lundi, juin 23, 2008

يوميات عمار المغوار : عمار و الكوشمار

الحلقة الأولى

عمار و الكوشمار



صغار يلعبوا في وسط دار عربي. الدار تملى و تفرُغ بالعباد. النساء لابسين عربي و زغاريط من هنا و من غادي. صوت وحدة من النساء يقرب من هاك الصغيرات.

- عمار, يا عمار. أيا ايجا يعيش ولدي ... أيا زغرطوا يا بنات

الزغاريط تكثر. المرى هذيكا تشد عمار من يده و تهزو لتركينة من وسط الدار قاعدين فيها الرجال. بينات الحضور, راجل شايب في يده مقص مصدد يمضي فيه و يديه ترعش.

الشايب : ايا نحيلوا سرواله

عمار : لا ماما, ما تنحيليش سرولي قدام العباد

الام : ايا يزي بلا دلال يعيش ولدي

الام تنحي سروال عمار. عمار يحاول يخبي عورته رغم الي يلقى روحوا عريان قلم قدام خلق ربي الكل. الناس الكل مركزين على عورته

وحدة من الحضور : أوه ... تبرك الله

والد عمار : أمالا شنوة ماشي في بالكم ؟ ولدي فحل, طالع لبوه

مرأة أخرة : خمسة و خميس ....

يتلفت عمار. يلقى كاميرا تصور فيه. مش كاميرا عادية , كاميرا متاع تلفزة. تقرب منه هالة الركبي و في يدها مايكروفون.

هالة الركبي : نشاهدوا سيداتي سادتي الطاقات الي تزخر بيها بلادنا العزيزة ... و كل هذا في كنف العادات و التقاليد الحميدة ... نشوف في عمي الطهار شادد المقص و يمضي فيه. عم الطهار ... الله يعينك

الطهار : الله يسلمك.

هالة الركبي : كيفاش اتم, يا بابا, عملية القصان لهالطاقات الشابة ؟

الطهار : و الله بنيتي هالعملية نسميوها عملية ال كات كات. نقصوا لقشة ب 4 صانطي و من بعد نزيدوا نقصوا لقشة أخرى ب 4 صانطي ....

هالة الركبي : ايه شنوة يبقى ؟؟؟

الطهار : تبقى كان ... (الرجال يتفلقوا بالضحك) ... تبقى الصلاة على النبي.

هالة الركبي : و توة باش انشاهدوا العملية مباشرة على قناة بلد الفرح الدائم.

الطهار يأمر الرجال باش يشدوا عمار.

عمار يصيح و يبكي.

هتافات "قص, تقص, قص"

صوت نسائي "قص, تقص, تقص"

عمار يفيق من النوم. يلقى روحو في فرشه. يشوف المنقالة. السبعة غير ربع. يسمع صوت مرته و هي تنادي.

زوجة عمار : يا عمار, يا عمار ... الماء السخون قص. تي فيق ... أنا تحت الدوش ... شوف حل... تقص

عمار : الله مصلي على النبي ... ماني نبهت عليك كلمة قصان ما عادش نحب نسمعها في الدار.

زوجة عمار : و انا أش نعمل توة نتقروح بالبرد تحت الدوش ؟ شوف حل في حكاية القصان مع الملاك

عمار : بو القصان و الي خلق القصان ... هاني ماشيلو

يتبع

dimanche, juin 15, 2008

ما حال أهل "بلغسفير" ؟



من ضمن بلدان نورمالاند, يحكيو على بلاد اسمها بلغسفير. يقولوا كتب التاريخ الى هالبلاد تسمات هكة لأنه في التاريخ القديم كان جاء سفير من بلاد بعيدة عابر صحاري و برور و ما خلط الى الجهة هاذيكا كان في حالة يرثى لها.

دخلوه أهل هاك البلاد و صبولوا شريبة ماء بش يرجع أنفاسه. اش جاء بيك يا فلان ... قاللهم ايا شدوا عندكم, راهو البلاد الي جيت منها وصلنا لكذا و كذا في العلم و في الفكر نعتقدوا كذا و كذا و ضرب نهارين من غير ما يتحلحز وهو يفسرلهم فرحان الي خلطلهم لبلادهم و وين يقولولوا أرتاح و الا كول حاجة يقوللهم "ما تقاطعونيش ... خلي نبلغ, خليوني نبلغ". نهارين وهو يفسر و يبين و كيف كمٌل كلاموا قاللهم " لقد بلٌغ السفير" و اتكى ميٌت و كانت اخر جملة قالها في حياته. من ثمة خذاو أهل هاك البلاد كلام هاك السفير و أهتموا بيه و زادوا نسنسوا حتى لين وصلوا لكتب الحضارة الي جاي منها السفير و تبناوا هاك الفكر. و تقديسا لهاك السفير سماو بلادهم "بلٌغ السفير" و الي ولات توة في عصر السرعة معروفة ب "بلغسفير".

هالكلام أهل بلغسفير توة ما يعرفوهش و عمرهم ما سمعوا بيه. تراه نشوفوا شنوة قاعدين يعملوا توة أهل بلغسفير. هاني نشوف في مجموعة كبيرة من الشباب لابسين لبسة الفلاحة. عادي لأن بلغسفير أهلها الكل فلاحة. لكن ماهمش قاعدين يفلحوا و الا يحصدوا ... شنوة يعملوا ؟ هاني نشوف فيهم محلقين ... شنوة يحكيو زعمة ؟ تراه نسمعوهم :

- لا يا ولدي ماني قلتلك غالط

- لا مانيش غالط

-غالط و نص

- انت غالط ... و تبلع فمك كيف أنا نحكي

- يا بهيم شبي **** **** تحكي مع **** هكة ؟

- على خاطر ما تحبش تحل**** مخك انت و جماعتك و تفهموا

- أنتوما**** و **** و ما تحبوش تفهموا

- سكٌر **** يا ****, ماني قلتلك الي العضمة هي الي جات قبل ... شبيك تشكك في كلامي

- كلامك مش معقول ... الدجاجة هي الي توجدت قبل

- كيفاش تنجم تجي دجاجة من غير عضم يا زكيم ؟

- و العضمة ؟ شكون باش يفقصها ؟ مش يلزم تكون فمة دجاجة ؟

- يا خويا قداشكم تقلبوا الفيزتة جماعة الدجاج ... مش أنت بالذات كنت من جماعة العضمة سابقا

- ايه أنا عضمة سابق, اما افتنعت الي يلزم نكون من حزب السرادك

- ههه, عضمة سابقة ؟ يعني انت عضمة حارمة ؟

- يا خويا أنا عضمة حارمة ... و تعرف شنوة نعمل أنا بيكم معشر العضم ؟ ماذابيا نرجعكم أوملات

- ايا سكر فمك يا ****, تي انتوما اناثيكم دجاج كارك

- برى امشي ****, احنا دجاجنا كيف يجيبوا العضم يخراو عليه ... أحنا نخراو عليكم هههه

- يا **** , يا *** ,انتوما مش دجاج ... أنتوما فروخ هههه

- يعطيكم **** يا **** , احنا حزب الديك الشراب و ال*يك هههه

- يعطيك **** يا ****, احنا حزب العضم الشهامة و الكرم

هاو نشوف فيهم كشاكشهم خارجة و يتخاصموا و يتعاندوا و يتمقعروا على بعضهم و الي مخبي وراء ضهره بالة و الي مخبي وراه بيوش و الي حاطط في جيبوا سكٌينة والي في مكتوبو لام ...

شنوة صاير في بلاد بلغسفير في نفس الوقت. تراه نشوفوا .... يا لطيف!! ... عمٌار مولى الكات كات رفس اليوم زادة واحد من شباب البلاد و قتله عالبلاصة ... مش أول مرة يعملها عمٌار بعد ما يسكر و يشد الثنية ...

هاني نشوف في حقولات كبيرة مهملة لا فمة شكون يحرث و لا فمة شكون يحصد. ازح, القمح مهمٌل وشايح و لاحد تلهى بيه ...كله فاسد و محروق في سبولته.

ستنى ستنى, هاني لقيتهم بقية العباد متاع البلاد ...شيوخ و نساء و صغار ...شادين الصف.

شفمة زعمة ؟

اه ...شادين الصف قدام الكوشة يلوٌجوا عالخبز و قدام باب الكوشة مكتوب "ما فماش خبز ...أرجع غدوة...كان لقيت"

jeudi, juin 12, 2008

ثقافة ال404 و الزلاط و سواد الصبورات


في العام الفارط, كنت تحدثت بمناسبة يوم التدوين من أجل حرية التعبير عن ثقافة ال404 و الزلاط (هنا) ... و للأسف صديقنا عمار, سائق ال404  في عوض يفهم روحو , مازالت هاك الكشطة الي لاففها على مخوا عاملة عازل و عامل زوز و الا تلاثة  مو دو باس على هاك المخيخ الي يكسابوا ... بحيث الكعبتين نورون الي عندو يستعمل فيهم باش ينزل عالأكسيليراتور و يدهس أكثر عدد ممكن من المواقع

و بما انني نفد كيف الواحد ما يخدمش خدمتو على قاعدة  ... هات نتبرعوا لعمك عمار بنورون و الا زوز راهو مسكين محتاج و قليل في مخو

يا سيدي أولا ... علاش تبيعولنا في اشتراكات الأنترنات باش تقعدوا من بعد اتعبوا في رواحكم و تقراو في الي تكتب الكل و هاو قصيتوا هالبلوغ و نسيتوا لاخر ؟  و هاو واحد مشاغب كتب على احصائيات عالمية تضر البلاد و ما شلقتوش بيه , و هاو لاخر حط عالأنترنات مقال جريدة أجنبية , و هاو واحد اخر معارض -حاشاكم- عبر عن رأيه ... علاش الخساير و  المصروف الزايد من أنجنيورات و غربال متكلفلكم ملاين زرقة و كسكاس و مقفول ؟  و أنتوما حارقين عصابكم ؟ علاش ؟
تي ماهو طيشوا عليكم هالبلوة متاع الأنترنات جملة وحدة ... و الا يا سيدي ماكم مخليينها بش القورة وقت الي يجيوا ينبهروا بما ارتقت اليه بلادنا من  رقي و ما فتأت تعتلي المراتب الأولى في شتى المجالات ايمانا منا بضرورة كسب رهانات المستقبل ,راجين ...الخ  ياسيدي كيف عاملينها هالأنترنات كارت بوستال بش يضهررلهم القورة الي أحنا قافزين ... هاو أنا عندي اقتراح : تي ماهو هوما ابتدعوا الأنترنات ,أحنا نقصوها و نعملوا شبكة أخرى نسميوها الشبكة الجربوعية  - أهوكا بش ما نشلقوش الي نقلنا عليهم الشبكة العنكبوتية- و نسميوها التونسنات

بالله مش فكرة طيارة ؟  و زيد ما تتكلف شي, تي حتى حقوق الفكرة ما ينجموش يطالبونا بيها مادامنا عايشين في بلاد -و الحمد لله- ما تستعرفش بحقوق المؤلف و شاشية هذا فوق راس لاخر و الكوبي كولي عامل مسد في كل المجالات

ايه, تقولولي شنوة نلقاو كيف نبحروا (بالله ركزولي على كلمة نبحروا) ؟ 

في البرنامج تلقاو :ه

,  أخبار وطنية  تساهم في رصدها ثلة من صحافيينا الأبرار , الأوفياء  و الي عمرهم لا  يوجعونا بكلمة مايقولوا علينا كان الكلام الباهي يعطيهم الصحة 
وعوعوع.عين-ما-تضرنا.تن
أهوكا بدلنا ال  تلاثة دوبلفي ب وعوعوع ...أولا باش ما نشلقوش و ثانيا للحفاظ على الطابع التونسي و ابراز طاقاتنا في التزويك

تحليلات سياسية و أجتماعية و رياضية و ثقافية و في التاريخ و الجغرافية و علوم الحيوان و اخر تقنيات التوليد و عدة علوم منها العلوم الصحيحة و أغلبها العلوم الي مش صحيحة جملة, مع محللنا الوحيد برهان بسيس على الموقع التالي 

وعوعوع.برهان-خيارنا-الوحيد.تن


و اضافتا الى بث برامج قنواتنا الوطنية يمكن للجماعة الكل أنها تبحر على الموقع التالي لمشاهدة اعادة للبرامج الهامة كبرنامج عالم الحيوان و المسلسل البيروفي (ضهر الي فما مسلسلات تتكلف أرخص من المسلسلات المكسيكية) و برامج توعوية بش الناس الكل تبطل الدخان

وعوعوع.عاود-كي-اللوبانة.تن


كما برمجت على الشبكة الجربوعية تونسنات موقع لهالة الركبي تتحدث فيه عن السعادة الدائمة الي يعيشوا فيها مواطنينا في مناطق الظل (وين الشمس تكوي يا بوقلب) و رغد العيش و خصال هؤولاء من جود و كرم و عاداتهم و تقاليدهم و كيفاش ي***  الزكرة 

وعوعوع.برنامج-كل-ما-تاكل-بعضها.تن


و هكا يا عمار و أصدقاء ال 404 تكونوا ربحتوا ماديا و ربحتوا راحة مخكم و أنا من هالمنبر أول مساند للشبكة الجربوعية كان تسترجلوا وتسكروا الأنترنات ضربة وحدة ... و أنستوا بعقولاتكم ... 

شعار الشبكة الجربوعية : هي بحرت ,بحرت ...خلينا نبحرو على تونسنات 




samedi, juin 07, 2008

تدوينة حمراء ... لكي لا تستباح دماؤنا

لكي لا تستباح الدماء التونسية

كل من يساهم في جريمة يعتبر مجرم. هالقانون خلق ربي الكل يعرفوه

ما يخفى على حتى حد الي صاير في الجنوب الغربي التونسي و ببعض المناطق الاخرى رغم هاك العباد الي يغطيو في عين الشمس بالغربال و يكذبوا عيني عينك ... هذوكم نقوللهم وين عندكم تهربو من التاريخ ؟

لأنني ضد التعميم و لأنني نعرف الي بلادنا كيما فيها برشة عباد ما تسواش و ما تحيياش نعتقد الي فيها أغلبية من الأشراف و أصحاب المبادء ليس من ضمن المواطنين العاديين فقط لكن زادة من ضمن المسؤوليين ...لكل الي مازال عندو وجه يشوفو في المراية كل صباح نطالب باش يضموا صوتهم لصوتي و يطالبوا بمحاكمة كل من تورط في مقتل أحد الشباب التونسي لأننا نعتقدوا الي دم أهلنا و ناسنا غالي. و نذكر كل مواطن معنى اللون الأحمر على علمنا ... كانكم نسيتوا هاك اللون الأحمر يرمز لدماء شهداءنا الي هدرو دمهم في سبيل تونس عادلة في سبيل وطن ... و الوطن , يا جماعة يعني حتما حقوق مواطنة

ما فماش تونسي أشرف من تونسي و ما فماش لقمة عيش أغلى من قطرة دم  , ما فماش منصب سياسي أغلى من دمعة أم قتلولها ولدها 


أعتبر أنه أضعف الايمان , من موقعنا كمدونين, هو المطالبة بمحاكمة المجرمين و تذكير الي نساو باللون الأحمر

أقترح على كل المدونين مطالبة الدولة بمحاكمة المتورطين و خاصتا معتمد الرديف

أقترح على المدونين تدوينة حمراء باش يتذكر كل من نسي غلاء الدماء التونسية

أطالب السلطة بالتدخل و مقاضات كل المجرمين و ردعهم
  

jeudi, juin 05, 2008

شيابننا و الفياغرا

زوز شيابن ,تحت زيتونة, يركركوا في التاي

- يا مختار بالله شنهية هذه الفياغرا الي الناس الكل يحكوا عليها ؟

- اه ...الفياغرا ... وقيل دواء 

- دواء متاع شنهي ؟ متاع برودة ؟

- تي لا يا جيلاني ... هذايا دواء ...كان تاخذ منه حربوشة تو ... تروح للحاجة و تدني ليها اللا مور ...عشرة مرات ....

- ايوااااه ... تي ماهو قول ماللول يا مختار يا خويا الي هو مهدئ 



lundi, juin 02, 2008

نشرة أخبار المغرب العربي


سيداتي آنساتي سادتي, السلام عليكم و رحمة الله و بركاته و مرحبا بكم بنشرتنا المغاربية الموجزة و إليكم عناوينها :

1- احتجاجات كبيرة من بعض النواب المغاربيون حول النظام.

2- مسيرات عارمة في كل أنحاء البلاد المغاربية و احتجاجات حول محدودية الدخل.

3- البطولة المغاربية لكرة القدم تتوقف مؤقتا.

4- فنانون مغاربيون يلتحقون بصفوف المعارضة و آخرون يتحدثون عن البلاد المغاربية على قنوات أجنبية.

1- شهدت مداولات مجلس النواب في وهران, شهدت احتجاجات كبيرة من ائتلاف الأحزاب اليمينية المغاربية ضد الأغلبية اليسارية الحاكمة متهمين إياهم -حسب قولهم- "بزرع الفتنة و إهمال الحس الوطني المغاربي" و تأتي هذه الاحتجاجات بعد قرار الحكومة بالعمل بالنظام الفدرالي لمدة خمس سنوات أخرى بينما تطالب أحزاب اليمين بإدماج دويلات المغرب في نظام جمهوري.

2- نظمت ظهيرة اليوم في أغلب المدن المغاربية الكبرى, نظٌمت مسيرات عارمة من طرف اتحادات الشغل. وقد عبٌر المحتجون في مسيرة سلمية عن عدم رضاهم بالزيادات في الدخل. و قد فنٌد رئيس اتحاد الشغل المغاربي, فنٌد تبريرات الحكومة بأن مدخول المواطن المغاربي يضاهي مدخولات البلدان الأوربية, بقوله" أن العامل المغاربي يعيش في بلد بترولي و ذا مدخولات كبيرة ناتجة على تصدير الغاز و البترول و عدة مواد منجمية, اذا فالمقارنة بالمدخول الأوروبي غير جائزة و المطالبة بدخل أكبر للعمال في كل المجالات متواصل".

3- توقفت البطولة المغاربية لكرة القدم مؤقتا لترك المجال الى مسابقة الكأس. و بينما وصل التشويق الى أشده في المقابلات الفدرالية الأخيرة في البطولة و التي ستدلي بآخر أسماء الفرق المترشحة للعب على اللقب, جاءت مقابلات الكأس كامتحان أخير لكبار الفرق. ومن المقابلات الهامة التي تتابعونها هذا الأسبوع مقابلات أهلي بنغازي ضد الجيش الملكي المغربي, شبيبة القبائل ضد النجم الرياضي الساحلي, الرجاء البيضاوي ضد أهلي طرابلس, مولدية وهران ضد النادي الصفاقسي و مقابلة دربي تونس الترجي الرياضي ضد النادي الأفريقي.

4- ضم عدة فنانون مغاربيون أصواتهم لصوت المعارضة محتجون على قرار متابعة التجربة الفدرالية بينما اختار آخرون مساندة هذا القرار. و تعتبر آراء الفانون المغاربيون هامة و هامة جدا في اختيار هذا القرار أم ذاك خاصة لو التجأت الحكومة الى تصويت شعبي عام و كلنا نعرف شعبيتهم و أهميتهم في نفوس الشعب المغاربي. و قد نشأ صراع بين مؤيد و مخالف على أعمدة الصحف فبينما نشر "علي ديلام" كاريكاتوره اللاذع ضد نظام فدرالي, نشر " لطفي بن ساسي" كاريكاتور يستهزء باليمينين و أحلامهم القومية. و وصل النقاش الى الدول العربية الشقيقة و الى الدول الأوروبية و الى الولايات المتحدة الامريكية و غيرها من البلدان. و قد وضع وجها لوجه بعض الفنانين لنقاش هذا الأمر على عدة قنوات عالمية. و نفسح المجال الان لأحد هذه النقاشات الذي سيدور على قناتنا و سيضم المخرج و الممثل "محمد فلاق" و المخرجة و الممثلة "جليلة بكار" و المخرج السينمائي "نبيل عيوش".

أمتع الله أوقاتكم, سيداتي سادتي, ونفسح المجال للحوار ... دمتم في رعاية الله مواطنينا من كل بر و صوب في أرجاء بلادنا المغاربية.