خرج المفتاح بش يحل باب داره, تلفتلها وهي داخلة الى برطمانها ... خزرو لبعضهم, حشمت و وجهها حمار ... ادخل بعضه و ارتبك ... حبشي هالمفتاح يدور ويحل الباب و يرتحهم من هالموقف المحرج ؟
تحل الباب دخل سكر على روحو ... وقف وراء الباب ... تنهد تنهيدة ارتياح , غمض عينيه : السخانة, التعفيسة في الكار, زميله الي عفس فيه, عرفه الي هنتله, سهى قصتله بونو و جارته ... محلاها جارته ...شبيه عمره ما تجرأ و كلمها ؟
تحل الباب دخلت ... ترمات على الكانابي, شدت راسها و غمضت عينيها : السيركولاسيون, السخانة , التكركير, البوليس الي شدها و تبولد عليها, نوفل مفددها في البيرو, العباد الي بش تقول صحة تقول سداف, الراجل الي يحبو دارهم يبيعوها ليه .. و جارها ... محلاه جارها الجديد ... ماصاب الي بش يقدموهولها يطلع كيفه
حل الفريجيدار خرج كعبة بيرة باردة حلها و ترمى على جراية و حل يتفرج في العربية ... نقاش, زوز يتصايحوا على بعضهم و هاك المذيع ضايع بيناتهم ... عاود تفرج في نشرة الاخبار ... عركة جديدة بين فتح و حماس ... فد ... تنرفز ... طلعلوا الدم .. هات ندور قناة تونسية ... جمهور المكشخة ... نقاش حاد في ما يخص الدربي ... غناء الفيراج ... تبسم و قال وحده ..فورتسا روما ... جات أخبار تونس ... افففف ... عاود فد ... الانترنات و ما قلة الناس
السلام عليكم .. السلام عليكم ... كملت صلت العصر ... قوات في حس التلفزة المحطوطة على قناة الجزيرة ... دمايات في العراق ... دمايات في فلسطين ... و جعها قلبها ... عينيها دمعوا ... زادت حست بالقهر ... بدلت قنواة تونس .. الكل يحكيو عالدربي ... محلاه جمهور البيانكو روسو ... جات اخبار تونس ... حست كأنها هاجت عليها الحساسية و حست كرايمها تكسروا ... سكرت التلفزة و مشات عالكمبيوتر ... الانترنات ...
حل المدونة متاعو الجديدة ... يلقى تلاثة تعليقات ... قلبه دق بالفرحة ... قراهم بلهفة ... ناس تشكر فيه .. و واحد يسأل فيه في ما يخص موضوع التدوينة و انونيم ينبر ... حس روحوا .. انسان هام .. وهم في اجابة الانونيم بطريقة تخليه يضحك عليه خلق ربي
حلت المدونة متاعها ... ثمانية تعاليق ... قريب تنقز من الفرحة ... هاو الناس الي يفهموك ... حست صوتها مسموع و حست بفرحة كبيرة .. و جاوبت هاك المعلقين الي يلوجوا في ربط علاقة معاها بكل حزم و بخستهم و هزبتهم قدام الي يسوى و الي ما يسواش.
تقابلوا في الدروج ... عسلامة ...يسلمك ... شفت مالا سخانة ... أي عندك الحق سخانة تقتل.
دخل للدار و هو يسب و يلعن في روحوا ... ما عرفش علاش قدام البنية هذي يضعف تماما و يفقد قدراته. هاو في التدوين يصول ويجول, لسانه داير برقبته و الي يجبدو من هاذوكم الحثالات المكشطين يعطيه لين يقرس.
دخلت للدار و قلبها يدق ... حست بالحسرة و قالت الي اخر مرة يشوفها و هي عزباء ... وقت الي ترجع من الكونجي في البلاد .. ترجع معرسة ... مانيش انا الي بش نكلمه .. و الي عمل ربي باهي .. حتى رشاد خطيبي ناس ملاح و يخاف ربي ... مش كيما هاك الحرافيش الهمال الي نهار كامل نصطكلهم بش يترباو و هوما مازالوا يتجربعوا ...
عسلامة جاري ...قالو الراجل .. جاوبو ببرود يسلمك ... عمره ما هضموا هذا السيد ..شافها طالعة الدروج و كرشها قدامها ... قداش قعر راجلها مخليها واحدها في الدروج و هي حبلة ...
دخل للدار ... يلقى مرته متحيرة عليه ... وين كنت الى توة ؟ كنت نعمل في كعبات مع الولاد ... ما عجبهاش كلامه ... قعد مخه في جارته و كرشها الي قدامها ... طلعتلو في مخو ...ضحكت مرته..اش تعمل يا ولدي ؟ نحب بايبي توة توة ...
رد بالك يعيش ولدي من هاك الكفار ... يمشيوش يغروا بيك نهار من نهارات ؟ راهم يلزمهم يتشنقو الكل كان جت الدنيا دنيا ..
رد بالك يعيش ولدي من هاك المكشطين ..راهم مخ مسكر و تخلف البلاد منهم ... كان جات الدنيا دنيا رانا رميناهم في الحبس ...
وربى ولدو عالكره
و ربات ولدها عالكره
و نهارة الي سمعوا بالي ولادهم ماتو في الحرب الاهلية الي قامت بعد سنين ... بكت هي و بكى هو و زادت كرهت الكفار و زاد كره المكشطين ... و لا عرف لا هو و لا هي ان الحكاية بدات ... بقصة حب