الزنزانة, حصة تعارف
- أنا ؟ … براكيت واحد مكستم نحيتله سطوشه و منقالته … الزهر المقود متاعي … طلع بوه في الوزارة … اكهو وقفوني
يتلفت الي بجنبه.
- و أنت ؟
- أنا … شي … وحدة حلات في عيني … فرخة صغيرة … حطيتلها لام في رقبتها و هزيتها للفوري … و النبي مولاك
يقهقه بالضحك و يواصل
- بالرجولية 3 سنين مش حرام فيها … وقت الي يسيبوني تو نعاود
يواصل يضحك و يتلفت الي قاعد على يساره … يفهم السيد الي جاء دوره بش يتكلٌم
- أنا يا ولدي خاطيني … انسان نظيف … دلست شيكات و قدمت جماعة صحابي في فلوس و بعت كراهب مش بوراقهم … بالله شنوة ذنبي أنا كيف العباد بهايم ؟ يلفقولي قضية تحيل على خاطري خبيث و نفهملها ؟
- أنا … أنا تعاركت مع واحد … كان صاحبي … شلقت بيه يخزر للمدام ...تي صاحبتي ..فهمتها كيفاه ؟ … أحنا في جلسة خمرية و ... الجباد عطيه … فهمتها كيفاه ؟ ما يفيق كان بالسكينة في كرشه … كملت شلطله وجهه باش يتربى … وقبل ما يهز عينه في صاحبة الروج … يعمل ألف حساب
- أنا … أنا طالب … نحاولي حقي في المبيت الجامعي … و أنا ما عنديش حتى حل غيره … عملت اعتصام في الجامعة … جابوني هوني
الكلهم يخزروا البعضهم مذهولين و يبحلقوا في هاك الطالب … ثم يوخروا في حالة ذعر …
- تي هاك شبهة يا صحوبة … ابعد علينا .. يا ولدي احنا ناس حدنا و حد روحنا
- اش عملنا أحنا من الي عملوه غيرنا و الي فوق منا … يا ولدي خاطي خوك .. ابعدني لا يقولوا معارض
- لا يا خويا … أنا مازالي 4 شهور ؟ يحطوني مع متاع السياسة ؟ تحبهم ينحيولي حسن السلوك ؟ برى فوتنا هالصباح
يقوم واحد منهم ويدق باب الزنزانة بحماس
- يا محمد … يا علي … بعدوه علينا هالشبهة … رانا مجرمين زواولة
4 commentaires:
يا قوفرنور
راك تلعب بالنار
ماريتش عمار يتجلطم بالمقص في يدو؟؟
و الا سايي ماعادش تخاف ؟؟
@clando
ما قلتش حاجة عيب
قلت الي يلزم ما نعاملوش الطلبة كيفما نعاملوا المجرمين و السراق و المحتالين
فيها عيب هذه ؟
:) sayéb 5ouk!
allah-allah 3lik ya 9ouférneur.. wallah yji court-métrage yfatta9.. :))
Enregistrer un commentaire