jeudi, novembre 13, 2014

خرافة القرد و الصيد



يا سادة يا مادة , يدلنا و يدلكم للخير و الشهادة . و الي عاشق النبي يصلي عليه. يا مولى الليم  و الليمون و الخبز و الزيتون , أعطيني ليمك و ليمونك و خبزك و زيتونك, نرجٌعلك ليمك و ليمونك و خبزك و زيتونك , و وقتها ... وقتها لا تبقى تسالني لا ليم و لا ليمون و .لا خبز  و لا زيتون

يحكيو على غابة هجرها الحق و كثروا فيها الصبابة.  و من يوم ما غاب عليها الصيد , عمل فيها بشرعه القرد البليد.  هاك القرد الظالم  ما خلى حتى حد  سالم  و هو هاو سرق هذا , هاو قدم هذا , هاو مرر عيشة هدا ... الحاصيلوا مرج حيونات الغابة الكل  و فددهم في النهار الي تولدوا فيه.

رجعش الصيد ؟ مشاوله  الحيونات الكل يشكيو له بش ياخذ لهم حقهم من القرد .
 وقت الي سمع الصيد الحكاية هبل في مخه و تغشش و حلف انه ما يرجع كان  و هاك القرد السارق المسٌخ شاده من عنقة و  مروح بيه في الساحة العامة للغابة بش يتحاكم بحضور الحيونات الكل. 
بطبيعة الحال القرد  تشعبط في أطول شجرة في الغابة و ركش يرعش خايف. 


ايا مشى  عمك الصيد  و وقف قدام  الشجرة الي متخبي فوقها القرد و قاله يالي بيك يالي عليك  اهبط بش نحاكمك . فبالطبيعة القرد ما حبش يمتثل و يهبط. يا ولدي أهبط خيرلك ... شي .. النافع ربي.
خونا الصيد استرزنها أنه  يرجع للحيونات بخفي حني و يصارحهم و يقوللهم  "راني ما نجمتش نشد القرد  توة أما تو يجي نهار و يحصل" ,  لأن عمك الصيد كان خايف على شعبيته لا  تنقص,  فشد بجنب الشجرة و هو يقرُق  بالقرد بش يهبط ...  لكن شي , القرد قالك أبدا كان نهبط. 

زاد شوية و بدى يتفاوض معاه ... "ها قرد وخي , اهبط , و الله نسلكهالك مع الحيونات  و نخرجك منها كيف الشعرة من العجين" , شي ... زاد شوية و قاله "يا قرد خويا , رانا الكل حيونات و خوات .. أهبط يهديك و عفى الله عما سلف " ... شي ... هاك القرد قاله ألف و أعود بالله كان نهبط .. لأني نهبط منا تو تبلعني في فم واحد منا. 

و لاشي الصيد يحلف و يتكتٌف أنه ديمقراطي و أنه مش بش ياكله و أن الحكاية أمور شكلية : يهزه قدام الحيونات و زعمة زعمة يكش عليه قدامهم و يقوله "ماعادش تعاود صنعتك" ..  و يطيح الكف على ظله.

شي. القرد ما حبش يصدق. و قال للصيد : "ما نهبط كان بضمنات".  خمم الصيد و قاله : اش قولك كان  نربط يديا و تهبط ؟ جاوبه القرد :  دويو تنجم تفك روحك فيسع و تزرطني زرطان .. 

كمبسوا هزوا و نفضوا .. حتى لين تفاهموا على أن الصيد يلزم يربط روحه ربطة الي هي بش يرضى القرد و يهبط . ايه أكهو شد الصيد حبل و ربط روحه ربطة متاع القضاء حتى لين ولى ما عادش ينجم يحرك كرومته .. وهز عينيه للقرد و قاله .. "ايا توة اهبط 
"هاني مكرفط تكرفيطة بأمها.

بدى القرد هابط من الشجرة و هو مازال يرعش. 

"قاله الصيد : "تي شبيك يا قرد ؟ ياخي بالربطة الي ربطها لروحي و ما زلت خايف ؟ 

"جاوبه القرد : "لا مش خوف ... أما أول مرة بش ناكل لحم صيد حي. 


 و كلامنا قياس . و ربي يبعد القواد و العساس و يتقينا من شر الي طيح على راسنا الساس.