dimanche, décembre 23, 2007

...في سبرنا أحنا

الشاوش ياقف و يصيح

الشاوش: محكمة ! قفوا تقديرا لخالتي خدوجة

القاعة الكل تاقف, خالتك خدوجة تقعد , الناس الكل يقعدوا. خالتك خدوجة تخزر من تحت للشاوش.

خالتك خدوجة : دخّلوا المتهمان.

يدخل راجل ناهز الثلاثينات في يدو صندوق قطوا و بنية في نفس العمر في يدها بلاتو قازوز. الوليد يدخل لقفص اتهام عاليمين و البنية للقفص الي عاليسار. هالزويز يدنكسوا ريوسهم و يلزموا الصمت. خالتك خدوجة تخزر من تحت المرايات لملف قدامها و من بعد تخزر للجهة اليمنة.

خالتك خدوجة : أحيل الكلمة لأم العريس.

تاقف خالتك محرزية و تتقدم لوسط القاعة بين قفصي الأتهام.

خالتك محرزية : خالتي خدوجة ,حضارات المستشارين. كيما تعلموا, تعتبر التهم الي وجهوها أهل العروسة لينا و لولدي, تهم خطيرة ياسر ..بينما هوما الي غالطين في حقنا حسب سبرنا

تاقف خالتك عيادية.

خالتك عيادية : نحتج يا خالتي خدوجة ... كلمة سبرنا في المهموتة

خالتك خدوجة : وضح أكثر أصل السبر

خالتك محرزية : حاضر خالتي خدوجة... كنت نقول حسب الفصل الأوّل من السبر 124 لمدينة تونس و ضواحيها ...يقول "يحجّر خروج أهل العريس فارغي اليدين" فهنا مخالفة واضحة و جلية لسبر هذه البلاد.

خالتك عيادية : نحتج يا خالتي خدوجة ... العروسة من الساحل و تتبع سبر مدينة سوسة و الساحل و ذلك حسب الفصل 15 من السبر رقم 325 الي ينص على عدم شرعية تمكين أهل العريس من أي شيء عند خروجهم.

خالتك محرزية : نحتج خالتي خدوجة ... السبر يتبع مكان الخطبة و العرس و لا يعتمد أصل و مفصل أهل العروسة

خالتك خدوجة : احتجاج مقبول

خالتك عيادية : هذاكا كان تم احترام السبر من هؤولاء ... لكن هوما بيدهم كانوا مخالفين ...و مخالفة خطيرة ...نساو ما قالوش "جيناكم خاطبين راغبين" مما يعتبر مجاوزة خطيرة لكل سبر تونسي من أقصى الجنوب لأقصى الشمال

خالتك خدوجة تاخذ مطرقة لوح و تضرب فوق مجلسها.

خالتك خدوجة : ترفع الجلسة ... وقيت كاس تاي منعنع .. و زيد المسلسل عادك بيه باش يبدى ...ترفع الجلسة لبعد المسلسل


6 commentaires:

Tarek Kahlaoui a dit…

ما تقوليش المرة هذية الأقصوصة مش ناتجة على تجربة مباشرة

البرباش a dit…

هـهـه

حكاية تقليدية، و صايرة و تصير في معظم العروسات، لكن تنجم تقول انو النهاية ديمه تكون مرهونة بقوة الشخصية متاع خالتك خدوجة.

lasnumberone a dit…

شبيه القفص ماهوش ذهبي, بل بالعكس خشبي... ههههههههه

titof a dit…

حكاية حلوةابدعت ...........وزير الثقافة في النورمالل لاند

Karozello a dit…

la réalisté est parfois plus tragique/comique que cela :)

en tout cas bonne chance pour ........... :)

7achicha a dit…

الأسلوب الرمزي طيب و المعنى عميق شكرا على هذا العطاء و حظ طيب مع باقي البلوغ