jeudi, juin 12, 2008

ثقافة ال404 و الزلاط و سواد الصبورات


في العام الفارط, كنت تحدثت بمناسبة يوم التدوين من أجل حرية التعبير عن ثقافة ال404 و الزلاط (هنا) ... و للأسف صديقنا عمار, سائق ال404  في عوض يفهم روحو , مازالت هاك الكشطة الي لاففها على مخوا عاملة عازل و عامل زوز و الا تلاثة  مو دو باس على هاك المخيخ الي يكسابوا ... بحيث الكعبتين نورون الي عندو يستعمل فيهم باش ينزل عالأكسيليراتور و يدهس أكثر عدد ممكن من المواقع

و بما انني نفد كيف الواحد ما يخدمش خدمتو على قاعدة  ... هات نتبرعوا لعمك عمار بنورون و الا زوز راهو مسكين محتاج و قليل في مخو

يا سيدي أولا ... علاش تبيعولنا في اشتراكات الأنترنات باش تقعدوا من بعد اتعبوا في رواحكم و تقراو في الي تكتب الكل و هاو قصيتوا هالبلوغ و نسيتوا لاخر ؟  و هاو واحد مشاغب كتب على احصائيات عالمية تضر البلاد و ما شلقتوش بيه , و هاو لاخر حط عالأنترنات مقال جريدة أجنبية , و هاو واحد اخر معارض -حاشاكم- عبر عن رأيه ... علاش الخساير و  المصروف الزايد من أنجنيورات و غربال متكلفلكم ملاين زرقة و كسكاس و مقفول ؟  و أنتوما حارقين عصابكم ؟ علاش ؟
تي ماهو طيشوا عليكم هالبلوة متاع الأنترنات جملة وحدة ... و الا يا سيدي ماكم مخليينها بش القورة وقت الي يجيوا ينبهروا بما ارتقت اليه بلادنا من  رقي و ما فتأت تعتلي المراتب الأولى في شتى المجالات ايمانا منا بضرورة كسب رهانات المستقبل ,راجين ...الخ  ياسيدي كيف عاملينها هالأنترنات كارت بوستال بش يضهررلهم القورة الي أحنا قافزين ... هاو أنا عندي اقتراح : تي ماهو هوما ابتدعوا الأنترنات ,أحنا نقصوها و نعملوا شبكة أخرى نسميوها الشبكة الجربوعية  - أهوكا بش ما نشلقوش الي نقلنا عليهم الشبكة العنكبوتية- و نسميوها التونسنات

بالله مش فكرة طيارة ؟  و زيد ما تتكلف شي, تي حتى حقوق الفكرة ما ينجموش يطالبونا بيها مادامنا عايشين في بلاد -و الحمد لله- ما تستعرفش بحقوق المؤلف و شاشية هذا فوق راس لاخر و الكوبي كولي عامل مسد في كل المجالات

ايه, تقولولي شنوة نلقاو كيف نبحروا (بالله ركزولي على كلمة نبحروا) ؟ 

في البرنامج تلقاو :ه

,  أخبار وطنية  تساهم في رصدها ثلة من صحافيينا الأبرار , الأوفياء  و الي عمرهم لا  يوجعونا بكلمة مايقولوا علينا كان الكلام الباهي يعطيهم الصحة 
وعوعوع.عين-ما-تضرنا.تن
أهوكا بدلنا ال  تلاثة دوبلفي ب وعوعوع ...أولا باش ما نشلقوش و ثانيا للحفاظ على الطابع التونسي و ابراز طاقاتنا في التزويك

تحليلات سياسية و أجتماعية و رياضية و ثقافية و في التاريخ و الجغرافية و علوم الحيوان و اخر تقنيات التوليد و عدة علوم منها العلوم الصحيحة و أغلبها العلوم الي مش صحيحة جملة, مع محللنا الوحيد برهان بسيس على الموقع التالي 

وعوعوع.برهان-خيارنا-الوحيد.تن


و اضافتا الى بث برامج قنواتنا الوطنية يمكن للجماعة الكل أنها تبحر على الموقع التالي لمشاهدة اعادة للبرامج الهامة كبرنامج عالم الحيوان و المسلسل البيروفي (ضهر الي فما مسلسلات تتكلف أرخص من المسلسلات المكسيكية) و برامج توعوية بش الناس الكل تبطل الدخان

وعوعوع.عاود-كي-اللوبانة.تن


كما برمجت على الشبكة الجربوعية تونسنات موقع لهالة الركبي تتحدث فيه عن السعادة الدائمة الي يعيشوا فيها مواطنينا في مناطق الظل (وين الشمس تكوي يا بوقلب) و رغد العيش و خصال هؤولاء من جود و كرم و عاداتهم و تقاليدهم و كيفاش ي***  الزكرة 

وعوعوع.برنامج-كل-ما-تاكل-بعضها.تن


و هكا يا عمار و أصدقاء ال 404 تكونوا ربحتوا ماديا و ربحتوا راحة مخكم و أنا من هالمنبر أول مساند للشبكة الجربوعية كان تسترجلوا وتسكروا الأنترنات ضربة وحدة ... و أنستوا بعقولاتكم ... 

شعار الشبكة الجربوعية : هي بحرت ,بحرت ...خلينا نبحرو على تونسنات 




21 commentaires:

mariouma a dit…

ychaya7 ri9ek ya gouverneur
9taltni betha7k. yatik essa7a
ou ena ensendek fi fekret achabaka aljarbou3ya. heyla elfekra!!!
ama ejme3a mta3 el404 bech ywaliou blé 5dem mséken :(

kissa-online a dit…

allah yetwallak ya gouverneur
un des meilleurs textes que j'ai lu au cours des derniers mois

framboise a dit…

Tbarkalla 3lik ya gouverneur, vous m'avez imprisionnée.Ana men ouel ennas elli nchaja3 Al CHABAKA ALJARBOU3IA. Choft 3ammek 3ammar sensar Zabbala wsamsoum. wallah Kan 3iiiib.
Could you visit me at http://yfarrejrabbi.blogspot.com/.
Thanks in advance

Gouverneur de Normalland a dit…

@ Mariouma

ti mouch mouchkel ya Mariouma, el jma3a ma you9o3douch battaala, tou nchoufoulhom khidma fil 9Assan : y9oussou el tssaker fel car, walla 7ajjama y9oussou el ch3ar , walla ba7Aka y9oussou el bhar, walla tahara y9oussou ...

lé lé, tahara lé, 3ala khater na3refhoum, dima y7abbou y9oussou akthar mel lézzem :D

Gouverneur de Normalland a dit…

@ kissa online :

chokran mon ami, hedhi chhada na3taz biha.

Gouverneur de Normalland a dit…

@ Framboise

mabrouk 3lik el moudawna el jdida, ou mar7ba bik fi el fadhhaa ( elli bin hwa ou fdha) el tadwini.

3amek 3amar yssou9 fi 7aalet soukr wadha7, ya3fass 3al akhdhar wal yaabess.

dkhalt el modawant zabbala, ma fhemtech 3lech 9Assouha ?????

3amek 3amar bal3ou , c sur

Bechir a dit…

وحدك يا قوفرنور... كيف العادة ديمة تبدع

Gouverneur de Normalland a dit…

@ Bechir :

merci mon ami et a bientot

Badiâa بديعة a dit…

ya3tik essa7a 3la hal post

Werewolf a dit…

أنا نحب نعاتبك سيدي المحافظ على خاطرك قاعد تشجع فينا على اللوغة الخشبية و إلا انتي فاش قام عليك تكتب في تدوينة باهية باش تلم الشكر هذا الكل... نحب بالمناسبة نلانصي كويز و اللي هو في الحقيقة سؤال طلبي: شكون أول مدون أطلق اسم عمار على سائق الكات صون كات؟

chanfara a dit…

سيادة المحافظ، باعتباري نائبا سابق لكم أطالب سيادتكم بالسبق و إعلان قيام وزارة جديدة تحمل إسم الشبكة الجربوعية و بإمكانكم طلب المعونة من الشقيقة تونس لما لها من سبق و خبرة في هذا المجال


حاصيلو وحدك يا قوفرنور

:)))

Anonyme a dit…

bravo, chaaab3a dhohk
j'ai tellement rigolé pour "borhane bsssaysss" walla l'autre jour je l'ai vu fi barnamej bilmakchouf yahki ala koora, tayara
houwa + hela errokbi thounay al marah

البرباش a dit…

و الكورة يا قوفرنور... ما عندهاش بلاصة في البحر هذا الكل

وين بش نفجروا الطاقات المكبوتة متاعنا يعيشك... و نتنفسوا

أرابيـكا a dit…

اش نقلك ؟؟؟ انحب انزيد موقع للشبكة الجربوعية
وعو عو ع.مولدي-القلم.تن
موقع للصحافة فيه كل مقالات التثمين والترهدين وقلة الدين والكذب اللى عامل ساقين عريان قلم وبرشة لوح عاد

zaman a dit…

ملا جو عندك هوني يعطيك الصحة المدونة متاعك تعمل 66 كيف

Gouverneur de Normalland a dit…

الى بديعة

شكرا يا بديعة على الزيارة

Gouverneur de Normalland a dit…

werewolf

عندك الحق صديقي أما خوك طايح مونك و كيف نسمع شوية لغة خشبية متاع هزان القفة نشم عليكم ريحة البلاد

هههه

شكون الي سماه عمار صاحب ال كات كات ؟

أنا نسيت.. ما عنديش الأجابة

Gouverneur de Normalland a dit…

الى الشنفرة


بات من الضروري احياء العمل الساسي و الوزاري النورمالاندي

و من بين أبرز الوزارات يلزم نبعثوا
وزارة الشبكة الجربوعية و نطوروها باش هكا انجموا نبحروا الكل


هي بحرت بحرت

Gouverneur de Normalland a dit…

@anonyme

sa77A ou bechffa :)

ou nchallah dima zahi fi bledek el iftiradhia Normalland

Gouverneur de Normalland a dit…

الى برباش و ارابيكا

لا عاد أنتوما البلاد النورمالاندية معملة عليكم باش تتلهاو بالوزارة الجديدة متاع الشبكة الجربوعية و ما فيها باس كان تزيدوا الكورة أهوكا الناس يلقاو كيفاش يفشوا غبضهم و كيما قالت أرابيكا نزيدوا موقع لسي المولدي المباركي باش تكتمل شبكتنا على أحسن وجه

أيا الى العمل

Gouverneur de Normalland a dit…

الى زمان


شكرا صديقي و دمت مواطنا نورمالانديا

و ما فيها باس تعمل الدعوة النورمالاندية باش تزنس أصدقائك الكل و يوليو نورمالانديين كيفك