التدوينة المدنية

سيداتي انساتي سادتي ... مرة أخرى أنتم مع مسابقة ملكة جمال تونس, و نذكروكم الي وصلنا الى التلاثة متسابقات الاخيرات. و قبل ما تقرروا شكون بش تكون ملكة جمال تونس. هات نسمعوا امنياتهم و نظرتهم المستقبلية   لبلادنا ... تونس (تصفيق الجمهور) . و المتسابقة رقم واحد بش تبدى و تجاوبني على سؤال كيفاش تشوف تونس المستقبل ؟

- المتسابقة الأولى : نتمنى قبل كل شي ان الناس الكل يحبوا بعضهم و نعيشوا في عالم الكله سلام  و يكون العالم هكة فرحان من غير حروب و ... (تمسح دمعه من عينها. بالطبيعة دمعة وحدة خير ما يتبلبز الماكياج) حب ... برشة  حب

(تصفيقة كبيرة للحضور)

- المتسابقة الثانية : نتمنى برشة حب. و نحب الديمقراطية و الحداثة . و يلزمنا ديما نقدموا القدام . و نردوا بالنا باش ما نقدموش التالي ... و يلزم يعم الحب و الوئام ... و يبيعوا في الشارع الكاكي بلاش ... و .. ( تعمل روحها تمسح في دمعة ما هبطتش) حب .. و سلام

(تصفيقة كبيرة للحضور)

- المتسابقة الثالثة : يلزم نتفقوا الكل على الديمقراطية و نحبوا بعضنا ... و نعنقوا بعضنا

(الجمهور يصفق على كلمة نعنقوا بعضنا)

- المتسابقة الثالثة : و نتفاهموا الكلنا على السلام و الديمقراطية ...  و علاش ما نلموش رواحنا و الكلنا نصححوا ورقة و الا نبصموا الي يلزمنا نحبوا بعضنا و نقدموا ديما القدام و نحبوا الديمقراطية و نحبوا تونس ... بلاد الثورة

- الزوجة :  يا راجل ...فيق ...فيق

- الزوج :  اه ؟ شفمة شكون ؟

- الزوجة :  تي فيق .. هاك وليت تشخر ...

يهز راسه, يلقى روحه في بيت الصالة  قاعد قدام التلفزة و بجنبه مرته تصلح في أوراق الامتحانات.  يفهم الي هو كان ناعس و يمسح الريقة الي  خرجت على فمه. يحشم من روحه على الحلمة التافهة الي حلمها ... بملكات جمال تونس ... و يقعد باهت منين جاه الإلهام باش يحلم بحلمة كيما هكة. يخمم يحكي الحلمة لمرته و الا لا ... هو متلفت و يسمع صوت  يقول : " احنا مع الحداثة و الديمقراطية و يلزمنا الكل نصححوا ميثاق يضمن القيم هذه ... و علاش ما نلومش المدونين التونسيين.. يصححوا حتى هوما و يعملوا تدوينة يحثوا فيها الناس على الديمقراطية ... و ينصحوهم بش يحبوا بعضهم ..." ... يتلفت ... بش يكتشف منين جاء الصوت هذا ... يلقاه  برنامج سياسي في التلفزة, و الي يتكلم سياسي معروف عن حزب معروف ...

- الزوج : على الأقل كان جيت  نصوت لملكة جمال  أهوكا الواحد يشلل عينيه .. أما هذوما لا مخ و لا منظر

- الزوجة : شنوة ؟ اش تخرم ؟؟؟؟

- الزوج : شي ... شي ... نمشي نتكب في فرشي خير ... و ننصحك حط روتانا ... المستوى أرقى شوية على قناة روتانا

http://www.facebook.com/?ref=home#!/video/video.php?v=180488998666731&oid=182969491721182&comments 

تسونامي الهازبين المهزوبين

أيا قلنا السلام. زلزال يا جماعة ... زلزال كبير. لا, مانيش نحكي على الزلزال الي صار في اليابان. نحكي على الثورة التونسية : تهزت الأرض من تحتنا و طيحت سيستام كامل  بايت , بائد,باير . كيف ما كل زلزال عنيف و مفاجئ, خرجوا الناس من ديارهم مش فاهمين شي و مش حاسين بعمق و كبر الرجة." اش ثمة اش صار ؟" برشة تلفتوا عاليمين و عاليسار فماشي ما يقيٌموا الأضرار .. حتى شي ما ضهر كانش فكرة وحدة :  الي ولينا أحرار.

الحرية للتوانسة ... الشعب التونسي حر. الشعب التونسي العظيم  ... ايه و من بعد ؟ خرجوا علينا نفس الوجوه في التلافز يحكيوا بإسم الثورة ... نفس الوجوه الي كانت تطبل. نفس الفاتشات الي كانت تغني في عهد الرداءة. نفس مسلسلات العار كرط و عاود. نفس الجرائد البودوروا حمم وجهك و أقعد بودورو. نفس المتمعشين بإسم "سينما تونسية". نفس السياسيين مشكي و عاود و المعتمد الي قتل الشهيد العلايمي  في أحداث الحوض المنجمي حطوه معتمد الحامة ... أوه يا الحامة أوه.

المفارقة يا جماعة, هي أنه الزلزال التونسي  بأقصى دراجات سلم البوعزيزي قلب ما قلب, و اذا بيه يوصل لمصر يحطم أصنام أبوالهول البارك, ويتعدى من ليبيا يقلب  و يدمر مدمر القذافي و عائلته و يخلط لليمن يقسم في ثلاثة علي و عبد الله و صالح و يفجر براكين غضب في الجزائر و سوريا و قطر و الأردن و السعودية و البحرين و فلسطين و الصين و بلدان اخرين و ربي يهد الظالمين ..امين ثم امين.

كيفاش زلزال عنيف كيف هكة يضرب بعيد و ما يهددش المكبشين و المتمعشين ويبقى حده القصبة و الشواشين ؟ و قت الي هد ما هد و ما شاور حتى حد ؟ الجواب تلقاووه في زلزال اليابان.

اذا  زلزلت الأرض زلزالها و أخرجت الأرض أثقالها و قال الإنسان مالها  ...احنا توة يا جماعة في فترة "مالها؟" ... مش فاهمين –كيف ما يقول سي قائد السبسي- كوعه من بوعه. و فترة "مالها" تكون مرفوقة عادة بالطامة في المعنى القراني و ب"تسونامي" جارف وقت الزلازل الكبرى يضرب بموجاته الهائلة و يجرف ما تبقى من البني القديم  و الفكر العديم و الطبال الخديم و الصحافي الذميم و السياسي الدميم و التجريم و التلجيم .. بقدرة قادر عليم.

ايه ... تقلي وينه الهازبين ؟ نقلك هانا جايين. الهاز بين كلمة بالأنجليزية تعبر على صياغة نحوية في ما معناه "كان و ولى  ولن يعود" .. و تطلق كلمة هازبين على هاك المغلوبين المنكوبين من النجوم الافلين و الي ماعاد ما يسواو لا صوردي و لا  مليم.  قداش عندنا من هاز بين يا بوقلب ... برشة برشة ... نكتب و الاسامي تتعدى قدامي ... تي أغلبية الموجودين على الساحات الفنية و الإعلامية و الي ترهوجوا من زلزال الثورة و ما تحلحزوش رغم صولاتهم و جولاتهم في ميدان الرداءة مزالوا يحلوا في كشخهم  ويوعدوا في جماهيرهم (الي  عددها يقرب ياسر لعدد المنتخبين في صناديق الإقتراع للحزب الدستوري في انتخابات نزيهة) بأعمال جديدة بعد تفرغهم التام بحكم سقوط مهمتهم متاع "استفيد".

كانوا الفانانين ... وسطرلي على كلمة "فنانين" . كانوا مهمشين في عهد هاك الشين (الي يسميو فيه زين) . شادين تركينتهم ...قاعدين ... الي يخنتب في تركينة و الي حل مدونة يعبر فيها و الي هاجر و الي ولى تاجر  و الله يهلك الي الي كان السبب .. هاك الفاجر.  

صديقي الهاز بين ... خليني نعطيك في العظم كليمتين : كان لاحظت الي الرجة  صارت , و الحشمة طارت , و العروق فارت و العقليات القديمة بارت و الطحانة حارت  ... افهم الي  الكرة دارت و قبل ما تشوف طيحة جارك شوف عارك ... و ثبت مليح مليح قدام دارك ... راهو تسونامي زارك.

تسونامي عنيف و عفيف قادم عالمدن و عالريف .. شبر شبر .. بيت بيت ... زنقة زنقة ... يجرف اليابس و يخلي الأخضر ... و الأخضر أولى بتونس من الي  يشوف فيها جرد مومس و الي عليها يتنومس.

تسونامي هاو عادو جاي ... بش ينهي عهد الوشاي و عهد الي لاعبها باي ... و ازاي ازاي ازاي ... اوصفلك يا حبيبي ازاي ... بعد خروجكم بلادي تبقى الزاي يا حبيبي ... أيا البسوا ماسك .. الموجة جاية . و انستوا .

الحركة التدوينية : قطع يد عمار

بعد الاحداث الدامية الي تعرضتلها بلادنا في سيدي بوزيد و بعد الاحتجاجات الشعبية الي طالب بيها مواطنوا بلادنا في كل أرجاء وطننا العزيز مطالبين بانهاء المحسوبية و الفساد و بنظام عادل و بحرية التعبير و التظاهر الخ الخ ... يعمل هكا عمار و يحشلنا التن بلوغس ... علاش و كيفاش  ؟

أنا نضن الي عمار عنده روح مازوشية ... و عنده مدة  ما كلاش على راسه ... توحش نمزبلوه و نمرمدوه ... مادام هو مش الستار ... و الي احنا كيف كل مواطني بلادنا لاهيين بالمطالبات الشعبية العامة.

وكيف كل ولية مصابة بالهستيريا خونا عمار غار من اهتمامنا البالغ بهذه الأحداث و نسياننا ليه و بدى يبربش فينا بحجب عمره ما تجرأ و عمله سابقا الا وهو حجب مجمع المدونات الأكبر في تونس تن بلوغس.

في حقيقة الأمر الي يجول في بال عمار و الناس الي وراء عمار هو أن فم المدونين التونسيين أبخر و الي هات نحشوهم قبل ما ياكلونا ماكلة .. أما الي يبهت في تفكير كيف ما هكة , هو أن هالعباد بالرسمي مصطكين ...لأنهم ما يفهموش الدروس و الكفوف الي قاعدين ياكلوا فيها ... بالله يا عمار شنوة فاد انك عتمت اعلاميا على حكاية سيدي بوزيد ؟ تي ماهو العباد زادت هاجت ؟؟؟ و شنعت و رصاتلكم تغيروا في موقفكم من "حادثة معزولة في بلد الفرح الدائم " ل "فما بالحق مشاكل اجتماعية" ... مش شلبوق باهي هذا ؟ يلزم بعده داودي اخر ؟؟؟

ثم فما تفكير اخر موازي للبهامة متاع عمار ... عمار يقلك ... هات نحجبلهم التن بلوغس ... في اطار "فرق تسد" و تو يتلموا القننوات متاع التدوين و يشدوا في "سيب صالح يا عمار" و ينساو اذاعة و متابعة الأحداث الي تجري توة في البلاد.

يا عمار قداشك مسطك تسطيكة بقري ... الي ماكش فاهمه هو الي الأحداث الي صايرة توة من انتفاضات شعبية هي في علاقة بسيادتك زادة ... من كثر ما كممتنا و غددتنا العباد فدت مالسكات ..فدت من أنها تسكر جلغتها و تعدي ... فدت من أمثالك من جلادين و من عباد ترص فينا رصان. المطالب هي نفسها  : ماناش بهايم عندكم و  يزي ما استبلهتونا و استهبلتونا ...فاهمين كل شي و حافظين رواندكم الكل. و جاك نهار يا عمار ... و اكيد اليوم قبل غدوة بش تنهار ... قص الي تحب بابا ..لأن أيامك معدودة ... و جاء اليوم الي بش نقصولك يدك ... و ليك و لكل جماعة الخيارات .. خيارة من النوع الممتاز ...

يحكيو و الا جعلهم ما حكاو

يا سادة يا مادة يدلنا و يدلكم للخير و الشهادة

يحكيوا على راجل ...

 بون هو... في حقيقة الأمر ... مش راجل برشة ...يعني تنجم تقول أنه.... تي الحاصيلو ...

 يحكيو على مش راجل ... ضربته الحيوط على خاطره  بطال ...

هوا كيف تجي تشوف ... تلقاه ساعات يدبر راسه من  هنا و من غادي ... يعني مش بطال برشة ...

يحكيو على مش راجل ... مش بطال ... يعني مش خايب ... متوسط يعني ..لاهو لاهو ... معرس ...

 بون .. مش معرس برشة برشة ... أما تنجم تقول أنه عاطي كلمة في عرس ...

هو كيف تجي اتبع مليح ... تلقاه عاطي كلمة مش كان في عرس ... عاطي كلمة زادة في موتور ... 103 زرقة و عاطي كلمة لرئيس الشعبة الي يحب ديما ياخو الكلمة ... و عاطي كلمة في دهينة متاع دار ... مش قلتلكم يدبر في راسه ؟ ... و هو انسان مش بطال؟  ... أما المهم في حكايتنا أنه عاطي كلمة في عرس ...لوحدة .. حاشاكم و حاشى قدركم ... عزباء ... أهوكا كل مرة يمشي يطل عليها و يتركنوا تحت حجرة الي مكتوب عليها "الله لا تبارك الي يبول هوني" و يعطي كلمة و ياخو كلمة ... ياخي ... في اطار التبادل الثقافي ... عطى كلمة في العرس .... بالطبيعة عمره ما عرس بيها ... بش تقولولي علاش ... نجاوبكم : مش قلنا الي هو مش راجل ؟

يحكيوا على مش راجل مش بطال مش معرس و مش ناوي بش يعرس ... نهار من نهارات ... الوالد متاعه ... يعني بوه ...

بون هو كان نحبوا نكونوا واضحين في حكايتنا هذي هو مش بوه ... أما هو في باله بيه بوه ... باه ... تقولي كيفاش تجي ؟ نقلك و نبينلك الي بوه ... عندو بابا ... نقصد الي بابا .. عندو بوه ... يعني الوالد متاعه عنده بوه كان زادة مش راجل ... كيما ولد ولده, و جاب من وحدة ... حاشى المحل ... عزباء وحده أخرى ... وليٌد ... هالوليد ماهو الا صحيبنا ... الى  بعد ما جابوه و انجبوه و اندبهم بوه ... ما لقاو اش يعملوا بيه ... بش يفضوها ... اش نعملوا ؟ يا ربي اش نعملوا ... قرروا و انتدبوه : جابوه و جاء بوه  ... الي في حقيقة الأمر خوه من بوه و استبنوه ... يعني هذا الي قلت عليه بوه ..هو خوه من بوه ... الحصيلوا صحيبنا زيادة على أنه مش راجل و مش بطال و مش معرس ... مشبوه ...

يحكيوا على مش راجل  مش بطال مش معرس و مش ناوي يعرس و مشبوه ...  و كيف طلع مشبوه شدوه ... و هو ينجم يكون مشبوه في بلد الأمن و الامان ما غير ما يشدوه ؟ بون تقلي هاو مش راجل ... و الحبس نرمالمون للرجال و رغم هذا شدوه  ...  وقتها يلزم نحكيلكم على خال بوه ... بوه الي يعتبر خوه ... خال بوه هو عرصة في فرقة حميدة ... ما تعرفوش فرقة حميدة ؟ يا ناري عليكم

مش كانو يحكيو على فرقة اسمها فرقة الأخلاق الحميدة ... قالك تعاركوا في باعضهم نهار جماعة قالوا يلزم نثمنوا الانجازات و جماعة قالوا ما نستعرفوا بحتى رقم بخلاف السبعة ... جماعة اتحي و جماعة تزكي ... ايا تعاركوا ... أي أكهو انشقوا ... جماعة قعدوا في البندير ... و عملوا سلامية  ... سماوها سلامية الأخلاق ... و جماعة عملوا فرقة اخرى دوروها دربوكة و جابوا رقاصة اسمها حميدة ... وسماوها فرقة حميدة ... خال بو المش راجل المشبوه ... كان ضابط ... ايقاع  و ضابط حالة مدنية و ضابط ضبابط ... الحاصيلوا كان عرصة ... و وصاهم على ولد خوه ... قاللهم سايسوه ... اما وقت الي كلمهم في التاليفون و قاللهم سايسوه ... الجماعة ... فهموا سيسوه ... و فرحوا بيه ... وسيسوه  سيسوه  حتى لين نسوه في... انه مش راجل و انه مش بطال  و انه مش معرس و مش باش يعرس و أنه مشبوه ... و ما سيبوه كان ما تعاهد أنه معاهم مش مع الأخرين

وقت الي خرج ... الأخرين ...  بالأحضان أستقبلوه ... وزيد حسسوه أنه راجل ... و تنحات حكاية أنه مشبوه ... ايه أكهو لقاولوا خدمة ... و عرسولوا بوحدة ... هجالة ... قتلت راجلها ...بحسناتها ... و قعدت تقتل فيه عرق عرق ... بحساناتها ... حتى لين مات و دفنوه ...  و من وقتها

ما يحكيوش على مش راجل  مش بطال مش معرس و مش ناوي يعرس و مشبوه

نسرين الجوى

مال الربيع لا يبقي ولا يذر

                                                     غضبان احل من حولي الضجر                                                                                                                                     

و ما من ربيع غير مبسم الهوى

                                                  غابت... فلم نرى لشهر الهوى قمر                                         

ويلي أصائما يا نسرين الجوى

                                          أبقى ... ولم يبقى لأعيادي فطر                                          

جاءت نشرات الأنباء تسائلني :

                                                    مال الأقمار لا  تبث ولو خبر ؟                                 

سوى نواح نائحات العمى

                                       و الدم و الدخان والجمر  

                            

! قلت وقد هوى الدمع : ويحكم

                                                     ليس كل ما يغشي السماء قمر                         

عجبي كيف ترجون أخبار الهوى

                                                و قد خسف قمر الوصل و السمر                           

فما لمقلة العشٌاق من ضياء

                                      و ما للأحبة من شفة ولا صدر   

              

من دونك يا نسرين قد مات الهناء

                                          ولم يبقى لي في شمع الهوى عمر                                   

                     

رمضان 2005

يا مطر يا خالتي

يا مطر يا خالتي , صبي على قرطالتي, قرطالتي مبلولة بزيت الزيتونة.

يا حسرة يا زمان. في زمان آخر, وقت الي كنٌا صغار, كنا وقت الي تصب المطر نفرحوا : بلادنا بلاد فلاحة. و بلي يهزوا يصبطوا في السياحة, بلادنا بلاد فلاحة.

بابا من الي عرفته معلم. ال آس الناقصة و ال أو الزايدة دومانه. يعارك و كشاكشه خارجة على خاطرهم ... عمري ,دايور, ما فهمت علاش ... شنية آس ناقصة و الا أو زايدة ؟

أما وقت الي تصب وجهه يتهلل, يفرح و يضحك. المطر ما كانتش تزورنا برشة و دونك ضحكة بابا زادة. و كيف يضحك بابا و تصب المطر ... نفرح و نخرج مع الصغار... قدام الدار... و ندور ندور... حتى لين ندوخ ... و نهز راسي للمطر و نغني

يا مطر يا خالتي , صبي على قرطالتي, قرطالتي مبلولة بزيت الزيتونة.

هاي تصب. و هي حبت تكف ؟ ديما تصب... 24 على 24.... تصب .... نهار و ليل ... قالك بلاد الأنوار ... و الشمس ... ما تشوفهاش . من الي الواحد كان نهار كامل متخبي من الشمس. و لاٌ و توحش يراها.

نغمض عينيا ... نتخيٌل الشمس ... كرمة دارنا ... ضحكة جارنا ... ريحة بخور دار جدتي ... و كاس تاي منعنع ... كلمة صباح الخير من أمي ...ما أحلاها كلمة صباح الخير على الصباح من أمي... صباح ... خير ... أمي ... و ضحكة بابا ... الي نشوفوها من مطرة الى مطرة.

يا مطر يا خالتي , صبي على قرطالتي, قرطالتي مبلولة بزيت الزيتونة.

كفت المطر... و وقتها برك فهمت ... ما كنتش فاهم مليح ... وفات المطر ... و وفات خالتي ... توفات خالتي.

تذكرت التليفون في يدي و أنا في شوارع باريس ... رجعته الى وذني ... و ما عينيش.

نفس الكلام إلي ديما نسمعه و نحاول نحفظه و عمري ما تخيٌلت يتقالي : البركة في الحي ... و هذيكا حال الدنيا ... الله يرحمها ... ما يدوم شيء ....

هزيت عينيا الى سماء باريس ... مشات المطر ... مشات خالتي ... و هبطوا دموعي حيار ...شرشار ... إعصار ... نو ... مطر

يا مطر يا خالتي , صبي على قرطالتي

يا مطر يا خالتي , صبي على قرطالتي

تناوش رمضان

نقطة نظام

قداش عنده ما مشاش على ساقيه بين الناس في المرشي. ريحة رمضان تفحفح. الكرهبة متاعه تشق طريقها  الى مكان الاجتماع.   رغم توغلهم في وسط البلاد عمك محمد ,الشوفور, يجري أكثر من اللازم. كان ديما  يتمنى أنه يسأله : علاش ديما يجري أكثر من اللازم  ؟ ... اما ما يحبش يطيح معاه حرف الياجورة . هل السرعة هذي نتاج عن خوف منه أنه , السيد المعتمد, يخلط موخر الى مواعيده ؟  أو أنه يستعمل في النفوذ الي عطاتهمله وضيفته ؟

- عم محمد ... نقص ... وحدة وحدة

- حاضر سيد المعتمد

الكرهبة تولي تمشي بالشوية بالشوية. صحيح الي الكوادر الكل تستنى فيه و الي هو متأخر برشة, لكن مش مشكل : الوصول المتأخر يعطي وهرة و كار لقدومه. يتفرج من الشباك. محلاه جو روضان. عباد ناصبة في الشارع. كمشة رجال يتدازوا قدام بائع ملسوقة. موطورات و كراهب تزمر. نساء يدوروا بقفف. صغار ضايعين فيها بين خلق ربي الدازين من كل شيرة. كوشة. عباد شادة الصف. الدنيا منظمة. يبهت.

- عم محمد, اقف .. اقف

- حاضر سيدي المعتمد

الكرهبة تراكي على اليمين. يخرج السيد المعتمد. يتجه للكوشة. ياقف. صف طويل و ناس شادة الصف بنظام.  الصف منظم بباريارات كيما الي نشوفوهم في أكبر المطارات.  يثبت السيد المعتمد يلقى الي الصف رغم الي طويل باقي منظم حتى كيف توفي الباريارات.

- عيطولي مولى الكوشة ... عيطولي مولى الكوشة

- عيطوا للسيد المعتمد مولى الكوشة

الي عاود الكلام وزاد كلمة "السيد المعتمد" هو عمك محمد ... و كان ديما يرافق عرفه و يعاود عمدا كلمة "السيد المعتمد". على خاطر أكثرية  العباد ما  يعرفوش منضره و يخاف لا واحد يغلط في حقه و ترصيله في موقف لا يحسد عليه. و اش يسلكها.

- عسلامة سيد المعتمد. مرحبا بيكم في كوشتنا المتواضعة

- أهلا ... انت مولى المحل ؟

- أيه نعم سيدي

- شنوة هذا الي عامله ؟

- شوية نظام سيدي المعتمد

- نظام ؟ هذا نظام ؟؟؟ عاملي صف قدام كوشة ؟؟؟ شوف يا سيد  الصف وين يضرب ... مصففهملي واحد ورى واحد ؟ اش تحب يقولوا علينا يا سيد ؟  الي أحنا في مجاعة ... شادين الصف على خبزة ؟ تحب تضحٌك علينا الاجانب ؟؟؟ يا سيد احنا في بلاد خير ... ما نشدوش الصف على جرد خبزة... ايا تراه ... نحي عليا هالخرم ... هذاكا الي مزال

بطاقات تعريف

هز عينيه يلقى الباقة قدامه.

- ... ايا اطلع يا بابا ... أطلع

- لكن ...

- ما تسمعش ؟ قلنالك أطلع

- ما عملت شي أنا ...

- ما عملت شي ؟ شوف هاك اللحية قريب تعثر فيها ... شي ... ما تترباوش

- خويا راني ...

- سكر فمك ... اطلع خير ما نجردقك توة

طلع يلقى برشة جماعة بو لحي في وسط الباقة مدنكسين ريسانهم. وصلت الباقة للمركز. هبطوهم. فرحوا بيهم. خذاو منهم بطاقات تعريف. بعد سويعات, بداو يثبتوا في البطاقات بالوحدة بالوحدة

- اسحاق .. وينه اسحاق ؟

ياقف و يمشيلهم.

- تي هاك يهودي

- ايه نعم

- اش تعمل هوني معا هذوكم ؟

- زملائك طلعوني ...

- و شبيك ما تكلمتش ؟

- ما خلاوليش الفرصة ...

- برى يا ولدي ...تفضل روح ... باهيشي ؟ تحبنا نباصيوا هالليلة ؟

يتلفت اسحاق لباب الخروج. يلقي نظرة تجاه الجماعة الي مشدودين  و الي مازالوا مدنكسين ريوسهم ... يقوللهم تصبح على خير ... ويروٌح

رمضان و البرني

القهوة قريب ترحل بخلق ربي. الشيشة تقرقر.

- ايه ؟ شنوة عامل فيك رمضان ؟

- و الله يا خويا هكاكة ...

- شنوة؟ غلبك الصيام؟

- لا الصيام لاباس ... الواحد ستانس بالسخانة و العطش و النهار الطويل

- ايه تي هاك سلكتها ... شنوة الي غالبك امالا ؟

- يا ولدي نعدي نهاري عسل ... خشوع و صلاة و عبادة ...  و تتبلبز في الليل ...

- اش فما في الليل ...

- ماك تعرف ... حاشى الشهر ... ساعات نتفرج على أفلام برني ... عند هاك الشانات الي يتحلوا بالكود

- برني في رمضان ؟

- لا لا ... ياولدي هاني رايض في رمضان ... كان خلاوني رايض

- شكون يخليك رايض ؟

- يا ولدي وين نحل التلفزة التونسية و نتفرج في مسلسل و الا سلسلة تونسية ... يسخايلي الي هي فيلم اكس ... و نبدي نزيد من مخي

-  اش مدخل المسلسلات التونسية في الاكس ؟

-  و اش خلاو ؟ بالله  شد عندك ... النساء شطرهم ميكانيسيانات في المسلسلات التونسية ... ريتها هذي في بلاصة أخرى بخلاف البرني ؟ باهي ... الديالوق ... ثبت في الحوارات يا سيدي... تلقاهم  كيما البرني بالضبط  :  يقابلها سكريتيرة في بيروا ... كليمتين خفاف نظاف ... جونر : "صباح الخير" ... "السيد المدير موجود ؟" "لا خرج"  ... و ديراكت اللقطة الي مبعد تلقاهم مصاحبين بعضهم ... و زيد .. ولاو في المسلسلات... الناس الكل ترقد مع الناس الكل ... و السهريات ... شفتهمشي مرة بالله في مسلسل تونسي يسهروا على طرح رامي في قهوة ؟ و الا يسهروا قدام تلافزهم في بيجاما ؟ و الا حتى يسهروا في مسرح و الا سينما ؟  ما تشوفهم سهرياتهم كان  في بواط ...  بالله مش هذوما الافاحات متاع البرني ؟

- و الله مش غالط ... ما أنتبهتش أنا ...

- تي برى برك ... ضاهر فيه عمار ساترنا .. و قاصص علينا اللقطات الخليعة أكثر ماللازم ... اما الباقي الكل ... كيف كيف