اجابة الى مسلم سابق و رجعي للأبد

يا سادة و يا مادة يدلنا و يدلكم للخير و الشهادة



هاني هالأيمات دخلت في معمعة الاجابات التفاعلية ... فبعد النقاش على التجمع هاو سي مسلم متاع العهد الحجري يجبد في الشبوك من خلال هالتدوينة و هذه اجابتي









أيا سيدي صباح الخير

هات نشوفوا شكون فينا الخوانجي بالمعنى السلبي للكلمة

يعني أنت سيادتك لمجرد أن وقع خطئ في اسم صاحب التعليق قلت ما يكون كان القوفرنور منتحل شخصية و هذا يدل على نفسية مرضية ...عامل روحك تدافع على "حرية المرأة" و أنت تؤمن للنخاع بعدم استقلالية أفكارها و تؤمن بالوصاية

أيا شد عندك ... القوفرنور عندوا أصدقاء و صديقات و يمد يدوا و يسلم عليهم ويبوسهم و يحترم اراءهم و رغم كل الأختلافات الفكرية يتعايش معاهم و يخرج و يفدلك مع أصدقاءه و صديقاته

أما أنت يا سي الخوانجي السابق و الاحق ... مازلت تبهبر في الفارغ على خاطر كلامك المعوج و ان يتناسق مع شخصية معوجة لكن مازلت ماوصلتش باش اتطبق واحد في المئة منه


باهي ... توة برى امشي شوف مدونة صديقتي
esprit primal
تو تفهم الي ماهيش البارح بدات التدوين

زيد عندك ... راك ماكش توم كروز متاع التدوين باش العالم المدوناتي ما عندوا ما يخمم كان كيفاش باش يجاوبك على هزانك و نفضانك و أنا كانك عليا مضمضت بالدونتيفريس و في بالي الي الكلام معاك في مواضيع الحجاب و الاسلام عامتا لا يجدي

تبقى نحب بالله نسألك سؤال ... يا خي ... سي عاشور ناجي ... تحاورت معاك أنا سابقا في موضوع الدين و الحجاب باش تتهمني بكل هذه التهم "التخونيجية" على حد قولك ؟؟؟؟

أنا ما حكيت كان مع مدون اخر ... اسمه ... كان صدقني ربي, عماد حبيب ... الله يرحموا ويبشبش الطوبة الي تحت رأسه ... كان ناس طيبة ... كلا برشة على راسوا لين قرس ... أما ناس طيبة

و أنت منين ليك ؟ مش أنت جيت أيامات بعد موت مدونة صديقي عماد حبيب ؟؟؟ كيفاش اطلعت عالموضوع
A moins que ....
عماد عشور حبيب الناجي يطلعوا les quatres en un
الأربعة بدينار يا مادام

خويا لحبيب ... برى أمشي دور بغافل ... و كان صديقتي قالتلي قبل الي باش تتحاور مع مريض كيفك ... ما يشوفش حدبتوا و حلال عليا حرام عليكم راني قلتلها لوح عليك راهو كمونوا سوٌس و ما عندوا حتى مصدقية

أيا برى شوف شكون تستفز من الجوارات الصغار لا توة نعمل هكة و نعيط لعمي قصة أونلاين يعطيك زوز شلابقك الصباحية باش تفيق يا رفيق وتيزي علينا من النهيق

وخسارة فيك هاك " استعراض القراءاة و الاسماءالغربية " الي تعبت روحها "الأخت" (كرم الله وجهها) بش تقولهملك و انت حطيتهم تحت مجموعة أسماء غربية ..يعني كان زاداتك معاهم رونالدينو و جون بول قوتتيي راهو استوى الحال عندك

برى راجع نظرتك المريضة للمرأة و استنقاص ذكاءها و قدراتها و استقلاليتها ... وكيف تبرى و انشاء الله لاباس ...ايجا ...بالكشي ... يضهرلي و نحكيو

و انستو سي مسلم سابق و رجعي الى الأبد

مشلك البلاد ... كب سعد تونس

تعليقي للسيد الفاضل

يطيح و الله سعدك ... يطيح والله سعدك

ما تعرفش كيفاش تتكتب تونس بالفرنسية ؟؟؟؟؟

و عامل فيها تدافع عالبلاد ؟؟؟؟

تي أنت مشلك البلاد و مشلك كل من يغير عليها و ينتميلها

قبل كل شي ... خويا ... أنت يمين و الا يسار؟

- ألو ... مقر حزب ++++ .... معاك تفضل

- ألو أهلا ...

- صار أنت هو ؟ وينك ما تعديتش للمقر اليوم

- و الله هاني ... داخل بعضي ...

- اش فمة ... لاباس ماهو ...

- أنا خارج عالصباح ... يا فتاح يا رزاق ... و يعرضني واحد ... غزرلي وقالي "عندك شعول ؟" ...

- أيه هو يمين و الا يسار ؟

- هاذيكا هي المشكلة ... ثبتت ثبتت ... ما عرفتوش ... نعطيهوش شعول ... و من بعد يطلع من الجماعة الأخرين ... و نشمت الأعداء فينا ... عملت روحي ما سمعتوش ... و قلت نشاور ... يعاودشي يعرضني مرة أخرى ... ونقعد في الحشمة

- رد بالك ... تشعلوشي سيغارو و يطلعش زادة مش متاعنا ...

- غريبة ... أول مرة نشوفوا ... أهوكا شلغمي كرشوا خارجة ...

- يطلعش حاكم ؟

- تي لا اما حاكم ...جماعة الحاكم الكل نعرفهم ... هذا هكة سمين شوية ... كرشو غالبتو ...

- بوكرش ... شميتشي عليه ريحة شرب ؟ كان ريحته تفحفح , يطلع كان يسار ... سكران ؟

- لا صاحي ... و أناهي يساري باش يقوم عالفجاري نهارة ا أحد الصباح

- يطلعش يميني متطرف ... راجع من صلاة الفجر ... عندو أمارة في جبينه ؟ ما يطلع كان يميني ...

- لا أمارة و لا أشارة ...تي الراجل مقزمط روحه في دجين

- دجين ... أه ... يطلعش من جماعة الأسلاميين الجدد ؟

- و الله ما نعرف ... الحقيقة ضيعني ... أنا قلت شلغمي ... يعني عروبة ... قلت بالكشي ناصري ... من بعد شكيت ... قلت فك على بلايا منوا ... ماهو نشاور قبل ...

- أحسن ما عملت ... منوا هكة أي واحد يطلب منك شعول و الا حد يسألكش عالوقت أو أي سؤال ... ثبت قبل و قلوا .."قبل كل شي ... خويا ... أنت يمين و الا يسار؟"

نشيد البطّال الوطني

هذا الشعر من أروع ما قريت من مدة ... قشعرلي بدني و ما نجمتش نقراه من غير ما نتقاسمو معاكم ... برافوا مهدي

نشيد البطّال الوطني



لا حُماة و لا حمى
و لا هلمو لمجد الزمن
فارت في عروقي الدماء
و ماقاتلني كان الوطن


بطَّال
العمر ثلاثين
الشعر شاب
الجبين
خطوط سكِّينْ
القلب..عابْ
والدمع في العينينْ


بطال
شْهايد في الجْيُوبْ
و مالصْباح لآخر الليل
نجري
لين تْهَدْ الحِيلْ
و شبْتْ على صُغري

بطّالْ
همِّي على كتفي
جوّالْ
من حيط لْحِيطْ
ناكِلْ في الفالْ
و سكره
تنَسِّيني الهْبالْ

بطّاَلْ
ماكلتني الدنيا
و مشغول الباَلْ
في حلقي مولى الدّارْ
و في الدُّورَه
واقفلي العطّاَرْ
..
الكريدي
نار تحرق في جِيدِي
و شكون ياخو بِيدي
و يِحْيِي رُوحِيَّ فِيَّ
غِيرْ هاك المسكينه
بَيَّه
تحيا في المعْملْ
صباح..عشيّه
و تْزَهِّزْ..
و تِحْلِمْ معايا
بْعِرس و وطِيّه
..
مسكِينه..بَيَّه
كانت أحلى مرا
ماخْذاتْ مالبَيْ كان الإسمْ
واللقمه..
أقوى مالحِلمْ

بَطاّلْ
و رُوسْكُم يا رْجاَل
حتى في الكارطه
ماكلني ديما الكَوَّالْ

بطّال
..
برَبِّي..وقتاش
يستجيب القَدَرْ
و نتولدْ حرْ
في البلاد
و نحيا..و نفنى
في ها البَرْ

بطّالْ
و روسْكُم يا رْجالْ
نحب..الرَئيسْ
و البوليسْ
و الحُكومه
محْلاهُمْ
ليلى و صخرْ و حَلُّومه
..
و روُسْكُمْ
نموت في الوزراء
وْزِيرْ..وْزيرْ
و نأكدلكم إلّي المُعْتْمدْ
راوْ أسَدْ
و إنّوُ الوالي
ينَجِّيه العالي
يُقْرُبْلي مالجَدْ
..
و الله بطّالْ
و نحِبْ الحرسْ
و بَسْ
و روحي في التغييرْ
يِزِّيو ْمالتنبيرْ
يا بَعيرْ
..
و روسكم يا رجال
كي يجي التغيير يُرْقِدْ
نخَلِّيلو السْريرْ
و نِفْرِش الحْصيرْ
و نْسَكِّر خشمي و فُمِّي
بِيْدَيَّ
لا نُشخُرْ
و يقُومُ التغيير
و يْفِيقْ بِيَّ
..
بَطّال
و روسكم يا رجال
نْحب أعضاء الدستوري
عُضو..عُضو
محلاهمْ..بكْروشْهُمْ
شتّانَ مابين الكافيار
و البوري
..
و دوري يا طاحونة كِرْشي
دوُرِي
..
والله نحِبّهُم
عُضو..عُضو
نحبْ صبابطهم
و سراولهم
و كراهبهم
و صغارهم
و فضايحهُمْ و ْعارْهم
..
غِيرْ ألْقاوْلِي.. خِدْمه
و خلُّيوْني ناكل.. القِدْمه

..
بطّالْ
..
بَيَّهْ..خْذاتْ بُولِيسْ
بوُ خِيطْ
تْفو على هالوجهْ
تْقولْ..إبْليسْ
..
بوليس..
بوخيطْ
بْكَرْهْبه..و بِيتْ
..
و عرْسِت بَيَّهْ
..
وآنا نِسكِرْ تحت الحيطْ
..
في ليلة عِرْسْ بَيَّهْ
بْكِيتْ
شَقِّيتْ حْوالَيَّ
حَلِّيتْ يْدَيَّ
..
رْميت روحي في الدّاموسْ
تاكِلْني الحنوش الحيَّه
..
و بْكاتْ عْلِيَّ بَيَّهْ
..
و كْلاَني كَوّاَلْ
..
بْسبْعه سنين
ملاَّ زْهَرْ يا بَيَّهْ
..
كْلاَتْني و كْلاتِكْ
ْالسَّْبعَه الحَيَّهْ

مهدي هميلي

سلام : سينما

كاستينق. المخرج قاعد وراء طاولة. على يمينه مساعد ينظٌم في كدس فيشات و تصاور, بجنب المساعد كاتبة تخنتب على كراسة. على يسار المخرج كاميرا و كاميرامان يصور. زوز دبابز ماء و 3 كيسان بلاستيك فوق الطاولة. المخرج يومئ برأسه لمساعد ثاني واقف في الباب. يخرج هاك المساعد و يسكر الباب وراه. بعد لحظات يدخل وليٌد في العشرينات من عمره.

المخرج : أسمك ؟

الممثل1 : بشير ...

المخرج : سي بشير ... بش نختبروا طاقاتك في التمثيل... نفرضوا .. الي صارت مجازر في فلسطين و أنت الحكاية أثٌرت فيك ياسر ... ورينا كيفاش تتصرف ...

بشير ما يتحركش.

المخرج يستناه دقيقتين, يكتب على وراقه. يهز راسه و يخزر لبشير.

المخرج : تفضل ... نستناو فيك ...

الممثل1: ... راني بديت من بكري ... أما نمثل فيه غضب دخلاني ... مغلغل من الداخل... أما بالطبيعة ما يضهرش عليا برشة من برة...

*****

الممثل 2 : فيراج فلسطين عامل حالة ... فيراج فلسطين عامل حالة ...فافنكولو اسرائيل ...فافنكولوا USS ... فافنكولوا حسني مبارك و أولمالات ... و فريد عباس

المخرج : ... تقصد ... محمود عباس ...

الممثل2 : أيه هذاكا ال...(كلمة قد رأسه) متاع فلسطين ... ظاهر يا ولدي ... بايع الطرح ...

*****

الممثل3 بدى يغني بكل جوارحه.

الممثل3 : منتصب القامة أمشي ... مرفوع الهامة أمشي ...

المخرج : علاش هالأغنية بالذات ... ؟

الممثل : هوما الحقيقة خرجوا برشة غنايات جدد بالمناسبة ... أما مازالت الحكاية جديدة ... مالقيتش الوقت بش نشدهم في مخي ..".و أنا أمشي" ... كان صدقني ربي ...ضربت في حرب الخليج الأولى ...الحقيقة ... عبرنا بيها مش نورمال ... قداش غنيناها في المظاهرات و في الاجتماعات و في القعدات زادة ...

المخرج : هايل ... أيا واصل ...و أمشي ...

*****

الممثل4 شاد دبوزة ماء عاملها ميكروفون وعامل روحوا يخطب ... بلحوحوا خارج ...صوته قريب يبحاح من العياط و بزاقه شرتلة ...

الممثل4 : أين القانون الدولي يا عالم ... أين أنتم يا عرب ... أين المروءة ؟ أين المبادء ... خسأتم ... نحن لن نركع ... نحن صامدون

المخرج يتدخل ...

المخرج : سامحني كان قصيت عليك ... تسوق ؟ عندك كرهبة ؟

الممثل4 : أيه ...جيت بكرهبتي ...

المخرج : بصراحة ... كيف جيت ... عملتشي مخالفة ؟

الممثل4 : كيف الناس الكل ...مش حاجة كبيرة ...

المخرج : حرقت ضو ؟

الممثل4 : نحرق ساعات ... ما فهمتش اش مدخل الحكاية في التمثيل و الشخصية الي بش نمثلها ...

المخرج : تي هاك تحكي عالمبادء و على القانون و أنت أول واحد يكسرهم ..

الممثل4 : تي شبيك تصعب فيها ياخي ؟ اش مدخل الضو الاحمر في تقنبيل فلسطين ؟

المخرج : يعني أنت كنت تكذب وقتلي تطالب بالقانون ؟

الممثل4 : لا ...تي شبيه هذا ؟ كنت انمثل راني ... و الله قالولي المخرجين في البلاد الكلهم مخرتلين ...ايا فك هاني ماشي

*****

الممثل5 ياهو بكاء ياهو عويل ... وجهه أحمر كيف الطماطمة, خنانتو هابطة, كشاشكوا خارجة ... أدى الدور يجي حكاية نصف ساعة ...

المخرج : يكفي ... يكفي ... توة باش نتعداو لحاجة أخرى ... ورينا تفاعلك مع الوضع ...هوني ... في البلاد

الممثل4 : شنوة ؟؟؟

المخرج : الوضع هوني ... تفاعلت مع قضية فلسطين بالطريقة الي كنت تورينا فيها ... توة ورينا تفاعلك مع وضع البلاد

الممثل : برى صلي عالنبي ... قالوا وضع ... قالوا بلاد ... برى ألعب بعيد ... جاي على زوز صوردي ,بش تباصيني ؟ ... حتى لو كان جيتوا تخلصوا مليح ... أيا أنستوا

What a wonderful world : la terre promise nettoyée par Israël

Nous vivons dans un monde sublime ... le plus beau des mondes, celui qu'on purifie de tous "terrorisme" et "obscurantisme" pour qu'il devienne un monde de paix et de prospérité ! ... peu importe les méthodes ...

الديكة العربية ...يرحمك يا نزار قباني

في حارتنا
ديك سادي سفاح .
ينتف ريش دجاج الحارة ،
كل صباح .
ينقرهن .
يطاردهن .
يضاجعهن .
ويهجرهن .
ولا يتذكر أسماء الصيصان!!


في حارتنا ..
ديك يصرخ عند الفجر
كشمشون الجبار .
يطلق لحيته الحمراء
ويقمعنا ليلاًَ ونهاراً .
يخطب فينا ..
ينشد فينا ..
يزني فينا ..
فهو الواحد . وهو الخالد
وهو المقتدر الجبار .


في حارتنا ..
ثمة ديك عدواني ، فاشيستي ،
نازي الأفكار .
سرق السلطة بالدبابة ..
ألقى القبض على الحرية والأحرار .
ألغى وطناً .
ألغى شعباً .
ألغى لغة .
ألغى أحداث التاريخ ..
وألغى ميلاد الأطفال ..
و ألغى أسماء الأزهاء ..

في حارتنا ..
ديك يلبس في العيد القومي
لباس الجنرالات ..
يأكل جنساً ..
يشرب جنساً ..
يسكر جنساً..
يركب سفناًَ من أجساد
يهزم جيشاً من حلمات !!..


في حارتنا ..
ديك من أصل عربي
فتح الكون بآلاف الزوجات !!


في حارتنا ...
ثمة ديك أمي
يرأس إحدى الميليشيات ..
لم يتعلم ..
إلا الغزو .. و إلا الفتك ..
و إلا زرع حشيش الكيف ..
وتزوير العملات .
كان يبيع ثياب أبيه ..
ويرهن خاتمه الزوجي ..
ويسرق حتى أسنان الأموات ..


في حارتنا ..
ديك . كل مواهبه
أن يطلق نار مسدسه الحربي
على رأس الكلمات ..

كيف سيأتي الغيث إلينا ؟
كيف سينمو القمح ؟
وكيف يفيض علينا الخير ، وتغمرنا البركه ؟
هذا وطن لا يحكمه الله ..
ولكن .. تحكمه الديكه !!

في بلدتنا ..
يذهب ديك .. يأتي ديك ..
والطغيان هو الطغيان .
والمسحوق هو الإنسان ..


حين يمر الديك بسوق القرية
مزهواً ، منفوش الريش ..
وعلى كتفيه تضيء نياشين التحرير
يصرخ كل دجاج القرية في إعجاب :
(( يا سيدنا الديك )) .
(( يا مولانا الديك )) .
(( يا جنرال الجنس .. ويا فحل الميدان .. )) .
(( أنت حبيب ملايين النسوان )) .
(( هل تحتاج إلى جارية ؟ )) .
(( هل تحتاج إلى خادمة ؟ )).
(( هل تحتاج إلى تدليلك ؟ )).


حين الحاكم سمع القصة ..
أصدر أمراً للسياف بذبح الديك .
قال بصوت الغاضب :
(( كيف تجرأ ديك من أولاد الحارة ))
(( أن ينتزع السلطة مني .. ))
(( كيف تجرأ هذا الديك )) ؟؟




(( وأنا الواحد دون شريك