حرية التعذيب

لا لا ... مش حرية التعذيب , يا عم الباجي. قلنالك حرية التع..بير ... تعبير يا عم الباجي مش تعذيب. تسمع فيا ؟ السقيفة طوالت أما مزالت البركة يا حاج. قلتلك مازالت البركة ... لا ما قتلكش علاش فما أربعة تلافز بركة. التعتيم فاهمينوا. نحكي على البركة .. تي, علاش السبان يا عم الباجي؟ مانيش الراجحي راهو.

شي ... عم الباجي ما يسمعش. وراوله باطيمة لابراس و الصحافيين الي كلاو طريحة, فهم الي المشكل مشكلة ياجور.  يا عم الباجي فما  وليٌد عمره 13 عام ضربوه ضرب مبرح و فما  متضاهرين سلميين تم الإعتداء عليهم ومنهم بنات و نساء و فما شباب تم تعذيبهم و فما شكون تم إغتصابه من طرف أعوان أمن. يا عم الباجي ...تسمع فينا بالله ؟؟؟ اه ؟ ... و قيت قيلولة سيدنا ؟

زعمة شكون بش يسمعنا وقت الي نستغيثوا من التعذيب؟ ... الحكومة عاملة روحها مش هوني, و الأحزاب السياسية الي كانت عاملة من القضايا الحقوقية سجل تجاري, ما عادش يساعدها هالقلم و لاهية بأجندا سياسية. فماشي ما تخلط على بريٌج في خبزة القاطو. الله لا تحرم مومن. قالك فما حتى أحزاب كانت ناضلت ضد الديكتاتور وكان تعرض برشة من مناضليها للتعذيب جات  في مجلس تحقيق أهداف الثورة و بدات تعارك : علاش تجبدولنا على التعذيب ؟ و علاش تحبوا تأججوا الشارع؟؟؟. يعني بش ما نقلقوش الباشاوات الي يخمموا في الطورطة, تو نخليو المجرمين الي بالزي يشدونا بالسيف و يغتصبولنا ولادنا وبناتنا و نسكتوا حفاظا على قسمة عادلة للورثة.

بصراحة أنا التو ما إنجمش نتخيل كيفاش هالسيد الي يغتصب في المواطنين ولاد على بنات. كيفاش يعيش حياة عادية. و كيفاش بعد ما إغتصب  بنات الناس و ولاد الناس يروٌح  للدار. و يبوس صغاره و يسأل مرته شنوة العشاء. و كيفاش زعمة ينجم يبوس مرته ؟ زعمة في الليل يقوللها "تاعب" ؟؟  زعمة قبل ما يرقد يعمل دعيوة خير للصيد و للباجي ؟

حكاولي مرة حكاية على واحد من كوادرنا المشهورة في التعذيب الي تميزت بالتفاني و الإخلاص في العمل. عدى حياته يعذب في خلق ربي و برى يا زمان, ايجا يا زمان تقدم بيه السن و صغيراته كبروا و منهم بنية نوارة وصلت عمر العرس و عداته حتى لين بدات تيأس ... و اذا بيه  وليد حلال, ما تعفرش عليه منين خرجلها يضهٌر اهتمامه بيها. و نظرة و  ابتسامة و ترنديفة  ... أيا الحاصيلو حبوا بعضهم و حسوا الي مجعولين بش يكونوا مع بعضهم. وبما أن الراجل متديٌن, قرر يدخل البيوت من أبوابها و يمشي يخطبها من أهلها.

أيا هاك البنية عينيها قلوب قلوب و هي تحضر في روحها و تروشك في الدار. يضرب الناقوس, العروس جاي مع أهله. يقعد في الصالة. يجي والدها يستقبل الضيوف. تجي العين في العين : العروس يطلع من العباد الي  تحبسوا و تعذبوا على يدين بو البنية الي يحبها. العروس يخزر  لعون التعذيب, عينيه يدمعوا و يهرب  ساقيه أعلى من راسه من هاك الدار. البنية ما تفهم شي, بما أن والدها يوهم فيها من الي صغيرة أنه مجرد موضف في الوزارة, و تاقف تسأل في والدها "اش فمة؟"  "اش صار؟"  "شبيه هرب ؟". يلتزم الصمت.

دعيوة خير لكل من تورط في تعذيب أو إهانة تونسي ... يراك تشوفه في صغارك, ويراك معذب كيما عذبت ... و الي عند ربي مش بعيد.

يا توانسة يالي قهروكم , يا توانسة يالي عذبوكم, يا توانسة يالي غبنوكم, بن علي هرب. بن علي هرب و خاللكم مصايب زرقة. أكبرها جماعة التعذيب.

أنا الي يزيد يبهتني, هو أني ما انجمش نتخيل شنوة الدافع الي يخلي هالناس تضرب و تجرح و تخنق و تغتصب و تحرق و تنحي الضوافر و تقلٌع ..الخ. كيف تجي تشوف أكبر مجرمي العالم هذايا  و الي متورطين في جرائم ضد الإنسانية, تلقى أغلبهم يحملوا فكر معين يضطهدوا في الناس على خاطر هذا الفكر . كيما النازية و الا التعصب الديني الخ. لكن هذوما الي يمارسوا في أبشع الجرائم هكاكة من غير حتى دافع غير  نشوة تعذيب المواطنين و التنكيل بيهم, هذوما يلزمهم فرويد شخصيا و شوف و شوف يفهمش حاجة من تركيبة طاسة مخهم.

بالله يا معذبين أهلكم, و يا حكومة يا  الي قاعدين تغطيو عليهم عن علم أو عن جهل, ما يزيهش المواطن التونسي تعذيب الحياة اليومية؟؟؟ تي المواطن معذب خلقي : يقوم الصباح يا فتاح يا رزاق يعرضه مسبح ألمبي من الطبعة, برة لوٌج كيفاش يعديه  من غير ما يغطس الكله حتى لشوشة رأسه, و من بعد يتعذب في وسائل النقل و الكار دزني و ندزك وريحة الصنان ضاربة أطنابها. و من بعد يتعذب بش يطلٌع شهادة من مصلحة و الا من وزارة في إطار مسلسل "أرجع غدوة"  و يتعذب كيف عرفه يمزبله قدام الي يسوى و الي ما يسواش و يتعذب كيف يشوف أهله و ناسه ناقصين أبسط المرافق بش يعيشوا عيشة سليمة. علاش امالا تزيدوا تحبوا تعذبونا. هانا معذبين من جراير القرارات الحكيمة متاع التبلعيط الي دام أكثر من نصف قرن. سيبوا صالح. و أنستوا

السبسي و مشاغبي الياجور

أيا قلنا السلام. تصديقا لكلام قائد السبسي في خطابه الأخير , مشكلتنا في تونس هي الياجور :  و لذى يلزم الكلنا  نكونوا يد وحدة  من أجل محاكمة المشاغبين الي يستهدفوا في رجال الأمن بالياجور ... ويقمروا في الرأس زادة ... كيما القنا... استغفر الله ...شوية لا قلت "قناصة" لا عاد ... القناصة اشاعة .. و كان البلاد داخلة في حيط ... من المشاغبين متاع الياجور.

بش يوريك قداش مشاغبي الياجور هذوما خطر على أمن البلاد ... شوف كيفاش متمرسين : قالك قام المشاغب على الصباح, يا فتاح يا رزاق, زعمة اش نعمل اليوم ؟ اش نعمل اليوم ... برة نمشي لشارع الحبيب بورقيبة نعمل شوية شغب و نهد على باقة متاع شرطة نحب نقلبها. وهكة خونا العون , ربي يكون في عونه, الي مسيكن في حالة نفسية ترثى لها. يولي ما عنده حتى خيار الى أنه يرد على هذا الهجوم.

يولي مشاغب الياجور يفصع في شوارع تونس.  وبما أن المشاغب مافيا و مهف. بش يتخبى يقصد دار كبيرة . ألا وهي دار لابراس. بالطبيعة يدخل لدار لابراس. يستقبله البواب. يعديها عليه و يوهمه أنه صحفي. يخليه يدخل و من ثمة يتسلل الى السطح. و في السطح يقعد يصطاد في رجال الأمن و يخرٌج من جيبه ياجورة...

 ستنى ستنى .. هذه نقطة يلزم نوضحوها. مشاغب الياجور يلزم ديما يكون مسلح. ديما فوقه ياجورتين و الا تلاثةعلى القليلة. و كان عندك مرمة و طحت مونك ياجور, ما عليك كان تشوف مشاغب الياجور يسلكلك أمورك. ف... (كيما يقول السبسي) الياجور, هذيكا هي الذخيرة الي من غيرها المشاغب ما ينجم يعمل شي. وبش تفهموا يا جماعة قداش مشاغبي الياجور مهفات. يلزم تتذكروا أزمة الياجور الي تمر بيها بلادنا و كيفاش رغم هذا ديما مشاغب الياجور يلقى كيفاش يحط على جنب الذخيرة متاعه من الياجور بش يمارس هوايته المفضلة.

و الأدهى و الأمر عند مشاغبي الياجور. هو أنهم ينجموا يوهموا المتأزمين النفسيين و خاصة منهم الي يخدموا في الداخلية أنهم برشة. مما يفسر الي هؤولاء وقت الي إقتحموا دار لابراس ما فشخوش واحد برك أما اعتداو على برشة صحفيين. وكانو اعتداو عليهم ببار حديد. هذا يبين نواياهم الحسنة و نيتهم في الحوار مع مشاغبي الياجور : واضحة الحكاية, حبوا يتوافقوا معاهم و يصبوا دالة.   لحسن الحظ  أن الصحفيين الي تهرسوا ,في جرة مشاغبي الياجور, يحبوا قائد السبسي و قائد السبسي يحبهم. و ديما يزوروه بش يبوسوه و هو يبوسهم كيما صرح الوزير المؤقت الي يكره كلمة "مؤقت".

أنا في إعتقادي أن هذيكا الإشاعة المغرضة الي يسميوها "قناصة" و أعوذ بالله من كلمة "قناصة" ما يطلعوا كان جماعة مشاغبي الياجور. الي وقت الي ما لقاوش ياجور دوروها كرطوش.

و من هالمنبر هذايا . أنا أتهم الحواتة علنا . أنهم من ضمن مشاغبي الياجور. تقولي علاش ؟ نقلك الي سيدنا و مولانا كمال اللطيف . أبقاه الله ذخرا للوطن. وجعله يواصل "خدمة البلاد بكل وطنية" و من وراء حجاب . كان صرح أن الوزير السابق الي "مش في وعيه" وصلت بيه الدناءة أنه يقعد مع حوات و يصاحبه جملة. ملا مستوى ... هذا الوزير المخلوع المخمور  الي تسول له نفسه أنه يكون عنده صديق حوات .. ينجم يعمل كل شي. و فما إشاعات تقول الي هو مصاحب و العياذ بالله واحد كسكروتاجي . اذا تقارب الوزير ,الي يحدث في البلبلة, بالحواتة ما يتجم كان يأكد أن الحواتة و ممكن زادة البحارة متورطين في الشغب الياجوري. و هذه ليست الا مؤامرة منهم على أمن و إستقرار البلاد. هذوما هوما الأطراف الي جبد عليهم بابا عزيزي قائد السبسي و الي قال  أنهم غروا بالراجحي.

نقطة أخيرة تبين تفاني البوليس السياسي ... استغفر الله ..نقصد  أعوان الأمن بالداخلية  في عملهم. أنهم ألقوا القبض على الفنان "ياسر الجرادي"  و سيبوا فيه غل الحالة النفسية متاعهم. هذه تنفع و هذه تضر. تقولوي علاش ؟ و اش مدخل فنان في حكاية الياجور. نقوللكم اسمعوا أغنيته الي يتغنى بتونس فيها و يقول : " نحلف بعرق البناية الي يهبط على الحجر يذوب, بالي رجليهم حفايا و الي تعبوا من المكتوب نحلف بيمين البحارة بالشمس و الريح و السحاب نحلف بالموجة الغدارة لا لا على حبك ما نتوب" . واضحة الحكاية .. سي ياسر بعلاقة بالبناية و الياجور و زيد يحكي على البحارة مما يفسر أنه من الممكن أنه يكون هو زادة عنده صديق حوات. هذا ما  جعل  أن قواة الأمن مارست عليه حالتها النفسية. عاش قائد السبسي. عاش اللطيف و كل من يخدم في بلاده و يعمل في السياسة من غير ما يشلق, لله في سبيل الله. ربي يشفي قوات الأمن من حالتهم النفسية. و أنستوا.

الثورة ركوب على الثورة

أيا قلنا السلام, من نهارة الي  ارتحنا من "رجل التغيير" و "حياة  الأمن و الأمان المباركة" تقلبت المشامية و ولينا نسمعوا في نغمة أخرى ... يغنيوها نفس الطبالة ألا وهي نغمة "الثورة المباركة " . مسكينة مباركة نهار كامل تضرب فيها الشهيقة و  الناس الكل تشلكلها في اسمها من عهد الى عهد و من رئيس مكبوس لرئيس مبزع.

و الي زاد على ما بيا هي حكاية "الركوب على الثورة". شنية هذي "ركوب على الثورة" ؟؟؟  فيلم كوبوي هو ياخي ؟ و الا روديو ؟ حك راسك و أحكي على الركوب على الثورة.  الي هذا شادلي داره يركرك في التاي و يدخل على الأنترنات يسب في خلق ربي على بعضه قالك شنوة . قالك الناس الكل راكبة على الثورة. و انت يا سيد ؟ يا لي دازة كرشك و شادد دويرتك تنبر ؟ على شنوة راكب ؟ على فركة ..بش نقولولك مبروك الحصان ؟

بصراحة الفكر الثوري ما ينجمش يتماشى مع العباد الي ما تحبش تتحلحز قدام التلفزة و الي تنبر في القهاوي و الي تزيد في الكلام من هنا و من غادي و ما تعمل في شي لبلادها.

أول حاجة هي أن فكرة "الركوب على الثورة" تزعم انه الثورة ماهيش متسعة للناس الكل. و أن الثورة هي فكرة اقصائية  و أنه  ينجموا  يقودوا  الثورة زوز و الا تلاثة من ناس و بقية حثالة المجتمع ما عليهم كان يسكروا افامهم و يسكتوا  بش ما يتهموهمش بالركوب على الأحداث. اذا ففكرة الركوب على الثورة هي فكرة برجوازية تحب تهمش العباد الي عندها ما تقول و ما تعمل و يبقاوا و صايا على الثورة كان زويز بلدية يجغجغوا علينا بالفرنسية و يتهموا في الشعب بالبهامة و على تونس السلام.

تقلي ايه ؟ و القوادة و التجمعيون و الرهوط الي كانوا امرضينا بالكذب و التكنبين و سرقة البلاد ؟ نجاوبك و نقلك أن هذوما كان نعتبروا رواحنا ثوريين, نخدموا بش نحضرولهم دوسيات باهيين يكشفوا تلاعبهم وصولاتهم و جولاتهم في مجال القلبة و نبعثوهم للقضاء بش ياخذلنا حقنا منهم و يزينا من الكلام  في الفارغ.

نمشي معاك لأبعد من هكة. بالنسبة ليا فكرة الثوة بيدها و حكاية الي أحنا عايشين في كنف "ثورة مباركة و الا علجية" ... فكرة هي بيدها غير ثورية و تمثل كيما يقولوا أهل التشوكيع و العياط  "ركوب على الثورة".  كيفاش ؟ أنا نشبه كلمة ثورة بكلمة "فورة" ... يعني الثورة هي حالة فوران و غليان. و كيما تعرفوا, كيف تحط  طنجرة ماء فوق القاز تبدى بالشوية تسخن و في لحظة صغيرة تفور. لكن الفوران ما يدومش ... يبقى حيز من الزمن و ياقف لإنك بش يجي وقت و تطفى النار و الا تنقص. كيف كيف بالنسبة للثورة . الثورة  حالة هيجان فكري تقصف و تفور على كل المسلمات و تغير الواقع تغيير تام و جذري. لكن فكرة أن الثورة حالة عادية و دائمة, كذبة كبيرة. و شوفوا الأمثلة من الأنظمة الي يسميوها "أنظمة ثورية". فهي أنظمة استغلت ثورة شعب نهار من نهارات و نسبتها  لروحها و قعدت توهم في العباد الي هوما مازالوا قاعدين يثوروا . علاش تعمل هكة ؟ لأنها ببساطة كان توهم العباد الي هوما مازلوا ثايريين, ما ينجموش يعاودوا يثوروا. كيما بالضبط شنوة قال العقيد المعتوه وقت الي ثاروا عليه الأحرار من بنغازي قاللهم  الي هو يمثل نظام ثوري كيفاش ينجوا يثوروا على الثوري ؟

الثورة يا جماعة هي أفكار و مش حياة ملموسة. تقلي تونس مرٌت بحالة ثورية نقلك صحيح و نأكد الي الحالة هذي ممكن تعود لأن الأفكار الثورية موجودة. لكن كان تقلي عايشين في نظام ثوري نقلك ما حاجتيش بالكذب. عطيني نظام ديمقراطي و يحترم أسس المواطنة و برى خويا ربي يعينك بثورتك و ببقرتك و الا الي تحب تسميها سميها.

يزيونا بالله من الوصاية رانا ماعادش انجموا. كل واحد يعين روحه وصي, هذا وصي على الثورة, و الاخر وصي على الدين الاسلامي, و الاخر و صي على محاربة الأوصياء على الدين الاسلامي, و الي هذا يعين في روحه دكتاتور صغير بإسم الثورة, و بإسم الثورة المرأة و لات عورة ... و بإسم الحداثة بالفساد الاخر عاث ... و بإسم الحرية يبني بلا شرعية , و باسم اللائكية يسب في الديانة الاسلامية  و باسم البوعزيزي  بش تمشيوهالنا زيزي. و أنستوا

 

 

الفوضى و الأغلبية الصامتة

أيا قلنا السلام. لاحظوا يا جماعة الي الحاجة الوحيدة الي التونسي ما نجمش يتخلى عنها ... رغم الإنذارات العديدة الي بعثها الجيش التونسي أيامات حضر التجول ... هي التحليڨ.

يعني التونسي يحط حياته في كفة ... و رشفة قهوة معى صحابه و جيرانه في كفة ثانية .. و بالطبيعة تغلب الكفة الثانية بدون منازع ... عند التونسي الكرامة قبل الخبز ... أما قبل الخبز و الكرامة فما القهوة.

بالله تصوروا تونسي هكة ساك ... حده حد روحه ... من حضر تجول مرته الى حضر تجول الجيش ..  مش يمساط ؟  و يولي مش تونسي ياسر ؟ عاد الكرطوش يولي أهون ...

"الأمم بهتت في التوانسة كيفاش الكلهم زلاط زلاط ... و تحداو خطر الموت المحدق .. و خرجوا بكل شجاعة و رباطة جأش يعسوا على بعضهم و يحميو في بعضهم" ... هذي الحكاية تنجموا تحكيوها للفرنسيس و الا للطلاين كانكم من جاليتنا في لمبادوزا .. أما ما تجدش عالتونسي. التونسي كان خرج بزلاط و الكرطوش يخيط ... لا لشيء الا لحبه و تفانيه في التحليڨ و التحضيب ... و الإنفراد بخبر مازال ما حكى عليه حد و الا ما سمع بيه حد.

ممكن ياسر الحزب التجمعي كان يجمع برشة ناس على خاطر فيه كلمة "تجمع" و التوانسة يموتوا عالتجمع و الحضب ... و هاك التجمهر متاع الناس  تواصل أول أيام الثورة ... و مرة يتقلب مسيرة و مرة يتقلب اعتصام... و انت و وحي اللحظة ... و بالطبيعة مادام فما حضب ... فما شكون جاته الفكرة أنه يدوُر الزيرو , بداها الي يبيع في المطبقة و خلط عليه الي يبيع الملاوي , و جاء بياع الكاكي و تلموا من غادي بياعة قطانية ... و جوُك ولى أحلى جو.

أيا أنا بصراحة ... كنت شايخ بهاك الجو العفوي الغير مسبوق ... و بداو الناس الي كانوا شادين ديارهم ... من الأغلبية الصامتة ... يخرجوا و يلاحظوا ... وبديت عاد نسمع ملاحظاتهم.

باهي خلينا واضحين : اذا التونسي  هوايته رقم واحد هي التحضيب , هوايته الثانية هي التمقعير... مما خلاني نطلق على هالشعب لقب "شعب الله المقعار" ... و فما تمقعير من تمقعير .. فما تمقعير للضحك لا غير و فما  تمقعير للتنبير و الإنقاص من قيمة الآخر بش السيد المقعار يحس روحه فوق الناس الكل.

هالنوع الثاني من المقعارة بداو يظهروا و بداو يعلقوا على انعدام النظام و "سيدي عربي ما تنفع فيه كان العصى " و "شوفوا ملا فوضى" و "حلال فيهم التعذيب" و "ملا هوايش" الى غير ذلك من العبارات الي تنزٌههم هوما و تخليهم تقولش عليهم فوق الحضب و التجمعات. و كمل زغرطلهم محمد الغنوشي في وذنهم بكلمة "الأغلبية الصامتة" ولى التنبير ايديولوجيا شرعية و خرجوا يسبوا في المعتصمين و يسبوا في العمال الي يطالبوا بحقوقهم و كملوها يتبكاو على عهد الأمن و الامان.

الكلام متاعي يا جماعة .. مش المغزى متاعه هو تنزيه الفوضى الي تعم البلاد. ألمي و اسفي كبيران على الي سارق زوز سراول ينصب بيهم و الي جايب كرهبته و شادد صف التاكسيات الجماعية يطلٌع في العباد على باعضها و الي  يصرٌف في العملة الصعبة في الشارع و الي يردك في البيرة وهو يسوق و الي جاء في وسط الكياس و يبني في نصبة  والي جاء قدام المسرح البلدي و حكمله الخشوع متاعه الي ما يصلي كان غادي ... الحاصيلوا مآسي. لكن ... وهنا فما لكن ... الي يبهتني أنا و أكثر من التصرفات هذي هو التسليم و الاستسلام  أمام أعمال كيما هكة دون التفكير حقيقتا في حل عملي.

التسليم يا جماعة راهوا ما ينجمش يكون ثوري و كان ما صارش انقلاب عالمُسَلَّمَات راهو ما عملنا شي .. و راهو الاخ زعبع يكلخ فينا في دهاليز وزارة الداخلية هذي تنفع و هذه تضر.

تقولي كيفاش امالا نشوفوا الأمور يا سي العريف ؟ ... ستناني نعمل رشفة قهوة مدام بدات تحضٌب ..ايواش .. الحكاية و ما فيها أن بلادنا عاشت عشرات السنين اذا مش قرون في التواكل, و انه ستانسنا بديكتاتور يوجه فينا تقولش يلعب في البلايستايشن و ما عمرنا ما تحملنا حقيقتا المسؤولية.  يعني مثلا .. في حكاية العباد الي تنصب في الشارع , نورمالمون فما بلدية خدمتها أنها تنظم الأمور  ومش بشرطه بحلول ردعية.  

علاش احنا نتصوروا السلطة كان بالردع و الضرب و المطراك و اهانة ؟  ياخي ما فما عباد تنصب في الشوارع كان في تونس ؟ عشت في أوروبا  و شفت عباد تنصب في الشوارع و ما عمره ما صار حتى مشكل بما أن البلدية تخدم في خدمتها و ماهيش جاية تقطع في الأرزاق.

يعني كان البلدية قننت الحكاية و جعلت للبياعة حق أنهم ينصبوا في البساج مثلا نهار الاثنين من  الثمانية متاع الصباح للساعتين و تجي هي تنظم النصب قبل الوقت و تنظف المكان بعد الوقت و تعمل جدول أسبوعي تعين فيه مكان السوق المتجولة بقية الايام , يولي الي يخالف ما يلوم كان نفسه, لأنك عطيته فرصة انه يسترزق في إطار منظم و هو مصر على المخالفة.

مخ الهدرة أننا في عوض نتلهاو نسبوا في بعضنا و كل واحد يحب يظهر خير من الاخر و في أقرب فرصة يتلفت عاليمن و عاليسار و يعمل مخالفة قد راسه,  علاش ما نكونوش ناس ثوريين بالحق و انقصوا من التواكل و الهروب من المسؤوليات و نحاولوا نلقاو الحلول للمشاكل. راهوا يا عباد ربي بن علي هرب ... و حتى حد مش بش يجي يخمم في بلاصتنا, البلاد رجعت لماليها ... و اماليها لازم يخمموا في البلاد قبل ما يخمموا في المصالح الشخصية على خاطر كان ما ناقفوش لبلادنا حتى حد ماهو بش ياقفلها . يزينا من سياسة الفرجة من بعيد البعيد و التمقعير باللا سلكي ... و هاتوا نبنيوا بلاد جديدة و نعرقوا عليها ..بش وقت الي احفادنا يتولدوا نقولوهم شوفوا شنوة بنينالكم , عليكم بش تكملوا. و أنستوا.

التدوينة المدنية

سيداتي انساتي سادتي ... مرة أخرى أنتم مع مسابقة ملكة جمال تونس, و نذكروكم الي وصلنا الى التلاثة متسابقات الاخيرات. و قبل ما تقرروا شكون بش تكون ملكة جمال تونس. هات نسمعوا امنياتهم و نظرتهم المستقبلية   لبلادنا ... تونس (تصفيق الجمهور) . و المتسابقة رقم واحد بش تبدى و تجاوبني على سؤال كيفاش تشوف تونس المستقبل ؟

- المتسابقة الأولى : نتمنى قبل كل شي ان الناس الكل يحبوا بعضهم و نعيشوا في عالم الكله سلام  و يكون العالم هكة فرحان من غير حروب و ... (تمسح دمعه من عينها. بالطبيعة دمعة وحدة خير ما يتبلبز الماكياج) حب ... برشة  حب

(تصفيقة كبيرة للحضور)

- المتسابقة الثانية : نتمنى برشة حب. و نحب الديمقراطية و الحداثة . و يلزمنا ديما نقدموا القدام . و نردوا بالنا باش ما نقدموش التالي ... و يلزم يعم الحب و الوئام ... و يبيعوا في الشارع الكاكي بلاش ... و .. ( تعمل روحها تمسح في دمعة ما هبطتش) حب .. و سلام

(تصفيقة كبيرة للحضور)

- المتسابقة الثالثة : يلزم نتفقوا الكل على الديمقراطية و نحبوا بعضنا ... و نعنقوا بعضنا

(الجمهور يصفق على كلمة نعنقوا بعضنا)

- المتسابقة الثالثة : و نتفاهموا الكلنا على السلام و الديمقراطية ...  و علاش ما نلموش رواحنا و الكلنا نصححوا ورقة و الا نبصموا الي يلزمنا نحبوا بعضنا و نقدموا ديما القدام و نحبوا الديمقراطية و نحبوا تونس ... بلاد الثورة

- الزوجة :  يا راجل ...فيق ...فيق

- الزوج :  اه ؟ شفمة شكون ؟

- الزوجة :  تي فيق .. هاك وليت تشخر ...

يهز راسه, يلقى روحه في بيت الصالة  قاعد قدام التلفزة و بجنبه مرته تصلح في أوراق الامتحانات.  يفهم الي هو كان ناعس و يمسح الريقة الي  خرجت على فمه. يحشم من روحه على الحلمة التافهة الي حلمها ... بملكات جمال تونس ... و يقعد باهت منين جاه الإلهام باش يحلم بحلمة كيما هكة. يخمم يحكي الحلمة لمرته و الا لا ... هو متلفت و يسمع صوت  يقول : " احنا مع الحداثة و الديمقراطية و يلزمنا الكل نصححوا ميثاق يضمن القيم هذه ... و علاش ما نلومش المدونين التونسيين.. يصححوا حتى هوما و يعملوا تدوينة يحثوا فيها الناس على الديمقراطية ... و ينصحوهم بش يحبوا بعضهم ..." ... يتلفت ... بش يكتشف منين جاء الصوت هذا ... يلقاه  برنامج سياسي في التلفزة, و الي يتكلم سياسي معروف عن حزب معروف ...

- الزوج : على الأقل كان جيت  نصوت لملكة جمال  أهوكا الواحد يشلل عينيه .. أما هذوما لا مخ و لا منظر

- الزوجة : شنوة ؟ اش تخرم ؟؟؟؟

- الزوج : شي ... شي ... نمشي نتكب في فرشي خير ... و ننصحك حط روتانا ... المستوى أرقى شوية على قناة روتانا

http://www.facebook.com/?ref=home#!/video/video.php?v=180488998666731&oid=182969491721182&comments 

تسونامي الهازبين المهزوبين

أيا قلنا السلام. زلزال يا جماعة ... زلزال كبير. لا, مانيش نحكي على الزلزال الي صار في اليابان. نحكي على الثورة التونسية : تهزت الأرض من تحتنا و طيحت سيستام كامل  بايت , بائد,باير . كيف ما كل زلزال عنيف و مفاجئ, خرجوا الناس من ديارهم مش فاهمين شي و مش حاسين بعمق و كبر الرجة." اش ثمة اش صار ؟" برشة تلفتوا عاليمين و عاليسار فماشي ما يقيٌموا الأضرار .. حتى شي ما ضهر كانش فكرة وحدة :  الي ولينا أحرار.

الحرية للتوانسة ... الشعب التونسي حر. الشعب التونسي العظيم  ... ايه و من بعد ؟ خرجوا علينا نفس الوجوه في التلافز يحكيوا بإسم الثورة ... نفس الوجوه الي كانت تطبل. نفس الفاتشات الي كانت تغني في عهد الرداءة. نفس مسلسلات العار كرط و عاود. نفس الجرائد البودوروا حمم وجهك و أقعد بودورو. نفس المتمعشين بإسم "سينما تونسية". نفس السياسيين مشكي و عاود و المعتمد الي قتل الشهيد العلايمي  في أحداث الحوض المنجمي حطوه معتمد الحامة ... أوه يا الحامة أوه.

المفارقة يا جماعة, هي أنه الزلزال التونسي  بأقصى دراجات سلم البوعزيزي قلب ما قلب, و اذا بيه يوصل لمصر يحطم أصنام أبوالهول البارك, ويتعدى من ليبيا يقلب  و يدمر مدمر القذافي و عائلته و يخلط لليمن يقسم في ثلاثة علي و عبد الله و صالح و يفجر براكين غضب في الجزائر و سوريا و قطر و الأردن و السعودية و البحرين و فلسطين و الصين و بلدان اخرين و ربي يهد الظالمين ..امين ثم امين.

كيفاش زلزال عنيف كيف هكة يضرب بعيد و ما يهددش المكبشين و المتمعشين ويبقى حده القصبة و الشواشين ؟ و قت الي هد ما هد و ما شاور حتى حد ؟ الجواب تلقاووه في زلزال اليابان.

اذا  زلزلت الأرض زلزالها و أخرجت الأرض أثقالها و قال الإنسان مالها  ...احنا توة يا جماعة في فترة "مالها؟" ... مش فاهمين –كيف ما يقول سي قائد السبسي- كوعه من بوعه. و فترة "مالها" تكون مرفوقة عادة بالطامة في المعنى القراني و ب"تسونامي" جارف وقت الزلازل الكبرى يضرب بموجاته الهائلة و يجرف ما تبقى من البني القديم  و الفكر العديم و الطبال الخديم و الصحافي الذميم و السياسي الدميم و التجريم و التلجيم .. بقدرة قادر عليم.

ايه ... تقلي وينه الهازبين ؟ نقلك هانا جايين. الهاز بين كلمة بالأنجليزية تعبر على صياغة نحوية في ما معناه "كان و ولى  ولن يعود" .. و تطلق كلمة هازبين على هاك المغلوبين المنكوبين من النجوم الافلين و الي ماعاد ما يسواو لا صوردي و لا  مليم.  قداش عندنا من هاز بين يا بوقلب ... برشة برشة ... نكتب و الاسامي تتعدى قدامي ... تي أغلبية الموجودين على الساحات الفنية و الإعلامية و الي ترهوجوا من زلزال الثورة و ما تحلحزوش رغم صولاتهم و جولاتهم في ميدان الرداءة مزالوا يحلوا في كشخهم  ويوعدوا في جماهيرهم (الي  عددها يقرب ياسر لعدد المنتخبين في صناديق الإقتراع للحزب الدستوري في انتخابات نزيهة) بأعمال جديدة بعد تفرغهم التام بحكم سقوط مهمتهم متاع "استفيد".

كانوا الفانانين ... وسطرلي على كلمة "فنانين" . كانوا مهمشين في عهد هاك الشين (الي يسميو فيه زين) . شادين تركينتهم ...قاعدين ... الي يخنتب في تركينة و الي حل مدونة يعبر فيها و الي هاجر و الي ولى تاجر  و الله يهلك الي الي كان السبب .. هاك الفاجر.  

صديقي الهاز بين ... خليني نعطيك في العظم كليمتين : كان لاحظت الي الرجة  صارت , و الحشمة طارت , و العروق فارت و العقليات القديمة بارت و الطحانة حارت  ... افهم الي  الكرة دارت و قبل ما تشوف طيحة جارك شوف عارك ... و ثبت مليح مليح قدام دارك ... راهو تسونامي زارك.

تسونامي عنيف و عفيف قادم عالمدن و عالريف .. شبر شبر .. بيت بيت ... زنقة زنقة ... يجرف اليابس و يخلي الأخضر ... و الأخضر أولى بتونس من الي  يشوف فيها جرد مومس و الي عليها يتنومس.

تسونامي هاو عادو جاي ... بش ينهي عهد الوشاي و عهد الي لاعبها باي ... و ازاي ازاي ازاي ... اوصفلك يا حبيبي ازاي ... بعد خروجكم بلادي تبقى الزاي يا حبيبي ... أيا البسوا ماسك .. الموجة جاية . و انستوا .

الحركة التدوينية : قطع يد عمار

بعد الاحداث الدامية الي تعرضتلها بلادنا في سيدي بوزيد و بعد الاحتجاجات الشعبية الي طالب بيها مواطنوا بلادنا في كل أرجاء وطننا العزيز مطالبين بانهاء المحسوبية و الفساد و بنظام عادل و بحرية التعبير و التظاهر الخ الخ ... يعمل هكا عمار و يحشلنا التن بلوغس ... علاش و كيفاش  ؟

أنا نضن الي عمار عنده روح مازوشية ... و عنده مدة  ما كلاش على راسه ... توحش نمزبلوه و نمرمدوه ... مادام هو مش الستار ... و الي احنا كيف كل مواطني بلادنا لاهيين بالمطالبات الشعبية العامة.

وكيف كل ولية مصابة بالهستيريا خونا عمار غار من اهتمامنا البالغ بهذه الأحداث و نسياننا ليه و بدى يبربش فينا بحجب عمره ما تجرأ و عمله سابقا الا وهو حجب مجمع المدونات الأكبر في تونس تن بلوغس.

في حقيقة الأمر الي يجول في بال عمار و الناس الي وراء عمار هو أن فم المدونين التونسيين أبخر و الي هات نحشوهم قبل ما ياكلونا ماكلة .. أما الي يبهت في تفكير كيف ما هكة , هو أن هالعباد بالرسمي مصطكين ...لأنهم ما يفهموش الدروس و الكفوف الي قاعدين ياكلوا فيها ... بالله يا عمار شنوة فاد انك عتمت اعلاميا على حكاية سيدي بوزيد ؟ تي ماهو العباد زادت هاجت ؟؟؟ و شنعت و رصاتلكم تغيروا في موقفكم من "حادثة معزولة في بلد الفرح الدائم " ل "فما بالحق مشاكل اجتماعية" ... مش شلبوق باهي هذا ؟ يلزم بعده داودي اخر ؟؟؟

ثم فما تفكير اخر موازي للبهامة متاع عمار ... عمار يقلك ... هات نحجبلهم التن بلوغس ... في اطار "فرق تسد" و تو يتلموا القننوات متاع التدوين و يشدوا في "سيب صالح يا عمار" و ينساو اذاعة و متابعة الأحداث الي تجري توة في البلاد.

يا عمار قداشك مسطك تسطيكة بقري ... الي ماكش فاهمه هو الي الأحداث الي صايرة توة من انتفاضات شعبية هي في علاقة بسيادتك زادة ... من كثر ما كممتنا و غددتنا العباد فدت مالسكات ..فدت من أنها تسكر جلغتها و تعدي ... فدت من أمثالك من جلادين و من عباد ترص فينا رصان. المطالب هي نفسها  : ماناش بهايم عندكم و  يزي ما استبلهتونا و استهبلتونا ...فاهمين كل شي و حافظين رواندكم الكل. و جاك نهار يا عمار ... و اكيد اليوم قبل غدوة بش تنهار ... قص الي تحب بابا ..لأن أيامك معدودة ... و جاء اليوم الي بش نقصولك يدك ... و ليك و لكل جماعة الخيارات .. خيارة من النوع الممتاز ...