الثورة , الكلاب و الذئاب

منذ  سقوط بن علي و هروبه الجبان الى بلاط حماة الطغيان و أنا أستحضر مقطعا من رواية الياطر. كنت قرأته أيام الصبى و لم أُعد.  و لكن المقطع لم يغادر مخيلتي و كلما  دخلت في نقاش  مع من يدعوا الى "مواصلة المش وار الإصلاحي" و "عدم القطع مع الماضي" و "الكف عن الإحتجاجات  و الإعتصامات" و مع من ينظر الى أهالي المناطق الفقيرة و المناطق العميقة و كأنهم جرذان   أو كأنهم  سقط متاع. أصمت, أتنهٌد ثم أقول : "هل تعرف قصة الذئاب و الكلاب التي سردها زكرياء المرسنلي بطل رواية الياطر ؟" . تكون الإجابة بنفي سريع ثم تتواصل الغوغاء و يتواصل من الحديث البغاء و لا أتعلم من كلام محدثي   شيئا و لا يتعلم من كلامي شيئا. و نمضي كل في شأنه  و قد انتاب كلانا صداع .

أما وقد حمى وطيس الكلام و تفاديا  لصداعي المتكرر و بدلا عن اصطناع حوار ليس بحوار, إلتجأت الى أرشيفي و جعلت أنبش في كتبي الى أن وجدت القصة و عثرت على المقطع الذي طالم اشرت اليه : هذه القصة التي سردها "زكرياء المرسنلي" البحٌار الشجاع لصديقه "عبعوب" البسيط في رواية "الياطر" لحنا مينة...قال زكرياء لعبعوب ..".هل تعرف أيها الكلب أصل الكلاب" ...لم يقل عبعوب لزكرياء ..."الكلب من لا يعرف للكلب سبعين اسما" ...بل فتح عينيه كالأحمق ...وتدلى لسانه وهو يسمع القصة ....قال زكرياء ..."يحكى يا عبعوب الكلب ...أن بنت احد الملوك في قديم الزمان وسالف العصر والأوان قد امتنع عليها النوم وأصابها الأرق بفعل عواء الذئاب المتكاثرة حول أسوار المملكة ..فاشتكت الأمر لأبيها الذي أرعد وأزبد وأمر الوزير الذي دبر قبل أن يطير رأسه ...استقر الأمر على إلقاء المحكوم عليهم بالإعدام خارج أسوار المملكة أحياء لتتدبر أمرهم الذئاب – ماداموا سيموتون بالمقصلة أو بالمشنقة أو بمخالب الذئاب – وهكذا سكن العواء برهة ونامت الأميرة ليال هادئة ...ولما نفذ رصيد المحكوم عليهم بالإعدام تقرر إلقاء المرضى الميئوس من شفائهم رحمة بهم وإنقاذا لهم من الم المرض وهو ما لم يدم طويلا ...وعندها تم الالتجاء إلى الحيوانات المسنة والنطيحة والعجفاء والبتراء لتأكلها الذئاب هنيئا مريئا...ولما شحت موارد الثروة الحيوانية قرر الخدم إلقاء فواضل الموائد وما عافه الملك من مآكل وحلويات ...والغريب يا عبعوب الكلب ....إن ذئابا عديدة لم يرضها الوضع الجديد ورفضت أكل الزبالة والجيف فانطلقت إلى أدغال الغابة لتمارس فعل الفتك الشجاع وافتراس اللحم الحي بعرق مخالبها وأنيابها ....غير أن ذئابا – رخيصة – رضيت بالقليل و اطمأنت إلى استهلاك الفواضل الملكية و استقرت حول الأسوار تنتظر رزقها دون عواء أو احتجاج ...وبمرور الزمن توطدت علاقتها مع الحراس وتحولت إلى حيوانات داجنة لطيفة ....ثم سمح لها بالدخول و أصبحت تتجول في شوارع المملكة بعد أن فطست أنوفها وقلعت أنيابها و قلمت مخالبها و ترهلت عضلاتها و ارتخت آذانها وتحولت بسحر الفواضل كلابا سائبة ...الكلب ...يا "عبعوب" ذئب فقد كرامته يا ابن الكلب ...."

الحرية لسمير الفرياني : قصة اعتقال

خرج من وزارة الداخلية.  شارع الحبيب بورقيبة. عباد ماشية و عباد جاية . وصل قدام المسرح البلدي.  وليدات عاملين وقفة احتجاجية. بيناتهم تعرٌف على جماعة من البوليس يخدموا معاه في الوزارة. "الحرية : هدية الشعب الى تونس", كان هذا واحد من الشعرات مكتوب على علم كبير يرفرف بين يدين الشباب. و أنا شنوة نهديلك ؟  تذكر النهار الى هبط فيه  للميدان و شاف مجموعة من الشباب واقفين صدوراتهم  قدام الكرطوش. حتى حد ما وخر التالي و ما قال نهرب و الا نخبي راسي. واحد منهم كان متلحف العلم . عمره ما يتصور يجي نهار ينسى عينين هاك الوليٌد و هاك التصميم و العزيمة الى قراها في هاك الوجه.  الوليٌد ماشي و يقدم و يعيط "حماة الحمى ... يا حماة الحمى ..هلموا هلموا لمجد الزمن ... لقد صرخت في عروقنا الدما ... ".  عروقه فاروا عرق عرق , بدنه قشعر. تمنى يغنُي معاه, يعيٌط معاه, و وقتلي طاح, تمنى يطيح معاه. تمنى دمه يكون مع الدم الى نزف شرشار فوق الكياس و فوق العلم. و سكت الوليٌد مرمي في الشارع  و دمه يروي في التراب قطرة قطرة. و من نهارتها قلبه ينزف و ما حبش يكف.

 و أنا ... شنوة نهديلك ؟  حل باب الدار . جاو الصغار يتجاراو "بابا ... بابا" ضمهم لصدره. هز ولده الصغير  بين يديه. باسه فوق جبينه و من بعد خزرله. الله مصلي على النبي. في لحظة شاف في عينين ولده نفس عينين الشاب الي مات ايامات الثورة قدامه. رعش. شوية لا طيٌح ولده بين يديه.  شكون قال الى بعد عشرة سنين و شوية ما يموتش ولدي كيف ما مات ولد الناس. قطوس مرمي في الكياس. جيفة ياكلوها الضباع. لا والي و لا تالي. و الي قتلوا و الي ضربوا و الي عذبوا .. كل يوم, بينه و بينهم "صباح الخير" و "نهارك زين". لا عمره لا ينجم يفهم ضحكاتهم و تفذليكاتهم و رجوعهم لحياة عادية و كأن شيئا لم يكن. علاش هو قلبه يوجعه كل ليلة ؟ و علاش وقت الي مرته تبدى راقدة بجنبه يعمل روحه نعس بش ترقد هي و من بعد يحل عينيه للصباح, حي ميت, مرمي في الفرش ... كيما الشهيد المتلحف العلم المرمي في الشارع. و ساعات يتمنى الموت و هو مخه يدور في حلقة فارغة, في جملة وحدة : و أنا شنوة نهديلك ؟

ما حبش يفيٌق مرته. تلفت بشوية بشوية و مد تاليفونه.  قعد يشوف في الاساماسات, حتى لين طاح على الاساماس متاع الصحفي الي كان حكى معاه.  كتب في جملتين في ما معناه "نتقابلوا غدوة" و حط التلفون و قعد يخمم شنوة ينجم يقول و شنوة ما ينجمش يقول حتى لين هزه النوم.

خرج من الوزارة, نهارتها يجي نهار سبت, و المرة هذي  خطواته كانت خطوات اخرى. مشيته كانت مشية اخرى و خزرته لشباب يعملوا في وقفة احتجاجية كانت خزرة اخرى. تبسم, ضحك.  من مدة ما ضحكش من قلبه , من مدة  ما حسش روحه هكة  :  خفيف كيف الريشة. طار طيران و ما يخمم كان في حاجة وحدة : صغاره الي خارجين من المكتب و الويكاند الي باش يعديه معاهم. مشى ستناهم قدام المكتب, عنٌقهم, باسهم, شرالهم شكلاطة, فذلك معاهم. عنق مرته في بيت النوم متاعهم. شدها من يديها و باسها من خشمها و قاللها "نحبك", كب على أمه  في الصالة و باسلها راسها وقاللها "أنت احسن ام في الوجود". هدى هدية لبوه و  من غير ما يشلٌق وصاه على الصغيٌرات و على الوالدة و المادام. رقد كيما البيبي ليلتها و قام الصباح بكري. خمم في فطور صباح قمقوم. يمكن يطلع اخر فطور صباح مع العائلة. مشى يجري للكرهبة. خطٌفها و خرج بش يشري شوية كرواسون على شوية فطاير. أمه تموت على الفطاير. و ولده الكبير يحب النجاص على الصباح, نمشي نشري كيلو نجاص. خزر في الروتروفيزور. زوز كراهب يتبٌعوا فيه. فهم الحكاية. و عرف الي فطور الصباح بش يتأجل. قصت عليه وحدة من الكراهب و تعرضتله طريقه. خرجوا من الكرهبة الثانية جماعة يعرفهم بالأسم واحد واحد. حط يديه على الفولون و ضحك. عينيه دمعوا و غنى "حماة الحمى يا حماة الحمى .. هلموا هلموا لمجد الزمن . لقد صرخت في عروقنا الدماء. نموت نموت و يحيا الوطن. "  شدوه و كتفوه و هوما  يدزٌوا ا فيه لللكرهبة متاعهم  بعنف, تلمح العلم يرفرف في الشارع. خزرله و تبسمله و تمتم : " تعرف شنوة نهديك ؟ نهديك روحي يا بلادي  ... و ما نخافش و ما نخممش"

حمم وجهك ولي ديمقراطي, حمم وجهك ولي ثوري

أيا قلنا السلام, و أنا نتطلفح على الفايسبوك كيف العادة, نطيح على فيديو متاع برنامج في قناة نسمة جايبين محامي اسلامي و محامي قالك حداثي و دخلوا في بعضهم فرندس شي سبان على شي عياط على شي تزريق لبعضهم على شي نبزيات, قالك شنوة قالك في إطار الديمقراطية و حرية التعبير.

علاش في بلادي العباد ماشي في بالها الي الثورة تعني صياح و عياط و تقطيع شعر و شتم الخ ؟

الديمقراطية  سيدي خويا راهو ماهيش تنطيح كباش كيما يحبوا يسوقوها جماعة هالبرنامج. و الثورة ماهيش طول لسان و قباحة و الي فمه أبخر صحة ليه. هذيكا هي الصورة المبتذلة الي يحبوا يسوقوهالنا وهي صورة مضاهر. يعني في المخيال الشعبي, الديمقراطية هي التجغجيغ و العرك بزايد و الثورة قلبان طواول و سبان و الجماعة هذوما عجبتهم التمثيلية و فيسع تقمصوا الدور. و هنا يقول القائل ياخي الناس عرضت صدورها للكرطوش بش نعملوا زعمة زعمة و نفلموا على بعضنا  و نكذبوا كذبة  و نصدقوها و نبداو  نتزايدوا في القباحة و طولة اللسان ؟  يضهرلي مش هذايا المبتغى و المنشود.

 اللى فات الجماعة هذوما هو أنه  أول حاجات قام عليهم غضب الشعب و خلاتهم يثوروا  و هزت الأرض و لم تقعد هو التمضهر. و ما تنساوش الي تبوريب جماعة أعوان البلدية الفرحانين بالزي متاعهم و من بعد تبوريب الوالي و تبروريب الشرطة الي جد عليهم أكثر من اللازم الدور الي وكلوهولهم , هو الي جعل العباد تثور. يعني بالفلاقي, القولبة الي كنا نعانيو منها و هاك العباد الي تزغرطلهم في وذنهم ينساو رواحهم و ما يتذكروا كان  أدوارهم المهنية و الإجتماعية هي الي خلات العباد تثور و تهيج. و هانا , في إطار هالنوعية من البرامج , رجعنا للبداية :  واحد نفخولوا في وذنه قالوله انت بش تنصر الإسلام و لاخر نفخولو في وذنه و قالوله  من غيرك انت المرناق بش يتقطع و  انافاااا ... هبطوا بعضهم ريش.

المشكل هوني أكبر منه مشكل متاع جماعة الله غالب عليهم من الزبيبة يسكروا و فيسع ما تجد عليهم الأدوار الي عطوهالهم. المشكل الحقيقي هو العباد الي وراء هالنوع من النقاشات  في وسائل اعلامنا . و هي نقاشات في نهاية الأمر لا تغني عن جوع و مش بش تأدي الى محاكمة العباد الي عاثوا في البلاد فساد و مش بش تجعلنا نلقاو حل للبطٌالة الي عددهم يمشي و  يزداد  و مش زادة بش تجعل أكباش النطيح يفكروا مع بعضهم في مشروع ينجم يجعل المواطن التونسي يبني بلاد متقدمة من هنا المئة سنة القدام. هالنوع من البرامج التلفزية  هو طلاسم في العينين و نمشي أبعد من هكة و نقلك الي هالبرامج هي برامج ضد الثورة.

  تقولولي كيفاش ؟ نجاوبكم و نقوللكم الي  هالنوعية من البرامج التنطيحية هي برامج تركٌز على الحاضر و الا الماضي و تقعد غادي :  يا إما يجبدولك على الهوية يا إما يجبدولك على المشاكل بين الإسلاميين و الحداثيين يا إما يجبدولك على الجماعة الي يحبوا بورقيبة و الجماعة الي يكرهوا بورقيبة. يعني برامج و فقرات تلفزية تغيٌب المستقبل بتاتا و تتجاهله.

 سمعتوشي بالله ببرنامج استدعى اخصائيين اجتماعيين و حكاو على هيكلة التوجيه الجامعي و علاقته بالتشغيل ؟ و الا  برنامج يتناول  موضوع  الديون المتخلدة في ذمة تونس استدعى  اخصائيين في طريقة مجابهة التداين الخارجي و موقفهم من القروض الي هبطهم على كرايمنا سي قائد السبسي ؟

 لا ..  حتى حد ما يحكيلك على المستقبل. ما تهزوش ريوسكم ياسر الفوق . تلهاو  بحكايات  فارغة كيما حداثي و سلفي طناطحوا و اقعدوا نبروا يا على هذا يا على الاخر و القرارات الحقيقية لمستقبل البلاد خليوها بين يدين قائد السبسي و المبزع و اللطيف و  الأوربيين و الأمريكان و من تبعهم بإحسان ليوم الدين.

المشكل الي برشة من جماعة وسائل الإعلام  بداوها من الأول  و هوما يكذبوا على العباد و يكذبوا على رواحهم : في عوض يعترفوا بكونهم كانوا أخطئوا و يطلبوا السماح من الشعب التونسي لدورهم المخزي طوال السنين الماضية كبوق دعاية لنظام بن علي, خرجوا علينا  بقالب ثوري متاع مضاهر و بداو يفشلموا علينا و يهيٌبوا عيني عينك و رجٌعوا رواحهم هوما الي قاموا بالثورة. بالله شنوة الفرق بيناتكم و بين برهان بسيٌس و قت الي كان يخرج في التلافز و يهيب و يكذب على الناس و هو يعرف و الناس تعرف الي هو كاذب ؟ أنا يضهرلي الي الزوز كيف كيف , غير الضرف التاريخي تبدٌل.

ثم ما نعرفش كيفاش حتى حد ما أثار نقطة هامة جدااااا (على رأي الغنوشي)  :  شفت برنامج على قناة نسمة يحكيو فيه على شفافية توميل الأحزاب و الجماعة الي جايبينهم قريب يتضاربوا  بالصبابط و الكراسي و حتى حد ما طرح موضوع تمويل القناة هي بيدها. كيفاش قناة تقوم ببرامج سياسية و إخبارية تونسية و جزء لا يستهان به من فليساتها جاية من  جيب بارلسكوني و هو  رجل أعمال, سياسي ايطالي ,رئيس حزب و رئيس وزراء بلاد اخرى. ياخي كان سي برلسكوني يحب يعدي أفكاره أو أجندا سياسية خارجية على القناة شكون بش يوقفه ؟ يعني هل أن قناة كيما هكة مهيئة من أصله أنها تقوم بتغطية محايدة و صحفية شريفة ؟  

الحاصيلوا مخ الهدرة ان الثورة ماهيش ثورة مضاهر و  حمم وجهك ولي ديمقراطي و حمم وجهك ولي ثوري. و أنستوا.

ما بين السلفية و الحداثة .. الدم يقطر

أيا قلنا السلام.  أيا سيدي, هاي كلات باعضها في البلاد بين  أنصار الحداثة و جمعية أحباء السلف الصالح.  راكم تتساءلوا و تقولوا القوفرنور جاي مع شكون ؟ هات نعملوا تحليل صغير و نشوفوا :

جماعة الحداثة يا سيدي ينطلقوا من فكرة الي ثقافة تونس ثقافة غير حديثة و يلزم ندخلولها روح الحداثة. و من ثمة يلزم نبذ الثقافة "المتخلفة" متاع  هالبلاد و ندٌخلوا ثقافة "العصر" و هوما كيف يحكيو على ثقافة العصر يقصدوا الثقافة الغربية الي تضم  أوروبا و أمريكيا.  هذي هي  الطبقة أو على الأقل جزء كبير من الطبقة الي تعتبر نفسها "مثقفة" في تونس و كانت  و لازالت تقود في  المشهد الثقافي و الفني التونسي. مجموعة  تتحدث بإسم الثقافة و الفن التونسي و هي في نفس الوقت متعالية على كل نوع من أنواع التعابير الثقافية أو حتى الأنتروبولوجية التونسية. هذو هوما الي وقت الي تجبدلهم على الزكرة و الا الطبل أو المزود أو السطنبالي يقوموا يكشخوا  في إزدراء  و يبداو يمجدوا في الأوبيرا و المالوف و  كان جبدولك على السينما يحصروها في زوز أسامي قراوهم في دروس الأقسام الفرنسية  و يبداو يميلوا في ريوسهم على "الموجة الجديدة الفرنسية" متاع الستينات و قعدوا غادي متمسكين في حاجات الفرنسيس بيدهم تعداوهم عندهم سنين.  أما الحس الشعبي لهذه الرأية الي تم بثها بكثافة و التشهير ليها طوال الخمسينية الاخيرة فتلقاها في ثقافة القشور الغربية الي حصرت الغرب في مشطة شعر و الا في سروال دجين بالشعرة و الا في خرجة للملاهي الليلية الخ, و كأن الثقافة الغربية هي ثقافة مظهر و نساو  أو بالأحرى تناساو الرقي الثقافي الغربي في عمقه.

هالإحتكار لأنصار الحداثة متاع  ريبوك و كوكا كولا و اللوفيس و الأديداس و المرساداس و غيره من حداثة استهلاكية و حمقاء , جعل الناس يحسوا بتهميش كبير لثقافتهم و يشكيوا من تعالي على موروثهم. هالإحتقان نتاج هالحداثة المبتذلة كان ظاهر و جلي خاصة في مجال السينما حيث شاهدنا طوال  العشرينية الأخيرة قطيعة و علاقة إغتراب بين محب السينما التونسي و الأفلام التونسية المنتجة الي كان المتفرج يتلقاها بغضب حينا و بإستغراب أحيانا و بسخرية أحيانا أخرى .  القطيعة هذه من ناحية ناتجة على بعض الأفلام "السياحية" الي مجعولة بش تعجب الغربيين و بتحويل الموروث الى فولكلور أبله يستجدي و يستعطف الغرب و يثبُت فكرة علويتهم  و يدعوا الى فكرة أن تونس ماشية و متبعة و عينيها مغمضة كل الإفرازات الثفافية و الفنية الي هوما يشوفونا بيها.  أما القطيعة ناتجة زادة على متفرج يغالي في النقد و يخلط الغث بالسمين و ولات الرفض المطلق للفن التونسي عامة و السينما التونسية خاصة نهج كل واحد يحب يضهٌر الي عنده موقف و يحب يلعبها مثقف ثائر و محتج. و حسب رائي كيف سيدي كيف جواده.

ايه أكهو. هالتهميش و هالقطيعة الي خلقتها ثقافة الحداثة و مع الفراغ و تعطش الناس لثقافة عميقة و بديلة و مش مبتذلة و بتطور الإعلام السلفي الي قنوات تلافزه أكثر من شعر الراس, نتج هذا الكل على ثقافة السلفية. شنية ثقافة السلفية ؟ هي ثقافة تدعي أن  الحداثة (بالمعنى الي حكينا فيه أعلاه) هي ثقافة حائدة على المسار و يلزم تعويضها بثقافة إسلامية تعتمد على  السلف الصالح.  تقولولي وين المشكل في هذا ؟ نقوللكم أن بالطبيعة أن ثقافتنا العربية الإسلامية تعتمد السلف الصالح ... ياخي معتمدة على شكون ؟؟ هل من الممكن أن نبني مستقبلا دون تاريخ أو ماضي ؟ يعني بالفلاقي , شنية هالطلعة الي طلعتولنا بيها ؟ من البديهي أن عمق التاريخي و الحضاري لهذا البلد يعتمد على ما سلف من علامائه و رجالاته و نسائه  و ..و ... أما كيف تجي إنت تروٌج فكرة أن  لعزة الإسلام و المسلمين يجب العودة الى السلف الصالح , نقلك سامحني ... ياخي جدودنا و جدود جدودنا مش سلف صالح ؟ و  شكون يحدد شكون الي صالح و شكون الي طالح ؟ هذه نقطة أولى . النقطة الثانية هي فكرة " أسلمة البلاد" ...الي يشوف يقول الي أحنا عايشين في غابات الأمازون و عمرنا ما سمعنا بحاجة اسمها إسلام ... و جايين حارة يفهموا خير منا و مستعليين على عباد ربي و قالك هات نأسلموهم و نفسرولهم دينهم و نكفروا الي نحبوا نكفروه  و نأسلموا الي نحبوا نأسلموه. وقتها سيدي خويا نقلك اقف غادي. و حدك حد المسقي. لإن البلاد هذه هي نتاج حضارة قرون و قرون و التاريخ الإسلامي ما جاش البارح و مش بحاجة لواحد قاري زوز كتب في عمره الكل بش هو يوجهه كيما يحب. يعني مخ الهدرة أن الفكرة هذه متاع  أسلمة الشعوب المسلمة فكرة مغالطة و خبيثة و هو فكر تسطيحي و يتجاهل عمق ثقافتنا العريقة.

جيناهاشي. يعني الي نحب نقوله في الأخر, هو أن فكر "الحداثة" و فكر "السلفية" هوما وجهتان لعملة واحدة. هي تلك العملة الي تحتقر الثقافة المحلية و تتجاهل العمق الحضاري لهذه البلاد الطيبة. و لذى ننصح الشقين من الحداثيين و السلفيين بش يمشيوا يعملوا طريح كورة يعرقوا فيه  مليح و يدوٌروا الدم  و يبدلوا بيه الجو و يخطاونا من بهامتهم ماناش ناقصين بهامة توة. عندنا بلاد يلزم ناقفوا معاها و نحاذيوها حتى تولي بلاد ديمقراطية و حرة و كل شخص ينتميلها يتمتع بروح المواطنة الي يدفعه بش يحترم فكر الناس الأخرين و ما يبداش يتعالى علينا تقولش عليه مولود في القطن. و أنستوا.

فكر المؤامرة و تدين الخنوع

أيا قلنا السلام. نتذكر وقت الي كنت نعيش في الخارج و نرجع لتونس في العهد  البنفسجي متاع الأمن و الأمان لبن علي, نلاحظ حاجتين هامين   في  برشة توانسة  كانوا يركبولي السكر و الدم  و كانوا يعملولي احباط و يخليوني نعتقد الي حتى شي ما ينجم يتبدل في هالبلاد.  الحاجتين هذوما هوما "فكر المؤامرة" و "تدين الخنوع".

هات نفركوا الرمانة بالنقطة بالنقطة. بالنسبة لفكر المؤامرة فإنك تهبط للبلاد تلقى الجماعة شادين القهوة و  يعملولك في سيناريوات تعمل ستة و ستين كيف : هاو قالك اسرائيل تبيع في سبت بش يفقدوا الرجال التوانسة خصوبتهم .. و كأن الإسرائييلين ما عندهم ما مقلقهم كان فحولة عمك العربي مولى حانوت العطرية. و مرة تحل الأنترنات تلقى واحد  تقولش جايب الصيد من وذنه و يقلك توم كروز ماسوني و يلزم نقاطعوه , تقولش علينا كل ليلة نعملوا في طرح بولوت معاه. فكر المؤامرة متطور و عامل بعمايله في ربوع الخضراء. نتذكر مرة حضرت ندوة متاع فلم فلسطيني يتحدث على القضية الفلسطينية و معانات عرب 48 في ظل الإحتلال الاسرائيلي. يقوم واحد في القاعة يعيٌط و كشاكشه خارجة و يتهم في  المخرج الفلسطيني بالعمالة هو و فريق الفلم لأنه قالك  الشريط مصور في إسرائيل (ما في بالوش الي فما شعب فلسطيني محتل ) و سبهم واحد واحد وقال الي هذه مؤامرة صهيونية لإحتلال مهرجان قرطاج السينمائي. الحاصيلوا عديت اسبوع كامل و أنا حاشم في بلاصة هاك التونسي الي شلق بالمؤامرة وقت الي المخرج و الممثلين تأثروا و شوية لا بكاو من الجهل الي يعم بعض شرائح المجتمع العربي و عدم اطلاع هؤولاء على مشاكلهم. هالجماعة هذوما متاع المؤامرة وقت الي تقوللهم : "باهي مشات معاكم , توم كروز ماسوني... أما في بالكم الي أنتوما عايشين في نظام دكتاتوري و الي بن علي حارمكم من أبسط حقوقكم ؟" يبدلوا الهدرة و يقلك لا كان يتنحى بن علي تو يشد واحد ماسوني و الا واحد ينصر الصهيونية  و يفكك الوحدة العربية ... كأن العرب كانوا متوحدين في ظل الدكتاتورية ... طاح بن علي و تيقننا بفساده و علاقاته المريبة  و ممكن زادة يكون مورط في عمالة مع اسرائيل.

بالنسبة لتدين الخنوع, نحكي على هاك الجماعة الي يقيسوا في درجة إسلام الناس بعدد الركعات و نساو الي الإسلام دين معاملات   يدعوا للتنوير و التحرير ونشر الفكر والعلم و مكارم الأخلاق. هالجماعة تجبدلهم الجهاد ... يبدى يسرسطلك في اسامي غريبة في أفغانستان و جبال قندهار و وقت الي تسأله  : "حاولتش تجاهد بنفسك  ضد الدكتاتورية؟" ,  يقلك "حاكم جائر و لا فتنة تعم البلاد" و كيف تبدى تسرصطله الأدلة الي  يوضحوا أن على المسلم عدم السكوت على الظلم . يقلك تي هاو عمللنا راديو الزيتونة و هاني ماكل شارب و نصلي حاضر, ما عندي علاش نثور. وقتها تبدى تتغبن و تندب فيهم على هالبلاد الي حتى حد ما حاس بيها.

جاتشي الثورة ؟ خرجوشي شباب تظلم و انداس اجتماعيا و تهمش, يطالب  بالعدالة الإجتماعية و أسقاط  نظام الفساد. شباب عرٌض صدره للكرطوش و  استشهد الي استشهد و نجى الي نجى و هرب بن علي و إنقلب النظام.

ايه وينهم الي كانوا يقولوا الي خلي مشومك لا يجيك ما أشوم ؟ زعمة استعرفوا بغلطتهم  وبتقديراتهم الخاطئة  ؟ لا ... أما , بش يرجُعوا شرعيتهم و يضهروا ثوريين . اش خير من المزايدة على الثوريين ؟

ولاشي كل واحد بش يبرهن على أنه ثوري يلزم يطلع على كرايم المناظلين و يبدى يسب و يقشطل فيهم فماشي ما بسبانهم  يقزمهم و يطلع هو في الاخير بطل ؟ هكاكة يا جماعة , و لات الثورة عبارة على مجموعة صراخ هستيري و نساو برشة ناس الي مش المهم هوني اظهار شكون بطل لكن الي يهم هو ان تونس تخرج بطلة.

زعمة ولادنا الي خرجوا  يتضاهروا قبل نهار 14 جانفي و هوما على علم الي البلاد معبية بقناصة و مجرمين ينجموا يقتلوهم في كل وقت , زعمة خمموا شكون فيهم بش يكون بطل ؟  وشكون فيهم بش يدبر خدمة الأول ؟ و شكون فيهم بش يحطولوا مئة جام على صفحة الفايسبوك متاعه ؟

ياخي فما شكون يتصور الي ناشطي الفايسبوك الي توة الناس الكل تتهم فيهم بالماسونية و الصهيونية و العمالة و الخيانة و الي كانوا يخرٌجوا في أخبار سيدي بوزيد و تالة و الرقاب و يعرضوا في أرواحهم و أرواح عائلاتهم للخطر و للإعتقال , زعمة كانوا يخمموا أنهم يعملوا هذاكا الكل بش  يبعثولهم في الفايسبوك تعليقات شكر ؟  شبي التوانسة فيسع نساو الي المهم مش الأشخاص و لكن المهم هي تونس و شنوة انجموا نعملوا لتونس و يزيو براس الحنينة من المزايدات و البهامة و التسطيكة بقري متاع السب والشتم و الثلب و التنقيص من قيمة العباد و من نظالية الي ناظل و يزيو من الاسطياد في الماء العكر و تخمام متاع مؤامرة و اقصاء, مش على خاطر اصدقائي المناظلين على الأنترنات . هذوكم كيف عملوا عملو لبلادهم و ما حاجتهمش بإعترافات و لا بوكيات نوار, لكن على خاطر هالبلاد الي كانت خضراء و حاجتها بشكون يتلهى بيها و يعاود يزرعها ويسقيها بش ترجع خضراء و خير من الي كانت. و أنستوا

 

جانا المي .. جانا الضو ... جاتنا الديمقراطية

أيا قلنا السلام.  بالله شكون كان يستنى في المفاجأة العظيمة الي هبطت علينا بردا و سلاما ؟ بن علي مازال كيف فصع من هنا و بداو الحملات التبشيرية : أبشر يا فتى, أبشري يا فتاة ...جاتنا الديمقراطية.

الحقيقة متاع ربي, ما نخبيش عليكم أنا كل يوم وقت الي نحل باب الدار نبدى مفجوع, نلقاشي تحت الباب

فاتورة من نوع جديد  تشبٌه لفاتورة الضو و الماء و مكتوب عليها فاتورة الديمقراطية.

حتى لين نهار من نهارات دخلت كيف العادة للدار وأنا مفجوع. من ألطاف الله ما سخطوني بحتى فاتورة. نحل التلفزة نلقاهم  يحكيو في  الإنتخابات متاع مجلس التأسيسي و هاو واحد من التجديد طاح طاكل في واحد من النهضة. متاع النهضة يعمل هكة و يطلعله بكوتسيزو في وجهه, ينقز عليهم من غادي واحد بيديبي بحركة نصف طائرة يسدد في وجوههم الزوز , يجي واحد من المؤتمر يردك واحد منهم براس ...

وقتها فهمت الي فاتورة الديمقراطية هاو نخلصوا فيها من غادي الغادي..بالضبط كيما الأداء على تلفزة: ما شفنا شي يفرح من التلافز و ندفعوا في دم قلبنا دنوس يحك دنوس.

الحاجة الي تنرفز الي  ولات  الديمقراطية في المعجم الثوري التونسي مرادف لكلمة إنتخابات  و ولى العائق الوحيد "للديمقراطية"  الي تتمثل في "إنتخابات شفافة" هو "الإلتفاف على الثورة".  يا خويا اش تعجبني حكاية "الإلتفاف على الثورة"  ياسر خارجة موضة هالأيامات ... قريب تطلع في الكار تسمع :  "يا حمادي .. دور للمركز. فما التفاف على الثورة".

ايه. يقول القائل في هالجو الديمقراطي المبهج متاع انتخابات و إلتفاف,  الجهات  الي عملوا الثورة وين يجيو ؟

تنقلت مؤخرا لتالة و حكيت مع الشباب الي شافوا أقرانهم يموتوا بالكرطوش و الي تضربوا و تجرحوا و تصدوا لقواة الردع ببسالة و شجاعة أبهرت العالم. و طرحت عليهم السؤال البسيط الي أي واحد منكم ينجم يسأله  : "شنوة تبدل ؟" الإجابة كانت أوضح من الوضوح "حتى شي" . بالله اش من إنتخابات و عرك على الكراسي وقت الي منطقة مناضلة كيف ما تالة ما تغير فيها حتى شي ؟ 

- تمت محاكمة الأشخاص الي ارتكبوا جرائم قتل و قتلولكم ولادكم ؟

- لا

- تم التفكير العاجل في حلول إقتصادية تنجم تنعوش البلاد  حتى لين يحن ربي و ننتخبوا حكومة شرعية ؟

- لا  .. أما لقاو حلول بش يزيدوا شهاري العباد الي قمعونا

- فما إهتمام إعلامي بيكم ؟

- لا ..  و وقت الي جاء بعضهم ما عداوش كلامنا و ركزوا على حالات إجتماعية بش يسخفوا بينا الناس و ما غير ما يخلونا نوٌصلوا رأينا  و أفكارنا. تقولش علينا بهايم ما نعرفوا كان نتباكوا.

دوحي يا مباركة بحمد.  كيفاش نحبوا نبنيوا ديمقراطية وقت الي يتم إحتقار المواطنين و وقت الي نضخموا في المركزية تقولش عليهم البقايع الي خارج تونس العاصمة ماهمش تابعين البلاد و وقت الي ما تمش اصلاح القضاء و طمأنة الأمهات الي مازال دمعهم ما جفش على صغيراتهم و وقت الي الإعلام يهز و يسبط وحده و يكرس في المركزية  ويلعب بعواطف الناس و  يستبلههم و ما يتحدثش مع عقولهم و وقت الي ما يتمش التركيز على حلول عاجلة و ميدانية لإغاثة المناطق المحرومة.

في نفس الوقت سي قائد السبسي قاعد يقترض من مجلس الثمانية في فلوس ما يهني القوات هذي أننا بش نقعدوا مديونين و مبلعين معاهم من هنا الى قيام الساعة. و وقتها الحلقة تكتمل : الأوروبيين و الأمريكان  يستعبدوا الطبقة الحاكمة  الي تلحسلهم و هالجماعة يستعبدوا بدورهم المواطنين بدرجات : كل مواطن لحاس يفوق غيره بما فضلهم الدكتاتور الجديد بعضهم على بعض و عاود من أول و جديد نفس السيستام ما تغير فيه شي و يقعد المواطن التونسي زوالي و مقموع و مستعبد و جيابه فارغة  و يولي يخمم كيفاش يسلكها بشوية تخوبيث و تعم الفوضى و نطيحوا في المطلبية و الي يخلط الأول بكتاف و الا بصحة الرقعة صحة ليه.

تقولولي سيناريوا أكحل و قاتم و مش ممكن يتعاود ؟  نقوللكم شوفوا شنوة صار في الحوض المنجمي تو تفهموا كل شي : في عام 2008 مثٌل الحوض المنجمي  إنتفاضة  و عصيان مدني منظٌم  و كانوا أهل المنطقة الكل يد وحدة لأنهم تلموا على مطلب واضح وصريح : أحنا نسكنوا في منطقة منجمية تعود للبلاد بالمليارات لكن حالتنا الإجتماعية و الصحية جراء هذه المناجم تعيسة لأقصى درجة. و لذى نطالبوا بعودة  نسبة من مداخيل الفسفاط لتنمية الجهة . و هذا رأي سديد  جعل الناس الكل يد وحدة . توة و بعد الثورة  وفي سنة 2011 نفس الناس الي خرجت اليد في اليد تقاتلت لأن المطالب تبدلت من عطيونا نسبة تعود للجهة الى العائلة هذي مستحقة خدم أكثر من العائلة الأخرى و الا العرش هذايا يلزم ياخذ أكثر  و إلا المنطقة هذية يلزم تاخذ أكثر.  تقلي شنية العلاقة ؟ نقلك الى المطلبية هي نتيجة مباشرة لإفتقار لإصلاحات الجذرية و اللازمة في ميدان التنمية و  ميدان القضاء و ميدان الإعلام و ما نتصورش كان وقت الي أم يتقتللها ولدها جرة إشاعة انه بعد 10 سنوات بطالة بش يخدموه .. أنها يهمها أنه النهضة تعمل في حملة دعائية في الجوامع أو أنه الشابي مادد وجهه في الملصقات الإشهارية. و أنستوا.

واش هي ... العروشية ؟

أيا قلنا السلام. بعد التركيز على اسامة الملولي في اخر ايام بن علي و  وقت الي الشعب هايج و مايج و دماء أولاده  في الشوارع رايج. هاهي القناة التونسية بعد أكثر من خمس شهور من سقوط نظام الدكتاتور ما تبدلش سياسة الجور :  تركز على تتويج أنس جابر ,بطلة التنس,  و تدحرج مجازر المتلوي كعنوان ثانوي.  و كأنه الي ماتوا مش عباد و مش تابعين البلاد  ... مجرد حشرات و إلا قراد.

نقعد باهت كيف نشوف التعتيم الإعلامي الكبير الي صاير بعيد على العاصمة.  وقت الي في الجهات, شي إعتصامات و شي إضرابات و شي عصيان مدني و شي مجازر و التلافز هي هي ... يا تسأل في عياض بن عشور عن قياس صباطه يا جايبتلنا قائد حزب جديد يحكيلنا على حبه للديمقراطية و الحرية و يا ناس حبوا الناس الله موصي بالحب. و كأني ببعض قياديي الأحزاب يسرقوا في أفكارهم من عند تصريحات ملكات الجمال ... يا خسارة  لا عندهم نفس القد و لا نفس السر و الكمون.

  الحاصيلو قعدت التغطية الإعلامية محصورة في العاصمة, و كان ما جاش خليفة سوبرمان و باطمان و سبايدرمان الي هو "خميس بوبطان" راهو الأخبار محصورة في الوزارات و المجالس و مراكز الشرطة.

ما نعرفش كان لاحظتوا الى في بلاصة الربيٌع ساعة الي كانت مخصصة لتحديات بن علي  وصولاته و جولاته و هو هاو آذن من هنا هاو آذن من غادي .. تي الحاصيلو مقيم فيها الاذان , الربع ساعة هذيكا طارت و تبدلت  بأفلام اكشن هاو الشرطة شدت واحد عنده زطلة و مرة شدوا جماعة تسرق في التلافز و ساعات  يقلك تم القبض على جماعة عاملين براكاج و هاك الأعوان مسيكنات حاصرينهم في نقاب و الا هي كلسيطة ما تشوف كان في عويناتهم تلعب يمين و يسار. اش يحب يقولوا بالله ؟ بارك الله في الشرطة هاي تخدم في خدمتها ؟ علاش ما يعملوش مرة ربع ساعة اساتذة متاع جغرافيا و يجيبوهملنا يتبسموا بكل فخر واحد حكى في القسم على المناخ الأمازوني و الاخر حكى على عدد سكان اليابان ؟  بش نقولوا بارك الله في اساتذة الجغرافيا .

أكثر من هكة. وقت الي تسمعهم يحكيو على المتلوي, تقولش عليك تسمع في واحد يحكي على فيلم زانديانات : نظرة فوقية تقولش عليهم الي تقاتلوا هوما جماعة يثرب ضد جماعة الحبشة  و أحنا في الحكاية لا عندنا لا ناقة و لا جمل.   و كلمة "عروشية" تهز الكل.

"عروشية" كلمة غريبة عجيبة و كافية كيف الأبونمون متاع الكار

.

- تي هاو  سمعت ماتو عشرات في المتلوي ... زعمة مشاكل سياسية ؟

- تي لا ... عروشية

- اه .. عروشية ... و الله تفجعت قلت جاش مرض و الا حاجة

كيف نسمع  الإعلام و بعض المواطنين  كيفاش يحكيو على العروشية و كأنهم يحكيو على داء عضال هوما أبرياء منه و يقلقهم حتى الخوض و  الحديث فيه لأنه يمسٌخهم و يرميهم لعصور حجرية هوما أرفع باش ينتموا إليها نقول ياخي هالعباد مش حاسين الي حياتهم الكل غاطسين في العروشية لوذنيهم ؟  

و هنا بش نعمل ربط الكلام الي قلته في الإعلام و الشرطة و الأحزاب و غيره مع العروشية. العروشية بالنسبة ليا مش مشكلة ألقاب و ولاد عيار و ولاد بويحيا و فراشيش و همامة  الخ... في الاخر كيف نبربشوا نلقاهم الكلهم ولاد عم و نساب و عيلة وحدة. لكن العروشية هي فكرة. فكرة "أنصر اخاك ظالما أو مظلوما". غالط و الا صحيح ما يهمكش شنوة عمل يهمك أنك تسانده بمجرد أنه ينتمي لنفس المجموعة أو نفس الهيكلة.

شنوة يعني الكلام هذايا ؟ يعني أن العروشية تتعدى الأسامي و الألقاب و انجموا نسميو حكاية "ولد حومة" عروشية و "ولد جمعية" عروشية  .. و أكثر من هكة . نقلك الي هاك الإعلام التعيس الي كنت نحكي عليه من بكري و الي يتخبط في الرداءة لأنه ما يحبش يتخلص من رموز الفساد الإعلامي  عروشية زادة . و هاك الصحافي الي تجبدله على ضعف الصحافة و الإعلام في تونس و الا على دور المدونين المتقدم أيام الثورة في صحافة المواطن  يتقلب و يحمار و ييولي يعيط و كشاكشه خارجة تقولش عليك سبيتله أمه ... هذاكا زادة أنا نسميه عروشية.

و هاك البوليسية الي يهدوا على المحاكم بش يخرجوا بالقوة بوليس مورط في قضايا فساد لا لشيء إلا لأنه بوليس, هذيكا زادة تتسمى عروشية.

هذاكا علاش ما يلزمناش نحسوا رواحنا بعاد على المشاكل الي صايرة في المتلوي لأنها تصب في نفس جدول التخندق و  تحديد أهمية الفرد مش بكونه مواطن تونسي عنده حقوق و عنده واجبات لكن بكونه ينتمي لمجموعة يحس الي الشرعية متاعه كإنسان متأتية منها و كان تخرٌجه من هاك التخندق يحس روحه ضايع صائع لا أهمية و لا هوية .

هذاكا علاش يلزم قبل ما ننتقدوا العروشية القبلية هات ننتقدوا العروشية في مجالات الإعلام و القضاء و الأحزاب السياسية و الشرطة و وقتها , وقت الي ولد المتلوي يحس الي الإعلام عطاه قيمته كإنسان و البوليس دافع عليه و حماه كمواطن و الحزب السياسي شركه في ايجاد حلول لمشاكله  و وقت الي  القضاء حكم بالحق في الخلافات متاعه مع الاخر, وقتها كان سمعتوا بمجازر على أسس قبلية ايجاو حاكموني أنا. و أنستوا.