dimanche, décembre 24, 2006

هل نورمالاند تابعة للأمريكان ؟



اش قولكم كان إلي يحصل على جنسية نورمالاند يضرب معاها القرين كارد متاع الامريكان و يولي في نفس المناسبة مواطن أمريكاني ؟ برشا منكم باش يقولو "اش خص…و من فمك للربي.. وبرى سخنلنا الدربوكة" و برشة جماعة آخرين باش يقولوا "النار ولا العار…و تز.. تز في أمريكا…و بوش..بوش يا جبان الشعب العربي لا يهان".

كل واحد عندوا رأيه … و نورمالاند في اطار النورموقراطية تحترم أن كل الأراء نوووووورمال ياسر.

الي موش نورمال دي تو هو البحث الي قاعد يتعمل على نورمالاند و الي يحلف و يتكتف أن البلاد النورمالاندية عندها جذور أمريكانية.

الحكاية و ما فيها أنوا عدة مواطنين نورماليين تسائلوا عن جغرافية نورمالاند في خارطة العالم … و سبق و وضحنا أنوا نرمالاند على ما صغيرة قد النتفة ما نعرفوش بالضبط وين تجي … و أنها متأثرة تأثر كبير بالشقيقة تونس.

لذا استدعينا باحثين كبار باش يعطيونا الصحيح … و كان التقرير متاعهم مذهل.

يقلك التقرير ياسيدي بن سيدي ان نورمالاند بدون شك تقرب ياسر من الفار وواست الامريكي مستندين على عدة أدلة و براهين:

- و قتلي تحوس في نورمالاند ما تسمع كان " يا بقرة …هكا نقصوا الكياس ؟ " و الا " يا بقرة شد الصف" و الا " يا حيوان فما شكون قبلك" …الى غير ذالك من الجمل الي تدل دلالة قطعية أن نورمالاند معبية برعاة البقر.

- كيما في الوستارن نورمالاند ما فيها معبي كان وين يسربيو الشراب و الا القهوة وين الكوبويات يبداو يتضيحكو يقطعو و يريشو في فلان و الا يسّّمعو في فلتان في الكلام حتى تلحم عركة و تركح البونية …ورني يا كعبة رني !

- في نفس هاك الفضاء – الي في الوستارن يسميوه "الصالون"- و إلا في الأحواز متاعوا … تلقى هاك البنيات الي يلوجو على كوبوي عندو الفلوس باش يلسقو فيه و يمصولوا…دموا

- في نورمالاند كيما في الوستارن ما تشوف كان العباد الي تقحر لبعضها … والي مكشبر و الي يقردح للاخر …و الي عاقد قريناتو … حتى لين تسمع "شبيك تقحرلي …أخزرلي مليح" …و رني يا كعبة رني !


- في نورمالاند كيما في الوستارن كل واحد ما يخمم كان في رويحتو و في كيفاش يدبر راسو … لا فما لا أخلاقيات و لا قوانين … المهف هو إلي يقدم( بمعنى يعض) صاحبو و إلا يدور على ملك خوه و الا يعديها على حبيّب في سبيل الصوردي (عملة نورمالاند) و إلا الدولار (عملة المريكان)

- في نورمالاند كيما في الوستارن المواطنين الكل تقوللهم : " طول لسان" …يقولولك : "أنا" تقوللهم :"غطرسة و عرك و تعنطيز" يقولولك "أنا" …لكن و قتلي تولي عركة الكبارات … تولي حس الذبانة تسمعوا …الي مسكر على روحو دارو بالقفل و الي ساعة ساعة يطل من الشباك و يتخبى فيسع … و الي منبطح في القاعة … و هلّم جرى…

مستندين على كل هذه الأدلة , أكد هؤولاء العلماء قرب نورمالاند للفار وواست الأمريكي حضاريا مما يجعلهم يرجحوا امكانية قرب نورمالاند لهذه المنطقة جغرافيا. لكنهم ما نجموش يفسروا كيفاش نورمالاند تنجم تكون قريبة من تونس الشقيقة و من الفار وواست الأمريكي في نفس الوقت ؟

البحث مازال متواصل … لكن أنا عندي تفسير للحكاية … و علم هؤولاء الباحثين –حسب رأي- ما يقلش أهمية عن علم جدتي … الي عندها كلمة ديما تقولها …تنجم تفسرلنا هالتقارب : العلماء يقولوا "بلاد نورمالاند…بلاد الفار وواست" …و هي بطريقتها تقول –في ترجمة لكلمة فار وواست- " بلاد…لبعيد غادي…".

5 commentaires:

houssem a dit…

howwa normal ken normaland jet fi amarica amma elli mouch normal howwa kifech n3ichou normal fi amarica :s

rose epineuse a dit…

le prob c'est qu'ils ont réussi à se débarasser de leurs vaches alors qu'elles se multiplient chez nous. Il y a un truc qui cloche ds cette théorie.

gouverneur de Normalland a dit…

Houssem : ken jina fi Amerikia ellama nraj3ouha mouch normal ou nkhallsou el 9dim ( l'extermination des peaux rouges) wil jdid ( tous ce qu'ils sont en train de faire au monde) ...ellama Mac Donalds ywalli ysserbi fil lablabi ou Puff Dady ellama yghanni "3al jibin 3ssaaba"

rose épineuse : ce transfert de vache des chez les states a Normalland a crée bcp de boulvermsement et a deboussolé plus d'un ..commençant par les vaches qui sont devenus depuis ce jour la completement folles ! c'est cela qui cloche !

El-mourrr a dit…

ah bon !!! sar howa a ce point b3id ghadiii !!!!.... mé bon ana jé remarké un autre point commun bin el-normalandiine w zamarikane mta3 far west !!! yomken ykoun jenitik !! el machia mta3 les cow-boy tchabah yesser el machiett el mouwatnin mta3 normalland eli y3adiw 3 wala 4 ayem fel les plages mta3 normalland men ghir ma ydawchou ... bon ca c aux savants (el 3oulamaa mech essaboune !!) de le prouvé !!! ... w weld el far (west) ma yatla3 ken 7affar (7affer l3arfek tatla3 fi blasstou ... c pa normalien ca !!)... ounormal sa7bi !!

gouverneur de Normalland a dit…

Merci DR. el-mourr pour la recherche scientifique que tu as fait sur les normaliens illi tgadadou fil b7ar et le raport avec les cow-boys ...et comme tu as dit " wild el far-west yatla3 7affar-west"