التدوينة المدنية

سيداتي انساتي سادتي ... مرة أخرى أنتم مع مسابقة ملكة جمال تونس, و نذكروكم الي وصلنا الى التلاثة متسابقات الاخيرات. و قبل ما تقرروا شكون بش تكون ملكة جمال تونس. هات نسمعوا امنياتهم و نظرتهم المستقبلية   لبلادنا ... تونس (تصفيق الجمهور) . و المتسابقة رقم واحد بش تبدى و تجاوبني على سؤال كيفاش تشوف تونس المستقبل ؟

- المتسابقة الأولى : نتمنى قبل كل شي ان الناس الكل يحبوا بعضهم و نعيشوا في عالم الكله سلام  و يكون العالم هكة فرحان من غير حروب و ... (تمسح دمعه من عينها. بالطبيعة دمعة وحدة خير ما يتبلبز الماكياج) حب ... برشة  حب

(تصفيقة كبيرة للحضور)

- المتسابقة الثانية : نتمنى برشة حب. و نحب الديمقراطية و الحداثة . و يلزمنا ديما نقدموا القدام . و نردوا بالنا باش ما نقدموش التالي ... و يلزم يعم الحب و الوئام ... و يبيعوا في الشارع الكاكي بلاش ... و .. ( تعمل روحها تمسح في دمعة ما هبطتش) حب .. و سلام

(تصفيقة كبيرة للحضور)

- المتسابقة الثالثة : يلزم نتفقوا الكل على الديمقراطية و نحبوا بعضنا ... و نعنقوا بعضنا

(الجمهور يصفق على كلمة نعنقوا بعضنا)

- المتسابقة الثالثة : و نتفاهموا الكلنا على السلام و الديمقراطية ...  و علاش ما نلموش رواحنا و الكلنا نصححوا ورقة و الا نبصموا الي يلزمنا نحبوا بعضنا و نقدموا ديما القدام و نحبوا الديمقراطية و نحبوا تونس ... بلاد الثورة

- الزوجة :  يا راجل ...فيق ...فيق

- الزوج :  اه ؟ شفمة شكون ؟

- الزوجة :  تي فيق .. هاك وليت تشخر ...

يهز راسه, يلقى روحه في بيت الصالة  قاعد قدام التلفزة و بجنبه مرته تصلح في أوراق الامتحانات.  يفهم الي هو كان ناعس و يمسح الريقة الي  خرجت على فمه. يحشم من روحه على الحلمة التافهة الي حلمها ... بملكات جمال تونس ... و يقعد باهت منين جاه الإلهام باش يحلم بحلمة كيما هكة. يخمم يحكي الحلمة لمرته و الا لا ... هو متلفت و يسمع صوت  يقول : " احنا مع الحداثة و الديمقراطية و يلزمنا الكل نصححوا ميثاق يضمن القيم هذه ... و علاش ما نلومش المدونين التونسيين.. يصححوا حتى هوما و يعملوا تدوينة يحثوا فيها الناس على الديمقراطية ... و ينصحوهم بش يحبوا بعضهم ..." ... يتلفت ... بش يكتشف منين جاء الصوت هذا ... يلقاه  برنامج سياسي في التلفزة, و الي يتكلم سياسي معروف عن حزب معروف ...

- الزوج : على الأقل كان جيت  نصوت لملكة جمال  أهوكا الواحد يشلل عينيه .. أما هذوما لا مخ و لا منظر

- الزوجة : شنوة ؟ اش تخرم ؟؟؟؟

- الزوج : شي ... شي ... نمشي نتكب في فرشي خير ... و ننصحك حط روتانا ... المستوى أرقى شوية على قناة روتانا

http://www.facebook.com/?ref=home#!/video/video.php?v=180488998666731&oid=182969491721182&comments 

drou.US دروس

(زوز قاعدين في قهوة)

ه- أيا مازلت ناشط في نادي اليوقا متاعك ؟

ه- أوووه ...يا خويا هايلة اليوقا ... ! الواحد ينحي الستراس الكل ... و انت ؟ مازلت تتعلم في القولف ؟

- اه ... أنا ؟ وليت مهف في القولف ... ! أما توة نقصت شوية ...فما حكاية اخرى شاغلتني ..
.
- شنوة دخلت تتعلم في التايك واندو ..مع الأولاد ؟

- لا .. انا تايكواندو متاعك ؟ توة نتعلم في الديمقراطية !

- بالله ؟ صار يعطيو دروس في الديمقراطية ؟

- شنوة دروس ؟؟؟ فورماسيون كاملة ... ما نخبيش عليك ... وليت جن متاع ديمقراطية ... في تونس, بريسك, ما عاد يلعٌبني حد ... دايور, ماشي ستاج تكوين في المغرب ... فما بطولة مغاربية متاع ديمقراطية !

- ايا هايل ياسر ... و لاقي روحك على الصعيد المغاربي ... ؟

- والله شنوة تحب نقلك ... ديما نجي الثاني و الا الثالث ...في الديمقراطية . فما واحد دزيري ...يا خويا... مغلٌب عليا ! هم أزرق متاع ديمقراطية ... مهماشة متاع ديمقراطية ... هبلني ... ديما هو الأول, ديما الأول ...حتى لين نهار من النهارات وأحنا صاهرين في أوتيل خمس نجوم, و سارفور ماشي و سارفور جاي... خطفتوا على غرٌادة و قتلو : "...سامحني خويا ...من غير محقرانية...بالله انت دزيري و الا ...فرانساوي ؟ " ...قالي ..بهاك النخوة ...متاعنا ... متاع العروبة : "أنا دزيري أب عن جد" ...قلتلو و أنا مستغرب : "بالرجولية بع معاك ! ... الله مصلي عالنبي عليك ! الي يشوفك كيفاش تلعب بالديمقراطية لعب ... يقول ما تطلع كان فرانساوي و إلا أمريكاني ضربة وحدة ! ...ثابت الي ما عندك حتى عرق منهم ؟" ...خذاني على جنب , تلفٌت على اليمين و على اليسار ... و وشوشلي في وذني و قالي : "الحكاية و ما فيها الي مرت خالي أنجليزية ...يعني تربيت من الي صغير و انا نثبت في الديمقراطية و نقحرلها ... حتى لين شربتها شربان"

- أيوا ...تي ماهو عاد يقول من الأول ...السيد راضعها في الحليب ها الديمقراطية .

(واحد سيفيل ياقف قدامهم)

- السلام عليكم ...بطاقات تعريف ..يا الاولاد

- تفضٌل ...

- امالا حسب ما فهمت تاخذوا في سوايع زايدة متاع ديمقراطية ؟

- و الله خاطي خوك ... هو يتعلم في الديمقراطية ... و نزيدك زيادة ... ماشي للمغرب في ستاج و يجي الثاني بعد الدزيري الي ...

- سمعت سمعت ... عيب و الله عيب ... قد ما نعملوا معاكم وشي ! ... قد ما نعملوا في مجهودات جبارة لكسب رهانات التحدي و السعي قدما نحو ...نحو ... (ما يلقاهاش) تي هو حتى البنان جبناهولكم ! الكيلو على ألفين و نصف ! شنوة تحبوا وحد اخر ؟؟؟ و انتوما في عوض تحمدوا ربي ...شي ! شبيها يا بابا " دينم ...قراطية" متاع جد بوك الكلب ؟ مش عاجبينك أحنا ؟ نقريو فيكم في الدينم..قراطية من الابتداعي ... !

- ابتدائي ...

- تي .. الي هي ...من المكتب ... و أحنا نقريو و انوريو في الديمقراطية ...و الاخلاق الحميدة و حقوق الانسان و التعددية و مكارم الأخلاق وكيفاش نقصوا الكياس ...باش سيادتك تجبد بينا الكل و تاخذ دروس متاع ديمقراطية بالدوفيز ؟

- لا و الله لا ...خاطيني ... مش أنا ندفعلهم بالدوفيز ...هوما يدفعولي !

- بالله ؟؟؟ سامحني ...قلتلي وقتاش المأتمر متاع المغرب ؟ فما بلاصة ؟؟؟