mardi, octobre 09, 2007

شوفلي حل : الدكتور سليمان الأبيض يدقز عند خالتك جنّات

في بيرو الدكتور سليمان

- د.الابيض : ددو ... يا ددو ...بالله وينو هالسي القوفرنور ؟ عندو توة نصف ساعة روتار عالموعد...

- ددّو : دكتور حشمت باش نقلك ... خالتي جنّات جات هوني و قنعتو باش يمشي عندها ...

- د.الابيض : عجايب ؟ القوفرنور تجد عليه الحكايات هذية ؟

- ددّو : قعدو يتعاندوا و في الاخّر قاللها "هاني باش نتبّع السارق لباب دارو"..

- د.الابيض : هي هي هي ... نعرفوا هذاكا ..يموت على داه ... لازم تبعها باش يكشف رواندها ... و يضهرلها كذبها ...أسمع ددو ... هاني ماشي نشوف وين وصلوا ... كي قدّر ربي و ما فماش كليونات ... نقصد ... دي باسيون ...خلي الواحد يضحك شوية ...

- ددّو : حاضر دكتور ... كان جاء حد تو نبعث سبوعي يقلك ...

- د.الابيض : لا علاش ... تو تشلق بيه خالتك جنات ب ..شنكة ترافل ...هي هي هي

في دار جنّات العرّافة

- عزّة : خويا سيمان ؟ اش هالخطى السعيد ... أوّل مرة تجي بحذانا

- د.الابيض : عسلامة عزة ...حبيت نطل عليكم ... ماك تعرف حال رمضان ( يعلي صوته لتسمعه جنّات) ... و ال لي باسيون متاعي ...فر ...فر ...قالك مش باهية البسيكولوجي في رمضان ... راهوا رمضان شهر الكارطة

- جنّات العرّافة : أيا صلي عالنبي ... الكليون متاعك هو الي قعد يعاند وشد الصحيح باش يجيني نقرالو الكارطة ...

- د.الابيض : هي هي هي ... نعرفو راسو صحيح و يموت عالبونطوا ...امالا ...عطاك على راسك ...هي هي هي

- جنّات العرّافة : لا بالعكس ...شكرني و عطاني بقشيش من فوق !

- د.الابيض : عجايب ؟ القوفرنور يصدق الحكايات هذية ؟ وين مشى ... يلزمني نستفسر.

- جنّات العرّافة : لا مشى ... فمّا فروخ في الحومة من بكري وهوما يسبّوا في الدين و في ربّي في هالشهر الفضيل ... هبط يحكي معاهم ...

- د.الابيض : يحكي معاهم ؟ ضاهر فيه خج القوفرنور ! تو يطيحولو قدره ! تي هوما ما يعرفوش يحترموا رواحهم ..باش يحترموا الاخرين ؟؟؟ ما عليناش مش هذا موضوعنا ... تراه كيفاش سحرتوا سي القوفرنور

- جنّات العرّافة : اه ... احترم روحك سي سليمان ... بالك قالولك عليا سحّارة محّارة ... أنا عرافة بوراقي

- د.الابيض : تري تري بيان ...كيف الدولة تشجّع في الناس الي كيفك ... ما عندي ما نقول ... مازال ما رقّوكش

عرّفة urgentiste

و توليلنا دقّازة اد الدنيا ؟

- جنّات العرّافة : سي سليمان كان جاي تعدي في وقيّت راني محششة ...

- د.الابيض : اللطف عليك من الحشيشة يا باش عرّافة ! فسّرلي تراه ... كيفاش عديتها ... نقصد ..كيفاش أقنعت القوفرنير ؟

- جنّات العرّافة : تخاطرنا ... كان تطلع دقازتي صحيحة ... يخلصني بالوافي ... و كان تطلع غالطة ..أنا نبطّل الخدمة

- د.الابيض : تبطّل الخدمة ؟؟؟ ويني الكارطة خليني نقصها

- جنّات العرّافة : أيا يا سيدي ...أعقد النيّة ...

- د.الابيض : هاي الحية هبطت ... زعمة زبير بية باش يهبطوه رونترون ؟ هي هي هي

- جنّات العرّافة : لا ...هذيكا سبعة ..معنتها عندنا أحنا التوانسة احتفال ...احتفال كبير

- د.الابيض : ماني علّقتها التصويرة ... اش يحبّو عندي ؟

- جنّات العرّافة : تي لا يا سي سليمان ...الأحتفلات يعني العيد ...العيد الصغير

- د.الابيض : اه ...تري تري بيان ... مشى في بالي العيد الكبير ...موش الكبير متاع العلوش ..الأكبر من الكبير ...

- جنّات العرّافة : الخمسة هبطت ... ليلة العيد باش ترقد الخمسة ... و ريت الحسنات الي عملتهم في رمضان الكل ...يا سيدي تفديهم ليلة العيد ...أول حاجة تعملها بعد ما يتكلم المفتي ...

- د.الابيض : تي باهي باهي فهمنا ...امشيلي لصلب الموضوع

- جنّات العرّافة : تقوم السبعة واش تحضر روحك و تدوّش باش تخلط على صلاة العيد ... يا اما ما تخلطش و الا تخلط قد قد على الصلاة .. و زيد تضيع فيها تنسى كيفاش تتصلى

- د.الابيض : بالحق ...كي ندخل نصلي صلاة العيد نبدى نخزر ...هممم ...واصل يل جنّات واصل

- جنّات العرّافة : تروّح للدار ...تبوس الناس الكل بوستين ... تتقزمط في كوستيم و كرافات و صبّاط ضاربك ... و بناتك و المرى ضاربينك بلسانهم و يقحرولك ...في ما عطيتناش باش نشريو حوايج سيني ... و ...

- د.الابيض : و ديما أحنا نلبسو البوضرّوح وضحكة قدام الناس الكل ...نعرفوا مليح هالديسكور و هاك التخرنين

- جنّات العرّافة : بالطبيعة باش تبدى تتنرفز و زيد الي داخل جاي يبوس و الي خارس خارج يبوس

- د.الابيض : فعلا, فعلا ... وهاك الجوجمة ..و هالك الفروخ يتعاركوا على العب و تركح فيها البونية ...

- جنّات العرّافة : أيواش هذاكا اش قاعدة تقول الكارطة ...الفروخ يبداو يتضاربوا باليدين و من بعد الكبار يوليو يتضاربو بالكلام و رميان المعنى ... و الجو يتكهرب ... وقتها اش تعمل انت ؟

- د.الابيض : اش نعمل ؟ نحل التلفزة فماشي ما ينقصوا لهوة ببعضهم و يهدى الجو ...

- جنّات العرّافة : ايواش ...تبدى تلوج على حاجة تشدهم في التلفزة ... و أوّل قناة تحلها هي

- د.الابيض : قناة سبعة بالطبيعة

- جنّات العرّافة : خلي نقلبوا الكارطة و نطلّعلك شنوة تلقى في قناة سبعة ...الكارطة تقول الي باش اتطيح باز على أغنية "الليلة عيد" و شوية أغاني من الحضرة ... و كان ما مليتش يجيبولك برنامج فيه فريق المسلسلات الي تعدات و يجيبو كوثر الباردي و راجلها يحكيو على النجاح الجماهيري المنقطع النضير الي شهدو برنامجهم ...

- د.الابيض : باز باش نبدّل ... أولا باش ما يركبنيش السكر ثانيا باش ما تقولش وحدة من النساء لوحدة أخرى "كان تزيد تسمن الاما تولي كيما كوثر الباردي" و توليلي بكاء و نويح في الدار ...

- جنّات العرّافة : كي باش تبدّل باش تبدى بالشانات العربية المعروفة ...

- د. الأبيض : فعلا فعلا ...ايفكتيفمون ...

- جنّات العرّافة : هاي الكارطة باش تقلك شنوة فيهم ... يا اما فيلم "الرسالة" و الا وحدة من المسرحيات هذوما "شاهد ما شافش حاجة" , "مدرسة المشاغبين" , "شارع محمد علي", "العيال كبرت","رية وسكينة" و الا "الصعايدة وصلت"

- د.الابيض : ايييه ! شنية هالغلبة هذه ...هذوما شايفينهم مليون مرة ...حافظينهم حفاظة

- جنّات العرّافة : هذاكا علاش ... وحدة من البنات باش تخذ الكوموند و تحط شان متاع كليبات عربية ... و بي مناسبة العيد ...باش يتحلّو في العريض هاك الشانات و يبداو يخرجوا في كليبات العرى و الزرى و قلة الحياء

- د.الابيض : لا وقتها نوقفهم عند حدهم و مت نخليهمش ...يجيني خالي ... و أنا نحشم من خالي ...نحمّر عينيا و نعيط عليهم " ياخي ماعادش تحشموا ؟ بدلوا فرانسة" ...

- جنّات العرّافة : هذاكا اش قالت الكارطة ... صحيح الي مازالت الحشمة في فرانسا و شاناتها ... أما وين ما تبدّل ما تلقى كان اشكون يحكي على ربحهم ماتش الرقبي متاع الجمعة الي فاتت ...

- د.الابيض : ايييه ... حتى نهار العيد مش باش يسيبونا على هالماتش المحنون ...نعرفهم الفرنسيس كيف يكبشوا

- جنّات العرّافة : اش تعمل انت وقتها ؟

- د.الابيض : نعمل روحي شايخ و انا نغلي من داخل و راسي يغلي من برة و نقعد نمرطق و نبوس حتى نلقى فرصة نزرف و نمشي نتكب ...

- جنّات العرّافة : سبحان ربي ... نفس الكلام الي قالوا القوفرنير بالضبط ...أيا تخلصني توة و الا تستنى حتى تثبت نهارة العيد ؟

- د.الابيض : لا ..هاو فلوسك ..غير بجاه ربي أخطاني نهارة العيد ...حتى حد ما نحبو يدور بساحتي ...مانيش ناقص أنا ..

- جنّات العرّافة : سي سليمان ...بالسلامة و انشاله عيدك مبروك ...

(يخرج غاضبا)

- د.الابيض : وهو كذلك ...وهو كذلك ....

12 commentaires:

FREE-RACE a dit…

:)))
آش عملت مع الفروخ اللي يسبوا في ربي اللوطة ؟
أسمع, الحلقة اللي فاتت جابوا وحيـّــد وليدها أسمه "الشبروش"... هالشبروش رغم أنه "شلواش" و ديما مقطع مالحاكم عالعمايل الزرقة اللي يعمل فيهم...إلا أنه ظاهر فيه كيما "روبن هود"...و ما يحملش العوج... لذلك ننصحك باش تستعين بخبراته في حال ,لا قدر الله, تعرضت لتصرفات متاع شارع...
راني نعرفك يا قوفرنور ياسر ديمقراطي و ما تحملش تتعامل مع اللي يجي و كيما يجي

gouverneur de Normalland a dit…

@free-race

اه حكايتي مع الفروخ هذيكا حكاية في حلقة
وحدها...نشكرك على اعتباري ديمقراطي ...أنا من طبيعتي نحب و نحاول نتعامل مع الناس الكل -لأنني أعتقد في الأنسان- لكن صحيح الي موش تعامل كيما يجيو خاصة كيف تدخل فيها نوايا مبيتة

arabicca a dit…

حاكم بأحكام النورمالاند
بعد تقديم فروض الطاعة كالعادة حبيت ننصحك والنصيحة من الدين تبعد على التصريحات السيابسيكولوجية من شاكلة "خاصة كيف تدخل فيها نوايا مبيتة" وذلك خوفا عليك من الفتنة والعياذ بالله ويمشيش الشعب (بالضمة) ياخو في خاطرو منك
وبربي ماذابيك الحلقات الجايين ادخل صطوكو في اللعبة راهو حشاشة قلب الشعب (باقي بالضمة) وهكة تربح جمهور جبار
اى عيدك مبروك

Tarek Kahlaoui a dit…

والله أنا هذا شوفلي حل ما تفرجتش فيه بشكل كافي بش انجم نفهم الحوار و خلفياتو... أما راني مازلت شادد الصحيح في حكاية نادي السينما الافتراضي

gouverneur de Normalland a dit…

@arabicca

عندك ألف حق يا أرابيكا و انشاله هالقوس نغلقوه بما أن البلاد النورمالاندية بلاد محايدة و ما عندها علاقة بالتحالفات و التكتلات...لكن برى لوّج شكون يفهمك ..ههههه

بالنسبة لصطوكو (رغم أن الشخصية اسمها سبوعي و انو من المفترض أنه كان صطوكو في مسلسل سابق...لكن "الممثل" ما يعرف يلعب كان في قلم واحد فلم يتغيّر .اذا تسميته لا تهم) بلادنا تعج بالصطوكوات بكن ماخذة خاطر فيك -للّة- انشاله نحضروا حويجة في هاك السياق

و عيدك مبارك ههههههه

gouverneur de Normalland a dit…

@tarek Kahlaoui

انا زادة -كيف ما سبق و تحدثنا- عاجبتنبي الفكرة لكن تامشكل و العائق الوحيد هي حكاية وقت خاصة و انا مبلّع هالأيامات

لكن انشاله أول ما نتفاضى شوية نبداو

abunadem a dit…

والله عجبتني برشة حكاية السبعة الحية يعطيك الصحة على النقشة

explosiv a dit…

moi je sens que tu fais allusion par ce post au successeur de hatem belhaj lol.

ce post est un régal ;)

gouverneur de Normalland a dit…

@ abunadem :
شكرا جزيرا ابا ناظم. جيتك لنورمالاند غالية و عزيزة

@explosiv

و الله اش تحب نقلك ...حشمتني على روحي ...شكرا جزيلا و مرحبا بك في نورمالاند بلادك الافتراضية

jiji a dit…

اهلا بالجميع
انا نخمّم نعمل siteweb لسلسلة شوفلي حل كرد جميل لهذا المسلسل الرائع
شكون يعمل "كوراج" ويخدم الموقع معايا؟

gouverneur de Normalland a dit…

@jiji : why not ?

jiji a dit…

pour qui veulent m'aider voir:
http://chouflihall.googlepages.com/home