vendredi, février 13, 2009

قبل كل شي ... خويا ... أنت يمين و الا يسار؟


- ألو ... مقر حزب ++++ .... معاك تفضل


- ألو أهلا ...


- صار أنت هو ؟ وينك ما تعديتش للمقر اليوم


- و الله هاني ... داخل بعضي ...


- اش فمة ... لاباس ماهو ...


- أنا خارج عالصباح ... يا فتاح يا رزاق ... و يعرضني واحد ... غزرلي وقالي "عندك شعول ؟" ...


- أيه هو يمين و الا يسار ؟


- هاذيكا هي المشكلة ... ثبتت ثبتت ... ما عرفتوش ... نعطيهوش شعول ... و من بعد يطلع من الجماعة الأخرين ... و نشمت الأعداء فينا ... عملت روحي ما سمعتوش ... و قلت نشاور ... يعاودشي يعرضني مرة أخرى ... ونقعد في الحشمة


- رد بالك ... تشعلوشي سيغارو و يطلعش زادة مش متاعنا ...


- غريبة ... أول مرة نشوفوا ... أهوكا شلغمي كرشوا خارجة ...


- يطلعش حاكم ؟


- تي لا اما حاكم ...جماعة الحاكم الكل نعرفهم ... هذا هكة سمين شوية ... كرشو غالبتو ...


- بوكرش ... شميتشي عليه ريحة شرب ؟ كان ريحته تفحفح , يطلع كان يسار ... سكران ؟


- لا صاحي ... و أناهي يساري باش يقوم عالفجاري نهارة ا أحد الصباح


- يطلعش يميني متطرف ... راجع من صلاة الفجر ... عندو أمارة في جبينه ؟ ما يطلع كان يميني ...


- لا أمارة و لا أشارة ...تي الراجل مقزمط روحه في دجين


- دجين ... أه ... يطلعش من جماعة الأسلاميين الجدد ؟


- و الله ما نعرف ... الحقيقة ضيعني ... أنا قلت شلغمي ... يعني عروبة ... قلت بالكشي ناصري ... من بعد شكيت ... قلت فك على بلايا منوا ... ماهو نشاور قبل ...


- أحسن ما عملت ... منوا هكة أي واحد يطلب منك شعول و الا حد يسألكش عالوقت أو أي سؤال ... ثبت قبل و قلوا .."قبل كل شي ... خويا ... أنت يمين و الا يسار؟"

8 commentaires:

Hnani a dit…

هاني باش انعلّق في مدةنتك و ربي يستر لا تكون ماكش منا واتكون منهم ههههه
حلوة برشا خفيفة و تقول كل شيء

Al-Hallège a dit…

أنا يظهرلي هذا راجل بما انو عندو شلاغم... وحاكم مدام مقزمط و كرشو كبيرة ...و يميني مادام قام على الصباح يتفْتف و مايحبش يشري وقيدة... و يساري ما دام يكلم في إللي يجي متعدي على أساس انهم جماهير شعبية و عندو الحق باش يتقاسم معاهم الشعول

Al-Hallège a dit…

أنا يظهرلي هذا راجل بما انو عندو شلاغم... وحاكم مدام مقزمط و كرشو كبيرة ...و يميني مادام قام على الصباح يتفْتف و مايحبش يشري وقيدة... و يساري ما دام يكلم في إللي يجي متعدي على أساس انهم جماهير شعبية و عندو الحق باش يتقاسم معاهم الشعول

عياش مالمرسى a dit…

يطلع كان حاكم، دون أدنى شك ههههه

Sarah a dit…

tant que c'est un moustachu c un "hakém" :)

abu arabi a dit…

زعمة ما يطلعشى نورمالى

Clandestino a dit…

لوكان ماجاش شلغمي كنت نقلك هذاكة الكلاندستان مضيّع بريكيتو (ديما معنديش شعول)

لاعب النرد a dit…

ههههههههههه..
يقوى عليك ربي انت و لحلاج...ـ
نتصور انه واحد غاب على سيقارو، تو كيف يتكيف يقولنا وحده: يمين والا يسار