اش قولكم كان إلي يحصل على جنسية نورمالاند يضرب معاها القرين كارد متاع الامريكان و يولي في نفس المناسبة مواطن أمريكاني ؟ برشا منكم باش يقولو "اش خص…و من فمك للربي.. وبرى سخنلنا الدربوكة" و برشة جماعة آخرين باش يقولوا "النار ولا العار…و تز.. تز في أمريكا…و بوش..بوش يا جبان الشعب العربي لا يهان".
كل واحد عندوا رأيه … و نورمالاند في اطار النورموقراطية تحترم أن كل الأراء نوووووورمال ياسر.
الي موش نورمال دي تو هو البحث الي قاعد يتعمل على نورمالاند و الي يحلف و يتكتف أن البلاد النورمالاندية عندها جذور أمريكانية.
الحكاية و ما فيها أنوا عدة مواطنين نورماليين تسائلوا عن جغرافية نورمالاند في خارطة العالم … و سبق و وضحنا أنوا نرمالاند على ما صغيرة قد النتفة ما نعرفوش بالضبط وين تجي … و أنها متأثرة تأثر كبير بالشقيقة تونس.
لذا استدعينا باحثين كبار باش يعطيونا الصحيح … و كان التقرير متاعهم مذهل.
يقلك التقرير ياسيدي بن سيدي ان نورمالاند بدون شك تقرب ياسر من الفار وواست الامريكي مستندين على عدة أدلة و براهين:
- و قتلي تحوس في نورمالاند ما تسمع كان " يا بقرة …هكا نقصوا الكياس ؟ " و الا " يا بقرة شد الصف" و الا " يا حيوان فما شكون قبلك" …الى غير ذالك من الجمل الي تدل دلالة قطعية أن نورمالاند معبية برعاة البقر.
- كيما في الوستارن نورمالاند ما فيها معبي كان وين يسربيو الشراب و الا القهوة وين الكوبويات يبداو يتضيحكو يقطعو و يريشو في فلان و الا يسّّمعو في فلتان في الكلام حتى تلحم عركة و تركح البونية …ورني يا كعبة رني !
- في نفس هاك الفضاء – الي في الوستارن يسميوه "الصالون"- و إلا في الأحواز متاعوا … تلقى هاك البنيات الي يلوجو على كوبوي عندو الفلوس باش يلسقو فيه و يمصولوا…دموا
- في نورمالاند كيما في الوستارن ما تشوف كان العباد الي تقحر لبعضها … والي مكشبر و الي يقردح للاخر …و الي عاقد قريناتو … حتى لين تسمع "شبيك تقحرلي …أخزرلي مليح" …و رني يا كعبة رني !
- في نورمالاند كيما في الوستارن كل واحد ما يخمم كان في رويحتو و في كيفاش يدبر راسو … لا فما لا أخلاقيات و لا قوانين … المهف هو إلي يقدم( بمعنى يعض) صاحبو و إلا يدور على ملك خوه و الا يعديها على حبيّب في سبيل الصوردي (عملة نورمالاند) و إلا الدولار (عملة المريكان)
- في نورمالاند كيما في الوستارن المواطنين الكل تقوللهم : " طول لسان" …يقولولك : "أنا" تقوللهم :"غطرسة و عرك و تعنطيز" يقولولك "أنا" …لكن و قتلي تولي عركة الكبارات … تولي حس الذبانة تسمعوا …الي مسكر على روحو دارو بالقفل و الي ساعة ساعة يطل من الشباك و يتخبى فيسع … و الي منبطح في القاعة … و هلّم جرى…
مستندين على كل هذه الأدلة , أكد هؤولاء العلماء قرب نورمالاند للفار وواست الأمريكي حضاريا مما يجعلهم يرجحوا امكانية قرب نورمالاند لهذه المنطقة جغرافيا. لكنهم ما نجموش يفسروا كيفاش نورمالاند تنجم تكون قريبة من تونس الشقيقة و من الفار وواست الأمريكي في نفس الوقت ؟
البحث مازال متواصل … لكن أنا عندي تفسير للحكاية … و علم هؤولاء الباحثين –حسب رأي- ما يقلش أهمية عن علم جدتي … الي عندها كلمة ديما تقولها …تنجم تفسرلنا هالتقارب : العلماء يقولوا "بلاد نورمالاند…بلاد الفار وواست" …و هي بطريقتها تقول –في ترجمة لكلمة فار وواست- " بلاد…لبعيد غادي…".