خرافة البندار و العسّاس

يا سادة يا مادة يدلنا و يدلكم الخير و الشهادة.

يحكيو على راجل يموت على الموسيقى و خاصة منها الاحتفالية الى درجة أنه قرر أنه يخدم في فرقة حضرة اختصاص تبندير و تصفيق و هتافات ساعة ساعة. بدى خونا يترقى بالشوية بالشوية و يفصع على زملاءه البندارة و يتميّز عليهم بزنس صوت وبزنس لغة خشبية تعمل ستة و ..نقصد تعمل سبعة و سبعين كيف. ايا كي شافوه حاذق بعثوه في ستاج بعام في أوروبا. روّح صحيبنا بعد عام وهو حاسس روحو الي فسد كيف الخل, خاصة و ان اللغة الخشبية في أوروبا مش متداولة. روّح يجري ساقيه أعلى من راسوا, ووقف قدّام أوّل مقر متاع بندارة باش يرجّع الفورمة.

لقى روحو قدام المقر خايف. ساق القدّام و ساق التالي : حس روحو مش في فورمة "خشبية" كبيرة وخاف من تأثير هاك العام الي عداه البرة و تفجع و استلبس وهو يتصوّر في زملاءه يضحكو عليه و الا يقحرولوا اذا ما لقاش ضربة البندير متاعو المعتادة. حب يجس النبض قبل ما يدخل و يتستي مدى فورمتوا. تلفّت لقى عسّاس هاك المقر راكز كرسي و كاس تاي أحمر. قال خلي نجرّب مستوايا معاه.

البنادري : الله يعينك يا بابا ...

العسّاس : الله يسلمك ......

البنادري : تعرفش بابا شنوة موضوع الاجتماع متاع اليوم ؟ يقترحوا افكار جديدة زعمة ؟

العسّاس : لا ! هي هي هي (مات بالضحك)

البنادري : امالا يعملوا في النقد الذاتي ؟

العسّاس : لا ... حاشى وكلاّ ! شبيك ؟ وين عايش ؟

البنادري : شنوة يعملو مالا ؟

العسّاس : يثمنوا !

البنادري : تقصد يسبّعوا ؟

العسّاس : لا لا ...هذه فازة جديدة مازالت كيما خرجت ...يثمنوا ..

البنادري : متأّكد يا ولدي بالكشي تقصد يثنيو على المسؤولين و يشكروا فيهم ؟

العسّاس : يا ولدي ما تعاندنيش ... سمعتها بوذني ...قاعدين يثمنوا !

البنادري : عجايب ! متأكد ؟ بالكشي سمعت بالغالط و هوما قاعدين يخمّسوا على انجازاتنا العظيمة ...

العسّاس : خمسة و خميس على انجازاتنا ....

البنادري : بالكشي قاعدين يعملو في التوحيد ؟

العسّاس : يا ولدي ضم فمك لا نتكرفطوا عالصباح !

البنادري : لا نقصد السلطة الواحدة و المجهود الواحد و الاعلام الواحد ...

العسّاس : لا الاه الاّ الله ! شبي راسك كاسح ؟ متأكد الي قاعدين يثمنوا

البنادري : غريبة ...ما نعرفش انا حكاية "يثمنو" ...اه ..بالكشي قاعدين "يربعوا في الشتاء" فمّاشي ما ينسّيو و يتناساو أضرار الأمطار ؟

العسّاس : يا ولدي يثمنوا ... يثمنوا في القرارات الرائدة ! يضهرلي فيك يلزمك ايتود في اللغة التبنديرية !

من حينك رجع صحيّبنا منين جاء.سكّر على روحو داروا. شرى الجرائد الكل, حل تونس سبعة و شد بنديره في يده و حلف بالحرام ما يخرج من الدار كان ما يرجّع الفورمة.