أبو الحروف النورمالاندي : درس في التعبير

يا سادة و يا مادة يا أهل التدوين و البلادة يحمينا و يحميكم من شر ما كنبسو عباده.

كيف ما تعرفوا, قرب اليوم التدويني لحرية التعبير. و قبل ما تاكل بعضها و يختلط الحابل بالنابل, قلت نسبّق درس أستاذنا الجليل "أبو الحروف النورملاندي" فماش ما ينفع أهل التدوين في كتابة مقالاتهم.

***

اليوم يا جماعة باش ندرسوا مع العبد للله- عمكم "أبو الحروف النورمالاندي"- كلمة متداولة بزايد هالايامات في البلوقسفير التونسي الا وهي كلمة "التعبير".

اش نوة اننجموا نصنعنوا من هالكلمة كان نعاودوا نعجنو رسمها الثلاثي أي ع ب ر :

العبرة : العبرة يا جماعة- بكسر حرف ال ع" هي الحكمة أو مغزى الكلام و لبّوا. يلزم يكون " للتعبير" عبرة و مغزى ما كانش تولي صفسطائية و دوّة فارغة ما عندها حتى أهمية.

العبرة : العبرة – برفع ال ع- هي هاك الغصّة الي تمكن بنادم وقت الي يبدى شاد روحو باش ما يطّرشقش بالبكاﺀ. و التعبير – يا سادة- يلزم يكون مرفوق بهالعبرة باش يخرج صافي مالقلب و ما يولّيش وسيلة تلوعيب و ترهدين باش يخدم مصلحة فلان و الا فلتان ... و تبقى ديما الأعمال بالنيات... ايا صليو عالنبي, و صفيو قلوبكم و أعقدوا النية

العبار : العبار هو ايناﺀ كبير, متفاوت الحجم( منهم الي ينجم يدخل فيه بنادم) يستعملوه جدودنا باش يخزنوا فيه عولتهم و يعبيو فيه الخيرات الكل. و التعبير يلزموا عبار كبير يكون الأنسان خزّن فيه ما طاب من معلومات و دراية, تتخزن و تطيب على نار هادية باش و قت الي تخرج تروي عطش السامع و تمسح جوع المظلوم وهكاكة ما يكونش التعبير عبارة على شعور (أغلب الاحيان الغضب) مرفوق بزوز كيلوا و الا تلاثة كيلو بهامة. و من مزايا العبار زادة, أنوا يخلي صاحبوا يخرّج الزاد الي كسبوا وقت الحاجة و يعلموا كيفاش يتصرف فيه لأنه كان يخرّجوا في مرة واحدة ... ما يلقى ما يصرف من بعّد ...

العبير : العبير –كيف ما تعرفوا- هي رائحة شذية تعمل ستة و ستين كيف. و التعبير يلزموا يكون معطّر مليح و مفوّح مليح. يقول المولى لسيدنا : "لو كنت فظا غليظ القلب لانفضوا من حولك". بالفلاقي, للتعبير أسلوب. يلزموا يكون أسلوب مزيان و ذكي باش يعطي للتعبير منهج و طريق و ما يكونش مجرّد رسالة ماشية سبهللا.

العبور: العبور هو المرور. و الكلمة تحتّم حركة مرور من مكان إلى آخر. و التعبير – يا رفاقي- يلزم يمر من عند صاحبه و يخلط للمتلقّي و من ثمة, يلزم يشق قناطر و وديان باش يوصل للبقعة الي يلزم يخلطلها. و أنت دليلك ملك : يلزمك تعرف تعمل خلطة باهية بالكلمات الي سبق ذكرهم باش تخلي التعبير يبات كان عند مولاه الجديد و مش عند الاذان الصمّة أو أصحاب النوايا الخبيثة. و الي يعرف كيفية عبور التعبير متاعوا ...صحة ليه ! ما يستحق حتى شي : لا تأشيرة عبور و لا طابع في الديوانة ... وين يحب يمشي ...يوصل !

***

ان شاﺀ الله يكونوا الاخوان النورماليون الكل استنفعوا بدرسنا اليوم في كلمة "تعبير" ويأخذوه بعين الاعتبار في يوم التدوين لحرية التعبير. انشاله عن قريب ندرسوا كلمة اخرى ... اش قولكم في الغبار,الغبرة و التغبير ؟؟؟ و الا الغيار و الغيرة و التغيير ؟ و الا النبرة و التنبير ... ولا قول الي انتوما ما تحتاجوش لدروس في التنبير.

ربي يهدينا و يهديكم للخير ... و يطلقلنا لساننا بأحسن التعبير