dimanche, juin 15, 2008

ما حال أهل "بلغسفير" ؟



من ضمن بلدان نورمالاند, يحكيو على بلاد اسمها بلغسفير. يقولوا كتب التاريخ الى هالبلاد تسمات هكة لأنه في التاريخ القديم كان جاء سفير من بلاد بعيدة عابر صحاري و برور و ما خلط الى الجهة هاذيكا كان في حالة يرثى لها.

دخلوه أهل هاك البلاد و صبولوا شريبة ماء بش يرجع أنفاسه. اش جاء بيك يا فلان ... قاللهم ايا شدوا عندكم, راهو البلاد الي جيت منها وصلنا لكذا و كذا في العلم و في الفكر نعتقدوا كذا و كذا و ضرب نهارين من غير ما يتحلحز وهو يفسرلهم فرحان الي خلطلهم لبلادهم و وين يقولولوا أرتاح و الا كول حاجة يقوللهم "ما تقاطعونيش ... خلي نبلغ, خليوني نبلغ". نهارين وهو يفسر و يبين و كيف كمٌل كلاموا قاللهم " لقد بلٌغ السفير" و اتكى ميٌت و كانت اخر جملة قالها في حياته. من ثمة خذاو أهل هاك البلاد كلام هاك السفير و أهتموا بيه و زادوا نسنسوا حتى لين وصلوا لكتب الحضارة الي جاي منها السفير و تبناوا هاك الفكر. و تقديسا لهاك السفير سماو بلادهم "بلٌغ السفير" و الي ولات توة في عصر السرعة معروفة ب "بلغسفير".

هالكلام أهل بلغسفير توة ما يعرفوهش و عمرهم ما سمعوا بيه. تراه نشوفوا شنوة قاعدين يعملوا توة أهل بلغسفير. هاني نشوف في مجموعة كبيرة من الشباب لابسين لبسة الفلاحة. عادي لأن بلغسفير أهلها الكل فلاحة. لكن ماهمش قاعدين يفلحوا و الا يحصدوا ... شنوة يعملوا ؟ هاني نشوف فيهم محلقين ... شنوة يحكيو زعمة ؟ تراه نسمعوهم :

- لا يا ولدي ماني قلتلك غالط

- لا مانيش غالط

-غالط و نص

- انت غالط ... و تبلع فمك كيف أنا نحكي

- يا بهيم شبي **** **** تحكي مع **** هكة ؟

- على خاطر ما تحبش تحل**** مخك انت و جماعتك و تفهموا

- أنتوما**** و **** و ما تحبوش تفهموا

- سكٌر **** يا ****, ماني قلتلك الي العضمة هي الي جات قبل ... شبيك تشكك في كلامي

- كلامك مش معقول ... الدجاجة هي الي توجدت قبل

- كيفاش تنجم تجي دجاجة من غير عضم يا زكيم ؟

- و العضمة ؟ شكون باش يفقصها ؟ مش يلزم تكون فمة دجاجة ؟

- يا خويا قداشكم تقلبوا الفيزتة جماعة الدجاج ... مش أنت بالذات كنت من جماعة العضمة سابقا

- ايه أنا عضمة سابق, اما افتنعت الي يلزم نكون من حزب السرادك

- ههه, عضمة سابقة ؟ يعني انت عضمة حارمة ؟

- يا خويا أنا عضمة حارمة ... و تعرف شنوة نعمل أنا بيكم معشر العضم ؟ ماذابيا نرجعكم أوملات

- ايا سكر فمك يا ****, تي انتوما اناثيكم دجاج كارك

- برى امشي ****, احنا دجاجنا كيف يجيبوا العضم يخراو عليه ... أحنا نخراو عليكم هههه

- يا **** , يا *** ,انتوما مش دجاج ... أنتوما فروخ هههه

- يعطيكم **** يا **** , احنا حزب الديك الشراب و ال*يك هههه

- يعطيك **** يا ****, احنا حزب العضم الشهامة و الكرم

هاو نشوف فيهم كشاكشهم خارجة و يتخاصموا و يتعاندوا و يتمقعروا على بعضهم و الي مخبي وراء ضهره بالة و الي مخبي وراه بيوش و الي حاطط في جيبوا سكٌينة والي في مكتوبو لام ...

شنوة صاير في بلاد بلغسفير في نفس الوقت. تراه نشوفوا .... يا لطيف!! ... عمٌار مولى الكات كات رفس اليوم زادة واحد من شباب البلاد و قتله عالبلاصة ... مش أول مرة يعملها عمٌار بعد ما يسكر و يشد الثنية ...

هاني نشوف في حقولات كبيرة مهملة لا فمة شكون يحرث و لا فمة شكون يحصد. ازح, القمح مهمٌل وشايح و لاحد تلهى بيه ...كله فاسد و محروق في سبولته.

ستنى ستنى, هاني لقيتهم بقية العباد متاع البلاد ...شيوخ و نساء و صغار ...شادين الصف.

شفمة زعمة ؟

اه ...شادين الصف قدام الكوشة يلوٌجوا عالخبز و قدام باب الكوشة مكتوب "ما فماش خبز ...أرجع غدوة...كان لقيت"

11 commentaires:

أرابيـكا a dit…

هههههههه
زايد وبره محافظ نورمالمون تصدر بيان حتى انت ههههههههههه
لا شوية جدية
نتصور كان نركزو على اللى صاير في الارض احسن
شنوة قال المحافظ؟

Gouverneur de Normalland a dit…

@arabicca :


exactement ! ou youfa el klem !!!

3amrouch a dit…

شكرا وسام
مقبولة منك

Bechir a dit…

سيدنا الحاكم،

ألإنغليز والأمريكان عندهم مصطلح ينعتوا به الأفكار غير النمطية:

"Think out of the box"

إنت اليوم باش تجبرهم يطلعوا مصطلح جديد:

"Think out of the boxES"

حاصيلو زايد معاك وبرة.

titof a dit…

السلام سيدي المحافظ
شكرا لتذكير

tbib_3arbi a dit…

EXCELLENT !!! jebt fiha kil 3ada
vraiment c désolent ce qui se passe ds la blogosphere :(

mandela a dit…

أذيكا هي الدنيا...وحتى كي هربنا لمملكتك وعطيتنا اللجوء السياسي لقينلها كيف كيف نفس الحكاية زوز يتناقرو واحد فيهم أبهم من لاخر والثالث متكي فوق الربوة وفي بالوا فاهم الأطراح الكل ...تي هو حتى عمار ما هوش فاهم شقاعد يعمل

Stupeur a dit…

موش قلنا الدجاجة جات قبل العضمة
أولا خاتر نحنا السردك نحبو الدجاج
و ثانيا خرج فيها قرار رئاسي تمت تزكيتو من عند السيد المفتي

Exquiza a dit…

bravo!! pour le post , méme si ça me chagrine kon les choses prennent cette tounure!!!

علاش a dit…

قوفرنور 2019!!

yes_in a dit…

hihihi !!

5ayaal wase3 w bi thkaa ...

za3ma la3bed el koll hakka fi blad el normal walla inti akahaw w 3aladhaka to7km ???

mou7afidh à vie !