Wassup 2008

On se souvient tous de la publicité mytique de la biere Budwiser, il y a deja 8 ans. celle qui a lancé la mode de "what'zzzzzzzzzzzzzzzzzzzzzup"

voici la video pour le peu de personnes qui ne la connaissent pas : (ici)


8 ans aprés, voila ce que sont devenus les personnage, et voilà ce que sont devenus les états unis d'Amerique :

Voyage ...Voyage !

- لا يا خويا ... ما نمشيش...

- اسمع كلامي ...راهو تحواسة غاديكا تعمل ستة و ستين كيف

- هذية أمريكيا متاعك ما نعفسهاش أبدا ... و كان يصير الّي يصير ...

- يا ولدي نهزّك أنا ... ندور بيك ...إلاّما.. تتفتق بالتحواس ...راهو نعرفها نقبة نقبة !

- هوما يوّكلوا فينا في الخبط ... و أنا ما أحلاني ماشيلهم لعقر دارهم ... أنا يا خويا تعرف جوي...أوروبا : تفدليك الطلاين , السريو متاع الألمان , حرية الفرنسيس, الجو عند السبنيور و الكورة عند الأنقليز .. أنا هذاكا شربي ! نحبهم يا أخي و نحب نزورهم ! تبعني أنا تربح ...

- نتبعك ؟ تي هذوكوم الكل أعجنهم في بعضهم ... ما يجيو شي قدام الأمريكان ... يبلعوهم بلعان و يلعبو بيهم لعب ... و إلا مغشّش عليهم ملّي روفزولك الفيزا وقتها ؟

- نتغشّش امالا لا ؟ شنوة معنتها أنا الكلني...يروفزوني ... ؟؟؟

- ماكش الأول و لا الأخّر الي يروفزوه ...تي ماهو كثرت عندهم الحرقة ... !

- ايه تجي في راسي أنا ؟ قالك الي يحب يمشي ويقعد على راحتوا يقدم في اللوتري ... العرب الكل تبعث و شوفشي تخطف عند واحد و إلا زوز ... يا أخي مضروبين في رواحهم ... سامحني !

- علاه ؟ عجبوك الأوروبيين ... عاملين فيزا شنغان ...فيزا الشنقان ويييي ... قريب باش يطلبوا عليك المضمون متاع جد بوك الأول ... ما خلاّوش ورقة ما طلبوهاش ... تي دخول للجنة ممكن أسهل !

- لا ! سامحني هذاكا... تنظيم !

- تنظيم ؟ يسرقوا في العباد عيني عينك و تقلّي تنظيم ؟ بلاهي على كل فيزا قداش نحّاولك ؟ 100 و إلا 120 دينار ؟ و كي روفزوك ؟ رجعولكش فلوسك ؟

- ما عادش يرجعوا ... بالعاني باش يصفيو ...

- يعطيهم الصحة ... هاو صفاوك حتى أنت ...

- يا أخي على الأقل في أوروبا كي الواحد يكمّل قرايتو ...تسهال ... مش كيفك عامل ماستار في الجغرافية و الأمريكان قالولك لا ...

- محسوب انت خطفتلك أنسكريبسيون في فرانسا ؟ و برّا ما كمّلتش ماستارك في التاريخ ؟

- بارك الله فيهم ...بعثولي و قالولي ...علاش ما قبلونيش و شجعوني ... اما انت, طفاوك جملة !

- و فوق هذا ودونو... توة انت في بالك في أمريكيا عاملين هالعسّة الكل على الحرقة كيما في أوروبا ؟ ما نتصوّرش !

- يظهرلك ! ... ممررين عيشة الميكسيكان ...الي يقرب للحدود ياكل راسه !

- ما نتصورش كان عاملين هالعسة الكل من ناحية البحر كيما عند الأوروبيين ... تي كان جينا حارقين لأمريكيا ...و راسك لا تراهم عسّاسة الحدود البحرية !

- ديييويييو ! كان جينا حارقين لأمريكيا راهم ما فلتوناش ...راهو الكرتوش كلانا ...

- محسوب ... توة هانا نعوموا في وسط المحيط ... زعمة خير مالكرطوش ؟

- يا أخي ... أنا قررت و أنت دليلك ملك ...ماشي من هنا ...قاصد بلاد الأمريكان ...تحب تجي معايا تفضّل ...

- أنا مازلت نخمم ما بين أيطاليا و إلا اسبانيا ...

- و راس خويا كان اتّبعني و تعوم من هنا ... تشيخ في أمريكيا ... راهو موضوع المستار متاعي على أمريكيا ...نعرفها كيما نعرف جيبي !

- لا لا ...ماشي نعوم من الشيرة الأخرى ... عند الطلاين ...بديت نجوع و شاهي مقرونة كيف ما نعرف أنا ....

- دبّر راسك....تذكرني كي تزور برج بيزا ...

- و أنت أبعثلي تصاور البلدان الي باش تزورهم على الايمايل متاعي ماك حافظو

- في الأمان !

- ايا امالا في وديعة ربي !

هل نورمالاند تابعة للأمريكان ؟

اش قولكم كان إلي يحصل على جنسية نورمالاند يضرب معاها القرين كارد متاع الامريكان و يولي في نفس المناسبة مواطن أمريكاني ؟ برشا منكم باش يقولو "اش خص…و من فمك للربي.. وبرى سخنلنا الدربوكة" و برشة جماعة آخرين باش يقولوا "النار ولا العار…و تز.. تز في أمريكا…و بوش..بوش يا جبان الشعب العربي لا يهان".

كل واحد عندوا رأيه … و نورمالاند في اطار النورموقراطية تحترم أن كل الأراء نوووووورمال ياسر.

الي موش نورمال دي تو هو البحث الي قاعد يتعمل على نورمالاند و الي يحلف و يتكتف أن البلاد النورمالاندية عندها جذور أمريكانية.

الحكاية و ما فيها أنوا عدة مواطنين نورماليين تسائلوا عن جغرافية نورمالاند في خارطة العالم … و سبق و وضحنا أنوا نرمالاند على ما صغيرة قد النتفة ما نعرفوش بالضبط وين تجي … و أنها متأثرة تأثر كبير بالشقيقة تونس.

لذا استدعينا باحثين كبار باش يعطيونا الصحيح … و كان التقرير متاعهم مذهل.

يقلك التقرير ياسيدي بن سيدي ان نورمالاند بدون شك تقرب ياسر من الفار وواست الامريكي مستندين على عدة أدلة و براهين:

- و قتلي تحوس في نورمالاند ما تسمع كان " يا بقرة …هكا نقصوا الكياس ؟ " و الا " يا بقرة شد الصف" و الا " يا حيوان فما شكون قبلك" …الى غير ذالك من الجمل الي تدل دلالة قطعية أن نورمالاند معبية برعاة البقر.

- كيما في الوستارن نورمالاند ما فيها معبي كان وين يسربيو الشراب و الا القهوة وين الكوبويات يبداو يتضيحكو يقطعو و يريشو في فلان و الا يسّّمعو في فلتان في الكلام حتى تلحم عركة و تركح البونية …ورني يا كعبة رني !

- في نفس هاك الفضاء – الي في الوستارن يسميوه "الصالون"- و إلا في الأحواز متاعوا … تلقى هاك البنيات الي يلوجو على كوبوي عندو الفلوس باش يلسقو فيه و يمصولوا…دموا

- في نورمالاند كيما في الوستارن ما تشوف كان العباد الي تقحر لبعضها … والي مكشبر و الي يقردح للاخر …و الي عاقد قريناتو … حتى لين تسمع "شبيك تقحرلي …أخزرلي مليح" …و رني يا كعبة رني !

- في نورمالاند كيما في الوستارن كل واحد ما يخمم كان في رويحتو و في كيفاش يدبر راسو … لا فما لا أخلاقيات و لا قوانين … المهف هو إلي يقدم( بمعنى يعض) صاحبو و إلا يدور على ملك خوه و الا يعديها على حبيّب في سبيل الصوردي (عملة نورمالاند) و إلا الدولار (عملة المريكان)

- في نورمالاند كيما في الوستارن المواطنين الكل تقوللهم : " طول لسان" …يقولولك : "أنا" تقوللهم :"غطرسة و عرك و تعنطيز" يقولولك "أنا" …لكن و قتلي تولي عركة الكبارات … تولي حس الذبانة تسمعوا …الي مسكر على روحو دارو بالقفل و الي ساعة ساعة يطل من الشباك و يتخبى فيسع … و الي منبطح في القاعة … و هلّم جرى…

مستندين على كل هذه الأدلة , أكد هؤولاء العلماء قرب نورمالاند للفار وواست الأمريكي حضاريا مما يجعلهم يرجحوا امكانية قرب نورمالاند لهذه المنطقة جغرافيا. لكنهم ما نجموش يفسروا كيفاش نورمالاند تنجم تكون قريبة من تونس الشقيقة و من الفار وواست الأمريكي في نفس الوقت ؟

البحث مازال متواصل … لكن أنا عندي تفسير للحكاية … و علم هؤولاء الباحثين –حسب رأي- ما يقلش أهمية عن علم جدتي … الي عندها كلمة ديما تقولها …تنجم تفسرلنا هالتقارب : العلماء يقولوا "بلاد نورمالاند…بلاد الفار وواست" …و هي بطريقتها تقول –في ترجمة لكلمة فار وواست- " بلاد…لبعيد غادي…".