dimanche, mai 18, 2008

drou.US دروس

(زوز قاعدين في قهوة)



ه- أيا مازلت ناشط في نادي اليوقا متاعك ؟

ه- أوووه ...يا خويا هايلة اليوقا ... ! الواحد ينحي الستراس الكل ... و انت ؟ مازلت تتعلم في القولف ؟

- اه ... أنا ؟ وليت مهف في القولف ... ! أما توة نقصت شوية ...فما حكاية اخرى شاغلتني ..
.
- شنوة دخلت تتعلم في التايك واندو ..مع الأولاد ؟

- لا .. انا تايكواندو متاعك ؟ توة نتعلم في الديمقراطية !

- بالله ؟ صار يعطيو دروس في الديمقراطية ؟

- شنوة دروس ؟؟؟ فورماسيون كاملة ... ما نخبيش عليك ... وليت جن متاع ديمقراطية ... في تونس, بريسك, ما عاد يلعٌبني حد ... دايور, ماشي ستاج تكوين في المغرب ... فما بطولة مغاربية متاع ديمقراطية !

- ايا هايل ياسر ... و لاقي روحك على الصعيد المغاربي ... ؟

- والله شنوة تحب نقلك ... ديما نجي الثاني و الا الثالث ...في الديمقراطية . فما واحد دزيري ...يا خويا... مغلٌب عليا ! هم أزرق متاع ديمقراطية ... مهماشة متاع ديمقراطية ... هبلني ... ديما هو الأول, ديما الأول ...حتى لين نهار من النهارات وأحنا صاهرين في أوتيل خمس نجوم, و سارفور ماشي و سارفور جاي... خطفتوا على غرٌادة و قتلو : "...سامحني خويا ...من غير محقرانية...بالله انت دزيري و الا ...فرانساوي ؟ " ...قالي ..بهاك النخوة ...متاعنا ... متاع العروبة : "أنا دزيري أب عن جد" ...قلتلو و أنا مستغرب : "بالرجولية بع معاك ! ... الله مصلي عالنبي عليك ! الي يشوفك كيفاش تلعب بالديمقراطية لعب ... يقول ما تطلع كان فرانساوي و إلا أمريكاني ضربة وحدة ! ...ثابت الي ما عندك حتى عرق منهم ؟" ...خذاني على جنب , تلفٌت على اليمين و على اليسار ... و وشوشلي في وذني و قالي : "الحكاية و ما فيها الي مرت خالي أنجليزية ...يعني تربيت من الي صغير و انا نثبت في الديمقراطية و نقحرلها ... حتى لين شربتها شربان"

- أيوا ...تي ماهو عاد يقول من الأول ...السيد راضعها في الحليب ها الديمقراطية .


(واحد سيفيل ياقف قدامهم)

- السلام عليكم ...بطاقات تعريف ..يا الاولاد

- تفضٌل ...

- امالا حسب ما فهمت تاخذوا في سوايع زايدة متاع ديمقراطية ؟

- و الله خاطي خوك ... هو يتعلم في الديمقراطية ... و نزيدك زيادة ... ماشي للمغرب في ستاج و يجي الثاني بعد الدزيري الي ...

- سمعت سمعت ... عيب و الله عيب ... قد ما نعملوا معاكم وشي ! ... قد ما نعملوا في مجهودات جبارة لكسب رهانات التحدي و السعي قدما نحو ...نحو ... (ما يلقاهاش) تي هو حتى البنان جبناهولكم ! الكيلو على ألفين و نصف ! شنوة تحبوا وحد اخر ؟؟؟ و انتوما في عوض تحمدوا ربي ...شي ! شبيها يا بابا " دينم ...قراطية" متاع جد بوك الكلب ؟ مش عاجبينك أحنا ؟ نقريو فيكم في الدينم..قراطية من الابتداعي ... !

- ابتدائي ...

- تي .. الي هي ...من المكتب ... و أحنا نقريو و انوريو في الديمقراطية ...و الاخلاق الحميدة و حقوق الانسان و التعددية و مكارم الأخلاق وكيفاش نقصوا الكياس ...باش سيادتك تجبد بينا الكل و تاخذ دروس متاع ديمقراطية بالدوفيز ؟

- لا و الله لا ...خاطيني ... مش أنا ندفعلهم بالدوفيز ...هوما يدفعولي !

- بالله ؟؟؟ سامحني ...قلتلي وقتاش المأتمر متاع المغرب ؟ فما بلاصة ؟؟
؟

6 commentaires:

chanfara a dit…

يا قوفرنور تي ماهو القذافي قالها من هاك العام، الديمقراطية أصلها كلمة عربية غير جماعة الغرب الأحرف هوما اللي حرفوها..... أصلها "ديما كراسي" هههه

;-)

FREE-RACE a dit…

أطلبوا الديمقراطية و لو في الميبي
أطلبوا الديمقراطية و لو في الإيركس
لا لا ...نفدلك و برّا
للجماعة الللي ماشيين:
راهو ما فمة حتى خطاب تخويني...
لكن بصراحة أتمنى ان أقرأ تدوينة واحدة فيها أفكار واضحة تعبرون فيها عن سبب المشاركة في ها المؤتمر المشبوه

Bel Malwene a dit…

وووووهههههههه ... راني باش نهبل بالديمقراطية ...

7achicha a dit…

اذا أمريكا هي الي منضمتو الملتقى انا نقول لغاية في نفس يعقوب و ما هاش الغاية المعلنة بل مبيتة الي يعرف النظام الأمريكي و يعرف شنوة نعناها نظام مخابراتي جاسوسي يعرف شنوة معتاها ملتقى المدونين المغاربة بمباركة الملك محمد السادس

titof a dit…

الديمقراطية تتباع صبة ولا با كوات
و الشنية الديمقراطية
حاجة مادية ولا روحية
على خاطر نسمع في الجماعة يحكيو عليها ومنيش فاهم و الاغرب من ذلك توصل بيهم الوقاحة انهم يطالبوني باش نكون ديمقراطي
يا عمي المحافظ فسرلنا عيش خويا باش نتعلمو كش نحكيو مع الديمقراطين

titof a dit…

@free race
سؤال انكاري هذا؟؟؟؟؟؟