الحرية لفاطمة أرابيكا

يصعب الحديث في هذه الظروف

أنا الذي اقترفت جريمة تعريف التدوين لفاطمة

أنا فاطمة

أنا من بارك كل شعر اقترفته

أنا فاطمة

أنا من نظر في عينيها

وقال : شرف لتونس امرأة مثلك

أنا فاطمة

ويوم رحيلي ... أهدتني

ديوان درويش
"لا تعتذر عما فعلت"

أنا فاطمة ...

أنا بين مخالب البوليس

لا تعتذري فاطمة

عما فعلت

فلم تفعلي الا شعرا

لم تجرمي الا ادبا

لم تسرقي الا روعة

لم تقتلي الا جهلا

أنا فاطمة

و اهلي عاقبوني

لا لشيء الا

لأني ولدت

حرة كتونس

أنا فاطمة

أنا تونس

سجنوني

و لم ينظرو في عينيا

ليعرفوا

أن اسمي الثلاثي

حرية حرية حرية

خطاب محافظ نورمالاند لجمع المدونين

أخي المدون, أختي المدونة

عندنا سنين و أحنا ندونوا ... و الى حد اليوم مازال فما عقول حجرية يمشي في بالها أن أبداء راي و التعبير عنه من باب احداث البلبلة و تكسير البطاطا و يحمل نوايا خبيثة تخدم ضد "مصلحة" الوطن.

وسمعنا عاد هاك اللوغة متاع التخوين و العمالة و هلم جرى.

و حرصا منا , محافظ نورمالاند, على السلام و الوئام و الاخوة بين العصا و المفكر و بين عمار و المدون ... أقول لهؤولاء مشات معاكم ... و لا تبالي يا عمار ... ما تروُح كان فرحان.

أنني ...العبد لله ... أقترح في عوض اليوم الوطني لحرية التدوين ... و الناس تكتب و تعطي رأيها في الصحافة الوطنية و مشاكل الناس و شؤون بلادنا و الى غير ذلك من مواضيع ... ندوروها يوم تدويني للمقرونة

ايه نعم ... المقرونة يا لولاد يحبوها المدونين و يحبها ياسر عمار و الحاكم و كل نورمالاندي من الصغير للكبير للي يدبي عالحصير.

بالله ريتوشي مرة اشهار على المقرونة في تلفزة من التلافز ...يتقص و يعملوا في بلاصته بلاكة زرقاء (تدل الي صاحب معمل المقرونة نهاره أزرق و بش ياكل ما كلا الطبل) و الا شفتوش على النات مقرونة باللحم المفروم تتحش حشان و يحطو في باصتها كعبة 404 باشي ؟ لا ... اذن موضوع المقرونة موضوع مستحب و منصوح بيه

و تبارك الله المواضيع في شؤون المقرونة ما تاقفش, تنجم اخي المدون تكتب عالمقرونة سباقتي, على المقرونة بالصالصة, بالعلوش, عالمقرونة جارية (أما مش جارية برشة لا يتغشش عمار و يلعج على مدونتك يمحيها من الوجود), على المقرونة بيضة, على المقرونة سبيرال .... تي الحاصيلوا عندنا برشة حجات انجموا نكتبوا عليها في صلب موضوع المقرونة.

اخي المدون, اختي المدونة فل نضع اليد في اليد لنبني وطن ممقرن و مشخشخ بالجبن المرحي.

و في انتظار يوم تدويني اخر يتناول مواضيع حساسة للغاية مثل موضوع الملوخية (الي حقيقتا مش في متناول كل المحللين) أقول لكم دامت نورمالاند بلدا تحلوا فيه المقرونة

و السلام عليكم و رحمة الله و بركاته