vendredi, août 31, 2007

أكلة نرمالاندية ...تعمل الجاير



مرحبا بيكم في مطبخ نورمالاند. اليوم باش نشوفوا مع بعضنا أكلة نرمالاندية عريقة و سهلة التحضير

تاخذوا شوية كريمة ... موش مهم النوع ... كل قدير و قدرو : تنجم تكون كريمة بوفريوة و الا كريمة شكلاطة و الا حتى كريمة برونزاج ... المهم اتطيبوا هاك الكريمة و تخليوها تبرد. في نفس الوقت تاخذوا كعبة لفت تنظفوها مليح و تقعوروها من داخل. تاخذو هاك الكريمة و تحطوها في وسط هاك اللفتة ... اش نوة تعطيكم تراه ؟ تعطيكم "لفتة كريمة" تسربيوها باااردة في نشرات الأخبار و في الجرايد بو دورو.

بالله اش يقصد مبتدع حكاية "لفتة كريمة" ؟ قالك "نشكروا المسؤول فلان على اللفتة الكريمة" ...زعمة هالمسهول عافس على كرايم العباد و طالع للسماء ... و العباد البسطاء هازين أكف التضرع لسيادتوا , يستجدوا فيه : "يا سي فلان بالله اخزرلنا ...يا سي فلان بالله تلفتلنا" ...شي ...السيد هاز راسوا للسماء و كأنه حتى حد ما كلمو. حتى لين نهار من نهارات سخفوه هالحثالة من بكاهم و نويحهم ...ياخي بكرم كبير و نبل ما فماش كيفوا قرر ... و عقد العزم ( هذي "عقد العزم يلزمها حتى هي بوست ليها برك) انه باش يتلفت و يخزرلهم. و هذاكا اش صار ...تلفتلهم ياخي هاك الرعية من كثر الفرحة و الشرف الي نالوه نساو مشاكلهم و مشاغلهم و بداو يستباركو بهاك "اللفتة الكريمة" الي تصدق عليهم بيها السيد المسؤول.

ياخي سي المسؤول هذايا "توم كروزو" و الا "سيدنا يوسف" باش في تلفيتة و من نظرة وحدة يطيح العباد الكل على راسها ؟

انا بصراحة فديت من هالصيغة الي يقولوا فيها و يعاودو ...بالله بدلوا شوية ..يا سيدي في عوض لفتة كريمة ...قولوا بيتنجان نبيلة و من غدوة قولوا سفنايرة سميحة و الا قرع بوطزينة جميلة ...الحاصيلوا تصرفوا ... على خاطر "لفتة كريمة" يلزمها "لفتينق" و برررررررررشا كريمة.


8 commentaires:

FREE-RACE a dit…

مش كان اللفت...فما زادة الخيار....اللي هو الفقوس بلغتنا الدارجة

Téméraire a dit…

Hakka mahou ?, chnouwa hal khonnar, kén telhina bel mouwatnine, n'welliwou khaybine.
Wallahi entouma cha3b mé test'hakkounéche, hakkna jina fi suissra wella suéde rahou 3tawna kdarna.

Anonyme a dit…

حاكم النورمالند العزيز
نشكرك على ها اللفتة الكريمة (ههههههههه) لها الموضوع الحساس ويعطك الصحة على المجهودات اللى قادم اتقول بيها في سبيل عزة ومناعة .....اى انستو يا جماعة

Gouverneur de Normalland a dit…

@ free race :

صحيح يا فريرايس...الحاجة الوحيدة الي عاملين فيها اكتفاء ذاتي في نورمالاندي هي الفقوس...وذلك بعد الحملة الوطنية تحت شعار "فقوسة لكل مواطن"...ه

Gouverneur de Normalland a dit…

@ Téméraire :

اش خص كان تمشيو لسويسرة يا تمرار و تخليونا زواولة صافيين في نطاق النورموقراطيةالشعبية ...ن

Gouverneur de Normalland a dit…

@arabica :

ان دلت موالاتكم لي و دعمكم الكلي فانما تدل على ثقتكم في المجهودات الجبارة التي تقوم بها السلط المعنية و معرفتكم حسن المعرفة بالرهانات المزعم كسبها في اطار مثابرة صانع...ههههه

نقصد صانع الكفتاجي متاع مطعم باب الخضرة تباركالله عليه...في..خفة اليدين...يقص في لباطاطا ويكسّر فيها ...كي الباطاطا ...و انستوا

Clandestino a dit…

لذلك قررنا منح صغار الفلاحين (و كل عمال الحضائر و الموضفين و الناس المباعة سلفا للبنوك ) منحة اللفتة الكريمة للنهوض بهذا القطاع الحيوي و ترسيخ ثقافة اللفت و قيم الكريمة في تونس الغد
و السلام

brastos a dit…

..وانا نقول شبيني ديما عندي جــــايــر مـزمـن...:)
تحياتي