mardi, novembre 06, 2007

نخوة و اعتزاز

- طمنّي دكتور ...

- و الله ... شنوة تحب نقلّك ... التحاليل ما تسرّش برشة

- كيفاش تراه ؟ صارحني دكتور ...

- في الحقيقة ... أمور النخوة سافا ... أمّا الأعتزاز طايح ياسر

- بالله ؟ و الحل دكتور ...

- و الله الحكاية فيها حلين ... الحل الأول هو شدّان الريقلة ... ترد بالك ... تعرف اش تعمل ... مش تهمّل روحك عاد و تسيّب الماء عالبطيخ مرة أمور النخوة طالعة للسماء و الأعتزاز طايح و مرة النسب متاع النخوة منعدمة و الأعتزاز يلعلع ...لا ... عيش ولدي ... يلزمك ترد بالك بحيث أن النخوة و الأعتزاز يكونوا متوازنين و متواجدين بكفاية في بدنك ...

- ايه دكتور ... و الحل الثاني ...

- اه ... الحل الثاني حل راديكالي ... يطلعلك الطو متاع النخوة و الاعتزاز للسماء ... ضربة وحدة !

- يا دكتور نوّرنا ... هاو هالدواء الثاني أسهل ... من الريجيم و الريقلة ... شسمو بربّي

- أيا سيدي خوذ حربوشتين "مصلحة شخصية" الصباح و حربوشتين "مصلحة شخصية" في الليل ... و تو توّلي أمورك خمسة على خمسة في النخوة و الاعتزاز.

14 commentaires:

الشنفرى a dit…

و الله وحد يا قوفرنور
أما رد بالك الحرلبش برشه مش باهية و كيف ما يقولو الوقاية خير من العلاج
;-)

Anonyme a dit…

تماشيا مع الايقاع الاحتفالي ...
انغنيلك
وين يبيعو فيه نشري جهار بهار
ندفعلك بالشيك
ولا بالدولار
ههههههههههههههههههه

Gouverneur de Normalland a dit…

@chanfara :

شي يا شنفرة ...النلس الكل دازة عالحرابش ...رغم مضاعفاتها الخطيرة ..ربي يستر

Gouverneur de Normalland a dit…

@ Arabicca :

يا فطوم ...الأسم عالأسم ...وربي يجيب القسم ههههههههههه

FREE-RACE a dit…

حتى الدواء العربي ما عندك فيه ما تقول
:
اللي يحب "ينْـتَـــخـــي" على قاعدة صحيحة ننصحوه باش يعمل صــــحفة "وطــْــو" و يمســّـــــد بشلـّـــيقة متاع "قلة حياء"...و بالنسبة للأخوان القادرين...ميسالش كان يفـَــوحوا بـــماء "الترهدين"
...و الوصفة لازالت تطول لكن للأسف ,الناس مـــخلــطـــة, و ما أنجمش نصـــرّح بالعبارات الكل

Tarek طارق a dit…

لا لا يا راجل هذية حكاية ما يداويهاش الطبيب التقليدي... ما يحلها كان الطبيب الحداثي العراف... شوية حشيش و ظفر القرد و أتوة تشوف كيفاش أمور النخوة و الاعتزاز تولي سانك سانك

samsoum a dit…

اي كما قال طارق انزل علي الحشيش و تفكّرني ضربة ضربة للنخوة
:))))

Gouverneur de Normalland a dit…

@ free-race & Tarek @ samsoum :

نشكركم على كل هذه الوصفات السحرية ...ضهر بالكاشف أن مشاكل "النخوة و الاعتزاز" عندنا و مداواتها أهم ببرشة من مشاكل "العجز الزززنسي" و عقاقير الفياقرا و غيرو...وربي ينقصلنا من العجز

m0ntassar a dit…

سيّب عليك يا سي القوفرنور , واحد حبيّبي مشا للطبيب على مشكلة النخوة و الإعتزاز هو زادة ياخي عطاه دواء رزاه فيهم الزوز
أنا شخصيا نقترح عليك انشاء صندوق نرمالندي للنخوة و الإعتزاز و تعيّن لجنة مختصة تقوم بمعاينة حالات النقص و تقييم الكمية اللازمة لكل حالة باش تسهل عمل سلطة الإشراف
و آهوكا منها حاجة و منها حويجة

Anonyme a dit…

يا حضرة القايم على النورماللاند ثمة و صفة خبّـاها عليك الطبيب و هي لا محالة تنجم تقول يعطيوها بالوجوه:أية شد عندك تحب ترتاح ضربة وحدة من الطلوع و الهبوط متاع هالآفة اللي يسميوها النخوة و الإعتزاز يلزم تستأصل غُدّة الضمير و راهي عملية بسيطة ما فيها شيء لا تبنيج و لا رقاد في الكلينيك و من نهارت اللي تنحّي هاك الغدة حاشاك توللي لا عندك إحسلس لا بالنخوة و لا بالاعتزاز و دنيتك توللي في العنبرو اتفكـّرني.و تقول قال آزواو.

Clandestino a dit…

lool

Gouverneur de Normalland a dit…

@ montastar :

شنوة نسميوه الصندوق ؟ 77-77 ؟ هههه


@ azwaw :

عندك الحق يا ازواو ...صحة ليه الي ضميرو مات من أوّل ما تولد...هذوكم لا عملية و لا مصروف

@ clando :

كيما تقول أربيكا ...ههههههه

roy mustang a dit…

salut mr le gouverneur on a un point commun moi aussi j'attendais chaque mercredi majed.. eh oui c'est un des problêmes de l'éspace médiatique tunisien l'immobilsme de la pensée un chauvénisme absurde sur des idée qui ne valent pas le dourou.. eh oui il mérite bien ce toute la critique de http://boudourou.blogspot.com il n'a fait que prouver la chose...rabi youjberlou ce vieillard sénil

Anaruz@Amal a dit…

tnajem tabra w l mas2la wa9tya betbi3a hata tnahi sbab 3eltek w 3eletna lkol w eli howa dhamir, just ma 3lik kan ta3mel bensiha el 9ayla eli lazmek thawlou dhamirek hahda ila dhamir ghayeb ta9dirouhou mosatater.