lundi, mai 17, 2010

يا ترابي

و راس هالشاذلية

وريحة قهوة قوية

و فاشكة زهر نابلية

قلبي ماشي عليك دم

يا ترابي ... يا راس الهم


يا ترابي يا .. داء العيشة

يا حياة الكرمة و العريشة

نساو غلاك ... و عملوك خيشة

وحتى زرعك منهم ما سلم

نهبوه بشجره بحشيشه

ورشموا السرقة على العلم

ترابي صافي .. أما تظلم

.

نحلف بشجر اللوز المنوًر

بالزغاريط و الكعك المحوًر

برشمة شكبة قاعدة تتصًور

بالزردات بالروز المفوًر

ترابي صافي .. أما تظلم


ترابي صافي .. أما ظلموه

لموه قزة ...و بخ تف باعوه

و الي يموتلنا ماعاد ندفنوه

ترابنا تباع و قلبنا تردم

لا جواب و لا خطاب .. نساوه

و لا شكون يدافع ... بقلم

يا ترابي ... مش كنت تشرب دم ؟


نحلف بعبارات الزيت

و كلام قباحة مكتوب عالحيط

و بالرقعة الجلد و كبة الخيط

بكيسان الزرير بخبز القليط

الي ترابي كان يشرب دم


يا ترابي وليت تشرب كوكا ؟

و وليداتك هاربين في فلوكة

و الي قعدوا في حلقك شوكة

و حتى حد منهم ما سلم

عملوا بقانونك شكشوكة

وبحق الناس عملوا معبوكة

و حكموك بعصية و جلم

يا ترابي لو كان تتكلم ...


نحلف بدهنة فيكس و غلفة

و بجماعة الياسمين و الحلفة

وبقرون العلوش و العلفة

بالأفراح و الفلوس المتسلفة

ما تذكروا منك كان الجلم

يا ترابي لو كان تتكلم


يا ترابي لو كان تحكي وتقول

قداش رجالك عاناو الهول

فلاقة اتصول و تجول

و ياما منهم لبسك و تردم

كان يراوك منزوس بالبول

الي عطاك روحه زعمة يندم ؟


نحلف بحس قليان البريك

بهندي الطوابي بصوت الفوشيك

بكحل عاشوراء بالشربة الفريك

بالفزاني بطالب ركيك

ترابي صافي ... أما تظلم


ترابي صافي أما تظلم.

5 commentaires:

bacchus a dit…

رائع رائع رائع
برافوووووووووووووووو
من ولد البلاد للبلاد
إنّها تونس لاند بتفاصيلها
كم اشتقت إلى التفاصيل
شكرا أيّها الحاكم بأمر الإبداع

Gouverneur de Normalland a dit…

شكرا صديقي على تعليقك و مرورك

الحياة هي التفاصيل ... وبلادي حية رغم أنف الي يحبوا يقتلوها

Unknown a dit…

Chaque jour je découvre en toi un grand gouverneur de ....mots.... ya3tik essa7a ya gouverneur !!!! Wallahi j'ai trop apprécié. Mille merci.

Gouverneur de Normalland a dit…

@Lotfi

Merci beaucoup pour ton passage et ton commentaire :)

fléna bent flén a dit…

bravo :)) c'est tout le charme de noramalland c'est tout ''la3wéj'' de normalland