samedi, mars 07, 2009

مشلك البلاد ... كب سعد تونس

تعليقي للسيد الفاضل

يطيح و الله سعدك ... يطيح والله سعدك

ما تعرفش كيفاش تتكتب تونس بالفرنسية ؟؟؟؟؟

و عامل فيها تدافع عالبلاد ؟؟؟؟

تي أنت مشلك البلاد و مشلك كل من يغير عليها و ينتميلها

31 commentaires:

Legend Of The Fall a dit…

أعلاه يطيّح الله سعدو؟ آش ها الدعاء؟ و علاش هالكره؟ الراجل يدافع على حزبو و يكتب عليه و على رئيسو. اشنوة المشكل في هذا؟ و الأكثر غرابة منك إنك تكتب على غلطة بسيطة لا أكثر و لا أقل. ما نتصوّرش اللي هاالسيد ما يعرفش يكتب تونس بالفرنسية. على خاطر ظاهرلي برشا فينا كتبو و يكتبو و لكن يغلطو من غير ما يفيقوا

ça se voit que ce n'est qu'une simple faute de frappe.

بربي شويّة انظباط و احترام و كان عندك حاجة مش عاجبتك في البلاد قولها و خلّينا نتحاورو فيها من غير لا كره و لا سبان

samsoum a dit…

@legend of The fall; Moi j'ai qq chose qui ne me plaît pas dans ce pays. c'est le président et sa famille mafieuse, je veux qu'ils arrêtent de profiter du pays et changer les lois pour qu'ils profitent de ses richesses et changer la constitution pour rester au pouvoir. je veux que toute sa famille soit arrêté et qu'une commission judiciaire trouve l'origine de chaque millime que lui et sa famille ont récolté depuis 21 ans.
Voila on peut discuter maintenant?

Legend Of The Fall a dit…

@samsoum: معناها انت همّك الوحيد هو هذا؟ و الشيء هذا مقلّقك برشا؟ كي هوما خذاو و بناو و قدّو و عملو آشنوة اللي مقلقك؟ نحاولك خبزة و إلا نقصولك في مصروفك؟؟؟؟ أنا مانيش اندافع عليهم هوني، أما انحب نعرف بالظبط اشنوة اللي مقلقك في الموضوع قبل ما نبداو حوارنا الشيّق

Gouverneur de Normalland a dit…

@legend of the fall

مرحبا بيك سي ديانا ماغازين

أولا ما عندي حتى مشكل مع الحزب الدستوري الديمقراطي الي هو حزب تاريخي في تونس و تاريخو في تحرير البلاد حد ما يشكك فيه ... و أنا كنت من أول المرحبين بناشطي الحزب في هالفضاء و يضهرلي تعليقاتي عمرها ما حملت كراهية لحتى حد ...ه

تقلي غلطة مطبعية ...سامحني ...تغلط أنت كيف تكتب اسمك ؟؟؟ من المستحيلات ...و أسأل أي واحد يفهم في البسيكولوجيا ...تي أنت كيف انسان يناديك بأسمك بالغالط تتنبز ...خلي ولد بلادك يكتب أسم وطنك بالغالط

ممكن بالنسبة ليك أمر عادي ... أنا يا أخي كيف انحل موسوعة حتى من نيكارغوا و نلقى أسم بلادي مكتوب بالغالط نتغشش و نتنبز

ثانيا .. أش مدخل البلاد مع هالمدونة ؟؟؟؟ ياخي هالسيد يمثل بلادي خير مني ؟؟؟ و الا يدافع عليها خير مني ؟؟؟ مجرد مدون كيفي كيفوا ..و حسب رأي الشخصي ما عندوش المؤهلات باش يمثل بلادي ألي نخزرلها أنا بعين كبيرة

و اخيرا نقلك ,خويا العزيز, برى أقرى تدويناتي من أولها تو تفهم الي عمري ما تخبيت باش نعبر عن رأي و نقول كلمتي و ماحاجتيش بمدونة رديئة كيما هذيكا بش نتخبى وراها و نقول الي نحب نقولوا

تحياتي

lina ben Mhenni a dit…

@ Legend of the fall: non mekech tdafe3 3lihom 7atta tarf.

samsoum a dit…

@Legend of The Falls: Arretes de tourner autour du pot. Ce qui je n'aime pas je te l'ai dit. je te parles d'abus de pouvoir, de vol de paratiques mafieuses tous condamnable par la loi et tu me dis, c'est quoi mon probleme? C'est pas MON probleme, c'est le tien aussi si tu es Tunisien. Et j'ai choisi ce probleme specifique et pas un autre car il y'en a beaucoup, car j'ai vraiment cru qu'il n'ya pas photo et que tous on sait ce qui se passe. Tu veux le nier, ok pas de probleme. Mais ne me dis pas c'est quoi le probleme?

L'AsNumberOne a dit…

تي شبيكم توة يا جماعة؟؟؟
هذيكة
Tunissie, rime avec Ben Ali, mieux que Tunisie

Anonyme a dit…

@diana
le vol du richesse d'un pays au profit de quelques individue , une acte punit par la loi tunisienne a ce que je sache .
la derniére a date : le hold-up de la fameuse de terre antique donner gratuitement a un proche de président , sachant que cette terre appartient a tous les tunisienne pour le simple raison , cette terre est classé un patrimoine national par le ministére de la culture (sic) appartient a allysa fondatrice de carthage il'ya 800 ans avant la mort jeusus crist ...et 2800 ans aprés la mort de jésus crist

vrais ou faux ?

kacem a dit…

1- دينا ولى إهز في راسو ...و إقول ألي ما عجباتوش حاجة يتفضّل ....إنعم أنا موش عاجبني الحزب الخارب متاعكم و ألي ما عندو حتى شرعية دستورية ...بل هو أصبح أداة قمعية موجهة ضد الشعب التونسي بأكمله ...الحزب متاعكم إمثل عصابة في خدمة عصابة بن علي و الطرابلسية ....و فقد بذلك شرعيتو التاريخية الي مازال مشكوك فيها...
و رئيس الحزب متاعك ...منقلب على الدولة التونسية ...و على مؤسساتها الكل ...هو و مرتو و أنسابو ...أنقلب بإنقلاب شبعة نوفمبر ألي إمثل غلطة تاريخية ...و إخفاق الحزب متاعكم سياسيا ...عبر خروج رئيسو في بطانية ..حزب خارب من أصلو ما هوش قادر باش يعمل البروجاكسيون متع الديمقراطية على الحياة السياسية ... تونس لازمها تتخلصّ من حزب التجّوع هذا و تقسمو على 3 أحزاب و على الاقل حزبين ...لأنو أصبح إمثل الحقل الخصب لنبات أي دكتاتور ...الحزب هذا ما عندو حتى شخصيّة لأنو ...أفرغ بفعل فاعل....و ما وجودو على الساحة السياسية اليوم إلا لوجود السلاح في يد الميليشيات متاعو.....

داخل الحزب هذا ما ثّمة حتى راجل !!! و كان ثمّة واحد ..إعطيني إسمو ......الحزب هذا مستحيل إتصير فيه أي إنتخابات ديمقراطية ....و يستحيل إتصير فيه سباق على ألليدر شيب ...بحيث ...الي إدخل للحزب هذا ...إما متورط و إما إمبلع و إما أحب رخصة ....ما ثمّة فيه حى فكر و حتى سياسية ...دزن القمع و الآرهاب متع الشعب التونسي...

الحزب هذا ...إمثل الاستعمار الجديد...و طال أو قصر الزّمن ...سنقسم ظهره ألي الابد كما أي حزب شمولي ....مسارو\ و يفنى...

kacem a dit…

مازال ما كملّتش
*- شنوه حزب في الدّولة و دولة تخدم بالحزب ؟ التدّاخل هذا ما كان و ما إنجم أكون إلا في الدول الشمولية كما شرق أروبا سابقا....البلدان هذيكه كانت شادة روحها ...ببث الرّعب و الخوف من عدو إمبريالي لا وجود له إلا في رؤوس قيادتها الخايفة ....اليوم تونس إتعيش بالضبط كما أروبا الشرقية قبل...حزب خارب و غارق في الجريمة السياسية و المالية و حتى الآخلاقية ...شاد داخل مؤسسات الدولة الكل عبر الشعب المهنية متاعو ...و إقول إسير في الامور .....و في الواقع قاعد ينهب في البلاد و إقيد على حساب الشعب....دخل للجامعة التونسية باش إخمجها...و أحل كفيشانطة فيها ...و مزود و دربوكة ....بالحديد و النار...
حزب إزّو في كل الآنتخابات منذ الآستقلال ..و لا صندوق سلم ....و لا مواطن نجم أمارس حقوقو بكل حريّة .
حزب إنضم في قوافل الصّحة ...بإسم الآطباء و الكادر التونسي ....تحت طائل الآرهاب و التخويف ....حزب مسيطر على مؤسسات الدولة أصبح عبئا على الشعب التونسي ....و جاء الوقت باش نتخلّصو منو
رئيس حزب ...شد بإنقلاب ...و كل يوم يعمل إنقلاب جديد ..هاهو على المحامين ...هاهو على القضاة ....هاهو على الصّحافين .....هاهو زور الآنتخابات ....هاهو قال نعملو إستفتاء ....هاهو غير في الدستور ...هاهو إيزيد ...هاهو إنقص ...هاهو ما تحكموش علي ..حتى إذا ما عاش رئيس .....هاهو خلّصولي الضوء ...هاهو خلّصولي الماء ....هاهو أعملولي قانون يحميني من التتبعات حتى بعد خروجي .....
رئيس حزب ...صخصخ البلاد ...و كتبها بإسم مرتو و أنسابو ....و بناتو ...و عمامو ...و خوالو ...و ماشي باش إورّث الحكم ....
قال شنوه نحمي فيكم من الخوانجية
هذه لغة !!!!!؟ يا ديانا ....عليكم و عليهم الحرب ....و على اقل واحد فيكم.....إنعم ....

بالك بن علي جاب حاجة من دار السّيد الوالد ......و إلا إنت جبت حاجة ...بالك عامل مزية فينا ......لا لا لا يا بابا....تونس اليوم ما حاجتهاش لا بيكم و لا بحزبكم و لا بنوفلكم ...

أقلب إنت و الرئيس متاعك

3amrouch a dit…

ديانا مجلة
انا بيدي برشة حاجات موش عاجبيني
بناو و قدّو و عملو آشنوة اللي مقلقك؟؟؟؟
عاد انت متع القانون وتعرف القاعدة الشهيرة متع من اين لك هذا؟
علاش رؤساء العالم الكل يعمل جرد للممتلاكات الي عندو قبل ومبعد كيف يخرج(هاذي صعيبة عندنا) يشوفو اش ولا عندو ويعملولو لحساب ومن اين الفائض؟
نحاولك خبزة و إلا نقصولك في مصروفك؟
علاش موش فلوس الضرائب انا ندفع فيها؟
باهي والقروضات الي قاعدين ناخذوا فيهم ايمين وايسار وين مشات فلوسهم؟ قداش عندي ديون خارجية؟ شنوة الفائض؟ الخ
الارض الي حكى عليها رمزي متع الدولة بانه حق تعطى لمواطن تونس وهي ارض مدرجة ومحمية اثار وطنية؟ على انه اساس؟ راجع الرائد الرسمى لشهر اكتوبر وتوى تلقى ا لسيد مكتوب اسمه بالثلاثي للتمويه
هاو قتلك اشنوة موش عاجبني
نجموا نحكيو توة؟؟؟؟

samsoum a dit…

شفت يا ديانا وقت اللي قتلك ماعندكش مصدقيّة قتلي كيفاش . انا مستعد نتناقش معاك اذا كان انت مستعد تتكلم بصدق و تحكي في الصميم من غير ما تدخلنا من باب و تخرجنا من خوخة. و اما بش تقلي اش نقصلك من المصروف نوليو فروخ صغار نلعبوا في البيس و احنا كبرنا علي هذا. انا ما نقصلي حد من مصروفي علي خاطر هجّيت و انا ما نسكتش علي حقي و حق اولادي لو كان يبدي ملّيم نحارب عليه و نصرف اللي ورايا و اللي قدّامي بش نرجعوا و علي هذاكا بعدت بش مانعيشش الموقف هذا يعني كتجي تقلي انت شحرق حليبك تخسر مصدقيتك لانو الكلنا نعرفوا اش صاير في البلاد و اولهم انت و انا متاكد مئة في المئة اللي انت حاسس و عارف المافيا متاع العيلة الملكية اش قاعدة تعمل و ما تستهبلناش بربي لانو ماناش وليدات صغار و فاهمين بعضنا

ferrrrr a dit…

سمسوم، نفهمك و نوافقك

Anonyme a dit…
Ce commentaire a été supprimé par un administrateur du blog.
Anonyme a dit…

Il faut pas le blâmer les amis ! Il faut savoir de quel fameux établissement il a eu son diplôme ;-)

Et dernière petite chose, supposons que les "ss" ne sont qu'une banale faute de frappe ... Le "t" MINISCULE en est encore un !!?

Anonyme a dit…

يهديكم، يجعل منكم، البلاد هاذي إسمها تونس/Tunis


بالعربي بالسوري بالشنوة بالأوردو بالهولاندي تقعد تونس

لا تونيزي لا تونيسي

علاش نغتاظوا من غلطة في تسمية جابها المستعمر توة ميا وثمانية وعشرين سنا؟؟؟

Bel Malwene a dit…

ديانا مجلة بودورو:
برا الله يفرج عليك

نونو:
يكب سعدك و سعدالأكدمي الي قراتك !! مرة أخرى من عندي

Gouverneur de Normalland a dit…

@Khalil
ton commentaire est supprimé.

desolé, pas d'insultes personelles

on debat les idées ici et pas les orientations sexuelles

WALLADA a dit…

أنا متأكّدة أنّه صعيب باش الواحد يغلط في كتابة كلمة تونس و لكن الغلطة هذه كشفت علّي وراها من استخفاف السيّد الّي كتب بالشيء الّي يكتب فيه و استخفاف أكثر بالقرّاء

ديانا

القوفرنور كيف علّق على الغلطة كان يناقش في مدى جديّة المدوّن الّي كتبها
أنت الّي جبدت علّى مقلّقنا في البلاد آش مجبّدك في هذا لو كان ماعندكش حويجة مرزّنة على ضميرك ؟ وقت الّي نحبّو نتحدّثو في الّي مقلّقنا توّ نتحدّثو فيه بملء إرادتنا من غير ما تستدرجنا أنت والا غيرك

و نصيحة أخيرة
خلّي سي نوفل يناقش بنفسه لأنّه مادام عامل حاجز بينه و بين المدوّنين هذا ما يعنيش أنّه خير منهم لا قدر و لا شهايد و تملّك لتقنيات النّقاش و هاي الغلطة في كلمة تونس أكبر دليل ههههه

HNANI a dit…

أنا مصروفي نقص ، العيشة غلات وانحب الزيادة في الشهرية و الدولة ما عندهاش فلوس باش اتزيدني على خاطر الصحاح خذاو الفليسات هههه

Anonyme a dit…

C´est la 1ere fois qu´il ose d´ecrire pas comme son habitude cop col (copier coller)

Adem Salhi a dit…

ألو ديانا؟؟؟؟ ألو؟؟ تي وينك يا مجلة ديانا؟؟ و الله شاهي نفهم آش مدخل ديانا في الحكاية هذي الكل؟؟؟
ههههههههههه
زايد الحديث ؛ هرب هههه

Legend Of The Fall a dit…

يا سي آدم الصالحي مش من عاداتي الهروب. أنا كنت غائب على الانترنات في السوايع اللي تعدّاو. و الإجابة على كل النقاط تلقاها انت و الاخوة في مدونتي تحت عنوان

ردّا على ثقافة التشليك و على قاسم و أقول له: أو نورمال


قال الله تعالى في الآية 6 من سورة الحجرات: بسم الله الرحمان الرحيم "يا أيها الذين آمنوا إن جاءكم فاسق بنبأ فتبينوا أن تصيبوا قوما بجهالة فتصبحوا على ما فعلتم نادمين " - صدق الله العظيم

أوّلا انحب انخاطب الأخ حاكم نورمالاند و انقولو اللّي أنا ما كنتش انهاجم فيه و لكن وقت اللي علّقت على التدوينة متاعو المتعلّقة بخطأ في رقن تونس باللغة الفرنسية من طرف أحد المدوّنين، إنّما أنا انقدت كيفيّة تصويرو للخطأ و تهويلو للأمور.

إنت، قتلي إذن اللي إنت ما تحمل كراهية لحتّى حد....بارك الله فيك. و لكن اتنجمش تفهّمني آش ماعناها إمّالا تكب في سعد الرّاجل و مشهّر بيه و تتّهمو بأنّو مشلّك البلاد؟؟؟؟؟ منين جاء الاحترام اللي إنت تحكي عليه؟؟؟؟؟

أنا ما جبت حتى شيء من عندي...المدوّنة متاعك موجودة...و التعليقات موجودة...و الإخوة ينجمو يرجعو ليها و يفصلو بين الجميع
و أرجو أن لا تعتبرو ما أكتبه تهجّما نحو شخصكم المصون، سيدي القوفرنور، و لكنه مجرّد لفت نظر

صحيح إنو من غير المقبول إنو شخص يخطأ في أمور بديهية مثل كتابة بلدو و لكن الله أعلم بظروف التدوين. بكلّنا يصير علينا إنو نخطئو و نغلطو لأنو بجميعنا اندوّنو و نكونوا تحت ضغط الوقت أو غيرو. شكون فينا ما غلطتش نهار في كلمة؟؟؟ تي أنا ديما غالط و انحاول انصلّح المقال أكثر من مرّة قبل ما ننشرها و في أكثر من حالة لا بدّ باش ننسى حاجة

تونس مش صدق الله العظيم باش وقت اللي نكتبوها بالغالط معناها أحنا مشلّكين و شلكّنا البلاد و قزّمناها و قللّنا احترامنا تجاه وطننا

بكلّكم تعرفو اللي أنا من أكثر المعارضين لثقافة التخوين و العمالة و كذلك احتكار الوطنية. على خاطر كان باش تحكي على تشليك البلاد، إمّالا بربي قللّي آش يعملو جماعة كيما مدام سهام بن سدرين و الأستاذة راضية نصراوي و سي توفيق بن بريك و سي الشابي و القائمة طويلة وقت اللي يتوجّهو إلى باريس و إلا جنيف و يلقاو سيّارات المرسيديس تستنى فيهم في باريس شارل دي غول و إلا في جنيف كوانتران؟؟؟
تنجمش تفهّمني منين جاتهم الفلوس باش يقعدو في فنادق 5 نجوم و يركبو أفخر السيارات و يعملو الطيّارة كيما الكار بين تونس و أروبا؟؟؟؟
شكون اللي يشلّك ببلادو و شعبو و يشهّر بيهم في المحافل الدولية و يبعث بالفاكسوات للبرلمان الأورربي و للصحف و القنوات الأجنبية و يروّج لأخبار كاذبة سرعانما منظمات حقوقية كيما منظمة العفو الدولية و هيومن رايتس ووتش ماقدّمت اعتذاراتها للحكومة التونسية نتيجة أخبار كاذبة تلقّاوها و من بعد التحقيق اتضّح أنها غير صحيحة تماما؟؟؟؟
اشكون اللي يشلّك في البلاد و يصوّر في تونس على إنها سجن كبير و لا يمكن لمواطينها الخروج من أرضها في حين إنو هو نفسو حرّ طليق يدخل و يخرج على البلاد كيما يحب و يشتهي؟؟؟؟؟؟؟؟؟؟؟؟
اشكون اللي يشلّك في البلاد؟ اللي انهار الكل و هو يقزّم في بلادو و إنجازاتها؟؟؟؟

و لنّا انجي لسي قاسم. يا ولدي مرحبا بيك و بهالعودة الممنونة في العلاقات بيني و بينك.

بربّي قللّي، ياخي الكلام اللي إنت كتبتو الفوق صحيح و إلا أنا نحلم؟؟؟؟؟؟؟
ميليشيات و سلاح و قنابل و تفرقيع....يا ولدي شبيك؟؟؟؟؟ ياخي بايت تتفرّج في فيلم على أم.بي.سي أكشن ؟؟؟؟ تقولش أعليك تحكيلي على حزب الله و إلا على حماس. كانك تحكي أعليهم...أنا موافقك 100 في المائة هههههههه ماك تعرف، عدوّ عدوّي...صديقي هههههههه

أما كانك تحكي على تونس و فعلا على التجمّع، فسامحني فيك. ظاهرلي إنت عندك ماس في خيوط الضوء ضربو في بعضهم و عمللوك حالة من الهيجان و الانفعال اللي ينجم راهو يؤدي إلى جلطة دماغية أو سكتة قلبية لا قدّر الله

أنا مانيش متحدث رسمي باسم التجمع و لكن ثمة حقائق لا بدّ من إيضاحها لأنها تغالط الرأي العام.

شوف يا سيدي قاسم، التجمع حزب شرعي. بكلّنا قرينا التاريخ و نعرفو اللي الحزب الحر الدستوري اللي تكوّن في 1920 مع المناضل الشيخ عبد العزيز الثعالبي، الله يرحمو و من بعد صار مؤتمر 1934 و ظهر انشقاق داخل الحزب نتيجة عدم تفاهم بين جيل الشخ الثعالبي اللي وقتها كان يخيّر التفاوض مع المحتل الفرنسي، في حين إنو المحتل كان الهدف متاعو هو إخماد أي نواة لحركة وطنية و كسب الوقت تحت شعار تشريك التونسيين في الحكم و غيرو من الوعود الزائفة و شباب الحزب اللي كان يقودهم الزعيم الراحل بورقيبة و رفاقو و اللي كانوا مؤمنين بضرورة تسريع وتيرة الحركة الوطنية و من هنا كان قيام الشق المنافس و هو الحزب الحر الدستوري الجديد

من جهة عنّا حزب متاع كفاءات و نخب و زيتونيين، بعيد عن القواعد الشعبية و أحاسيسها الوطنية بقيادة الشيخ الثعالبي و من جهة أخرى حسب يقوده شبان تخرجو من الصادقية في أغلبهم و درسو في فرنسا و ألمانيا و بالتالي تشبعو بأفكار جديدة و التصقوا بالشعب و بمطالبو

و تعرفوا بقيّة الحكاية و مسار تحرير تونس و مختلف التكتيكات و الاستراتيجيات التي اتبعها الزعيم بورقيبة و رفاقو إلى أن حصلت تونس على استقلالها

مهمة الحزب تغيّرت...من حزب التحرير و الكفاح و المقاومة إلى حزب الاستقلال و بناء الدولة

بربي انحب انحل قوس هوني: لازمنا ناقفوا وقفة تحية و إجلال و إكبار لأجدادنا اللي ضحّاو بالكثير في سبيل بناء الجمهورية التونسية اللي البعض يشلّك فيها

أحنا جمهورية عمرها توّا تقريبا 53 سنة...بناوها أجدادنا من 53 سنة من دون أي إعانة من فرسنا المحتلة اللي خرجت و غادرتنا أو من الإيطاليين اللي خرجوا و سيبونا أو من اليهود اللي هزّوا زادهم و زوّادهم و مشاو

حتى حد ما عاون تونس باش تبني روحها...و حتى وقت اللي اختارت الاستثمار في التعليم و المرأة، برشا دول ضحكو عليها و على سياستها و قالوا: شوفوا تونس فاش تعمل. في بلاصة تعمّر الحجر ماشية حاطا فلوسها في التعليم. و أحنا وقتها ماعناش فلوس برشا و لكن كانت إرادة حكيمة من الزعيم بورقيبة لأنهم الدول اللي ضحكو علينا، أحنا توّا نضحكو أعليهم و هوما يشهدو اليوم لكفاءتنا التونسية

ألوف التوانسة ضحّاو بقرايتهم و بمستقبلهم باش يعاونو على بناء تونس. فرنسا خرجت بحيشها و موظفيها و معلميها و أساتذتها و إدارييها و ما بقى في تونس كان عدد بسيط من المتزوجيين بتوانسة أو المتعاطفين مع القضية التونسية. بين ليلة و ضحاها البلاد فرغت و حتى القلوس طارت مع اليهود و الطلاين. شكون اللي عمّر ها البلاد و بناها؟ من صناعة و فلاحة و سياحة و خدمات؟ و تونسة القضاء و الأمن و بعث جيش وطني؟ من غير ما نحكي على المجلس القومي الـتأسيسي و دستور البلاد و اختيار النظام الجمهوري

و بربي كليمة صغيرة فيما يتعلّق بالمرأة. مجلة الأحوال الشخصية اللي منحت المرأة حقوق منها حق الانتخاب اللي حتى مرأة في العالم، حتى في فرنسا و الولايات المتحدة ما تحصلو على حق الانتخاب بالتزامن مع قيام الثورات و الجمهوريات. بالعكس، بقاو لسنوات حتى حصلو على حق الانتخاب كيما في سويسرا عام 1971 و البرتغال عام 1974 في حين في تونس حصلت المرأة على حق الانتخاب عام 1957، عام واحد بعد الاستقلال و في دول أخرى المرأة حصلت على حق الانتخاب تو تو كيما في قطر 1999، عمان 2003، الكويت 2005 و الإمارات 2006

و بربّي اشكوني هي المرأة؟ مش المرأة هي أمي و أمك و أختي و أختك و مرتي و مرتك و عزيزتي و عزيزتك و بنتي و بنتك؟؟؟؟؟؟
نغلق القوس و نرجع لسي قاسم

أيا بابا، كيفاش قتلي؟ حزب غير شرعي؟ علاش؟ كيفاش؟ حزب مستمر، متواصل من الحزب الحر الستوري التونسي في 1920 إلى الحزب الحر الدستوري الجديد في 2 مارس 1934 إلى الحزب الاشتراكي الدستوري في 19 أكتوبر 1964 فالتجمع الدستوري الديمقراطي في 27 فيفري 1988

إذن، التجمع الدستوري الديمقراطي هو حزب يستمد شرعيتو من تاريخو النضالي لأنو هو حزب الكفاح و التحرير و الاستقلال و البناء و التشييد و الانقاذ و الحزب المؤتمن على التغيير

و تغيير الأسامي في الأحزاب أمر عادي يا سي قاسم لأنها أحزاب تتفاعل مع التاريخ و التغييرات العالمية و الاديولوجية و كيما ريت في تونس في وقت من الأوقات إسم الحزب حمل "الاشتراكية" لأنو وقتها كانت الاشتراكية خيار و توجه مع سياسة التعاضد و تخلّى الحزب على تسيمة الحزب الحر الدستوري لأنو كلمة الحر كانت توجدت لأنو تونس كانت محتلة و تطمح للحرية و الانعتاق من الاحتلال ثمّ تغيّرت المعطيات و رويدا رويدا حتى وصلنا للتغيير

شرعية دستورية؟؟؟؟ الحزب عندو شرعية دستورية يستمدها من تاريخو. هو حزب معترف بيه منذ 1920 بالرغم من أنوّ مرّ بفترات حظر من طرف فالمحتل الفرنسي. ثم جاء الدستور و قانون الأحزاب و الحزب منصاع للدستور و للقانون بحيث أنّو في تسميتو لا وجود للدين أو العرق أو الطائفة أو الاديولوجيا أو لأي شكل من شأنو باش يشلّك البلاد و بالتالي هو يحترم الدستور و القانون

إذا كنت تقصد بالشرعية زادة، شرعية وصول الرئيس بن علي للحكم، شوف، أنا ديما ضد استعمال كلمة الشرعية أو تعبير "التغيير في كنف الشرعية و الدستورية" و كأنهم يحاولو باش يعطيو شرعية للتغيير

شرعية التغيير شرعية حاصلة و في التحصيل الحاصل. يقول القايل علاش و كيفاش؟؟؟ يا يس قاسم، و يا إخوة و أخوات، أنا ما نعرفش قدّاش أعماركم. في بعض الأحيان تاخذنا الحياة و ننساو التفاصيل.

راهو السؤال ديما باهي. و لا يخيب من استشار. بل بالعكس. أنا في 1987 كنت صغير. عمرية يمكن 7 أو 8 سنوات ما أكثرش. ما نتذكر من بورقيبة كان مرّة أو إثنين شفتو فيهم و إلا ذكريات خفييييييييييفة من حلقات "توجيهات السيد الرئيس" فيما عدى ذلك ما نتذكر شيء
و لكني نسأل. نسأل عزيزي و أمي و أقاربي و عدد من الكهول اللي عاشو الاستقلال و عاشو بناء الدولة و اللي عاشو زادا السبعينات و الثمانينات و الحالة اللي وصللها الزعيم بورقيبة: كانوا يقولول هاو باش نحفروا آبار ارتوازية، يحفرولوا حفرة و يهزّوه باش يدشناها و الفلوس تمشي في مكتوب زيد و عمر. و إلا في هعيد ميلادو يبداو الوزرة يدورو بيه في صينية ...إلخ

ما ينجم حتى حدّ يقول غير الواقع: الزعيم بورقيبة كبر...خرف...في كثير من الأحيان ياخذ قرار الصباح و يتراجع فيه العشية و بالتالي استقرار البلاد و مصلحة الشعب تتطلب إنقاذ خاصة مع بروز تيار إسلامي متطرّف. كان جات على إسلامي مافيهاش مشكل. أحنا بكلنا مسلمين و دين الدولة هو الاسلام، لكن وقت اللي يولّي الاسلام في شكلو الأكثر تطرف و انغلاق و عدوانية، وقتها ماعادش إسلام، وقتها ولّي محاولة للوصول إلى الحكم لتطبيق أعمى للنص دون أي اجتهاد أو تأويل و من دون مراعات التطوّر الزمني و المجتمعي

بن علي...إنسان تدرّج في السّلم القيادي إلى أن وصل وزير أول. و ما وصل وزير أول في الوقت هذاكا اللي الدنيا داخلة فيه بعضها و الوزراء كالبين على السلطة و ثمة حدّة إلا إنو معناها هو إنسان كفء. صحيح الكمال لله و لكن ما نعتقدش إنو وصل بمحض الصدفة. الصدفة ماتجي كان في اللّوتو و البروموسبور و الأحلام.
في السياسة كان ما تثنيش الركبة و تخدم و تبحث و تحقق و تنجز ، ما تلقاش روحك. و الإنسان اللّي ما يقدّمش..يوخّر

إذن، بن علي وزير أول. الفصل 57 من الدستور في الوقت هذاكا كان يعطي الحق للوزير الأول باش يشد رئيس الدولة في حالات خاصة (وفاة أو عجز الرئيس المباشر) و الزعيم بورقيبة كان عاجز. حبّينا و إلا كرهنا الزعيم بورقيبة كبر و خرف و ماعادش قادر على حكم تونس. إيه، آش نعملو؟؟؟ نقعدو نتفرجو في البلاد ماشية في حيط و في هاوية؟؟؟؟ و إلا نقذو ها البلاد و العباد؟؟؟؟؟؟؟ بالكشي تسخايل ساهل باش إنسان يقدم على التغيير في وقت برشا أشخاص قويين و كالبين على السلطة كانوا طامعين في الكرسي. الراجل كان حاط راسو بالميزان و كان من الممكن لو إنو ما تجاوب معاه حتى حد رهوا حاكموه بالخيانة

إمّالا، يزيّوا من الترّاهات و من الحكايات متاع الشرعية و الدستورية و الانقلابات خاصة و إنو أحنا توّا في 2009 و على بعد 21 سنة من 1987. صحيح الربط بين الماضي و الحاضر باهي..و لكنو باهي باش نتعلمو من أخطائنا و باش انقارنو أرواحنا بين البارح و اليوم و باش نرسمو طريقنا للمستقبل

حزب فارغ؟؟؟؟ حزب أفرغ بفعل فاعل؟؟؟؟ بفعل اشكون؟ الجنّ؟؟؟؟ اللطف...اللطف....اللطف..يا لطيف ... يا لطيف

الحزب فيه العديد من الكفاءات الوطنية من أساتذة جامعيين و من باحثين و من أطباء و محامين و أساتذة تعليم ثانوي و إعدادي و معلمين و مديرين و رجال أعمال و طلبة و شباب و عملة و ممرضين و مهندسين و مفكّرين و صحافيين و أدباء و شعراء و كتاب و فنانين و مثقفين و حتى الأميين لأنو حزب جماهيري و من هنا جاءت تسميتو بالتجمع لأنو يجمع كل النسيج الاجتماعي التونسي و ما يقصي حتى حدّ من المثقف و المتعلّم للأمي و من المتخلّق و المتربيّ للفاسد و الباندي و من الراجل للمرأة و من الكبير للصغير

الحزب ماعندو حتى فكر؟؟؟؟ كي ماعندو حتى فكر، كيفاش هالحزب نجّم يحكم بلاد من عام 1956؟ و كان ينجم يكون موجود من عام 1920 حتى لين أصبح يعدّ واحد من أقدم الأحزاب في العالم؟؟؟؟؟؟؟؟؟؟؟؟؟؟؟؟
تقدّم تونس باش جاء؟ بالهواء؟؟؟؟؟؟؟؟ و إلا بمساعدة فرنسا و العفو الدولية و الصليب الأحمر و هيومن رايتس ووتش و أ.ف.ب و رويترز و سهام بن سدرين و الشابي و بن بريك و نصراوي و عبو و المرزوقي و الجزيرة و الحزب الاشتراكي الفرنسي؟؟؟؟؟؟؟

بفضل حكم التجمع للبلاد على مرّ 53 عام، نجّمنا انخليّك تتمتع بالماء و الضوء في دارك في حين إنو أشقائنا في دول مجاورة كيما الجزائر اللي عندها النفط و عندها احتياطي نقدي قيمتو 140 مليار دولار، و دول أخرة كيما لبنان و الخليج، الماء يقصّ عدّة مرات في النهار و في أماكن أخرى يشريوه بالفلوس و ينقلوه للدار لأنو مش كل ما يحلّ السبّالة يلقى الماء يمشي. و الضوء النهار الكلّ و هو مقصوص

إذا إنتي اليوم تشري خط بورطابل ب 5 آلاف فرنك في لبنان مازالو يشريو فيه بـ 150 دولار
إذا إنتي اليوم عندك الأوتوروت واصل من بنزرت حتى لصفاقس و من تونس حتى الواد الزرقاء و عن قريب حتى لقابس و راس الجدير و قفصة و سيدي بوزيد و القصرين و القيروان و عندك أكثر من مطار في أكثر من جهة، و أكثر من ميناء في أكثر من جهة، و عندك جامعات في كل الولايات و أقطاب تكنولوجية و محاضن مؤسسات و مراكز أعمال، هذا الكل جاء بفضل شكون؟؟؟؟؟؟

بفضل النبّارة و الشلايك اللي يشلكو في البلاد؟؟؟؟؟؟؟؟؟

و هاذي بعض الأرقام لخونا عمروش زادة اللي يحب الأرقام:
- تطوّر الناتج المحلي الجملي بمليون دينار: من 7.160 سنة 1987 إلى 44.254 سنة 2008
- ارتفاع نسبة النمو من -2 % سنة 1987 إلى 4،6% سنة 2008
- انخفاض نسبة التداين من 57،9% سنة 1987 إلى 46،1% سنة 2008
- نسبة خدمة الدين: 26،3% سنة 1987 إلى 15،4% سنة 2008
- نسبة التضخم: 8% سنة 1987 / 3% سنة 2008
- الاستثمار الجملي بحساب المليون دينار: 1789 سنة 1987 / 10000 سنة 2008
- الادخار الوطني بحساب المليون دينار: 1404،8 سنة 1987 // 9118،9 سنة 2008
- عدد السياح الوافدين: 1.502.000 سنة 1987 / 7.000.000 سنة 2008
- العائدات السياحية بحساب المليون دينار: 386 سنة 1987 / 2751 سنة 2008
- عدد السكان: 7.639.000 سنة 1987 / 10.216.000 سنة 2008
- النمو الديمغرافي: 2،5% سنة 1987 / 1،11% سنة 2008
- نسبة التغطية الاجتماعية: 53،1% سنة 1987 / 90،4% سنة 2008 مقابل 40% بالولايات المتحدة
- نسبة التمدرس بالنسبة للتلاميذ الذين أعمارهم لا تتجاوز ستة سنوات: 91،5% سنة 1987 / 99% سنة 2008
-- نسبة تمدرس التلاميذ فيما بين 6 و 14 سنة: 79% سنة 1987 / 95،2% سنة 2008
- عدد الطلبة: 43.700 سنة 1987 / 342.000 سنة 2008
- نسبة نفقات البحث العلمي من الناتج المحلي الإجمالي: 0،4% سنة 1987 / 1،07% سنة 2008
- نسبة معرفة القراءة و الكتابة من البالغين من العمر 15 إلى 24 سنة: 74،2% سنة 1987 / 94،3% سنة 2008
- مؤمل الحياة عند الولادة بحساب السنة: 68،9% سنة 1987 / 74،2% سنة 2008
- نسبة الوفايات للألف ساكن: 6،4 سنة 1987 / 5،7 سنة 2008
- نسبة وفايات الرضع للألف رضيع: 50 سنة 1987 / 18،5 سنة 2008
- عدد السكان للطبيب الواحد: 2193 سنة 1987 / 970 سنة 2008
- معدّل إحداثات الشغل سنويا: 41500 سنة 1987 / 74400 سنة 2008
- نسبة تغطية الطلبات الإضافية: 61،7% سنة 1987 / 92،1% سنة 2008

نسبة الربط بشبكتي الكهرباء و الماء بلغت 100% في الوسط الحضري في حين ارتفت تسبة التنوير بالوسط الريفي من 35.3% سنة 1987 إلى 98.8% سنة 2008 و نسبة التزود بالماء الصالح للشراب بالوسط الريفي من 28.7% سنة 1987 إلى 93% سنة 2008 و نزلت نسبة الفقر من 7.7% سنة 1987 إلى 3.8% سنة 2008 و ارتفع الدخل الفردي المتاح من 960 دينار سنة 1987 إلى 4.294،6 دينار سنة 2008

إضافة إلى الزخم التشريعي من قوانين و اوامر و قرارات و مجلس نواب و مستشارين يخدمو على أرواحهم في حين إنو مجالس نيابية أخرى في دول صديقة و شقيقة مسكرّة البيبان و راقدة

هالتصانيف العالمية اللي تصنّف تونس في مراكز متقدة مقارنة حتى بدول متقدمة كيما إيطاليا و اليونان و البرتغال، زعمة يكذبو أعلينا؟؟؟؟؟ و علاش يكذبو أعلينا؟؟؟؟ شنوة مصلحتهم؟؟؟؟ على سواد عينينا و إلا على البترول اللي غارقين فيه؟؟؟؟؟

حزب قمع و إرهاب؟؟؟ توّا هذا كلام؟ علاه ريتو حاطط بلاكا كاتب عليها وزارة الشؤون الداخلية؟؟؟؟ و حتى وزارة الشؤون الداخلية، ياخي هي قاعدة تقمع في التوانسة و ترهب فيهم؟؟؟؟ تي الدولة شرّعت القوانين باش بلادك تقعد آمنة و مستقرة باش سيادتك و سيادتي و السائح الضيف اللي يجي يعيش مطمئن و يخرج هو و عايلتو و أصحابو و يحوّص من غير قلق

قمع و إرهاب، أعلاش أحنا ياخي عايشين تحت حكم بينوشيه؟؟؟؟ ريت العباد موقفينهم تحت الحيط و يقتلو فيهم بالرصاص؟؟؟؟؟ و إلا اللي يحل فمّو يلجموه؟؟؟؟

حزب استعمار جديد؟؟؟؟ وينو هالاستعمار؟ علاه؟ ياخي اللي شادين الحزب و إلا المنخرطين فيه جايبينهم من فرنسا و هولاندا و انقليتيرا و أمريكا و الهند؟؟؟؟؟؟ الحزب نحّالك أرضك و إلا فكّلك دارك؟ جاء غصبك على حاجة باش تعملها و إلا ما تعملهاش؟

بربي شويّة وعي و شويّة مسؤولية و كي الواحد يرمي كلمة ماذابيه يكون مطلّع و مايقولش اللي يجي. ظاهرلي فيكم ناس متثقفين وواعين و من خيرة أبناء هالوطن...اللي يجمعنا أكثر من اللي يفرقنا...احنا بكلنا الهدف هو النهوض بتونس و تقدمها و تحسين مستوى العيش بيها و التحديات اللي قدمنا كبيرة. هاكم تراو في الأزمة المالية العالمية و انعكاسها على اقتصاد بلادنا. ثمة دول أفلست.
أحنا ما قلناش اللي تونس جنة على وجه الأرض. أحنا صحيح حققنا برشا حاجات في وقت صغير: 53 سنة من الاستقلال و لكن أكيد ثمة نقائص أو اخطاء. هاتوا انشوفوها و انحللوها و كل واحد يعطي رايو في إطار الاحترام و الأخلقيات اللي تربينا عليها

شنوة حزب يخدم في الدولة و دولة تخدم في الحزب؟ و حزب شمولي و أوروبا الشرقية؟؟؟؟ فاش اتخضرط يا سي قاسم؟؟؟ظ ظاهر فيك مازلت تعيش في الحفبة الشيوعية و الاشتراكية. يا سي قاسم، يهديك رانا في 2009...فيق...ستالي عندو يجي 50 سنة ماللي مات و جدار برلين عندو 20 سنة ماللي طاح و إنت تقوللي ستة من سطّاش؟؟؟؟؟؟؟

صحيح الحزب هو الدولة و الدولة هي الحزب و هذا في كل دول العالم. تقوللي كيفاش؟ انقللك لأنو الحزب اللي تكون عندو الأغلبية هو اللي يحكم. ووقت اللي الحزب اللي عندو الأغلبية يولي هو اللي يحكم، معناها باش ينفذ برنامجو الانتخابي. بالتالي ماتنجمش تفصل الدولة عن أجندة الحزب الحاكم. و في تونس، اللي نظامها هو نظام رئاسي يقوم على علوية رئيس الجمهورية، هذا الأمر مش غريب، لأنو يا سي قاسم النظام الرئاسي ولد في الولايات المتحدة الأمريكية و هو يقوم على علوية و أهمية رئيس الدولة و لكن دول أخرى تبنّت النظام الرئاسي كيما فرنسا بعد الثورة أو دول أخرى كيما إيطاليا أو ألمانيا و طل دولة طوّعت النظام الرئاسي حسب خصوصياتها المحلية

و لعلمك يا سي قاسم، اليوم الخدمة بالكفاءة و نعلمك إنو السيد الوزير الأوّل بعث منشور للوزرارت و الادارات المعنية يمنعهم فيه من توظيف الأفراد اللي عندهم أكتاف. و عندي أصدقاء من المعارضة و من الاتحاد العام لطلبة تونس و غيرو يعملو اليوم في الأدارات و الوزارات و القضاء و هوما معارضين للسلطة و للنظام إلى يومنا هذا

و الأكتاف موجودة في كل دول العالم. حتى في فرنسا يسميّوها روكومانداسيون recommandation

حزب ينهب في خيرات البلاد؟؟؟؟؟ و الله إذا الحزب و اللي شادّينو هوما قاعدين ينهبوا في خيرات البلاد و البلاد مع ذلك ماشية تي هاو شيء باهي؟؟؟؟ كان جينا إمالا في زمبابوي اللي نسبة التضخم 100.000% و إلا في المغرب اللي واحد على زوز مغاربة يعيشو تحت خط الفقر و ثروة الملك متاعهم تقارب 3 مليارات دولار؟؟؟؟؟؟؟
حزب ينهب في ثروات البلاد؟؟؟؟ تي في أكثر من مناسبة يا سي قاسم منخرطين الحزب و المسؤولين اللي فيه و رجال الأعمال المنخرطين فيه و مناضليه يدفعو من مكتوبهم باش ينظمو التظاهرات و باش يساندو برامج الحزب في الجهات و يسدّو العجز المالي متاعو في بعض الأحيان. العباد اللتي سيادتك وصفتهم بالتجوّع و اللي هوما ولاد بلادك، يوصلو في سوطك باش السلطات تلقى حلّ باش تخلقلك وظيفة في ظل هالأزمات العالمية و باش يصلحولك الطريق و يركبولك أنبوبة الضوء
المتجوعيّن و المتشلكين ولاد بلادك اللي يخططو و ينظمو و يسهرو في البيروّات باش سيادتك تلقى الايسونس و حق كارتت التلفون و تلقى الخضرة و الغلة و الخبزة

سي قاسم، إنت حكيت على القوافل الصحيّة اللي تخرج باسم الأطباء و الكوادر و تحت التخويف و الترهيب: أعلاش؟ ياخي القوافل هاذي مش خارجة لفائدة توانسة؟ بالكشي مخرجينها لفائدة الكونغو و إلا الصومال و إلا إسرائيل؟؟؟؟؟ ماهي قوافل خارجة لفائدة التوانسة و ضعاف الحال. و أش كون قاللك اللي هالقوافل خارجة تحت الترهيب و التخويف؟ ياخي الحزب هو ناقص منخرطين و مناضلين من الأطباء و الممرضين؟ تعرفهم إنت باش تحكي اعليهم؟ شكونك إنت؟ وين ريتهم؟ و إلا عرفت نشاطهم؟ ريت إنت وزير الصحة كيفاش وقت اللي خرج في القافلة الصحية الأخيرة لولاية القصرين و كيفاش حكى مع المواطنين و هوما قاعدين على الحصيرة؟؟؟؟ و خذى بيدو كارنياتهم و قيّد المعلومات المتعلقة بعدد آخر منهم باش يدرس حالاتهم الاجتماعية و الصحيّة. وين ريتو و إلا عرفتو إنت هاذايا؟؟؟؟
ريتش إنت ألطباء متاعنا اللي مشاو و بعثو الدواء لغزة و إلا القافلة البريطانية ألأخيرة اللي وقت الل تعدات بتونس زدنا أعطيناهم دواء و ماكلا و شراب و غطاء لسكان غزة

حاجة أخرى قبل ما ننسى: المرّة الجاية قبل مالواحد يتكلّم، ماذا بيه يكون مطلّع على المعلومات و الأرقام و المؤشرات و التقارير الدولية و الأممية و عدد المشاريع الكبرى المزمع بعثها بالبلاد و كذلك مختلف النصوص القانونية المنظمة ليها لأنو تونس حفظت حق أبنائها في العمل من ذلك إنها فرضت على سما دبي و مجموهة بوخاطر و غيرهم إنهم يشريو المواد الأولية من تونس و إنهم يتعاملو بالأساس مع الشركات التونسية و أن يستعملو اليد العاملة التونسية و أن لا يقع التداين إلا من خلال بنوك تونسية أو أموال تابعة لنفس المجموعات و ذلك تفاديا لأاي مشكل مالي أثناء القيام بالمشروع و هو توجه يذكر فيشكر خاصة و أن صحته قد بانت خلال هذه الأزمة

حتّى حدّ ماينجم يزايد على الآخر في الوطنية و حب تونس و خدمة شعبها....و اللي يحب يجادل بالرسمي عليه يجادل بلغة الأرقام و الشهدات مش بالعنعنة عن فلان عن فلان عن فلان و إلا لأسباب في نفس يعقوب

Gouverneur de Normalland a dit…

عمي ديانا ماغازين

هات بالله نفركوا رمانة "يكب سعدك" الي غايضتك غيض كبير و كأني سبيت الجلالة و ألا الراجل أتهمتوا ببعض التهم.
أنا ما يضهرليش كانك أنت و الا سي نوفل تامنو بالسعد و الفرتونة و كان أنا قلت "يكب سعدك" يعني خونا نوفل يسكر على روحوا باب و يغم على راسوا يرقد خوفا من أن كاس السعد الي يكسابوا يطلع مشى قزاز في جرة القوفرنور و ماعادش يحالفوا الحض في حياتوا بعد كلامي ...
أنا بالنسبة ليا كلمة يكب سعدو توازي لفظ
« Malheureux » en français ou « shame on you » en anglais

باهي ... تقول

"صحيح إنو من غير المقبول إنو شخص يخطأ في أمور بديهية مثل كتابة بلدو و لكن الله أعلم بظروف التدوين"
شنوة زعمة هالضروف ... ألي نخرجوهم كي حبيٌب يغلط و نحبوا نغطيو عين الشمس بالغربال و الا كل ما الفريق الوطني ياكل حارة في ماتش ؟ و الا تلميذ فاصع و يحب ياخذ بيي دونتري ؟؟ شنية الضروف ...بالله فسرلي

الكلنا نغلطوا صحيح أما مش في كتابة أسم تونس ... و ما تقنعنيش ... و مش على خاطر هالسيد لابس كرافات و حاطط اسم الحزب الدستوري الديمقراطي في مدونتوا بش نبدل رأيي . و كان هالفضيحة جات من الجماعة الحقوقيين الي مش عاجبينك راك أول العباد الي يتكلموا ... أنا نعامل الناس الكل كيف كيف و مافهمتش علاش هالسيد عاملينلوا حصانة وهمية و قرنتوا و تقرنوا بالحزب الدستوري و بالبلاد التونسية ...

هذا مدون و ما يمثل كان مدونته و مازلت نعتقد انوا بطريقتوا قاعد يساهم سلبا (مادامك ما تحبش لفض يشلك ... الي هو لفظ معبر ياسر).

"تونس مش صدق الله العظيم" ... لا يا سيد ... تونس صدق الله العضيم. دور العالم الكل تلقى الي المقدسات ديما تابعة الدين و تابعة الوطن.

كيما قال سمسوم ... عملت مقدمة طويلة عريضة تلوم فيا على أتهام سي نوفل (كرم الله وجهه) بالتشليك ... و بعد جملتين طحت في بن سدرين و النصراوي و بن بريك تتهمهم بنفس اللفظ ... بالله ثبتلي روحك عاد ...

من بعد عملتلنا درس في التاريخ ورغم اني حسيتو خارج عن سياق الاجابة عن اسألة طرحوهالك عدة مدونين الا أنه درس كان ينجم يكون هايل في ساعة تربية وطنية في الخامسة ثانوي بين الأربعة و الخمسة نهارة التلاث العشية

و من بعد شنوة تقول ... نفس الخطاب الي سمعتوا مليون مرة في تونس : شوف التشاد و شوف الزنبابوي و قارن تونس بيهم تو تلقاها جنة فوق الأرض ... و الخطاب متاع هاو في فرانسا و الا امريكيا صارت مشكلة ما صارتش في بلادنا ... كلام تغليطي و ما فيه حتى منفعة لأنوا الي يقارن يقارن بالحاجات الباهية الي ماوصللهمش وهكاكا تكون دافع بش يوصللهم

كمل زيد معاهم خطاب متاع هاو المسؤولين صاهرين (الله و أعلم وين) على مصلحة البلاد و يعطيهم الصحة ... خويا, راهو كل مسؤول الشعب عطاه مسؤولية (نقول الشعب ... هاني متفائل برشة) و يقبض في شهرية باش يخدم خدمتوا ... و كان عجبوا عجبوا و كان ما عجبوش يخلي البلاصة الى غيره وماهيش مزية كيف الانسان يخدم خدمتوا ومش عامل فليحة كيف يتلقى النقد و يتحاسب بالب و الت على الي عملوا باهي أو خايب من طرف كل مواطن في هالبلاد.

شكرا على قبولك للنقاش عكس البعض الي نعتبرهم ممثلين غير شرعيين للحزب الدستوري

تحياتي

.

Legend Of The Fall a dit…

قوفورنور، أيا توّا وين باش انجاوبك؟ في مدونتي و إلا في مدونتك؟ و إلا نعملو كوبيي كولي؟ ههههه

الحاجة اللي أنا حبّيت انفهمهالك، هو إنو إنت قاعد من غير ما تشعر تحكم على سي نوفل هذا بسبب انتمائوا للتجمع. لأنو لو كان الغلطة صدرت من أطراف أخرى، يمكن، نقول يمكن، راك غضيت الطرف

شو إنت سي رمزي اللي كاتب تعليق في مدونتك، هاو كتب
les tunisienne
في بلاصة: les tunisiens ou les tunisiennes au moins,
مالا عملنا منها مشكلة و قاوق؟؟؟؟ و الأكثر إنت استعملت كلمة "يشلّك" و اتهمت الراجل و الحزب إنهم يشلكو في البلاد.
و على فكرة يشلك ماهياش
malheureux ou shame on you

الأخوة في مصر يقولو: الملافظ سعد و إنت ما اختارتش العبارات اللائقة
المشكل لإنو هالمدون على خاطرو تجمعي ولّى هو المطلوب و بيه و عليه و الحزي خايب، و الحزب متاع قفّافة، و الحزب سارق و فاسد و قمعي و شمولي و ميليشوي و هات عندي عندك

مانقصدكش أنت و لكن ثمة مدونيين ما يعرفو شيء من الحقائق و ما يعرفوش أصلا آش كعناها حوار و تبادل آراء و افكار و آش معناها حرية و ديمقراطية. يهزّوا من الجابية و يحطّو في الخابية

انعاود انقلّك اللي أنا لا اتهمت سيرين أند كومباني لا بالخيانة و لا بالعمالة. أنا طرحت مجموعة من التسائلات البريئة حسب تحليلي للشيء اللي صاير، و لكن، لكن إنتوما ريتو فيه اتهام بالخيانة و العمالة، إذنـ إنتوما وحدّكم وصلتو إلى هاته النتيجة من خلال المعلومات اللي قريتوها و اللي هي صحيحة. كعناها انتوما نجّمتو، ربما مش عن وعي و بطريقة غير مباشرة، باش تحدّدوا معايير الخيانة و العمالة و بطريقة غير مباشرة لقيتو اللي هالناس بتصرفاتهم يغالطة في الراي العام و إنما هوما عملاء. يمكن أنا نكون صحيح و ممكن غالط في تحليلي

أنا لاني عامل حصانة و لاني اندافع على سي نوفل، أنا نناقش في حاجة نختلف فيها معاك لا أكثر و لا أقل. مش على خاطرو هو تجمعي و لا على خاطرو هو لابس كرافات. و في نفس الوقت أنا نناقش في سي قاشم و غيرو اللي النهار الكل و هوما طايحين ركبة في البلاد. توّا نشوفهم أشنوة باش يعملو نهارات اللي يشدّوا قرطاج

درس التاريخ مهم يا سي القوفرنور. و انا أعملت درس تاريخ ردّا على قاسم اللي شكّك في دستورية التجمع و حبّيت ابيّنلو تاريخ التجمع من عام 1920 و مختلف التغيرات و المؤتمرات اللي عرفها و تغيير التسميات و لكن في نهاية الأمر نحكييو على نفس الحزب

و التاريخ مهم. لأنو إنسان ما عندوش تاريخ، لا عندو لا حاضر و لا مستقبل. على خاطر كيما قلت، لازم الواحد يغزر للتاريخ و يقراه قراءة تحليلية و يربطو بالحاضر باش ينجم يخطط للمستقبل لأنو ما ثمة شيء اعتباطي في الدنيا هاذي و اللي يعيش من غير تخطيط إنما هو سامحني في الكلمة هايشة تتكلّم

و على ضوء التاريخ، احنا مازلنا يف تونس ماناش قاعدين نقراو في تاريخنا بالقدا. انسينا اللي أحنا انعيشوا في بلاد تعاقبت عليها الحضارات و انسينا اللي أحنا في يوم من الأيام كنا نحكموا في العالم تقريبا، مع قرطاج وقتها و لازمنا انكونو فخورين على خاطر عندنا إرث حضاري و تاريخي و ساهمنا في بناء الحضارة الانسانية. ماكناش شعب معزول أو بدائي

مثال: اليوم العالم الكل يحكي على المجتمع المدني في وقت أحنا اعرفنا المجتمع المدني من قرن تقريبا إذا مش أكثر مع الجمعية الخلدونية و الصادقية و غيرو. من المفروض نربطو بين ماضينا و حاضرنا باش انبينوا اللي احنا فاعلين و متفاعلين في منطقتنا و العالم. من غير مانزيد نذكر المفكرين و الشعراء و غيرهم. نغلق القوس

التربية المدنية: مرّة شدّيت خواتي و اعملتهم درس في القراية باش ينتبهو للتربية المدنية خاصة على خاطرها مادة مهمة باش توعيّ في المواطن حقوقو و وواجباتو و باش يعرف أبجديات القانون الدستوري و القوانين و باش تكون بوابة على السلوك الحضاري نفسو

أنا اليوم لقيت روحي في حاجة لكل شيء تعلمتو قبل من تربية مدنية و تاريخ و جغرافيا و اقتصاد و فلسفة و تربية اسلامية و حتى البراعة اليدوية

و سةاء كانت 4 و إلا 5 متاع العشية ماهو إلا مجرد توقيت و المهم هو الرغبة في التعلم و الدراسة

المقارنات: اسمعني، أنا مانعرفش إذا إنت إنسان ناجح في حياتك العمليّة و إلا لا، و لكن ليكن في علمك و في علم الوخيّان، اللي عمرو ماينحج الانسان، و لا المؤسسة و لا الوطن، من غير منافسة و مقارنة مع ناس و مؤسسات و دول منافسة من نفس المستوى و أقل منا و أحسن منا باش تعرف تحدّد الموقع متاعك، باش تصلّح الدّيفوّات متاعك و تقوّي من نقاط قوّتك

الماء و الضوء و الطريق و التلفون و المطار و غيرو، من بين المؤشرات اللي المستثمر التونسي و الأجنبي ياخذهم بعين الاعتبار باش يستثمر في منطقة ما. مش فقط هوما دليل على خدمة المواطن و تحسن حياتو و تسهيلها،و إنما زادة حافز على الاستثمار و خلق مواطن الشغل و زادة باش انقللوا من النزوح

لازمنا تكون عنّا نظرة شاملة للأمور مش نظرة ضيّقة و محدودة و لازمنا نربطو بين كل شيء. راك توّا تقول شبيه يخضرط هذا؟ لا يا سيدي...مانيش انخضرط. اقعد أ تات روبوزي و خمم فيها و شوف.

أحنا العباد الكل يحبو الوظيفة العمومية و إلا الجامعات و التكوين المهني عنا عيب و إلا مسار الفاشلين. اليوم يا سي القوفرنور ماناش لاقين العديد من الاختصاصات باش انغطيو احتياجات المشاريع الكبرى اللي في البلاد و إذا ما لقيناش حلّ باش انوليّو انراو في الهنود و البنغل في شوارع تونس مع العلم إنها اختصاصات جديدة مش متاع بلومبيي متاع نحاس و مطرقة و إنما ناس بروفاسيونال. مالقيناش. مافماش. الدولة تجري في جرتهم إيجا برك باش نعملك تكةين باش تلقى روحك في المدن الجديدة و تخدم بالموعد و الفاتورة و حقيبة كيما الطبيب و تخلص خير من الطبيب و الأستاذ و لكن: بح

و مانيش نكذب عليك. انقللك في كلام على شرفي

أنا صحيح قلت إنو المسؤولين يسهرو حتى للصباح باش يخدموا و لكن أيضا أنا قلت إنو هذيكا مش مزية منهم و إنما واجب و لكنني حبّيت انظهرلكم إنو عنا ناس خدّامة كيما عنا ناس كركارة زادة. و لكن المشكلة إنو المسؤول تلقاه خدّام و يثني الركبة و انسان عملي و متخلق و متربي، و لكن عون التنفيذ و اللي هو في اتصال مباشر مع المواطنين تلقاه ساعات كي آش باش يقول فمّي. و لكن صوابع يديك مش قدقد

Adem Salhi a dit…

الى ديانا مجلة؛
يعطيك القوة يا خويا في هالتحليل الهايل ههههههههههه
اما حويجة بركة؛ الجزء لول من كلامك قريتو في برنامج التاريخ متاع الباك؛ او الجزء الثاني نتفرج عليه يوميا في أخبار قناة 7؛ لذا باش ما يتهموكش بالسرقة الفكرية ما ذابيك تذكر المصدر
هههههههه
هيا انست بيهم

Legend Of The Fall a dit…

يا سي آدم كي هوّا كلامي سيادتك قاريه في برنامج التاريخ متاع الباك و تتفرج فيه يوميا على قناة تونس 7، إمّالا علاش مخلّيني نعاود فيه لخوك قاسم و غيرو؟ و في بلاصة تقعد اتنبّر / مش كان تعطينا رايك في المسألة خير؟ و إلا الموضوع مايهمّك كان في التنبير و الهزّان و النفضان؟؟؟؟
و سؤال: قللي بربي شكون يكذب برنامج التاريخ متاع الباك و الاتونس 7؟ و إذا الزوز يكذبو، اشكون يكذب أكثر من الآخر و علاش؟؟؟؟ و سؤال أخير: بربي تنجم تقوللي إذا التجمع حزب شرعي و إلا لا؟ على خاطر خونا قاسم قال اللي حزب "التجوّع" حزب غير شرعي. جيتك بجاه ربي يا خويا يا آدام، يرّاك تلقى أمنا حواء، نوّرني

Anonyme a dit…

@ounormal
j'ai trouvé deplace et grave que cette dame ou mr "diana" puisse insulter impunement des citoyens membres de la societé civile.
d'ou detient-t-il l'info que des mercedes les attendent a l'aeroport?
a-t-il vu cela? a-t-il des films ou photos? je ne le pense pas!
il ne fait que repeter ce que disent des feuilles de choux!
il le fait parceque il sait qu'actuellement personne ne peut le poursuivre penalement!
malheuresement les mensonges qu'il profere lui seront compatabilisees plus tard et il devra rendre compte!tot ou tard!

Legend Of The Fall a dit…

@Lamia: dear lamia, first I did not insult any person. second, I am not obliged to tell you from where I know about the mercedes and the luxirious hotels. third, I do not like to publish such pictures because I do not like to behave despicably as they behave. Otherwise, from where can they get the money to travel between Tunis and European cities? they made from the plane a taxi or a bus. can you travel weekly or monthy to Europe? do you know how the ticket cost? what about the hotel and the food and the transportation?
We all know that they are not rich people. come on please!

Anonyme a dit…

@mr diana
ta reponse est hors sujet! tu as avancé des infos que tu ne peux pas etayer par des preuves materielles!
cela tombe sous le coup de la loi.
aujourd'hui tu es protegé et demain ?
essaye d'eviter ce genre de gym, cela ne mene à rien. ceux que tu insultes par procuration aujourd'hui
te demanderont des comptes demain quand la justice sera de nouveau independante.

Legend Of The Fall a dit…

je ne suis pas de la même bassesse qu'eux. J'ai vu Me Radhia Nasraoui en criant et insultant le pouvoir juste parce qu'elle a vu des journalistes qui passent aux douanes alors que personne n'a lui fait du mal. en sortant des douanes elle s'adressa à ses accompagnateurs en demandant si elle a bien jouer son rôle. je te jure j'ai vu ça par mes propres yeux et je l'ai entendu parler à ses proches, ça c'est un exemple.
Tu parles de poursuite pénale mais ma chère je peux dès demain entamer des poursuites à l'encontre de c personnes à cause de diffamation et la diffusion de fausses information.
je respecte ceux qui luttent pour les vrais causes mais pas pour ceux qui les utilisent pour régler leurs comptes!