fait Monsieur …

- Donc, vous aviez fermé votre boutique parce que vous aviez une parente morte … mon pauvre ami … on vous a mal traité .. enfin … on vous a emprisoné pour rien … on a mal compris votre action ce jour la Mr Selim … et au nom de l’autorité francaise on vous doit des excuses … vous êtes libre … vous pouvez aller tout de suite aux obseques de votre parente

سليم يبقى متسمر في بلاصته و يخزر للكوميسار الي من مدة قصيرة كان يعذب فيه.

- Mr … n’etes vous pas au courant ?

- Quoi donc ? .. dites moi Mr Selim … ?

- Farhat Hached est mort !

الكوميسار يحمار من الغش و يقوم من بلاصته

- en Prison ! remettez le en prison ! tout de suite !

lundi, janvier 18, 2010

كابوس

تسمر أمام نبيذ التلفاز ... ربما لينسى ...أو ليتذكر ... لا أدري ... و لا هو يدري ...صارحني و قال "أنا انت يا صديقي" ... لمحت عينيه وقلت "تبا ... كم تشبهني... اتخمل الساعات وراء جهاز حاسوبك حاملا حقائب سفر القبوع ؟" قال " بلى ... انا انت" ...

أنا : أنا لا أعرف ذاتي لأجزم هل انا انت ...لكن لي احساس بانك صادق ... اذن هذا أنا .... يال الدهشة

هو : هل ترى تلك الخطيئة التي خطت على جبيني ؟

اسود وجهي و اكفهر ...دمعت عيناي و استطردت بغصة

أنا : كم بشع ان أرى وجها خطائا كوجهي ... اغرب عن وجهي يا غراب الرذيلة

هو : بعد عتمة الغروب يأتي الشروق يا صديقي ... ماذا لو اشرقت ؟

قلت على مضض دون النظر الى عينيه

أنا : افصح ... مالذي اتى بك يا هذا ؟

هو : النبوة

لم اتمالك نفسي و انطلقت ضحكتي في قهقهات تعدت ما كنت قد توقعت.

أنا : النبوة ...مراتا واحدة ... ؟

هو : هذا نصف الخبر ..صديقي ... أما النصف الاخر فهو مبكي

أنا : هات ما عندك

هو : انتهى ما عندي

أنا : و ماهي رسالة نبوتي ؟

هو : لا اذكر ... وهذا هو المبكي

أنا : لا تذكر ؟ كيف تتجرأ ان تبشرني بنبوة دون أي رسالة ؟؟؟

ذاب كالسكر في فنجاني ... بحثت عنه في المراة ... فلم يترائي لي ..سوى نبي حزين دون أي نبوة

mercredi, janvier 13, 2010

العبرة

رنة و رنة
دقات قلبي
خانسة تستنى
صوت من بعيد
وقيل جاي مالجنة
"ألو ... يا كبدي
ألو يا زهوة بالي"
رعشو ا يديا
و الفؤاد اتهنى
زولك اتصور
يا اميمتي في خيالي

و ...
خنقتني عبرة

زعمة تبرى ؟
يا قلب يا محموم
يا سكيب النبرة
الضحكة كذبة
و الابتسامة غدرة
و الفرحة دون الأهل
ما تحلالي
الغربة كفنك
و البعد باني قبرك
غارق في جهنم
ملي الزمان نساني

عرس الغالي ؟
عينين تزغلل
وضحكة كبيرة تشالي
الخطبة تمت ..
و الفرح ؟ الشهر التالي ؟؟؟
يا ريت نقدر نوصله
و نتهنى
خدمة و كواغط
راهم شغلوا بالي
و الجيب فارغ
و الكرى يستنى

و ...
شدتني العبرة


زعمة تبرى ؟
يا قلب يا محموم
يا سكيب النبرة
الضحكة كذبة
و الابتسامة غدرة
و الفرحة دون الأهل
ما تحلالي
الغربة كفنك
و البعد باني قبرك
غارق في جهنم
ملي الزمان نساني

شنية أحوالي ؟
ساعات مكدر
ساعات زاهي بالي
غربة وطلاق
و انشاء الله همي يجالي
و ننسى جروحي
ونحصد ما نتمنى
و نرجع غانم
زادي طموحي و مالي
و نرجع لأهلي
و أميمتي تتهنى

و ...
غمتني العبرة


زعمة تبرى ؟
يا قلب يا محموم
يا سكيب النبرة
الضحكة كذبة
و الابتسامة غدرة
و الفرحة دون الأهل
ما تحلالي
الغربة كفنك
و البعد باني قبرك
غارق فجهنم
ملي الزمان نساني



جوان, 2009

mercredi, janvier 06, 2010

عمار بوزور VS عمار 404


مقهى الحومة البلوقسفارية. مدونين هنا و هناك. فما منهم شكون يلعب في الشكبة, جماعة تلعب في الرامي, جماعة تشيش و اخرين يتحدثوا بين بعضهم. يدخل الجاندارمي.

الجاندارمي : السلام عليكم ...

الناس الكل تقحرلوا و ما يردوش عليه السلام. يتلفت الى حسين في الكونتوار.

الجندارمي : شفت ملا مستوى منحط ... ما عندهمش ادنى اداب الحوار ... و من بعد يجيوا يحبوا يطعنوا في المكاسب و الرهانات الي نخوضوا فيهم ... كيما يقول سيدي برهان و سيدي بن نصيب.

واحد من الحاضرين يقلد صوت الجاندارمي و هو يعاود "المكاسب و الرهانات" ... الكل يتطرشقوا بالضحك, يتلفت الجاندارمي, يدنكسوا روسهم و يحاولوا يخبيو ضحكتهم الي قعدت ضاهرة.

الجندارمي : ايه اضحكوا ... اضحكوا ... هاو جاي ...سيدنا عمار 404 و تو يفهمكم شنوة معناها الضحك ... الاما يمحيكم من على وجه الأرض ... الاما يعمل فيكم

صوت خارجي يغني " و الله ما كادوني ...ستين درجة في العلى ما كادوني ... ما كادني كان الكلام الدوني" يدخل عمار بوزور .

الي كان يشيش ما عادش يشيش و الي يلعبوا في الكارطة ينحيوا الكارطة و الي يتحدثوا يسكتوا و يخزروا لعمار بوزور متهللين.

مدون 1 : يا عمار يا وليد عمي ... تي هاك جيت ...

ع.بوزور : اهلا اهلا بأهلي و ناس ...

عمار يبدى يسلُم بالبوس على رواد المقهى يخلط للجاندارمي الي يتقدم بش يبوس. عمار يهزوا و يحطوا

ع.بوزور : اذهب ... خازوق

الجاندارمي : أمان عمار ؟

ع.بوزور : اذهب قود ...

المدونين يتضيحكوا ...يتشجع واحد منهم و يتوجه للجندارمي.

المدون 2 : ايه نعم ... تذهب تقود

يتلفت عمار لهاك المدون ...

ع.بوزور : تي هاك تسرُحت في الحديث ...سي الشباب ...

المدون : أمان يا عمار ؟ ... أنا ديما كلمتي نقولها ...

ع.بوزور : بالله ؟ امالا وينك وقت الي الكرتوش يخيُط

المدون يدنكس راسه.

المدون : كنت لاهي ... يا عمار

ع.بوزور : بالله ؟ ايه شبيه ... و أنت سي فلان ... الي زعمة تضرب تصرع في التدوين ... و عاملينلك زعمة طاولة و كراسي ؟ وين كنت وقت الي زميلتك في يدين ال404 ؟

المدون 3 : أنا ؟ .... أنا ... كنت في الخارج ...

ع.بوزور : ايه ممكن ... هو سي سور ...كنت خارج الموضوع ... و أنت يا سي ... متاع الايديولوجيا ... كنت في الخارج زادة ؟

المدون 4 : تشديت في برشة خدمة ... شبيك ؟ مش عاجباتك الايديولوجيا .. عمار ؟

ع.بوزور : تي هذه مش أيديولوجيا .... هذه ... ايدو في ايد خوه..لوجيا ... زعمة علاش كيف الكرتوش يخيط الكلكم وليتوا لاهيين ... و هاو توة رجعتوا اتطلعوا في ريوسكم واحد وراء واحد ... و انت ... وينو هو ... اه أهوة ... انت متاع "لن يمروا"

المدون : ايه نعم ..لن يمروا ...

ع.بوزور : تي هاو مروا ... وين كنت وقتلي مروا ؟

المدون : و الله لا فقت بيهم وقت الي مروا يا عمًار ... تو المرة جاية لن يمروا

ع.بوزور : ان شاء الله ما يحطوكش حارس مرمى الفريق القومي ...

الجاندارمي : شفت يا عمُار ... راهو الكله تقشقيش حناك

ع.بوزور : كيف الي سمعت حاجة تكلمت يا جماعة ... ما يطلعش هذا" الواطي ناي" الي كيف تشدت زميلته قالك نخليو الامور تمشي هكة ... و قال ماذابيه كان يتسكروا مدونات اخرين ؟

الجاندارمي : من فضلك سي بوزور احترم نفسك ... نجيبلك راهو عمار 404 ... و كيف ما يقول سيدي برهان ...

ع.بوزور : لا برهان و لا دليل ... ايجى لحظة نحكي معاك كلمتين ... تي مانا عاد جيران .. و محسوب نسكنوا فرد بلاصة

الجندارمي ينصاع الى عمار بوزور ... ويمشي معاه

ع.بوزور : تي ماهو عاد البلاد صغيرة و ما يتخبى شي ... حكالي واحد يعرفك مليح مليح الي انت كانت مش ماشية معاك الأمور ... و قلتلوا من بوم الي دخلت للدوالب هذية ... الي نسميها أنا الطحين .. و انت سميها اش تحب ... قلتله الي الامور ولات ماشية سانك سانك ... و البيبان الكل تحلت في وجهك ... و زدت قلتله الي هذايا اسهل طريق بش الواحد "يوصل"

الجندارمي : أنا قلت ؟ باللازمة يا ولد بوزور ... الاما نحرش بيك سيدي عمار 404

ع.بوزور : حرش الي تحب ... و زيده من عندي ... الي و الله يعمل اش يعمل ... نمشيوا احنا يجيوا اخرين ... ايماننا بالحرية ... و حبنا لبلادنا أقوى منك و من ألف كيفك ...


samedi, janvier 02, 2010

دين الكوجينة




يا سادة يا مادة, يدلنا ويدلكم للخير و الشهادة .. الكلام الحكيم قياس , و الي يحب النبي يصلي على سيد الناس.

يا مولى الليم و الليمون و الخبز و الزيتون عطيني ليمك و ليمونك و خبزك و زيتونك, نرجًعلك ليمك وليمونك و خبزك و زيتونك و وقتها ... وقتها لا تبقى تسالني لا ليم و لا ليمون و لا خبز و لا زيتون.

يحكيو على مرى يعيطولها خالتك بية , ربة بيت ممتازة ذات أخلاق و خلق عالية متوسطة الجمال, عرست عن طريق ركن التعارف بعمك جمال. أما مش هذيكا هدرتنا ....

خالتك بية من صغر سنها, تغير على كل ماهو عربي و عندها انحياز كبير لكل ماهو عنده صلة بكلمة عربي... لا, ما كانتش قومية عربية و الا من احباء جمال عبد الناصر ... تي هي كان في المسلسلات المصرية ما يجبدوش على عبد الناصر راهي ماتعرفوش

. لا ... خالتك بية الي يهمها هو مثلا ... العضم العربي , الدجاج العربي ....

مثلا ثنية طويلة و تحكيلها على قصة عربي تشيخ , تشوف عبد يدور مع كلب عويقل تدوح راسها و تتأسف على انقراض الكلب العربي متاع الحومة.

حتى في اطار الثقافة ... خالتك بية من هاك العباد الي كيف يشوفوك تتفرج في برنامج بالقاوري تنهيك نهيا شديدا و تقلك "حطلنا حويجة عربي يهديك .." و الا كان لقاتك مصفار و قاصد ربي لفارماسي و في يدك ورقة طويلة عريضة متاع دوايات, كتبهالك الطبيب ... تشهق فرد شهقة و تقلك "فاش مطلوب ؟ تي تو نعملولك دواء عربي تقوم صح سالم"

تي هو حتى في المكتب حبت تعمل قصة عربي في امتحان التاريخ (هي تقول ديما بالله شنوة فايدة مادة كيما التريخ كان وجعان الراس بحكايات فارغة) ياخي الأستاذ هو الي عمللها قصة عربي و شدها بالفوسكة حاشيتها في بوستوها ... و كيف الاستاذ قاللها خرًج الفوسكا ... بطبيعة الحال عملتله شوهة عربي و خرجت طرد نهائي ... أما كيف تسألها توة عالحكاية تو تجبدلك ان المسألة هي مسألة شرف ... و تقلك "باش عربية كان مش شريفة" ... و الهدرة هذي زادة حكاية أخرى

الحاصيلو .. خالتك بية لقات روحها في الدار .. قالت "ما صار شي ... هو شنوة مستقبل فتاة عربية اصيلة اذا مش في الدار" ... و هكا خالتك بية لقات وقت أكثر باش تتعمق في أصولها و عروبتها و من حينك .. تعلمت اتطيب الكسرة العربي و الحلو العربي ...

وقت الي استصينت في أمور الكوجينة العربي, لقات خالتك بية فراغ كبير و كانت وقتها مدمنة على المسلسلات المصرية الي يبثوهم في القتاة الوطنية و بحكم الي ثورة الاقمار الصناعية مازالت ما حدثتش, تصالحت لأول مرة في حياتها مع المطالعة ... و ولات تطالع و تعدي وقت كبير وهي تقرى

ايه ... فاش تقرى ؟ تي مش وقتها متعدية بجنب المكتبة و تشوف في تصويرة أحدى بطلات مسلسلها المفضل في أحدى المجلات ... شرات هاك المجلة الخليجية الي هبطت عليها كيف الميدة من الجنة : تلقى يا من تصاور متاع ممثلين حبتهم يا من نصائح عربي يعملوا ستة و ستين كيف ... و كملوا دخلولهم خيط تليفون في الدار ... جنة و فيها بريكاجي

- ألو ... اختي سعيدة ؟ تي وينك ... تصبغ في شعرك ؟ تي لا ... زيد كعبتين عضم فوق راسك ... و الله ... أي أي ضربة ضرية ... و الله كيف ما نقلك ... قريتها في زهرة الخليج

- ألو ... تي لا يعطيك ... الزبدة يلزمها تكون عربي ... ايه ... لا وه ؟ تغلفها بالكاغط بش تتفورم ... تي أي مثبتة بهيشي ؟ قريتها في مجلة سيدتي ...

- ألو ... شفت ؟ شفت ما تسمعش كلامي ؟ قتلك لوح عليك منه ... برجه و برجك ما يوالموش بعضهم ... ماللول قتلك فك عليك ... باهي ايجاني ندقزلك بالرصاص ... تي أي جربتها و العدد هذاكا مازال عندي ما طيشتوش ...

امشي يا زمان و ايجا يا زمان ... برابول في السطح بجنبوا برابول ... المجلات معادش تاكل ... و القنوات قد شعر الراس

- ألو ... اهلا اختي سعيدة ... لا حرام ... وه ... حرام زقوم ... اسألني انا نقلك ... الكولون هو نيلون و الا صوف ؟ يا بنتي حرام حرام ... استغفر مولاك ... اسمع ... قول هاك الدعاء 15 مرة ..تو. أمورك تولي سانك سانك ...

شكون ؟ اه ... روحت ؟ وه وه ... هاك الفاسدة روحت ؟ أي قالك تقرى البرى ...باش تعديها على شكون بالله ؟ راهي اللطف من راجل لراجل ... تي حرام زقوم ... عايشة من غير محرم ... مش كان شدت دار بوها خير ؟ على الاقل شوية ستر يا ديني ...


بالله لحظة يا جماعة ... تعديت في بعض الأسطر على 20 سنة من حياة خالتكم بية و ما جبتش جملة على عمكم جمال.

عمكم جمال ناس ملاح, حده حد روحوا , كل كلمة يقولها في حقها, محراث متاع خدمة. كان راجل حشام ياسر ... مما لزه باش يلتجئ لركن التعارف بش يلقى شريكة حياته و فيسع تم التقابل و القبول و الزواج.

كان عمكم جمال تصور الي حياته باش تتبدل رأسا على عقب بعد الزواج ... الا أنه تقريبا ما تبدل شي. صحيح الي كان متميزر شوية في أمور الماكلة و تحسنت الامور في فترة الي المدام تغرمت بالكوجينة ... الا أنه كان يحس روحو زايد و الا مش موجود جملة في هاك الدار. يدخل يلقى مرته لامة زوز صاحباتها اتدقزلهم ... و يرقد وحده بحكم الي المسلسل الي اتبع فيه يتعاود بعد نصف الليل و كان شتهى يعمل حوار مع المادام تحكيله على كيفاش اللوبان العربي يولي ما يذوبش في الفم ...

و حتى كيف خالتك بية حبلت و جاء ولدهم ا لياس ... كانت طريقة تربية ابنه تمثل له خيبة كبيرة ... كان يتغبن على خاطر ما كانش عنده الوقت الكافي بش يخصصه لولده بحكم خدمته و المادام نهار كامل تبعث فيه يلعب في الشارع بش ما يوجعلهاش مخها وقت الي تبدى هي لاهية في أمورها ...

كبر الياس و ولى أكبر عايق في الحومة ... جاو البارابولات و زادو شربوا مخ خالتك بية ... عمك جمال يشوف في الامور معوجة و ما لقى شي يطمنه ... و وقتها تعرف عالانترنات ...


وين كنا احنا ... اه ... ايه خالتك بية تتكلم في التليفون ... و يدخل عليها عمك جمال

- .... عايشة من غير محرم ... مش كان شدت دار بوها خير ؟ على الاقل شوية ستر يا ديني ...

عمك جمال يجبد مرته ... و يشيرلها أنها يلزمها تعلق ... خالتك بية باهتة ... عشرين سنة عشرة عمرو ما عمللها هكة ... والا حكى معاها بالطريقة هذيكا ... تعلق و تنصاعله ... من غير ما يتكلم يشيرلها بش تقعد ... تستجيب ... يقعد مقابلها ..

- وينو ولدك ؟

- يضهرلي خرج مع ولاد الحومة ...

- راهو كيف العادة يسكر

- استغفر الله انا ولدي يسكر ؟ قول عشرة مرات ... الله لا...

- اسمعني ... عندي كلمتين خفاف نظاف بش نقولهملك ... تعرفت على مرى على الانترنات ... عندنا 3 سنين نعرفوا بعضنا ... بش نطلقك و نعرس بيها ...

و هز روحو و مشا ... و تمت خالتك بية تسبح ب "يا لطيف" 50000 مرة ... لا رجع راجلها ... و لا روح ليلتها ولدها بش يهزها للاستعجالي ... و لا نفعها الدواء العربي ....