vendredi, octobre 03, 2008

اصحاب المراية و اصحاب البارود و الكارابيلة

يا سادة يا مادة يدلنا و يدلكم للخير و الشهادة و يهلك كل من ظلم و تمادى ...


مديدة عندي يا جماعة على البلغسفير ... مديدة عندي على التمقعير و التنبير و الهزان من الجابية للبير ... ولذا حليت تن_بلوغس بش نعرف اش فمة و اش يصير.


حبيت قبل كل شي نشكر برشة صديقنا البرباش على المجهود الكبير الي عملو بش كتب مسلسل "حومة البلغسفير" ... رغم اني مازلت ما قريتش كل الحلقات.


بصراحة البرباش ضهُر بالكاشف قدرات هايلة و ابدع في كتابته بخلط بين معطيات واقعية و معطيات خيالية ... و هالخلط (الي اصحاب الصنعة يعرفوا قداش صعيب) ما كانش مصطنع بالمرة بل بالعكس حسينا بتكامل و وفاء لهيكلة الشخصيات الي موجودين في المسلسل.

الي لفت انتباهي أنوا في بلد التصفيق الدائم ... ماشفتش برشة تصفيق على مجهودات البرباش الجبارة ... يضهرلي عبارات الشكر و الامتنان و الاعتراف بالجميل ... كيف الي فما شكون محتكرهم ... الى محتكرين هالعبارات بيعوا ... بيعوا ... راهوا العالم في ازمة اقتصادية كبيرة و كان ما تبيعوش توة ترصيلكم توزعوا في عبارات الشكر و الامتنان بخ تف ... و مش عجب تتباع في سوق ليبية الأربعة بدينار ....


كلامنا هنا يا جماعة قياس و ما مسلسل البرباش كان مثال من ضمن عدة أمثلة متاع عباد قاعدة تكد و تجد بش احنا نشوفوا رواحنا في المراية و نشلقوا هاو ب"بوان نوار" هوني ... هاو شعر مشبشب من غادي ... المشكل هو الي احنا مش ديما نفهموا اهمية المراية ...

شنوة لاحظت زادة في صفحة تن_بلوغس ... لاحظت برشة تعصب ديني و طائفي ....


هاني نشوف في حسين وجهو صفار و نشوف في عمك عمًار يقرى في البوست و يديه تلوًج عالمقص ...


اصبر يا عمار ... هاو جاك : التعصب الطائفي و الديني مش بالضرورة بالمعنى البدائي للكلمة و مش هاك اللفظ الي نستعملوه في مراكز الشرطة بش نباصيو واحد خريون ما يشربش البيرة نهار السبت في اليل .


نقصد هنا بالتعصب الطائفي و الديني هاك الجماعة الي ما يفرقوش ما بين القلم و حد السيف و يعتبروا أن من واجبهم توجيه القراء الى ما يرونه صالحا لهم. يعني بالفلاقي يعتبروا العباد هوايش ,حاشاكم, أو قاصرين على التفكير و التخمين و هوما, بما أنهم مخهم كبير ياسر و ذكاهم خارق, يوجهوا العباد للذوق السليم و التفكير السليم.


من أبسط النماذج الي انجموا نستدلوا بيها هي أغلبية المادة السمعية البصرية الناتجة من مؤسسة الاذاعة و التلفزة التونسية وين حاسبين المواطن أبهم من صباطي و هوما باش يربيوه و يعلموه ...


و بش نرجعوا للبلوغسفير أنا ما شفتش برشة تعصب ديني بدائي أي بمعنى جماعة كاتوليك , يهود أو "أسلاميين" يحاولوا يهديو أهل البلغسفير الى نظرتهم للدين ... أو على الاقل بصفة مباشرة أو بمباشرتية معلنة ...


ألي لفت انتباهي هوما جملة من المدونات تدُعي اللائكية و الادينية و هي في نفس الوقت تعتمد أسلوب ديني وهو أسلوب "الجهاد" بالقلم ... أو أسلوب الطريق السوي و الطريق الخطأ ... أنا هوني نلاحظ مفارقة كبيرة بين مضمون كلامهم و الي يدعي لا دينية ( وهو في الحقيقة مش لاديني بل معادي للدين و هذي هدرة اخرة) و هو فلسفيا أسلوب ديني بحت.


بش نرجع بيكم لنص سارتر "الكلمات" ... يقول :


«Écrire, ce fut longtemps demander à la Mort, à la Religion sous un masque d'arracher ma vie au hasard. Je fus d'Église. Militant, je voulus sauver par les œuvres; mystique, je tentai de dévoiler le silence de l'être par un bruissement contrarié de mots, et surtout, je confondis les choses avec leurs noms; c'est croire…. En même temps j’étais moi, élu, annaliste des enfers, photomicroscope de verre et d’acier penché sur mes propres sirops protoplasmiques. Plus tard j’exposai gaiment que l’homme est impossible ; impossible moi-même je ne différais des autres que par le seul mandat de manifester cette impossibilité qui, du coup, se transfigurait, devenait ma possibilité la plus intime, l’objet de ma mission le tremplin de ma gloire. J’étais prisonnier de ces évidences mais je les voyait pas : je voyais le monde à travers elles. Truqué jusqu'à l’os et mystifié, j’écrivais joyeusement sur notre malheureuse condition. Dogmatique je doutais de tout sauf d’être l’élu du doute ; je rétablissais d’une main ce que je détruisais de l’autre et je tenais l’inquiétude pour la garantie de ma sécuritéLongtemps j’ai pris ma plume pour mon épée, à présent je connais notre impuissance. N’importe : je fais, je ferai des livres ; il en faut ; cela sert tout de même. La culture ne sauve rien ni personne, elle ne justifie pas. Mais c’est un produit de l’homme : il s’y projette, s’y reconnaît ; seul, ce miroir critique lui offre son image »

Jean Paul Sartre, les mots, 1963

18 commentaires:

black dark a dit…

ahla belgouverneur ; ya mar7bé ya mar7bé!!! ech hal 5ta s3id!! nchallah 3idek mabrouk, w ya3tik essa7a 3al article kil 3ada... 3ajbetni fazet : وهو في الحقيقة مش لاديني بل معادي للدين .. ajbetni elkelma fi blasset'ha w 7assit'ha mo3abbra barcha 3al état mta3 elblogsphere, chey y2assef, w kollo b2esm le droit d'expression!!! ayya b5atrek ya gouverneur, votre peuple vous supporte à 2009!!!

chanfara a dit…

يا مرحبا يا مرحبا
والله توحشناك
هاك داخل بقوة، اصدم و أنا معاك
هههه

ما عادش تغيب برشة عاد
راني خممت نعمل عليك إنقلاب آخر

;-)

Zied Tarek Tounsi a dit…

mar7ba ounormal

Bel Malwene a dit…

re mar7ba bik ya gouverneur ... wel 3o9ba lia nokhrej men hal 3o9m el houjoumi mta3i w narja3 nekteb 3ala rou7i ... rani twa7achtt el tadwiin .. ghir el bokhel alah yehelkou 9atelni !!!
pour revenir au post ... moi je crois que hal ta3assob hatha est ds les deux sens ... " chwaya mel 7ena w chwaya men rtabet lidine " ... mawthou3 eddine wel la-dine, ana (w a3outhou belah men kelmet ana ) nrah mawthou3 chakhssi chakhssi w akther chwaya mawthou3 el jidel fih 3ala safa7at el blogshère ma nrahech bech ybadel hata chay bel bel3akess bech yakhle9 7azaziette kbira a7na fi ghinaa 3anha fi wa9t eli dawr el moudawnet howa khal9 badil lel sa7afa el boudourou eli 3andna (ma y3abrou 3anou b Sa7afet el mouwatna) ... 7assilou hal mawthou3 hatha taw nzid net3ame9 fih fi tadwina tkoun raja3ti lel blogsphere ...
fel akhir ne9ef w na3mel tassfi9a 7aaaaarrrrraaaaa el khouna Barbech 3ala el chef d'oeuvre eli chayekhna biha fi romthane kemel el darejet khal9 naw3 mel idmen 3and ba3th el moudawnine w men binhom ana :)

Chiheb 12 a dit…

عيد مبروك يا قوفرنار ،عندك مدّة على التّدوين ،أمّا حبيتك تكتب بوست كامل على مسلسل البرباش بما أنّك ولد دومان وتفهم في ها الأمور سيناريو وإخراج
.إن شاء الله عودة مباركة

Tarek طارق a dit…

تي ماهو هذاكة شنوة نقصد بمعنى السرديات الشمولية يا قوفرنور... مش مهم شنوة المحتوى أما المنهج إلي يستبق تحليلو أو يرغب في الإيمان بوجود حقيقة مطلقة خاصة في علاقة بمواضيع بشرية ينتهي بالضرورة الى رؤية متوسطة جبرية في نتائجها (دينية كانت أو "لادينية")... حلوة متوسطة-جبرية.. خسارة مانجمش نستعملها في مقال بالفقهي...

أية شنوة أحوالك عادة؟ بديتشي "تتهنى" و تكون في الكريشة؟

Werewolf a dit…

Welcome back :)
ياخويا ما فيها باس كي تبطى علينا و ترجعلنا بتدوينة في الصميم و مانيش قاعد نقفف... بالعكس موش في البلوغسفار أكهو و إنما في المجتمع متاعنا برشة تلقاهم متأكدين من وجهة النظر متاعهم وقتلي هي اسم على مُسمّى "وجهة نظر"... و بالله يا طارق ماعادش تحكي بالصعيب... و لازم تزرّفها كلمة المتوسط
:)))

البرباش a dit…

أيواه... هيا عودة ميمونة للتدوين و لحومة البلوغسفير يا قوفرنور... ليك وحشة و الله

شفت بالله، كنت نستنى في التصفيق و التهليل ياخي شي... طلعت قرعة كيف ما يقولوا (أما موش ع الآخر، كيف تحس أنو برشا ناس اتبع في المسلسل و تستنى في الأحداث و في الحلقات يكفي)... بل بالعكس، وصلت في بعض الحالات سمعت وسخ وذنيّ من عباد كنت نعتقد انهم أصحاب... تي لا علينا

و ما نتصورش أنّي يمكن نستنى أكثر م الشي اللي حكيت عليه ع المسلسل (خاصة كيف الشي هذا يكون صادر من عند شخص ملم و مختص في الحكايات هذي)... الله يخليك

بالنسبة لجماعة لادين لا ملة (و لو أنو الكلمة هذي ما تعجبش برشا ناس، لكنها أول وصف يتبادر لذهني كيف يتجبدوا في الحديث)... هاك جبت المفيد و أكهو، الحكاية ولات تفدد

Gouverneur de Normalland a dit…

@Black Dark :

aya merci Black Dark pour tout ... surtout pour me soutenir pour 2009 car haw chanfara y7adhar fi in9ilab :)

Gouverneur de Normalland a dit…

@chanfara

هاني كيف شميتها قارصة و كيف حسيت بالانقلاب جاي ...رجعت ساقيا أطول من راسي

عيشو شنفرة و انشالله في لمة كيف ما نعرف انا ... على الاقل على راديون

Gouverneur de Normalland a dit…

@Zied Tarek tounsi

oubik akthar ya khouya

Gouverneur de Normalland a dit…

@Bel Malwene :

ايا اكبسلنا روحك سي بالملوان و متًعنا بتدوينات عالمية

Gouverneur de Normalland a dit…

@Chiheb :

أنشالله عيدك مبروك يا شهاب ...عليك و على حومة البلوغسفير الكل بكبارها بصغارها

في ما يخص تحليل مسلسل البرباش ...انا يضهرلي الي المسلسل ما يستحقش تحليل و يكفي أنو عجبنا الكل

انا نشوف في المسلسل كقصة بقطع النظر على تسميتو و فورمتوا ... المهم بالنسبة ليا روح الخلق عند خونا البرباش

Gouverneur de Normalland a dit…

@Tarek

اهلا بسي طارق, و الله ليك وحشة يا راجل

محلاها كلمة "متوسط" من فمك يا طارق هههههههههههه

بالنسبة للكرش هاي
under-construction

:)

Gouverneur de Normalland a dit…

@Werewolf :

الله يخليك يا ورولف,نعرفك مش متاع تقفيف ... كان جيت قفَاف راك شادد بلاصة عمار

;)

Gouverneur de Normalland a dit…

@ Barbach :

و لا يهمك خويا البرباش ... هوما الانبياء و ياكلو على راسهم ... اما الرسالة ديما أهم من الكل

و بصفتي محافظ نورمالاند قررت بش نهبٌط أهل نورمالاند للشارع بش يصفقولك ليك ... و قدام المجهود الي عملتوا يا خويا ... ما يجي شي

Clandestino a dit…

اهلا بالقوفرنور
انشالله كل شي بالبركة
موش باش نلومك على الغياب المطول , المفهوم ,ما يستحقش التبرير ...
اما فيما يخص البولسقفير فامورها تاعبة ياسر لازمها اعدة مسح شامل بالسبونتاكس و الجافال و الدينول

(انا يديا قشرت من شدة استعمال مواد التنظيف هاذي)
لذلك باش ندورها فيتوكس ... بالفشفاشة من بعيد لبعيد


نتمنى انك تكون متواجد اكثر (على الاقل في الفترة الحالية) قبل ما تشد بعضها و تكبر العايلة و تطيح لحكة الحليب متاع 17 الف و باكو الكوش متاع 10 الاف
:pp

Gouverneur de Normalland a dit…

اهلا كلاندو

اشنية أحوالك يا صديقي ؟

انشاء الله الجماعة الكل قدم و جدد المحبوبين و المذمومين ...الكل يكثروا من الكتيبة و التدوين

هاني أناقاعد نحاول نكون أكثر التزام في التدوين

و يلزم يا كلاندو نعاودو نحييو بودورو