jeudi, janvier 03, 2008

حدود جهتنا ...حدود حومتنا

- الفرملية : والله كيف ما نحكيلك ...انا بيدي قعدت باهتة

- الفرملي : تي يزي بلا تفدليك قالتلي "فاق"

- الفرملية : و الله لا نفدلك ...شوف ...

- المريض : صباح الخير ...

- الفرملي : مشششش نووووررررمال

- الفرملية : نهارك زين

- المريض : قداش عندي و أنا راقد ؟

- الفرملي : قريب 30 سنة و انتي في الكوما ... تي الفرملية الي كانوا لاهيين بيك في الروترات توة !

- المريض : 30 سنة ؟؟؟

يسكت لحظات في ألم ثم يستطرد ( الجملة سارقها من ألغاز ملف المستقبل)

- المريض : شنوة صار في هال30 سنة ؟

الزوز فرملية يخزو لبعضهم بأسف ...

- الفرملية : برشة حاجات ...

المريض ينضر حوله مبحقا في غرفته ثم يستطرد ( تي هي سرقة سرقة .. خلي نشيخها)

- المريض : أنا في صبيطار ؟ تي هاي البيت هايلة و كلها معدات ... تبارك الله !

- الفرملي : هذا الكل يعود للقرارات الرائدة و الحكيمة لكسب رهانات ...

- المريض : صار مازلتوا لهنا ؟

المريض يتلفت على جنبوا ...

- المريض : أيا خليني نرقد 5 و الا 6 سنين ...حتى تتحسن الأمور ...

- الفرملية : استنى ... نعمروا هالوريقات من بعد أرقد لين تفد ... في بالك الي انت تمثل رهان كبير في عصرنا هذا و دخلت التاريخ ...

- المريض : كيفاش تراه ؟ أيا الحمد الله ... أخيرا قراولي كتبي و أشعاري و عطاوهم قيمة في هالبلاد ؟

- الفرملي : تي أني كتب و اني خرم ... ما تقوليش الي أنت كنت من الجماعة الي حكاولي عليهم جدودي و الي يسميوهم جماعة "الثقافة" ..

- الفرملية : شنوة معنتها ثقافة ؟

- الفرملي : تي جماعة كانوا مهمشين قبل و انقرضوا ... المفيد ... صارت مشكلة في ما يخصك أنت و دخلت التاريخ لأنك تسببت في حرب ...

- المريض : حرب ؟ أنا تسببت في حرب ؟؟؟

- الفرملي : أيه نعم ... حرب بين التوانسة و الصفاقسية ...

- المريض : شنوة قاعد تخضرت ... ما نفهمش فيك ... ياخي التوانسة و الصفاقسية ماهم في بلاد وحدة ؟

- الفرملية : ايييه....ياحسرة ! زمان ما خلطناش عليه ! التوانسة يقولو الي انت تابعهم مادامك كنت عايش في تونس قبل الحادث و الصفاقسية يقولوا الي انت تابعهم مادام بوك من أصل صفاقسي ...

- الفرملي : و شعلت ... جاب ربي تدخلت دولتنا ... دولة الساحل باش فضتها و خذاتك على عاتقها !

- المريض : دولة الساحل ؟؟؟ يا ولدي اش قاعد تقول ؟

- الفرملي : ياخي أنت دخلت في غيبوبة قبل استقلال الدويلات هذه ؟

- الفرملية : تي ماهو الحكاية و ما فيها ... بدات وقت الي الجهات متاع البلاد التونسية سابقا بداو يتسكروا على رواحهم ... الي يتولد في جيهة يتطهر فيها, يقرى الابتدائي( ماهو في العصر هذاك عاودو نحاو التعليم الأساسي و رجعوا للأبتدائي ) و الثانوي و الجامعة فيها و يخدم فيها و يعرّس فيها و يموت فيها ... حتى لين كثرت الحزازيات ...

- الفرملي : و بدات هالحزازيات تظهر من تحت لتحت ... ومن بعد ظهرت في الرياضة ... و من بعد القائد الصفاقسي الكبير " الزحّاف" صاحب الحملات الصفاقسية الأولى و انذاك رئيس فريق كرة ...ظهّرها ... وبداو الجهات يغليو الصفاقسية يقولو احنا مهمشين و القفاصة يقولو التهميش كان في قفصة و جماعة الشمال الغربي يعيطوا من المظالم و القصرين و سليانة و القبلاوية و الدوازنة و العكارة و الجرابة و النوابلية و المهادوة و القوابسية و القراوة ...

- المريض : هذوما الكل ولاو دول مستقلة ؟

- الفرملية : (بش تموت بالضحك) تي السيد نسى ما سماش شطرهم ...تي فما دول خذات استقلالها و زادت تقسمت لدويلات-حوم !

- المريض : ايه أنا اش مدخلني في هذا الكل ؟

- الفرملي : ما عرفناش أصلك بالضبط ... وحتى الي شهد الي عندك أصل صفاقسي مشكوك فيه ...و هذا جعل كل الشعوب تتعارك و تتناحر عليك ...

- المريض : صحيح الي عندي اصل صفاقسي ... لكن أمي قفصية و عاشت في الوطن القبلي و الوالد أموا من توزر و عدى حياته في باجة ...

- الفرملي : عندك عرق جريدي ؟

- المريض : أيه نعم !

الزوز فرملية يخزروا لبعضهم ... ينزلوا على قفلة حمرة مرشوقة في الحيط ... يتلفتوا وراهم ..يدخلوا جماعة لابسين لبسة عسكرية ... واحد منهم يخرّج سلاح غريب الشكل.

- الفرملي : لا مكان للجريدية في بلادنا ...

- الفرملية : اسفين ... ما فما حتى جريدي مسموح ليه باش يعيش و يتنفّس في بلادنا الساحلية ...




21 commentaires:

Clandestino a dit…

سيدي الحاكم بصراحة ابدعت
,
اما فكرني في ادهم صبري و جماعة ملف المستقبل يا حسرة....

Bechir a dit…

EXCELLENT POST!!!

Moi aussi, jétais, je suis et je serais toujours... fan de Milaff el Mosta9bal w Rajol al Mousta7eel :-D

Anonyme a dit…

محافظ بلاد النورمال لاند
أثلجت صدورنا...

FREE-RACE a dit…

يــُــقال أن هناك جهود حثيثة لتكوين حزب وحدوي: هدفه توحيد الدّول التونسية في دولة مـُــوحدة.. كما كانت في بدايات القرن 21... لكن هذا لن يتم قبل عزل بعض الإنفصاليين من بقايا حزب الجهويات الأنبطاحي..هذا الحزب الذي شهد أوجه عقب سلوك مـُـشين لمسؤول كروي كان من شأنه أن أوقد نار العصبيات القبلية و نضرية المؤامرة الخزعبلاتية لكل من في قلوبهم جهالة

Gouverneur de Normalland a dit…

@clandestino :

زعمة شنية أحوالها "سنية جراهم" مازال زعمة ادم صبري عامل الواجب معاها ؟

Gouverneur de Normalland a dit…

@ Bechir :

جماعة هالالغاز يلزم الواحد يخصصلهم تدوينات ...الكلنا قريناهم و ما فما حد يعتبرهم مرجع في تربيته و ثقافته

أنا كنت مولع بجماعة ملف المستقبل و كانوا في فترة من عمري الكتب الوحيدة الي نقراها بشغف

Bechir a dit…

[quote]
زعمة شنية أحوالها "سنية جراهم" مازال زعمة ادم صبري عامل الواجب معاها ؟
[/quote]

شدوها هي ومستر "اكس" في نومرو 156

:-D

Gouverneur de Normalland a dit…

@ arabicca :

فتاة العرب, مرورك برد وسلام

Gouverneur de Normalland a dit…

@free-race :

صديقي, دمت حرا

Bechir a dit…

[quote]
أنا كنت مولع بجماعة ملف المستقبل و كانوا في فترة من عمري الكتب الوحيدة الي نقراها بشغف
[/quote]

أنا مازلت مولع برجل المستحيل وملف المستقبل ومازالوا من الكتب النادرة اللي نقراها بشغف

نبيل فاروق يلزمو جائزة نوبل للآداب حسب رأيي

Gouverneur de Normalland a dit…

@ Bechir :

loooooooool

شدوها مسكينة ...والله الواحد ربى عليها الكبدة رغم أنها تابعة الموساد

ايه و أدهم مسكين ؟ اش قعد يعمل وحدوا ؟ راهو فد و روحو طلعت و ما لقاش كيفاش يهشم أنف هذا و يكسر أسنان ذاك

تي هو مش جاب منها فرخ سنية جراهم ؟؟؟ اش عملوا فيه ؟ لوحوه لل أمم المتحدة ؟؟ يرضع فيه كوفي عنان و الا بونكيمون ؟

Gouverneur de Normalland a dit…

@ Bechir :

أنا أدم صبري ما كانش يعجبني لأني كنت نحس الي فما برشة هيبي و غرور مصري بعيد عالواقع

أما ملف المستقبل كنت نشيخ عليهم لأنهم كانوا فريق (وزيد شكون يعرف عالبلى بلكشي في المستقبل مصر تولي بلد متقدم)و كانت فما خيال شاسع ...وكانت بالتحديد حلقات "الغزو" من أروع ما قريت وقتها

أنا بيدي نحترموا ياسر الدكتور نبيل فاروق (لكن كنت نستغرب اش مدخل صفتخه كمتحصل على الدكتورا في كونوا كاتب ألغاز و علاش يدكتروا فيه)هه

Bechir a dit…

[quote]
ايه و أدهم مسكين ؟ اش قعد يعمل وحدوا ؟ راهو فد و روحو طلعت و ما لقاش كيفاش يهشم أنف هذا و يكسر أسنان ذاك
[/quote]

لا يا راجل, شني "وحدو" هذي؟ ماهي منى رجعتلو ولمّ ربّي شملهم في جزء من ثلاثة أجزاء من الثّانية

:-D

Bechir a dit…

@Normalland:

صحيح, أدهم صبري فيه برشة "تفشفيش متاع مصارى" ,وهكّة ننجّموا نفتحوا آفاق عربية لمفهوم الجهوية

بالنسبة لنبيل فاروق (ربي يفرّج عليه لأنّو مريض في الوقت الرّاهن) وكونه ذا تكوين طبّي وغير أدبي, فإنّو أحسن كتّاب الخيال العلمي هم ذوو تكوين علمي

Par exemple, "Isaac Asimov", considéré par certains comme le maître de la science-fiction et qui est l'auteur du "Cycle des Robots" (dont le film 'I Robot' est une très mauvaise adaptation) et du "Cycle de Fondation" qui a été élu "meilleure série science-fiction de tous les temps" est bio-chimiste à l'origine. D'ailleurs, pour les amateurs de science-fiction et d'histoires psychosociologiques, Fondation devrait être un régal :-)

PS/ Au moins, cette histoire de CSS-EST-ZAHAF nous a permis de parler de chauses utiles (ou pas d'ailleurs, ça dépend des goûts :-D)

PPS/ http://en.wikipedia.org/wiki/Isaac_Asimov
http://ar.wikipedia.org/wiki/%D9%86%D8%A8%D9%8A%D9%84_%D9%81%D8%A7%D8%B1%D9%88%D9%82

Gouverneur de Normalland a dit…

@ Bechir

صار هو دكتور بمعنى طبيب ؟ انا ماشي دكتور أي متحصل على دكتورا في ميدان أدبي

ما في باليش بيه مريض ...الله يشفيه

و الله أنا نعتبروا من أحسن الكتاب بالعربية لانه من القلائل الي ختار هالنوعية من القصص

شكرا على المعلومات المثرية صديقي بشير و كيف ما قلت حديثنا خرّجنا من تفاهة دوّامة الجهوية

شكرا بشير

Werewolf a dit…

و الله رتحتونا من حكاية الجهويات بحكاية أدهم صبري...أنا زادة كنت نفضل سنية جراهم على منى توفيق...آش قولك سي القوفرنور تستعمل كلمة غمغم المرة الجاية...الكلمة هاذي كانت ياسر تعجبني في الألغاز

weld houma 3arbi a dit…

C normal.médém l 7kéya sayra fi normalland ma tnajjém tkoun ken mouch normal.bravo

Unperfectchild a dit…

ena sma3t famma ka3ba tayara ismha JIhen taya7 biha Adham!!

Bechir a dit…

@never_done

يظهرلي انت هو السيّد اللّي يحكي عليه الحاكم في تدوية اليوم.

ـ

:-D

Clandestino a dit…

@gouverneur:
يا حسرة على سونيا قراهام
ماهي كيما قالك بشير مشات
توة رجل المستحيل مع سلوى

yes_in a dit…

chouf ettaswira hadhi ... yezzi ....
Normal Land