mardi, octobre 23, 2007

خرافة البندار و العسّاس


يا سادة يا مادة يدلنا و يدلكم الخير و الشهادة.

يحكيو على راجل يموت على الموسيقى و خاصة منها الاحتفالية الى درجة أنه قرر أنه يخدم في فرقة حضرة اختصاص تبندير و تصفيق و هتافات ساعة ساعة. بدى خونا يترقى بالشوية بالشوية و يفصع على زملاءه البندارة و يتميّز عليهم بزنس صوت وبزنس لغة خشبية تعمل ستة و ..نقصد تعمل سبعة و سبعين كيف. ايا كي شافوه حاذق بعثوه في ستاج بعام في أوروبا. روّح صحيبنا بعد عام وهو حاسس روحو الي فسد كيف الخل, خاصة و ان اللغة الخشبية في أوروبا مش متداولة. روّح يجري ساقيه أعلى من راسوا, ووقف قدّام أوّل مقر متاع بندارة باش يرجّع الفورمة.

لقى روحو قدام المقر خايف. ساق القدّام و ساق التالي : حس روحو مش في فورمة "خشبية" كبيرة وخاف من تأثير هاك العام الي عداه البرة و تفجع و استلبس وهو يتصوّر في زملاءه يضحكو عليه و الا يقحرولوا اذا ما لقاش ضربة البندير متاعو المعتادة. حب يجس النبض قبل ما يدخل و يتستي مدى فورمتوا. تلفّت لقى عسّاس هاك المقر راكز كرسي و كاس تاي أحمر. قال خلي نجرّب مستوايا معاه.

البنادري : الله يعينك يا بابا ...

العسّاس : الله يسلمك ......

البنادري : تعرفش بابا شنوة موضوع الاجتماع متاع اليوم ؟ يقترحوا افكار جديدة زعمة ؟

العسّاس : لا ! هي هي هي (مات بالضحك)

البنادري : امالا يعملوا في النقد الذاتي ؟

العسّاس : لا ... حاشى وكلاّ ! شبيك ؟ وين عايش ؟

البنادري : شنوة يعملو مالا ؟

العسّاس : يثمنوا !

البنادري : تقصد يسبّعوا ؟

العسّاس : لا لا ...هذه فازة جديدة مازالت كيما خرجت ...يثمنوا ..

البنادري : متأّكد يا ولدي بالكشي تقصد يثنيو على المسؤولين و يشكروا فيهم ؟

العسّاس : يا ولدي ما تعاندنيش ... سمعتها بوذني ...قاعدين يثمنوا !

البنادري : عجايب ! متأكد ؟ بالكشي سمعت بالغالط و هوما قاعدين يخمّسوا على انجازاتنا العظيمة ...

العسّاس : خمسة و خميس على انجازاتنا ....

البنادري : بالكشي قاعدين يعملو في التوحيد ؟

العسّاس : يا ولدي ضم فمك لا نتكرفطوا عالصباح !

البنادري : لا نقصد السلطة الواحدة و المجهود الواحد و الاعلام الواحد ...

العسّاس : لا الاه الاّ الله ! شبي راسك كاسح ؟ متأكد الي قاعدين يثمنوا

البنادري : غريبة ...ما نعرفش انا حكاية "يثمنو" ...اه ..بالكشي قاعدين "يربعوا في الشتاء" فمّاشي ما ينسّيو و يتناساو أضرار الأمطار ؟

العسّاس : يا ولدي يثمنوا ... يثمنوا في القرارات الرائدة ! يضهرلي فيك يلزمك ايتود في اللغة التبنديرية !

من حينك رجع صحيّبنا منين جاء.سكّر على روحو داروا. شرى الجرائد الكل, حل تونس سبعة و شد بنديره في يده و حلف بالحرام ما يخرج من الدار كان ما يرجّع الفورمة.

14 commentaires:

3amrouch a dit…

انا اسمي ماجد...ماجد لعبة خشبية

gouverneur de Normalland a dit…

@ 3amrouch

ماجد...موهبة شعبوية...ماجد...ه

Stupeur a dit…

7atta houa na99ar ezzahweni esmou : woody wood pecker!

ma7lena 3aychin fi 7elm awled sghar! :)

malla kwemik ( pluriel de comiques)

Tarek Kahlaoui a dit…

ما نعرفش علاش ما فماش يسدسو، يثلثو، يتسعو، يعشرو... هذية الكل بلايص فارغة غير مستعملة

Walid ben omrane a dit…

Aya inti srafet srafet kaml choufelna 7kayet eri3aya el mawsula w el maqtu3a.

gouverneur de Normalland a dit…

@ stupeur

توة بركة فهمت علاش نقار الزهواني بعد ما يعمل هاك الضربات الخشبية...يموت بالضحك

و يقول
هاهاهاها..هاهاهاها..هيهيهيهيهي

gouverneur de Normalland a dit…

Tarek Kahlaoui :

ماهو يا سي طارق مازالو قاعدين يبدعو و يخلقو في اللغة الخشبية..و اذا مازلت ما سمعتش بالارقام هذه الناقصة ...تو تسمع بيها عن قريب...ه

gouverneur de Normalland a dit…

@ Walid Ben Omrane :

هذوكم تو نجيهم في الحلقة الجاية متاع مسلسل "لغتنا الخشبية"ه

;)

Clandestino a dit…

اولا باش نثمّن التدوينة الثمينة هاذي
و نسبعو عليها بالكمون ...
ثانيا ملاحظة تقنية
انا كلمة بندار تفكرني بالباكستان و الهند و ساعات بالامير السعودي
احنا حضرة الحاكم في تونس نقولو بنادري و جمعه بنادرية
(على وزن مزاودي و مزاودة)
و اكاهو
ايا ربي يعينك

gouverneur de Normalland a dit…

@clandestino

أهوكا يا كلاندو موجودين الزوز

بنادري تدل على مهنة فهي على وزن "صنايعي" كيما "مزاودي" و "صبابطي" و فطايري الخ

اما بندار فهي على وزن فعّال و الفعّال تعني الشدة في هذاكا الفعل كيما "هرّاب" مثلا الي يكون معنها شدة الهرب و تأديش نفس معنى "هارب"ه

هذايا الكل باش نقول الي انت مش حارق برك بل أنت "حرّاق"ه و زادة "حرارقي" (صنايعي في الحرقة)ه

:p

explosiv a dit…

أنا بديت نشك إّلي يجي نهار و نغلبو فنلندي و السويد في إنتاج اللّوح...
واصل يا قوفرنور ;) .

gouverneur de Normalland a dit…

@ explosiv :

شكرا يا "سريع الألتهاب" على ثنائك و خمسة وخميس على تجارة اللوح في بلادنا
...أيا تجي نثمنوها تجارة اللوح في بلادنا ؟

:p

yes_in a dit…

BRAVO BRAVO !!

kan ja 3andi ellougha rani 9addamtlek ja2iza khachabiya !!

ta7iyyati sayyed el walli
hadha min 7osen akhla9ik
la9ad abda3t kal 3ada
...

gouverneur de Normalland a dit…

@yes-in :

merci beacoup mon ami et tu es bienvenu a Normalland !