المدون 1 : … نحب نشكر المدون 2 و المدون 3 و المدون 4 على أرتقاءهم بفن التدوين … حاجة هايلة ياسر … هكاكة نرفعوا من المستوى … و تعقيبا على التدوينات هذوما الي حكاو فيه على خطر المايوناز .. أنا بش نعمل تحليل :
حسب رأيي و بادء بدء … المايوناز فيه العضم و الزيت … و هوني لاحضت الي الزيت مادة نباتية مأتاها الشجر و خاصة شجر الزيتون .. أما العضم فهو مادة حيوانية مأتاها الدجاج … نتساءل هوني … هل أن كان فرضا جات الأمور معكوسة ؟ يعني كان جاء الزيت جاي من الدجاج هل أن يكون المايوناز بالمضرة هذه ؟
المدون 2 : نحب نشكر شكر جزيل المدونين 3 و 4 و خاصتا المدون 1 الي أبدع بالتدوينة متاعو الاخيرة. و حبيت في هالسياق نعقب على كلاموا … و نكمل تساءلاته … هو متفقين أن المايوناز مضر …أما … السؤال الي يبادر ذهني هل أن الهريسة حارة ياسر ؟
المدون 3 : حقيقتا أبهرت بالتدوينات الأخيرة متاع زملائي الي يعملوا في مجهود كبير لأثراء المشهد التدويني … و تعقيبا على كلامهم نحب نعرج على نقطة هامة … وهي أن المايوناز مضر … و هوني خليني نلاحظ ملاحظة ما يلزمش نغفلوا عنها و هي أن دبوزة المايوناز بو 750 جرام فيها تقريبا كان نوزنوها 750 جرام
المدون 4 : شكرا للمدون 1 و 2 و 3 الي أرتقاو بالمشهد التدويني و سكروا جلغة المدون الحيوان فلان و المدون الهايشة فلتان .. الي ما يعرفوش معنى الأرتقاء بالتدوين … أحنا مش في مستواهم المنحط … و الدليل تدوينات زملائي المدون 1 و 2 و 3 … و في هالسياق ..حبيت نعمل تحليل … و بين قوسين راني مانيش أكاديمي .. أما مجرد تحليل شخصي … المايوناز …أنا نتفق على كونه بالطبع مضر بالصحة …لكن كي تجي تلاحظ …تلقى أن المايوناز بقدر ماهو موجود في جل المناطق في العالم .. مش موجود بكثرة في مناطق المجاعات … و هذا يدل على تفطن هؤولاء لمضار المايوناز