samedi, janvier 02, 2010

دين الكوجينة




يا سادة يا مادة, يدلنا ويدلكم للخير و الشهادة .. الكلام الحكيم قياس , و الي يحب النبي يصلي على سيد الناس.

يا مولى الليم و الليمون و الخبز و الزيتون عطيني ليمك و ليمونك و خبزك و زيتونك, نرجًعلك ليمك وليمونك و خبزك و زيتونك و وقتها ... وقتها لا تبقى تسالني لا ليم و لا ليمون و لا خبز و لا زيتون.

يحكيو على مرى يعيطولها خالتك بية , ربة بيت ممتازة ذات أخلاق و خلق عالية متوسطة الجمال, عرست عن طريق ركن التعارف بعمك جمال. أما مش هذيكا هدرتنا ....

خالتك بية من صغر سنها, تغير على كل ماهو عربي و عندها انحياز كبير لكل ماهو عنده صلة بكلمة عربي... لا, ما كانتش قومية عربية و الا من احباء جمال عبد الناصر ... تي هي كان في المسلسلات المصرية ما يجبدوش على عبد الناصر راهي ماتعرفوش

. لا ... خالتك بية الي يهمها هو مثلا ... العضم العربي , الدجاج العربي ....

مثلا ثنية طويلة و تحكيلها على قصة عربي تشيخ , تشوف عبد يدور مع كلب عويقل تدوح راسها و تتأسف على انقراض الكلب العربي متاع الحومة.

حتى في اطار الثقافة ... خالتك بية من هاك العباد الي كيف يشوفوك تتفرج في برنامج بالقاوري تنهيك نهيا شديدا و تقلك "حطلنا حويجة عربي يهديك .." و الا كان لقاتك مصفار و قاصد ربي لفارماسي و في يدك ورقة طويلة عريضة متاع دوايات, كتبهالك الطبيب ... تشهق فرد شهقة و تقلك "فاش مطلوب ؟ تي تو نعملولك دواء عربي تقوم صح سالم"

تي هو حتى في المكتب حبت تعمل قصة عربي في امتحان التاريخ (هي تقول ديما بالله شنوة فايدة مادة كيما التريخ كان وجعان الراس بحكايات فارغة) ياخي الأستاذ هو الي عمللها قصة عربي و شدها بالفوسكة حاشيتها في بوستوها ... و كيف الاستاذ قاللها خرًج الفوسكا ... بطبيعة الحال عملتله شوهة عربي و خرجت طرد نهائي ... أما كيف تسألها توة عالحكاية تو تجبدلك ان المسألة هي مسألة شرف ... و تقلك "باش عربية كان مش شريفة" ... و الهدرة هذي زادة حكاية أخرى

الحاصيلو .. خالتك بية لقات روحها في الدار .. قالت "ما صار شي ... هو شنوة مستقبل فتاة عربية اصيلة اذا مش في الدار" ... و هكا خالتك بية لقات وقت أكثر باش تتعمق في أصولها و عروبتها و من حينك .. تعلمت اتطيب الكسرة العربي و الحلو العربي ...

وقت الي استصينت في أمور الكوجينة العربي, لقات خالتك بية فراغ كبير و كانت وقتها مدمنة على المسلسلات المصرية الي يبثوهم في القتاة الوطنية و بحكم الي ثورة الاقمار الصناعية مازالت ما حدثتش, تصالحت لأول مرة في حياتها مع المطالعة ... و ولات تطالع و تعدي وقت كبير وهي تقرى

ايه ... فاش تقرى ؟ تي مش وقتها متعدية بجنب المكتبة و تشوف في تصويرة أحدى بطلات مسلسلها المفضل في أحدى المجلات ... شرات هاك المجلة الخليجية الي هبطت عليها كيف الميدة من الجنة : تلقى يا من تصاور متاع ممثلين حبتهم يا من نصائح عربي يعملوا ستة و ستين كيف ... و كملوا دخلولهم خيط تليفون في الدار ... جنة و فيها بريكاجي

- ألو ... اختي سعيدة ؟ تي وينك ... تصبغ في شعرك ؟ تي لا ... زيد كعبتين عضم فوق راسك ... و الله ... أي أي ضربة ضرية ... و الله كيف ما نقلك ... قريتها في زهرة الخليج

- ألو ... تي لا يعطيك ... الزبدة يلزمها تكون عربي ... ايه ... لا وه ؟ تغلفها بالكاغط بش تتفورم ... تي أي مثبتة بهيشي ؟ قريتها في مجلة سيدتي ...

- ألو ... شفت ؟ شفت ما تسمعش كلامي ؟ قتلك لوح عليك منه ... برجه و برجك ما يوالموش بعضهم ... ماللول قتلك فك عليك ... باهي ايجاني ندقزلك بالرصاص ... تي أي جربتها و العدد هذاكا مازال عندي ما طيشتوش ...

امشي يا زمان و ايجا يا زمان ... برابول في السطح بجنبوا برابول ... المجلات معادش تاكل ... و القنوات قد شعر الراس

- ألو ... اهلا اختي سعيدة ... لا حرام ... وه ... حرام زقوم ... اسألني انا نقلك ... الكولون هو نيلون و الا صوف ؟ يا بنتي حرام حرام ... استغفر مولاك ... اسمع ... قول هاك الدعاء 15 مرة ..تو. أمورك تولي سانك سانك ...

شكون ؟ اه ... روحت ؟ وه وه ... هاك الفاسدة روحت ؟ أي قالك تقرى البرى ...باش تعديها على شكون بالله ؟ راهي اللطف من راجل لراجل ... تي حرام زقوم ... عايشة من غير محرم ... مش كان شدت دار بوها خير ؟ على الاقل شوية ستر يا ديني ...


بالله لحظة يا جماعة ... تعديت في بعض الأسطر على 20 سنة من حياة خالتكم بية و ما جبتش جملة على عمكم جمال.

عمكم جمال ناس ملاح, حده حد روحوا , كل كلمة يقولها في حقها, محراث متاع خدمة. كان راجل حشام ياسر ... مما لزه باش يلتجئ لركن التعارف بش يلقى شريكة حياته و فيسع تم التقابل و القبول و الزواج.

كان عمكم جمال تصور الي حياته باش تتبدل رأسا على عقب بعد الزواج ... الا أنه تقريبا ما تبدل شي. صحيح الي كان متميزر شوية في أمور الماكلة و تحسنت الامور في فترة الي المدام تغرمت بالكوجينة ... الا أنه كان يحس روحو زايد و الا مش موجود جملة في هاك الدار. يدخل يلقى مرته لامة زوز صاحباتها اتدقزلهم ... و يرقد وحده بحكم الي المسلسل الي اتبع فيه يتعاود بعد نصف الليل و كان شتهى يعمل حوار مع المادام تحكيله على كيفاش اللوبان العربي يولي ما يذوبش في الفم ...

و حتى كيف خالتك بية حبلت و جاء ولدهم ا لياس ... كانت طريقة تربية ابنه تمثل له خيبة كبيرة ... كان يتغبن على خاطر ما كانش عنده الوقت الكافي بش يخصصه لولده بحكم خدمته و المادام نهار كامل تبعث فيه يلعب في الشارع بش ما يوجعلهاش مخها وقت الي تبدى هي لاهية في أمورها ...

كبر الياس و ولى أكبر عايق في الحومة ... جاو البارابولات و زادو شربوا مخ خالتك بية ... عمك جمال يشوف في الامور معوجة و ما لقى شي يطمنه ... و وقتها تعرف عالانترنات ...


وين كنا احنا ... اه ... ايه خالتك بية تتكلم في التليفون ... و يدخل عليها عمك جمال

- .... عايشة من غير محرم ... مش كان شدت دار بوها خير ؟ على الاقل شوية ستر يا ديني ...

عمك جمال يجبد مرته ... و يشيرلها أنها يلزمها تعلق ... خالتك بية باهتة ... عشرين سنة عشرة عمرو ما عمللها هكة ... والا حكى معاها بالطريقة هذيكا ... تعلق و تنصاعله ... من غير ما يتكلم يشيرلها بش تقعد ... تستجيب ... يقعد مقابلها ..

- وينو ولدك ؟

- يضهرلي خرج مع ولاد الحومة ...

- راهو كيف العادة يسكر

- استغفر الله انا ولدي يسكر ؟ قول عشرة مرات ... الله لا...

- اسمعني ... عندي كلمتين خفاف نظاف بش نقولهملك ... تعرفت على مرى على الانترنات ... عندنا 3 سنين نعرفوا بعضنا ... بش نطلقك و نعرس بيها ...

و هز روحو و مشا ... و تمت خالتك بية تسبح ب "يا لطيف" 50000 مرة ... لا رجع راجلها ... و لا روح ليلتها ولدها بش يهزها للاستعجالي ... و لا نفعها الدواء العربي ....

19 commentaires:

cactussa a dit…

j'ai adoré!!! :)

Anonyme a dit…

mamssssstek!!

Moghrama a dit…

واقع المجتمعات العربية المرير وسنين الضياع بين طيّات مجلاّت تافهة وبرامج فضائيات هابطة وعقول تُدجَّن

Anonyme a dit…

المرأة هي المرأة مهما إختلف المستوى أو الدرجة أو التربية أو ..

هشوش a dit…

عالميّه خويا التدوينه هاذي ما لقيت ما نقول
لخّصت 60% م الشعوب العربيّه (اقل شي 60% نتصور اكثر ياسر!!)
يعطيك الصحه خويا

Hamadi a dit…

Une très bonne reproduction d'une partie de la société à qui la presse (tv, journaux, magazine) représente le seul moyen de se cultiver. une culture boudourou.

illusions a dit…

adorable le texte,
mais ça ne reflète pas vraiment la majeure partie de notre société.

Anonyme a dit…

à côté de la plaque!

Anonyme a dit…

je pense que ça décrit une certaine réalité vécu par certaines familles au niveau intellectuel moyen et dans des quartiers où la culture minable de boudourou et des livres jaunes domine. Bravo quand même.

mirakus a dit…

berjuolia momtééz!

ta5ralouvitch a dit…
Ce commentaire a été supprimé par un administrateur du blog.
Gouverneur de Normalland a dit…

@Cactussa

Merci ma belle !

:)

Gouverneur de Normalland a dit…

@Moghrama

وهو كذلك سيدتي

:)

اشكركي على المرور

Gouverneur de Normalland a dit…

الى هشوش

شكرا أخي على التعليق و المرور

فما خلط كبير في ثقافتنا بين "العربي" و "الأعربي" مما جعل فما مغالطة في تشخيص الموروث الثقافي

Gouverneur de Normalland a dit…

@Hamadi :

À mon avis, il ne s'agit pas de mettre le doigt sur ce qui est une sous culture et ce qui est une vraie culture mais il s’agit, en priorité, de mettre le doigt sur la l'autoreprésentation de notre culture.
Une autoreprésentation colonialiste et qui prône l’ignorance comme acquis historique.


Je te remercie mon ami pour ton passage.

Gouverneur de Normalland a dit…

@illusions

Ecrire n'est pas représenter a mon avis.

Le cas de khaltek baya peut être un cas unique mais cela ne diminue en rien la légitimité de la représentation du personnage.

Soulignons de passage qu’à la base c'est une fable. Donc je suis plus dans la caricature que dans la description.

Je te remercie pour ton passage cher ami.

Gouverneur de Normalland a dit…

@Rym

Merci pour ton passage

Gouverneur de Normalland a dit…

@Mirakus

Merci mon ami :) Bienvenu a ton pays virtuel : Normalland

Gouverneur de Normalland a dit…

@ta5ralouvitch

el commentaire mta3ek sidi, ybayen barcha 7ajat :

t9oul "toul 3omrek .." donc enti ta3rafni toul 3omri ..

ou men ba3ad tssebni

hedha ybayan elli non seulement enti inssan mouch motrobbi (vu ce que tu as dit) mais aussi elli enti inssan jabén .. parce que tu n'oses pas le dire directement et tu es obligé de prendre un pseudo pour le dire ...

wa lidha ..ena inssan mouch motrobbi & jabén & 7ssoudi j'ai rien a faire de lui

enesst si "takhralouvich"