التدوينة المدنية

سيداتي انساتي سادتي ... مرة أخرى أنتم مع مسابقة ملكة جمال تونس, و نذكروكم الي وصلنا الى التلاثة متسابقات الاخيرات. و قبل ما تقرروا شكون بش تكون ملكة جمال تونس. هات نسمعوا امنياتهم و نظرتهم المستقبلية   لبلادنا ... تونس (تصفيق الجمهور) . و المتسابقة رقم واحد بش تبدى و تجاوبني على سؤال كيفاش تشوف تونس المستقبل ؟

- المتسابقة الأولى : نتمنى قبل كل شي ان الناس الكل يحبوا بعضهم و نعيشوا في عالم الكله سلام  و يكون العالم هكة فرحان من غير حروب و ... (تمسح دمعه من عينها. بالطبيعة دمعة وحدة خير ما يتبلبز الماكياج) حب ... برشة  حب

(تصفيقة كبيرة للحضور)

- المتسابقة الثانية : نتمنى برشة حب. و نحب الديمقراطية و الحداثة . و يلزمنا ديما نقدموا القدام . و نردوا بالنا باش ما نقدموش التالي ... و يلزم يعم الحب و الوئام ... و يبيعوا في الشارع الكاكي بلاش ... و .. ( تعمل روحها تمسح في دمعة ما هبطتش) حب .. و سلام

(تصفيقة كبيرة للحضور)

- المتسابقة الثالثة : يلزم نتفقوا الكل على الديمقراطية و نحبوا بعضنا ... و نعنقوا بعضنا

(الجمهور يصفق على كلمة نعنقوا بعضنا)

- المتسابقة الثالثة : و نتفاهموا الكلنا على السلام و الديمقراطية ...  و علاش ما نلموش رواحنا و الكلنا نصححوا ورقة و الا نبصموا الي يلزمنا نحبوا بعضنا و نقدموا ديما القدام و نحبوا الديمقراطية و نحبوا تونس ... بلاد الثورة

- الزوجة :  يا راجل ...فيق ...فيق

- الزوج :  اه ؟ شفمة شكون ؟

- الزوجة :  تي فيق .. هاك وليت تشخر ...

يهز راسه, يلقى روحه في بيت الصالة  قاعد قدام التلفزة و بجنبه مرته تصلح في أوراق الامتحانات.  يفهم الي هو كان ناعس و يمسح الريقة الي  خرجت على فمه. يحشم من روحه على الحلمة التافهة الي حلمها ... بملكات جمال تونس ... و يقعد باهت منين جاه الإلهام باش يحلم بحلمة كيما هكة. يخمم يحكي الحلمة لمرته و الا لا ... هو متلفت و يسمع صوت  يقول : " احنا مع الحداثة و الديمقراطية و يلزمنا الكل نصححوا ميثاق يضمن القيم هذه ... و علاش ما نلومش المدونين التونسيين.. يصححوا حتى هوما و يعملوا تدوينة يحثوا فيها الناس على الديمقراطية ... و ينصحوهم بش يحبوا بعضهم ..." ... يتلفت ... بش يكتشف منين جاء الصوت هذا ... يلقاه  برنامج سياسي في التلفزة, و الي يتكلم سياسي معروف عن حزب معروف ...

- الزوج : على الأقل كان جيت  نصوت لملكة جمال  أهوكا الواحد يشلل عينيه .. أما هذوما لا مخ و لا منظر

- الزوجة : شنوة ؟ اش تخرم ؟؟؟؟

- الزوج : شي ... شي ... نمشي نتكب في فرشي خير ... و ننصحك حط روتانا ... المستوى أرقى شوية على قناة روتانا

http://www.facebook.com/?ref=home#!/video/video.php?v=180488998666731&oid=182969491721182&comments 

خبر عاجل : محافظ نورمالاند في حالة صحية خطيرة

علمنا عن مصدر غير رسمي, أن محافظ البلاد النورمالاندية في حالة صحية خطيرة. و قد حدثنا المصدر الذي فضٌل الاحتفاظ بهويته , حدثنا أن المحافظ تعرض الى حالة تسمم في غاية الخطورة و أن قد حل ركب كبار الأطباء العالميين لأنقاذه.

و رغم أن المصادر لم توضح أكثر من هذا, فالاسباب و المسببات يمكن أن تكون عديدة و متعددة. فمن الممكن أن تكون محاولة اغتيال من طرف أحد المعارضين لسياسته الحكيمة. فكلنا نتذكر الانقلاب العسكري الذي كاد أن يطيح بالمحافظ من طرف الشنفرة. و كلنا مدركون زحف مملكة النمل بقيادة البرباش على الدولة النورمالاندية شمالا و تهديدات المهاجريين الغير شرعيين بالزحف و قلب الحكم بقيادة كلاندستينو جنوبا.
و لا تخفانا الخلافات الحادة التي كان عليها المحافظ مع العديد من الشخصيات كعاشور الناجي حبيب, و كل فيلقه المسمى 'انتحاريين الناجي و الديناري باجي".
و لا يمكن أن نتغاضى عن موقف المحافظ 'المحايد" بين حزب "الديك" و حزب "صلي لا نجيك" ... مما عمٌق العداوات تجاه الطرفين.
قيل كذلك أن علاقاته العاطفية يمكن أن تفسر تسميمه و قيل كذلك أن خيانته لأنا كريستينا في المسلسل النورمالاندي الذي يلعب فيه المحافظ دور البطولة يمكن أن يفسر الامر. كما ذهب بعضهم الى أن تسممه في علاقة مباشرة مع تضييعه فرصة الهدف لصالح المنتخب النورمالاندي .. و هو راس راس .. يا بوقلب .. و الكاج فارغ .. نجي نحطها أنا ؟ اه ؟ تي شبي والديه .. حححمم
..قلنا أذا ... أن السيد المحافظ قد تعرض لحالة تسمم .. و ... يصلنا الان خبر اخر ... نعم ... قد طلبت وزارة الشؤون الدينية من كل مساجد و كنائس البلاد النورمالاندية بالدعاء للمحافظ بشفاء عاجل ... مما يجعل من خبر مرضه خبرا شبه رسمي.

كما و صلنا على الفور خبر مفاده أن وزارة الداخلية النورمالاندية أعلنت عن جائزة مالية قيٌمة لكل من يمكن أن يفيدها بمعلومات أو احتمالات عن سبب تسمم محافظ البلاد, حفظه الله. و الجائزة قدرها ... يقولون لي على الفور أن سيادة الوزير كسٌر الشقاقة الي فوق بيروه و ما زال ما كملش حسب الجائزة الي يحب يرصدها.

تابعونا في نشرات لاحقة