samedi, septembre 29, 2007

شوفلي حل : القوفرنور في عيادة سليمان الأبيض


د.الأبيض - تنجم تقلي ... كيفاش تشخّص مشكلتك

القوفرنور - مشكلتي يا دكتور اني ...نشوف في الدنيا و كأني واحل في وسط مسلسل

د.الأبيض - ايوااه ؟ واحل ؟ كيفاش واحل تراه ...زيد فسرلي

القوفرنور - نحس في روحي مخنوق ... محسور ... كيما الانسان الي يبدى محصور في زنزانة و الا في دولاب قد النتفة ...

د.الأبيض - الله لا يجعلنا محصورين ...خاصة في دولابات بيوت نوم جيراننا ...هي هي هي

القوفرنور - مخنوق يا دكتور سيمان ...

د.الأبيض - سليمان من فضلك .... باش تدخلني في الهلوسة متاعك ؟ ... تنجم تقلي ...من وقتاش ...وقتاش تراه ...هالحالة ...ماكنتّك ؟

القوفرنور - من الي صغير ... اما كانت سوبرتابل ... توة ما عادش تنطاق...

د.الأبيض - تري تري بيان ...خلينا نبداو من البداية ... يا سي الياجور ...نقصد ...القوفرنور ...في اناهي نوع من المسلسلات كنت تشوف روحك واحل وقت الي كنت صغير ؟

القوفرنور - في صغري كنت نشوف روحي في السريات متاع الامريكان ... كيما سكيبي و لاسي

د.الأبيض - ايه ...يا حسرة على لاسي ...اه ... و فليبر الدنفير ...

القوفرنور - ايه و فليبار ...ايه يا حسرة يا زمان ..كنت زاهي ..ما عندي علاش نخمم ... كان عالطبيعة و المحافظة على المحيط و على الحيونات الايلة للأنقراض ...

د.الأبيض - صحيح صحيح ... هذايا قبل ما يجي سي ...لبيب و بلبزها ... وهو من حاوية لحاوية ... و من حاوي لحاوي ..في الوزارة ...

القوفرنور - و من بعد يا دكتور ...تعدات هاك الفترة و جات فترة المراهقة ...

د.الأبيض - ما تقوليش حتى في هالفترة حسيت روحك متسلسل في مسلسل

القوفرنور - بالمجد يا دكتور ... اما في هالفترة لقيت روحي و كأني في مسلسلات جيغا ...تعقل عليها جيغا ...

د.الأبيض - ايه ايه ...كنت مغروم ...نقصد ...المدام ..المدام ... كانت اتتبع فيهم ... و انا ساعة ساعة نتفرج معاها ...

Les années college القوفرنور

و غيرها ... في الفترة هذيكا حسيت روحي و كأني عايش في وسطهم ... نفس المشاكل و الهموم ...لكن من شيرة اخرى كان عندي –كيما ابطال هالمسلسلات- برشة طموح و برشة احلام

د.الأبيض - و كنت مخنوق في هالفترة ..؟

القوفرنور - لا ..لاباس ... الخنقة جات من بعد ...

د.الأبيض - كيفاش تراه ؟

القوفرنور - من اليوم الي حسيت روحي في وسط مسلسل مكسيكي ...

د.الأبيض - شنوة بابا خويا ؟ كيفاش مسلسل مكسيكي تراه ؟ زعمة... وليت تحكي بالعربية القحة ... و الا قول الي في هالنوع من المسلسلات معادش يناسبهم لفظ "قحة" يلزم لفظ ما أقوى ...نحفظوهولهم بال"ب" و ال"ت" ...هي هي هي

القوفرنور - لا مش هذايا وجه الشبه ..لقيت روحي كيما في ...ديناستي ... و الا فالكون كراست ...ما نشوف من الدنية كان هاو هذا ورث ...هاو هذا كسب شطر البلاد ...هاو هذا دار عالمرمة و الي فمة ... هاو هذاكا طلع مهف عالناس الكل و يتلوعب بالقوانين كيف ما يحب ... الحاصيلوا تقولش عليا محصور في طرح مونوبولي ...على الأقل المونوبولي فيها قانون ...

د.الأبيض - نفهم فيك نفهم فيك ...و ما تراش انها زادة فترة و الا مسلسل ..تو يتعدى كيفما تعداو و وفاو المسلسلات الاخرين الي حكيتلي عليهم ؟

القوفرنور - دكتور هذوكم سيريات متاع قبل ..لف لف ... يوفاو ...بعد 30 و الا 50 حلقة ...اما نوع المسلسلات هذوما ...ما يوفاوش...و الا يطولوا عالقليلة ... يقعدو 40,30 سنة ...اذا مش أكثرا

د.الأبيض -يراه في راسك !

القوفرنور -نعم ؟

د.الأبيض - لا ..حتى شي ..حتى شي ...

القوفرنور -زعمة يا دكتور يلزمني نقطع التلفزة ... ؟

د.الأبيض - التلفزة ؟ التلفزة ؟ ما دوختّك زعمة كان التلفزة ؟ ولدي ...دواك عندي ... (يأخذ ورقة طبية) ... الصباح تتفرج عالتلفزة ...لعشية تتفرج عالتلفزة و في الليل تتفرج عالتلفزة ...و رد بالك تحط خشمك البرة من داركم ...

القوفرنور - انجم نتفرج حتى في المسلسلات الطويلة هذية ؟

د.الأبيض - تي المسلسلات هذوكم ما يجيو شي قدام الوستارن الي البرة ...و كي تقلق سي القوفرنور مالتلفزة ...عليك بالانترنات و التدوين ...اما ...عالم الألف حلقة و حلقة ... الي تتسلسل بيهم تونس المسكينة ... اخطاك

10 commentaires:

Clandestino a dit…

40 sna ??

ما لقيت ما تفوّل علينا على صبحة ربي
انا نضم صوتي لصوت على الابيض
يا نراه في راسسك
لووووول

Téméraire V5.0 a dit…

Inchallah Labéss, inti w jmi3 el moumnine men hal maladie contagieuse.

FREE-RACE a dit…

خويا الحاكم ... نشاء الله نسمعو أخبار مطمئنة في أقرب الآجال...
سمعت اللي فما لقاح ضد هالوباء...
لقاح فعال أستعملوه في أماكن متفرقة من العالم ...و توة سمعت اللي يجربوا فيه في بلاد أسمها "ميانيمار" ما كان يسمع بيها حد

gouverneur de Normalland a dit…

@clandestino :

يا ولدي اش مدخّل "علي الابيض" تيماهو طار من الجامعة متاع الكورة و ارتحنا...نحكي مع سليمان الابيض
البسيكوترابوت متاع "شوفلي حل"...و انا زادا نضم صوتي لأصواتهم و نقول...يراه في راسي
:p

gouverneur de Normalland a dit…

téméraire :


ربي يخلص وحلنا و انشالله تجينا خفيفة و ما نتعذبوش برشة قبل ما ربي يهز متاعو...

gouverneur de Normalland a dit…

free-race :

ايه عاد ...هالدوى يستورده استراد و الا انجموا نصنعوه محلي عندنا ؟؟؟ علينا بالدوى قبل ما نتخذوا

arabicca a dit…

حلوة ياسر منك أما رد بالك اتبع فري راهو ناويلك على شوية حرية وديمو اللطف بعيد الشر وين انصنعوا فيهم ها الدوايات كان في النورماللاند هههههههههههه

gouverneur de Normalland a dit…

@arabicca :

ديمو ؟ حرية ؟؟؟ يراهم في راس الاعدى ....اللطف ...7 ألطاف...سبعة و سبوع علينا من الديمو

LOUKA a dit…

ravi de te connaitre si gouverneur :)

gouverneur de Normalland a dit…

@louka : moi de meme. tu as vu qu'il ya pire que d avoir 18 ans :p

tu es biensur le bienvenu a Normalland ton pays virtuel.